روايه
#نورتي_عتمتي
#حلقة 13
بقلم "رواسي بحرالدين "
(ملاحظة : شكرا للمتابعات يلي ينزلوا في مناشير عن الروايه عندهم في الصفحه او في لقروبات بجد بقققق لوووف ليكم 🥺🥀 و عشان خطركم رغم اليوم مريضة و حالتي حاله نزلت الحلقة 🙈❤❤)
_روح صقر متأخر خش لقي انوار راقده غير الزبون و خش رقد جنبها حتي هو
الصباح اليوم الثاني :-
ناضت انوار مع الساعه 9:30 دوشت و غيرت و حطت الشاهي و بعد سمعت صوت حركت عمتها حطت الفطور
و اول ماخشت افطيمه : واااااك وااااك شنو هذا يا بنتي
انوار : شن ياعمتي ؟
افطيمه؛ علاش التبذير هذا ولمن هذا كله
انوار:تحشمت وقعدت ساكته
افطيمه:نقصي منها السفرة يابنتي
انوار:حاظر ... وطبست ع السفره رفعت منها حكة التن و الجبنة
افطيمه:شافت لقاتها مطيبة دحي كان الطاجين ع الغاز.... خلي الجبنه وارفعي المربى و الزبده
انوار:حاظر وردت بالجبنه ورفعت المربى و الزبده زي ماقاتلها
افطيمه؛ ايوه هكي كويس يابنتي... خليني نعدي انوض البنات
انوار: تمام ... وخشت لدراها و الدمعه في عينها اول مرة يصير معاها موقف هكي 💔 حست بالاهانة و انها انسانه مبذره بدل ماتسمع كلمه طيبه لانها عروس ونايضة توتي في الفطور😓
صقر: خش للدار صباح الخير
انوار؛- صباح الورد
صقر: شاف وجها كان متغير ... صاير معاك شي
انوار؛ لالا علاش
صقر: لا شي بس وجهك مايوحي انه كل شي تمام
انوار: هههه بالك تعودت عليا بالمكياج😅
صقر: ممكن😅 ... وطلع..... وياروحي انوار غطت دموعها بضحكه و طلعت شنطة المكياج حطت اشوي BB كريم و كحلت عيونها ورسمت رسمه خفيفه من اخر العين ودارت روج رودي هادي
و طلعت
افطيمه؛ مقعمزه في الصالة .. هيا جيبي السفرة يابنتي
انوار؛ حاظر و مشت جابت السفره من المطبخ حطتها قدام عمتها .. و ردت للمطبخ جابت سفرة الشاهي و حطتها وقعمزت ... و اشوي جن البنات تسنيم و سارة .. و قعمزوا يفطروا و يهدرزوا
سارة: انوار خيرك ساكته
انوار؛ ابتسمت لا شي
تسنيم: صقر تقابل بتطلع لوين مال
صقر: شرب طاسة الشاهي احتمال نحصل عمل ثاني في الصبح
تسنيم: وخيره محل عمي عبدالرزاق
صقر: لا المحل اموره تمام بس انا نمسك من بعد العصر نبي شي قبل
سارة: و الورشه يلي خدمت فيها ؟؟
صقر: لا هذي كانت ايام محدوده و حيجي الشخص الاساس وتوا اكيده جا
سارة: باهي ربي يعاون
صقر: نشاءالله
انوار : وانتن تخدمن ؟؟
سارة: لا مزال نقروا
صقر:من بيخدمهن وهن مزال يقرن
انوار؛ في هلبا اماكن يبو بنات يخدمن و خدمه مش بالشهاده
تسنيم: زي شنو ؟
انوار: مثلا في الكوفيرا تكوني مساعده او تشدي في محل قصدي الخدمه مش عيب
سارة: اي صدقتي بس مافكرت قبل فيها
افطيمه لالا اهو خوك يخدم مافي داعي ليكن
تسنيم: بالعكس يام فكرة انوار كويسة نساعدوا بعض
صقر: حط يده ع كتف تسنيم.... حليلي من سومتي يلي تبي نتعانوا ... اهم شي قرايتك و الباقي عليا
و ناض صقر بيطلع
انوار : راجي اشوي ياصقر و عدت للمطبخ سخنت القهوه و جابتها له ... قهوتك
صقر:- ابتسم صحيتي كان ماشربتها راه اليوم كله ماركزت.... تبي شي ؟
انوار : ناقصت كم حاجة نبي ناخذهن
صقر: في شوط محلات هنا قريبات قولي لتسنيم و اطلعي معاها
انوار: تمام شكرا
صقر:- العفو و .... طلع
____________________
رواد ؛ كان الاسبوع هذا كله في هولندا يهيج مش مخلي شي و مش دايره غادي 🚫
كان راقد في الحوش متاع صاحبه في الصبح بعد ليله كلها شرب 😷🍻
ترن ترن ترن
رواد: ناض و هو راسه يوجع فيه رفع تلفونه كانت مكالمة واتس من امه .... واك ناسي النت مفتوح توا مطر انرد وفتح
ريم : ايوه رواد
رواد: صباح الخير يا امي
ريم: اين خير يارواد ليا كم يوم نرن عليك وماتبيش ترد
رواد: والله يام مانفضاش وانتي عارفه
ريم: ع اساس تخدم ليل نهار اسمعني توا
رواد: ..... نعم😑
ريم: بوك والع راه هي روح اول رحله تعال فيها
رواد: لا يام ما اتفقنا هكي مادرتش غير اسبوع انا
ريم: رواد اسمع الكلمه احسنلك قتلك اول رحله روح فيها راسي تعب من نق بوك
رواد: باهي حاظر هي باي
ريم : قول مع السلامه واحد من صاحبك مش تقولي باي
رواد: لا حول الله وخلاص مع السلامه يام و فصل الخط وعاود رقد
_______________
انوار: خشت لقت سارة تغسل في اماعين الفطور جت بتساعدها
سارة: لا عيب ساد انتي يلي درتيه
انوار؛ عادي نتعانوا فيهن
سارة:بلاش قطاف هي سفرة بس قعمزي انتي ونا توا نغسل
انوار؛ باهي براحتك و مشت انوار جابت الكرسي و قعمزت عليه وقعدن يهدرزن موضوت يجيب موضوع
سارة: شن رايك فيها البنت يلي امس قتلي بتصور معاك
انوار: قنينه هلبا و حتي لابستها و هديتها راقيات من تكون ؟
سارة: غسلت ايديها وجت صبت بجنبها .... هذي ريهام تكون اخت صاحب صقر
انوار: عقلها عدا انه ممكن تكون اخت رواد بس حاولت تجمع اسم اخت رواد ماجمعت
سارة؛ وين سرحتي
انوار: تبي تغير الموضوع .... لا بس انبدري قلت لصقر نبي المحلات قالي في شوط غادي قلت نقول لتسنيم تمشي معايا بعدين
سارة؛ اي بعدين شوفيها كان تلايم ولا نمشي معاك حتي نا
انوار؛ تمام
سارة: توا غيري لبستك و البسي لبس رسمي
انوار :علاش
سارة: ممكن ايخش اي عادي يبارك
انوار؛ اااه باهي بس توا مزاا بدري ماضني ايخش حد
سارة: لا توا الساعه عشره وعشره خلاص و اكيده الجيران يلي ماجو للعزومه توا يخشوا علينا
