جريمة صوفيا

الحلقة(11)

الحلقة الحادية عشر 11 من رواية #جريمة_صوفيا مؤلف القصة انا #إبراهيم_رشيد
قراءة ممتعة
في حلقة اليوم الرواية ح اتغير تغير تام و ح نمشو في طريق جديدة  وقريبآ ح نتعرفوا على شخصيات جديدة
رشا:انا زوجتة ونبي نخش عليه ضروري لو تبيها بالعناد والله نخش غصبآ عنك
صوفيا:والله لو كنتي منو مستحيل نسمحلك تخشي
رشا:لا انتي فعلآ وحدة قليلة الادب تي هذي مستشفى زوجي ونخش ونطلع كيف مانبي وانتي الي تطلعي برا
بدا الصوت يعلا بكل بيناتهم وعماد قعد يسمع وطلع وفتح الباب لأنها فضيحة قدام الناس الموجودة
صوفيا:لا انقولك حاجة تفضلي اطلعي برا منبش نشوف وجك هنا
رشا:ههههه ومنو انتي عشان تطرديني تي انا زوجي يكون صاحب المستشفى هذي يعني انتي تطلعي برا
عماد لما فتح الباب شاف الخلاف الكبير هذا الي بين صوفيا ورشا
عماد:خير خير شنو في
رشا:الاستاذة هذي رفضت نخش عليك وبعدين منو هيا اصلآ عشان تقولي اطلعي برا لا هيا تطلع برا
صوفيا:شن نبي ندير انت قلت محد يخش عليا اسفة واجد وانا توا نطلع برا
وطلعت صوفيا برا بسرعة
عماد:صوفيا صوفيا،عاجبك هكي يارشا
رشا:هيا الي غلطت فيا الاول
عماد:خشي استني جوا دقيقة توا نجيك
رشا:وناوي تمشي وراها ياعماد باهي تمام بكل
عماد:رشا ارجوك مش وقت فضايح بكل استني جوا شويا ونجيك
وطلع عماد بسرعة ورا صوفيا
عماد:صوفيا صوفيا استني عليش تجري هكي
ومسك يدها ووقفت
عماد:ليش تبكي ياصوفيا
صوفيا:شوف انا صاح يتيمه ومعندش اهل بس عندي كرامة وعندي عزة نفس مستحيل تشوفها عند واحد في الدنيا هذي كلها
عماد:صوفيا والله انا مش فاهم شن صار بالضبط بس انا نعتذرلك واسف جدآ على الي صار ولو غلطت فيك رشا انا ح نخليها تعتذرلك
صوفيا:انت نبهت عليا منبش حد يخش عليا مهمة كان يكون وبعدين انا الي درتة مش غلط قلت لحظة بس الدكتور مش فاضي قالت انا زوجتة ونبي نخش وغصبآ عنك
عماد:باهي ياصوفيا خلاص بس مش حلوة قاعدين واقفين في نص المستشفى هكي انا والله اسف بكل ورشا مش هكي طيبة وكويسة بس الي صار سوء تفاهم لا اكثر لا اقل
صوفيا:حصل خير يادكتور
عماد:تمام امشي خوذي ريست واشربي حاجة واغسلي وجك وتعالي انا في انتظارك فوق
ومشا عماد لـ رشا
عماد:الله يصلحك يارشا معقولة هكي تقوليلها
رشا:هيا قليلة ادب ورفضت ادخلني عليك حتى بعد قلتلها انا زوجتة لا والالعن من هكي تقولي اطلعي برا
عماد:رشا البنت هذي حساسة شويا وانا عارفها
رشا:وحساسة ليش يابعدي
عماد:هذي هيا صوفيا الي مرة حكيتلك عليها
رشا:هيا نفسها الي انت خشيت واسطة عشان يقبلوها في الجامعة
عماد:اها هيا نفسها والبنت شاطرة بكل وسمحتلها تجي تشتغل هنا
رشا:مكنتش عارفة انك فاتح المستشفى هذي ملجأ
عماد:رشا انتي فاهمة غلط بكل صوفيا شاطرة وانا محتاج حد يكون معايا
جت صوفيا وعماد ورشا كانوا مازال يتناقشو
رشا:تمام ياعماد اوكي وبراحتك
عماد:يارشا افهمي خلاص سوء تفاهم وصار وانا والله مش فاضي للكلام هذا ساد الشغل الي قاعد قدامي وياريت ياريت تطلعي تعتذري منها لأن زي ماقتلك بنت حساسة شوي
رشا:حساسة ؟ لا بجد اسفة واجد وانا الغلطانة اصلآ جيت لعند هنا خوذ الورد هذا ارميه مش لازم منه وشكرآ واجد يادكتور عماد
وطلعت رشا بسرعة
عماد:رشا رشا،تي انا على اساس فاضي للكلام هذا والله راسي يبي ينفجر
وفتح التليفون ورن على صوفيا
عماد:صوفيا كلميهم يجيبولي قهوة وهاتي الحالة الثانية هيا
صوفيا:تمام
طلعت رشا وركبت في سيارتها ومشت
رشا:انا الغلطانة اصلآ والله انت متستاهلش ولا حاجة خليك هكي ياعماد دير الي في راسك والبنت هذي الله اعلم شن قصتها وشن وراها مرة توسطلها في الجامعة ومرة جايبها تشتغل معاه والجاي شنو الله اعلم فخار يكسر بعضة خليك معاها صوفيا هذي
نمشو مع بعضنا شويا للحوش وكانت رودينة تكلم في وسام
رودينة:تي باهي رايفت عليك واجد ابعلتي حتى صورة لكي بس
وسام:كيف نبعتلك صورة مفش نت ياهمي المهم طمنيني عليكم كيف حالكم
رودينة:نحنا كلنا تمام انت كيف حالك طمني شن داير
وسام:الحمدالله شنو جو الجامعة
رودينة:تمام كملت واموري تمام انت المهم قولي امتى تبي تطلع
وسام:مازال ممكن الخميس والجمعة نطلع ونجيكم وبعدين نرد المهم نبي نقولك لو كلمتي مالك قوليلة يجي اليومين هذينا بس  عشان نشوفة فهمتي ولالا
رودينة:فهمت يعني نقولة احجز خميس او جمعة عشان تكون حضرتك قاعد
وسام:ايوا هكي قوليلة وتوا نبي نصكر طمني امك عليا باهي
رودينة:باهي باهي
وصكروا الخط
رودينة:ياربي امتى تردوا كلكم هنا ونردوا نتجمعوا من جديد والله رايفت واجد على لمتنا وكيف توا تفرقنا يارب يارب رد جمعنا من جديد،تعالي يالينو نطلعو صوت ماما جت