جريمة صوفيا

الحلقة(29)

الحلقة التاسعة والعشرين 29 من رواية #جريمة_صوفيا مؤلف القصة انا #إبراهيم_رشيد
       (ماقبل الاخيرة)
قراءة ممتعة
صوفيا:عماد خليك ياعماد انا حـ نخش معاه انا نكون ممرضة يادكتور
الدكتور:تعالي بس ردي بالك تقولي حاجة حـ تسببيلي مشكلة
وخشت صوفيا مع الدكتور
عماد كان منهار بكل ويفكر وخلاص
وسام:اهدا ياعماد ربي يمشي الليلة هذي على خير
مالك:يارب اشفي رشا يارب
رودينة طلعت هيا ولينا ولكن تفاجأت مفش حد بكل
رودينة:بسم الله الرحمن الرحيم وين تبخروا توا كانوا هنا0_0
صوفيا كان جوا مع الدكتور وتساعد فيه
وبعد تقريبآ نص ساعة طلع الدكتور0_0
ووراه صوفيا وكانت صوفيا تبكي
عماد:شن في
وسام:ارجوك طمنا
مالك:رشا شن صارلها
الدكتور:انا اسف شدوا حيلكم فقدنا المريضة 
عماد ووسام ومالك كانوا مصدومين بكل بكل
وسام:سألتك بالله قول غير الكلام هذا
عماد:تي لا رشا رشا تي رشا مستحيل تموت وتسيبني
مالك:تي شن تدوي انت
الدكتور:البقاء والدوام لله ياعماد شد حيلك هذا حال الدنيا
عماد:صوفيا ارجوك ياصوفيا قولي غير الكلام هذا ياصوفيا تي رشا مستحيل تسيبني
صوفيا كانت تبكي ومش قادرة تحكي ولا اي حرف
صوفيا:لا اله الا الله الله يرحمها ويغفرلها ياسراج هذي ساعتها
مالك:تي مستحيل تي لا ياربي لا
وسام:استغفر الله العظيم يارب إنا لله وإنا اليه راجعون
وسام ومالك من اول ماسمعوا الخبر زعلوا على طول اما عماد جن جنونة وقعد يبكي
عماد:تي لا رشا رشا مستحيل تسيبني انت دكتور كذاب انتم كلكم تكذبوا عليا يارشا يارشا
عماد خش يجري جوا ووسام وراه
صوفيا طاحت على الارض وقعدت تبكي
ومالك برضو طاح على الارض وقعد يبكي
عماد خش شاف الخط مستقيم على الشاشة وشافهم حاطين على وجه رشا اللحاف
وسام نزل راسة ومش قادر يحكي حرف من المشهد هذا عمرة ماكان يتوقع يشوف رشا هكي
عماد حول من على وجها
عماد:لا ياربي لا ليش سيبتيني يارشا ليش يارشا مشيتي بدري يارشا وينك يارشا صبي نمشو لـ عيالنا صبي يارشا عيالنا يستنوا فينا يارشا نوضي يارشا انا مقصر في حقك واجد يارشا خاطري نقولك نحبك ونعوضك على كل حاجة يارشا نوضي معايا هيا تي رشا مستحيل تسيبني تي انا حـ نموت وراك ياربي لا ياربي نبيك نوضي امشي معايا تي هيا ليش ياربي خذيتها مني ليش
وسام جاء مسك عماد
وسام:تي جنيت انت ياعماد تي شن تقول هذا كلام كفر تي اطلع معايا هيا خليهم يشوفوا شغلهم
عماد:اطلع برا انت انا مش حـ نتحرك من جنبها رشا ح تنوض وتمشي هيا يارشا صبي معايا
وقعد عماد ماسك رشا ويلمس فيها كأن ينوض فيها من النوم
وسام:تي ياراجل سيبها وادعيلها ياعماد شن قاعد تقول انت تي شن قاعد تقول كنك
وفجأ وسام لأول مرة ضرب عماد وبعدين على طول خذا عماد في حضنة وعماد قعد يبكي زي العيل الصغير
وسام:شد حيلك ياخويا هذا حال الدنيا والله كلنا على الطريق هذي
عماد كان يبكي في حضن وسام
عماد:قصرت معاها واجد ياوسام مكنتش متوقع تسيبني بالسرعة هذي ياوسام مش متوقعها تسيبني بكل بكل كنت نبيها تكون جنبي ونعوضها على كل حاجة لا ياربي ماتت وهيا زعلانة مني ماتت وهيا زعلانة اااااااه ليش هكي ليش تي ليش بس يارشا
وسام:لا اله الا الله ربي يرحمها ويغفرلها رشا اكيد مسامحتك ياوسام والله اكيد مسامحتك
بعد تقريبآ 15 دقيقة وسام طلع معاه عماد
صوفيا ومالك على نفس الوضع
صوفيا:مقدرتش نديرلها شي ماتت قدام عيوني يارشا وينك يارشا
مالك:مش مصدق واقسم بالله مش مصدق بكل
وسام الحق كان هوا الاقوى في الموقف هذا لأن هكي طبيعته
وسام:اهدوا بس ادعولها بالرحمة مش وقت الكلام هذا رشا توا في ديار الحق،عماد انا ماشي للحوش نبلغهم ونفتح عزاء كمل انت الاجراءات هنا
طلع وسام وفي قلبة حسرة غريبة الشكل
ركب في سيارتة وبدا يبكي على طول
وسام:الله يرحمك يارشا ويسامحك مش مصدق واقسم بالله مش مصدق بكل اللهم لا اعتراض على حكمك اللهم لا اعتراض على حكمك
وسام كان يسوق وفتح تليفونة ورن على معين
معين:حبيب قلبي وسامو
وسام:معين ارجوك نبي منك خدمة
معين:عيوني لكي شن في
وسام:معين رشا عطاتك عمرها وتوا عماد قاعد في مستشفى.............. ياريت تمشي معاه وتوقف جنبة انا توا ماشي للحوش
معين جاء الخبر هذا كأن صاعقة
معين:في شن تقول ياوسام تي شن تحكي انت رشا وكيف صار هكي
وسام:حادث سيارة يامعين ياريت تمشي لـ عماد توا
معين صكر الخط من وسام وطلع يجري.
وسام وقف قدام الحوش ومسح دموعة ونزل
فتح وسام الحوش ولقا الدنيا هدوء تام
خش وشاف منال تصلي في الصالة على الكرسي
في عيون وسام حسرة كبيرة بالاضافة ان الحزن باين على وجة وكان مصبي جنب منال
منال كملت الصلاة
منال:السلام عليكم ورحمة الله وبركاته،السلام عليكم ورحمة الله وبركاته
منال:وسام حبيبي كنك شن في
وسام نزل وباس يدها طول
وفجأ جت رودينة ومعاها لينا
رودينة:وسام تي وين مشيتوا انتو نرن عليكم مفش حد يرد لينا تبكي تبي رشا وسراج جعان يبي رضاعة وانا معرفتش شن ندير وين اختفيتوا كلكم فجأ
منال:وسام شن في ليش ساكت رد عليا
وسام حط عينة في عين امة منال
وسام:البقاء والدوام لله ياامي
منال:لا متقولهش ياوليدي في منو في منو المرة هذي
وسام:رشا
منال:لااااااالااااا
الاثنين على طول قعدن يبكن وخلاص ومش مصدقات
رودينة:تي شن تقول انت تي هذا اكيد كذب وسام انت اكيد داير فينا مقلب
وسام:ياريت لو كان مقلب رشا دارت حادث خطير وعطتكم عمرها توا
منال:لا يارشا لا وينك يابنتي وينك
طبعآ قلبت على طول حزن وهم وغم وعزاء في ظرف دقائق
كانت رودينة تبكي ومنال اما لينا مسكينة كان قاعدة ومش فاهمة شي ومستغربة
وسام خذاها في حضنة ومسكها بالقوة
وسام:ادعولها الله يرحمها ويسامحها لينو ادعي لـ ماما يالينو تي ولعو قرأن وادعولها
رودينة:ليش يادنيا هكي ليش ليش
(في المستشفى)
معين وصل ومشا حضن عماد طول
معين:عماد عظم الله اجرك مثواها الجنة ان شاءالله ياصاحبي
عماد:ماتت ياصاحبي وسيبتني سيبتني قبل ماتسامحني معين رشا ماتت يامعين وسيبتني
معين:خليك مؤمن ياعماد ادعيلها ياصاحبي بالرحمة والمغفرة
مالك:كان يبكي وكان منهار بكل على رشا
مالك:عماد كلمني الدكتور قالي لازم تجي اطلع شهادة الوفاء توا
معين:شويا يامالك بس خليه يهدا شويا
صوفيا ناضت من الارض وكانت تمشي بصعوبة شويا
صوفيا:شد حيلك ياعماد الله يرحمها ويسامحها يارب
نمشو مع بعضنا شويا لـ فاطمة
فاطمة جاها الخبر في التليفون وطاح منها تليفونها وهيا فقدت توازنها وطاحت على الارض وقعدت تبكي على طول
فاطمة:لا يارشا تي شن صار تي توا كانت عندي توا كانت عندي وكانت تضحك معايا
قبل كم ساعة رشا كانت عند فاطمة
رشا:سامحيني يافاطمة ارجوك سامحيني بسببي انا خسرتي شغلك وخسرتي كل شي
فاطمة:متقولش هكي انتي الي سامحيني يارشا انا خنت الامانة
رشا:لا متقولش هكي انا نعرفك كويس شن كان قصدك بس بسببنا انا وعماد خسرتي شغلك وحلمك وكل شي
فاطمة:تي شن تحكي انتي تي والله يمشي الشغل في ستين الف داهية المهم علاقتنا ترد زي الاول بس لأن في اخر فترة بعدنا على بعضنا واجد
رشا:وانا جيت عندك اليوم عشان نقولك انتي اختي وصديقتي ومفش حاجة ممكن تفرقنا
فاطمة:والله يارشا نحبك بكل كأنك وحدة من اهلي انتي
وبعد طلعت رشا من فاطمة شاء القدر انها ادير حادث وكانت هذي ساعتها
نردوا لـ فاطمة كانت منهارة بكل
فاطمة:لا هيا قالتلي مفش حاجة تفرقنا لا ياربي لا شن ندير توا رشا طلعت من هنا ماتت ياريتني ماسيبتها تطلع ياريتني متت معاه رشا رشا
مراد ولد فاطمة جاء يجري
مراد:ماما كنك ياماما تبكي
وخذت ولدها في حضنها وقعدت تبكي
اهل رشا وصلهم الخبر وحزنوا على طول وانقلب الحوش بكاء
حسن اب رشا قعد يبكي وبيسان خشت في عقل ثاني بكل من الصدمة
اما ام رشا مفيش حد كيفها لأن هذا قلب الام ومفش حد حـ يحزن كيف الام لما تفقد حد من اولادها
حسن:لا يابنتي لا مشيتي بدري بكل بكل يابنتي وينك بكرتي واجد رشا
بيسان:تي مش مصدقة اختي اختي الوحيدة تي توا مبدري كانت تحكي معايا كل يوم تكلم فيا وتواسي فيا رشا لا ياربي مش مصدقة حـ نقعد من غير اخت خلاص
إيمان:بنتي حبيبتي بنتي اغلى حاجة في حياتي راحت وسيبتني ياناس تي بنتي راحت خلاص بنتي وينك يابنتي
انفتح طبعآ عزاء في الليل هذا رسمي والكل جاء للحوش لابس اسود وحزين
عماد ومالك ومعين وصوفيا روحوا لأن خلاص وجودهم في المستشفى معش يفيد في شي
كملوا الاجراءات وبكرا حـ يجوا ياخذوا رشا
فاطمة واهل رشا كلهم وصلوا وخلاص انقلب الجو كلة لـ عزاء رسمي
يعني جديات مهمة نكتبلكم مش حـ نقدر نوصف الحسرة والحزن عند الجميع
عماد كان يبكي ويحكي بروحة وكان كل واحد حزين ويفكر وخلاص
عماد:الله يرحمك ويسامحك يارشا يازوجتي مهما برمت ولفيت مش حـ نلقا خير منك واقسم بالله،سامحيني يارشا سامحيني والله تعبتك معايا واجد وعذبتك معايا واجد الله يرحمك ويسامحك كان في خاطري تكوني جنبي ونربوا عيالنا مع بعضنا رشا مش مصدق اني معش حـ نشوفك خلاص الدنيا فراقة ياريت قعدتي معايا شويا كنت حـ نثبتلك كيف انا نحبك كنت حـ نقولك نحبك والله ياريت تردني نسيب الشغل ونسيب كل شي ونقعد لكي انتي بس رشا الله يرحمك ياقلبي كلة
وسام:الله يرحمك ويسامحك كنتي احلى حاجة في الحوش والحوش بلاك والله العظيم ولا اي حاجة يارشا كنت نتمنى تكوني معانا لأنك بجديات انسانة طيبة ومستحيل اتعوض ربي يرحمك ويسامحك ويجعل مثواك الجنة يارب
مالك:والله العظيم مش مصدق رشا انتي اليوم كنتي معانا وكنا نضحكوا ونبصروا وجونا سمح،مشيتي بدري بكل يارشا مكنتش متوقعها بكل كنت انتمنى تحظري عرسي وتكوني معانا الله يرحمك والله عمرك ماقصرتي معانا بكل مستحيل نشوف قلب اطيب من قلبك
صوفيا كانت تبكي وتفكر في رشا وتذكر في المشهد وهيا جوا معايا في المستشفى
رشا:صوفيا عماد عماد وينك ياصوفيا
صوفيا:اهدي يارشا هدي روحك توا ح تخشي للعمليات وحـ يقعد كل شي تمام
رشا:صوفيا صوفيا
صوفيا:رشا ارجوك هدي روحك،تي وين المخذر هيا
رشا:صوفيا نبي نقولك حاجة ارجوك اسمعيني انا حاسة روحي تبي تطلع مني توا
صوفيا بدت تبكي ومرتبكة
صوفيا:مفش الكلام هذا يارشا حـ تعيشي وتربي لينا وسراج حـ تشوفيهم لما يكبروا قدامك
رشا:صوفيا عماد اختارك انتي وعماد يحبك انتي لينا وسراج امانة في رقبتك لـ يوم الدين انتي بنت طيبة وبنت حلال عيالي امانة في رقبتك ياصوفيا
صوفيا كانت تبكي ومش عارفة شن تقول
صوفيا:اسكتي يارشا متقولش هكي ح تطلعي ح تطلعي وتربيهم انتي
رشا:وقولي لـ عماد انا مسامحتك متلومش روحك انا مسامحتك في الدنيا وفي الاخرة وعيش حياتك بعدي عادي وكون بخير
وفجأ صوفيا تشوف الشاشة وتلقا الخط مستقيم خلاص
صوفيا:لا يادكتور تعال
الدكتور:صدمات كهربائية بسرعة
وصار الي صار ومع كامل الاسف كان هذا موعد رحيل رشا من الدنيا 
ممكن اكثر واحد انهار في القصة هذي كلها سراج
سراج جاء الخبر وبجديات منقدرش نوصفلكم كيف كانت حالتة ويبكي كيف الطفل الصغير
سراج تخلى على جميع مبادئة واخلاقة عشان رشا ولكن للأسف النصيب ميبش يجمعهم
سراج:ليش هكي ليش يارب كنت كل يوم نقول ياريت تموت ولا تكون من نصيب غيري والله كنت ندعي من برا قلبي يارشا سامحيني يارشا انا نحبك تي انا درت كل شي عشانك وانتي قررتي تسيبني تخليت على اخلاقي وقعدت ندير في حاجات اجرامية على شانك وانتي بعدتي عليا لا يارشا لا انا نحبك يارشا مستحيل ننساك ياروحي مستحيل وينك يارشا كيف حـ نعيش بلاك بس كيف نبي نعيش وانتي مش موجودة
كان الحزن مسيطر على الجميع الحق كانن لحظات صعبة بكل بكل على الكل
والحق رشا كانت شخصية طيبة ومحبوبة من الجميع وبعمرها مازعلت حد والكل كان يحبها ويعزها
ثاني يوم دفنوا رشا والكل ودعها بـ حزن شديد وكبير بكل
مشن ثلاث ايام العزاء عماد كان مصبي في العزاء وناس واجد تعزي فيه ولكن هوا مش مركز ومش فاطن لولا اي حاجة ومش عارف من اصلآ الي يصبي قدامة
كانن بجديات ايام غريبة ومش عارف كيف مشن على الجميع وكمل العزاء صاح ولكن الحزن كل يوم يزيد على رشا
اقوى واحد كان وسام وبجديات صاح هوا زعل واجد على رشا بس انسان مؤمن لأبعد الحدود
اقوى واحد كان وسام وبجديات صاح هوا زعل واجد على رشا بس انسان مؤمن لأبعد الحدود
مشن تقريبآ 10 ايام والكل كان حزين بكل وكأن رشا ماتت امس
عماد مصكر على روحة الشقة فوق وميطلعش بكل حتى عيالة ميشوفش فيهم ولا يشوف في حد ولا اصلآ حد فاضي عشان يواسي عماد حتى عيالة مكانش يشوف فيهم
وسام خش للحوش وكانوا كلهم حزينين رودينة ومالك وصوفيا
وسام:خلاص معش في حاجة اديروها غير البكاء والحزن وخلاص والله عيب واقسم بالله هكي
مالك:يااخي انت كنك بارد تي هذا موت موت والموت خذا رشا كلنا نحبوها وانا لعند توا مش مصدق
رودينة:انت ديما هكي ياوسام من يومك هكي
وسام:واقسم بالله اكثر واحد زعل على رشا هوا انا لكن انا ربي عطاني الصبر وزي ماصار لما مات باتي صار مع رشا انا مؤمن بالقضاء والقدر وكل يوم وكل لحظة ندعيلها بدال مانحط الملح على الجرح ونقعد نبكي كيفكم
كلهم كانوا ملتزمين الصمت
وسام:مفش فايدة فيكم كلكم صوفيا امي وين
صوفيا:خذت الدواء ورقدت ياوسام
وسام:باهي ردي بالك منها وضعها مش عاجبني بكل وصحتها مش عاجبتني
صوفيا:كيف حـ تكون المسكينة ربي يصبرها على مصيبتها وخلاص
وسام:ياعليك قصة وخلاص ادعولها ياناس حرام هكي ولا خوكم الثاني الي قاعد فوق حابس روحة وميبش يفتح لحد مش شاغلكم توا
مالك:وسام انت شن فيك مش حاس بالمصيبة الي صارت
رودينة:شوف شوف لينا قاعدة تبكي شوفها كل شويا تقول نبي ماما نبي ماما شن ندير تي البنت تمشي وتعيط وتخش للديار وادور على امها هذي مش حاجة تقطع القلب ياوسام شوفها لينا شن ادير تبرم في الحوش كلة وتقول ماما ماما ولا سراج المسكين الي كل شويا جعان وتجي بنت جيرانة ترضع فيه تي حرام هكي حرام انا معش نقدر نتحمل
وطلع وسام وولع السيارة
الدنيا كانت حوالي ساعة 8 الليل
رن وسام على فاطمة
وسام:شن دايرة يافاطمة
فاطمة:كيف نبي نكون ياوسام واقسم بالله روحي قريب تطلع
وسام:باهي يافاطمة انا معندش غيرك عماد يافاطمة زي ماتعرفي حابس روحة وخلاص وغلطت هكي
فاطمة:وسام عماد تعرض لـ صدمة كبيرة بكل بكل ياريت ياريت تشوفلة شيخ لأن مستحيل يسمع مني انا عارفة عماد كويس ضعيف من جوا وعكسك انت بكل ياريت من بكرا تجيبلة شيخ
وسام:تمام حاضر بكرا الصبح يكون عندة
وصكروا الخط.
وسام:انتي بروحك تبي من يواسيك يافاطمة لا حول ولا قوة الا بالله،بجديات الي صار صدمة كبيرة ومش متوقعة لكن هذا حال الدنيا
رن تليفون وسام وكان رقم غريب
وسام:الو
الراجل:السلام عليكم معايا وسام معلش
وسام:اها تفضل انا وسام
الراجل:اولآ عظم الله اجركم انا اليوم مشيت للمستشفى وسمعت بالخبر
وسام:اجرنا واجرك على الله من تكون انت بس
الراجل:انا بنتي اتعالج عند خوك عماد وعندها السرطان وعماد قالي تاخذ العلاج وتجيني نبدا في الكيماوي مشيت للمستشفى حكولي الخبر وقالوا الدكتور عماد معش يجي الفترة هذي وهما عطوني رقمك انت
وسام:وباهي
الراجل:المهم انا والله ضروري خوك يكشف على بنتي ويبدا معاها في الكيماوي بنتي حـ تضيع مني ضروري ياوسام ارجوك دير حل والكيماوي مكلف بكل وانا معندش استطاعة نديرة في مستشفى ثاني وخوك عماد قالي على حسابي
وسام:باهي انت ليش ماتمشي للمستشفى واي دكتور ثاني يديرة لكي
الراجل:كلهم رفضوا وقالو لازم الدكتور عماد
وسام:لا حول ولا قوة الا بالله خويا تمام بكرا انا حـ نرد عليك
الراجل:الله يربحك في اسرع وقت بس
وسام:لا حاضر بكرا نرد عليك
وصكروا الخط.
وسام:لا حول ولا قوة الا بالله ياعماد الراجل بنته حـ تضيع منه ضروري بكرا ندير حل
وصل وسام للشغل ونزل وكان مع محمود
محمود:ربي يصبرهم ياوسام هذا هوا حال الدنيا
وسام:والله مش عارف شن ندير عجزت مع الجميع
محمود:الموت ياوسام حاجة شينة بكل والفقد في الدنيا واعر بكل ربي يصبرهم هيا فترة وتمشي
وسام:يستر الله وخلاص
محمود:تقدر تروح ياوسام وتجي بكرا
وسام:لا لا منقدرش عندي شغل والساعة 12 عندي كمين ساعتين في البوابة
محمود:تمام ياوسام انا مروح رد بالك بس
وسام:تمام
في اللحظة هذي صوفيا شافت تليفونها وكانت رسالة من سراج
سراج:موعدنا بكرا ساعة 4 في نفس المكان ونحنا الاربعة ح نكونوا حاضرين
مشا باقي الوقت عندي وكان وسام يكلم في ندى
ندى:ربي يصبرهم ياوسام والله في العزاء عمتي منال كانت حالتها تصعب على الكافر
وسام:ربي ينزل علينا الصبر كلنا
ندى:باهي انت امتى مروح
وسام:توا الوقت عندي كمين ساعتين ونبي نروح نرقد بعدها
ندى:تمام دزلي رسالة لما تروح
وسام:تمام
وسام كان يشوف في شغلة عادي وكان داير كمين ونقطة تفتيش وهكي
وسام:ارحم نفسك من الفيس مراتك ح تمسكك
الشرطي:والله ياباشا نتصفح بس
وسام:انت كيف مصبي هكي بدون واقي رصاص
الشرطي:واقي شنو هما الحمدالله انهم سلمونا سلاح اصلآ كل حاجة للبشوات الي زيك
وسام:ههههه ضحكتني باهي خوذ هذا هدية مني لكي وخليك لابسة ديما الدنيا مش امان
الشرطي:لا ياباشا هذا ملكك انت
وسام:خوذ بس انا عندي واحد ثاني وربع ساعة ولمو الكمين عشان نمشو
وسام حول واقي الرصاص وخذاه الشرطي
الشرطي:والله انك ولد حلال وطيب بكل
وسام:وعليش هذا كلة ركزوا بس ووقفوا السيارة الي جاية
روح وسام وثاني يوم جاب معاه الشيخ وهكي والشيخ خش قمعز مع عماد
الشيخ:ياعماد الي ادير فيه انت هذا غلط في غلط وحرام الحزن ثلاث ايام بس،قالي خوك وسام على حالتك حرام والشي هذا يغضب ربي ياعماد الله يرضى عليك اطلع واشتغل والحي اولى من الميت ادعيلها ياوليدي وصلي وادعي الشي هذا غلط ياعماد وحرام انت زمان فقدت باتك وحزنت بس رديت وكملت حياتك وحتى توا خسرت زوجتك و حـ ترد وتكمل حياتك من جديد عماد في ناس واجد محتاجينك توا عندك ناس يبو يعالجوا وحرام تسيبهم بروحهم وسام قالي على حالة بنت اسمها نور والبنت بين الحياة والموت وملهش غيرك ارجوك اطلع وشوف عيالك حرام هما توا من غير ام والبركة فيك انت حط كلامي في راسي وخلي ربي بين عيونك وربي يصبرك
عماد فكر كويس وعرف ان هذا كلة غلط في غلط وطلع ونزل تحت وحضن عيالة الاثنين وباس يد وراس امة
الدنيا بـ رشا او بدون رشا حـ تمشي يعني حـ تمشي يعني الحزن مش حـ يرد الي راح
عماد مشا للمستشفى وشاف شغلة مع نور
ومن اول ما خش كل الممرضين يعزوا فيه وهكي 
الراجل:يادكتور شنو
عماد:ادعيلها ربي يشفيها درت الي عليا وشعرها ح يبدا في التساقط جهزوا ارواحكم بس لأن ح تعيشوا في حرب نفسية الايام الجاية
صوفيا طلعت وكانت تمشي لين وصلت في المكان وخشت وشافت سراج
صوفيا:سراج شد حيلك
سراج:البقاء والدوام لله
صوفيا:وين الباقي ياسراج
سراج:في الطريق حـ يوصلوا توا ياصوفيا
صوفيا:لا اله الا الله وربي يصبرك ياسراج
سراج:اللهم امين
صوفيا:كأنهم طولوا صاح
سراج:توا على وصول خلاص
صوفيا:باهي ياسراج قبل مايوصلوا نبي نحكي معاك كلمتين
سراج:شنو ياصوفيا احكي
صوفيا:سراج انا عارفة انت ليش خشيت في الموضوع هذا وشن كنت تبي وربي مش كاتبلك فيها نصيب يعني خلاص كل شي واضح توا
سراج:شن تبي تقولي ياصوفيا
صوفيا:نبي نقولك انت شاب في اول حياتك اطلع من الموضوع هذا وعدي عيش حياتك خلاص
سراج:مستحيل العائلة هذي عندي معاها ثأر كبير
صوفيا:تي سراج الي درناه نحنا حاجة مش ساهلة بكل وبكرا الدنيا حـ تنقلب صدقني هذا احسن شي لكي
سراج:اسكتي شويا ياصوفيا لأن في صوت حد جاء
وفجأ يخش محمود0_0
سراج:اهو الباشا الكبير جاء
محمود:اهلآ وسهلآ بيكم شنو وين الباقي
سراج:تفضل ياباشا على وصول
وجاء محمود قمعز قدامهم
محمود:شنو ياصوفيا مفش مرحبا ليا انا
صوفيا:مرحبا
محمود:كان المفروض يكون اجتماعنا من زمان بس الله غالب
سراج:هوا هكي كان المفروض نتفرقوا بس بصراحة صوفيا كانت ابداع طول الفترة الي فاتت
صوفيا:هيا الرابع وين هذا طول بكل
وفجأ يخش معين0_0
معين:السلام عليكم ياحلوين مجتمعين عند النبي إن شاءالله باشا محمود كيف حالك
محمود:تمام الحمدالله تفضل قمعز
سراج:واخيرآ كملت الدائرة صاح ولالا
معين:من سنتين متجمعنش كلنا مع بعضنا
صوفيا:اختصروا بسرعة انا مش فاضية
محمود:شوفوا الي جاي والي ح يصير هوا نهاية القصة خلاص عشان هكي طالب منكم كلكم تكونوا اقوياء وحريصين بكل
معين:فهمنا باهي شن يصير وكيف حـ نتعاملوا مع الوضع الي جاي
محمود:جايكم في الكلام لما يصير الي خططنالة والي اتفقنا عليه صدقوني الدنيا حـ تنقلب بكل والاهم من هكي هدوء وتركيز بس
صوفيا:وانا وين حـ نمشي في وقتها
محمود:والله ياصوفيا انتي عندك خيارين،الخيار الاول تقعدي معاهم طبيعي كيف قبل والخيار الثاني تختفي بكل
معين:لا طبعآ لو اختفت هكي حـ ثبت انها لها يد في القصة ووسام مستحيل يسيبها
محمود:قانونيآ صوفيا مفش عليها حاجة
سراج:نصيحتي لكي ياصوفيا امشي لـ حوشك سادك بهدلة الفترة الاولى تعبتي واجد
محمود:المهم بعد كل الي حـ يصير معين حـ يمشي يزور عماد ويقولة تكتبلي الـ 70% من المستشفى بأسمي عشان تقعد 100% لـ معين ولما تطلع من المشكلة نردلك الباقي عادي وطبعآ عماد حـ يوافق ويقول باهي طول لأن صاحبة ومستحيل يغدر بيه وبهكي نخلصوا من قصة معين نهائيآ وتقعد ملكة كلها
معين:حلو بكل واقسم بالله هذا حلمي من زمان حـ نطير عماد بكل وتقعد ملكي انا بس
محمود:وصوفيا مسامحتك في المستشفى
صوفيا:طبعآ منشوفش فيها اصلآ مش مستحقة
محمود:سراج انا والله كنت نبيك تحقق الي تبيه ولكن للأسف هذي الدنيا وهذا النصيب ربي خذا امانتها
سراج:لا انا عندي حق عند الكلب وسام وانت وعدتني تجيبة ليا
محمود:قاعد عندي حقك في الحفظ والصون
صوفيا:شن ناويين تقتلوا وسام
محمود:صوفيا هذي مش شغلتك انتي كل هدفك تشوفي العيلة هذي مذلولة ومفلسة وولدهم معش يطلع من الحبس وبس
معين:باهي معلش عندي سؤال
صوفيا صبت من الكرسي.
صوفيا:تي لا انتو ناس مجرمين وبلا ضمير تي معقولة اديروا هكي ليش تبو تقتلوه تي مش هذا خطيب بنتك
محمود:انا وافقت نخطبلة بنتي بس عشان تزيد ثقته فيا لأن هوا كان شاك فيا ديما
صوفيا:انتو مجرمين وناس بلا رحمة ليش تقتلوه ليش هوا شن دارلكم،وبعدين شنو انتو تحسابوا ارواحكم ملاك مثلآ لا معانا الاخ معين خاين وخان صاحبة ورفيق عمرة عشان فلوس وطلع اكثر نذل في التاريخ،وسراج شن تبيني نقول عليه الي خرب حياتة كلها بس عشان ياخذ حاجة مش له اصلآ وهذي النهاية شنو رشا توا في ديار الحق،اما انت يامحمود مش عارفة شن تبي وشن هدفك من القصة هذي كلها ولكن الي نعرفة انك طلعت واحد مجرم وخسيس
محمود:صوفيا ردي بالك تغلطي معايا راهو لو خرب كل شي انتي بس الي حـ تمشي فيها انتي الي ورا كل حاجة فاهمة ولالا انتي السبب في الي صار ونحنا الثلاثة صفحتنا بيضاء تي عارفة انتي لو كشفتي كل شي ح تجي على راسك انتي وبس فاهمة الجريمة الي صارت انتي وراها
معين:وحياتك ياصوفيا لو صار عكس الي نبوه انتي حـ تلبسيها مش نحنا حـ تعيشي طول عمرك في الحبس ومعش تشوفي الدنيا حـ يكتبوا بالخط العريض جريمة صوفيا وبس مش جريمة حد ثاني فاهمة
صوفيا:ردوا بالكم صوفيا طول عمرها قوية وعمرة ما واحد فكرر يهددها
وخذت صوفيا شطنتها وطلعت.
معين:هذي عقلها طار من اول ما رشا ماتت قدام عيونها
محمود:في ستين الف داهية المهم انتو من بكرا اتصرفوا عادي خلاص ساعات عماد الاخيرة توا
سراج:ومش ناسي وسام
محمود:عندي ياسراج انا قتلك عندي
معين:حـ تصير فتنة كبيرة وانا خاطري نشوف شن يبي يصير انا متشوق بكل
مشا الوقت عادي وطبيعي ومفش اي حاجة صارت
عماد كمل الشغل وكان طول اليوم يشتغل بدون اي نيه
طلع عماد من المستشفى وكان يمشي في الباركين ووصل وفتح سيارتة0_0
فتح عماد باب السيارة وركب وقبل مايصكر الباب حس ان في حد مسك الباب0_0
برم عماد وجة عشان يشوف من0_0
وفجأ يشوف وسام قاعد قدامة وحاط المسدس في راسة............0_0
عماد:....................0_0
وسام:............................0_0يتبع الحلقة الثلاثون والاخيرة
الحلقة الجاية بإذن الله ح تكون الاخيرة