جريمة صوفيا

الحلقة (16)

الحلقة السادسة عشر 16 من رواية #جريمة_صوفيا مؤلف القصة انا #إبراهيم_رشيد
قراءة ممتعة
صوفيا ولعت الابتوب وقعدت قدامة وكانت الدنيا ظلام بكل بكل
عماد ركب في السيارة وكانت معاه الشنطة
عماد:كيف طالع بالشنطة فاضية هكي،بكرا ضروري نسلم الكشوفات للجامعة والدرجات عشان نبي نسيبها لهم والموضوع يبي الابتوب،ياربي وخلاص شنو هذا شن قاعد يصيرلك ياعماد بس كنك قاعد تنسى واجد بكل
صوفيا كانت على الابتوب وعماد كان جاي0_0
عماد بدا يقرب ويقرب وصوفيا مازالت نفس ماهيا
وفجأ عماد حط يدة وفتح الباب
قبل ثواني قليلة
صوفيا سمعت حد جاي
صوفيا صكرت الابتوب بسرعة بكل
صوفيا:لا ياربي لا
وفجأ خش عماد ولقا الوضع طبيعي جدآ جدآ وخذا الابتوب ورد طلع
صوفيا كانت تحت الطاولة وقلبها يدق بسرعة بكل بكل بكل
كانت بجديات لحظة حاسمة شويا يعني لو عماد كشفها كان ح يكشف حاجات واجد بكل
عماد طلع وكانت صوفيا مازالت تحت تأثير الصدمة
صوفيا:واو بجد ربي يحبني بكل،لو خش عليا كان ح يتغيرن حاجات واجد ربي يحبك ياصوفيا خليني نطلع من هنا احسن شي
وطلعت صوفيا ونزلت من التاكسي وكانت تمشي وقريب تخش للمكان الي هيا عايشة فيه
كانت صوفيا تكلم بالتليفون
صوفيا:تي شويا بس ومسكني..والله مش عارفة كيف بس في اقل من ثانية صكرت ونزلت تحت الطاولة.....تي اكيد لو مسكني كانت ح تخرب كل حاجة....باهي توا انا المهم معايا الباسوور وح نفتحة اكيد في يوم ثاني.....اكيد ح نستعجل ونبدا من بكرا.....مش عارفة سبب عماد غريب بكل ليش وقف معايا وهكي الله اعلم بس بجد انا اليوم قبل كنت ح نقول اسم بابا
مكالمة كالعادة مجهولة بكل ومش مفهوم منها ولا اي حاجة
عماد كان يسوق وقريب يوصل للحوش
عماد:منش عارف معقولة انا اليوم فقدت اعصابي بكل بكل وخسرت كل احترامي بين الطلبة عشان صوفيا؟مش عارف ليش كل لما نشوفها البنت هذي نتريح نفسيآ،بجديات هكي قلبي يدق كل لما نشوفها ووجودها معايا طول اليوم محسسني بالأمان،حاجات واجد تغيرن في اخر فترة والدنيا قاعدة تمشي
وصل عماد للحوش وخش على حوش اهلة اولآ
عماد:وين امك ورودينة
مالك:ياراجل الكل قاعد يسمع في برنامج متاع فاطمة هذا وانا قاعد مكسد بكل بروحي
عماد:باهي وقت نوم امشي ارقد
مالك:وين نرقد مازال بدري تعال كسد معايا
عماد:لا وين نكسد انا تعبان بكل عندي شوية شغل نبي نديرة ونرقد
مالك:باهي تمام
عماد:كلمت اهل يارا وخذيت منهم موعد
مالك:اها كلة تمام كلمتهم وقالو بعد بكرا بس انا كنت نبيها يوم الخميس الجاي عشان يمشي معانا وسام
عماد:لا حتى بعد بكرا كويس توا ناخذوا معانا معين ونمشو نتفاهموا مع بوها
مالك:باهي كويس وبعدها طول نبي نشيل امي والبنات
عماد:ههههههه كنك مستعجل انت
مالك:ياعماد 3 شهور ان شاءالله نلحقو
عماد:ان شاءالله وربي يتمم على خير
ركب عماد فوق فتح باب الشقة وزي كل يوم شاف رشا حاطة السماعات وتسمع في البرنامج
رشا مازالت مش ناسية كل شي دارة عماد ممكن مش زعلانة بس مش ناسية ولا اي حاجة
عماد:خير يارشا
رشا:اهلين
وخلاص تخيلوا في اليوم هذا مقالوش لبعضهم الا خير واهلين فقط
قعد عماد طول الليل على اللابتوب وخلاص
صوفيا كانت تشوف من الروشن في المطر وقبل ماترقد فتحت الدفتر وبدت تكتب
صوفيا:مش عارفة من ح يفوز في النهاية او شن ح يصير،عماد متغير معايا بكل وحاسة ان بدا يحبني بس انا ابدآ مش فاضية لـ شيء الا لأنتقامي ح ناخذ الحق من الجميع ويجي يوم وتنتصر صوفيا فقط موضوع يبي شوية صبر شوية صبر بس والكل ح يعرف من انا
مالك كملها الليل كلة يكلم في يارا وكان يعيش في احلى ايام حياتة حرفيآ الاثنين كانوا يعيشوا في احلى ايام حياتهم
طلعت الشمس وجاء ثاني يوم وكان واضح ان يوم صقع بكل والجو برا عاصفة
عماد زي كل يوم ناض بدري وبدا يلبس وهكي بس تفاجأت رشا ان طالع ولابس لبس كاجول مش كلاسيكي
كان لابس جاكة جلد سودة وتحتها تيشرت ابيض ومن تحت لابس امريكي وهكي
رشا:غريبة كنك لابس هكي
رشا طبعآ كانت عارفة الموضوع من امس بس مكانتش عارفة السبب ليش طالع ولابس هكي
عماد:الناس تقول صباح الخير اولآ
رشا:انا انصدمت بس مش عندك جامعة اليوم
عماد:اها عندي وانا ماشي نسلم الاوراق وخلاص نبي نحط استقالتي
رشا:معقولة وعليش هذا كلة غريبة ياعماد
عماد:بصراحة امس صارت مشكلة كبيرة بكل بيني وبين دكتورة معانا في الجامعة وانا توا ماشي نسيبها لهم بكل
رشا:مشكلة مع دكتورة عليش احكيلي
عماد:لأنها مش محترمة واهانت البنت صوفيا
رشا:صوفيا؟احكيلي شن صار
طبعآ عماد قاللها كل شي ورشا اصلا عندها علم بالموضوع من بيسان امس
رشا:اوكي انت معاك حق بس مكانش في داعي لـ هذا كلة عليش عشان صوفيا
عماد:قصدي كلام يقهر واهانت البنت وقالت عليها لقيطة
رشا:اوكي هيا غلط تقول هكي قدام الكل لكن حتى انت غلط الي درته
عماد:انا بصراحة انفعلت بكل بكل ومتحملش لما شفتها تبكي
رشا:مش عارفة شن نقولك وخلاص
عماد:انا طالع ولو سألت عليا امي قوليلها عندة شغل
رشا:باهي تمام
وطلع عماد.
رشا:هذا كلة عشان البنت الي اسمها صوفيا هذي منش عارف امتى بس خشت لحياتنا وشن تبي البنت هذي
نزلت رشا تحت وشافت رودينة ومنال
رشا:صباح الخير
رودينة:صباح النور
منال:صباح الخير وين لينا
رشا:راقدة في سابع نومة وسراج حتى هوا راقد وين مالك
منال:يابنيتي مالك انا نضت نصلي في الفجر وهوا مازال نايض
رودينة:قصدك رقد على الفجر امس معقولة هذا كلة يكلم فيها
رشا:ههههه خليه عادي يعيش اللحظة،اطلعي انتي ياعمتي ونحنا ح نجيبو الفطور
منال:تمام
وطلعت منال.
رودينة:وبعدين ياربي مع الكساد هذا
رشا:شن رايك نخشو في صالة رياضية نسائية
رودينة:عادي ياريت من زمان تذكري نقولك فيها وانتي حامل في سراج
رشا:اها والله لازم خصوصي انا العملية متاع سراج بدت هكي مش مريحتني حاسة روحي بطني ح تبدا تطلع
رودينة:هوا شي طبيعي بكل هذا طبيعي قصدي انها تطلع
رشا:باهي تمام شن رايك نطلعو ناخذو لبس رياضة وهكي وبعد بكرا نبدو
رودينة:تمام عادي بكل بس ليش بعد بكرا
رشا طبعآ تبي تختار اليوم الي معندهش عند فاطمة
رشا:هكي اريح وبالمرة نحكي لـ عماد
رودينة:باهي تمام
عماد وصل للجامعة وخش وكان يمشي والطلبة كلهم دارو دائرة عليه
الطلبة:معقولة ح تسيبنا يادكتور لا ياريت تخليك معانا
عماد:لا مازال مفش شي اكيد امشو للمحاضرة توا بس واستنوني نمشي نشوف شن ح يصير معايا وساهل
ومشا عماد وخش على مكتب العميد
عماد:صباح الخير يادكتور
العميد:اهلين اهلين عماد تفضل
عماد:شوف يادكتور انا جاي نعتذر منك انت بس لأني امس صاح قللت ادبي عليك وممكن صوتي كان عالي معاك اسف واجد وسامحني انت استاذي ومنقدرش نقولك غير هكي وهذي استقالتي وتأكد اني ح تقعد استاذي طول العمر حتى لو ما استمريتش معاكم
العميد:الي صار امس عادي يصير في اي مكان عمل بس يوصل الخلاف لكلام شوارعي انا اخر شي كنت نتوقعها منك هذي
عماد:انت معاك حق وانا غلطت بس ميصير تمسك في غلطي وتنسى الطالبة الي عندك غلطت فيها وقدام الكل
العميد ناض من المكتب وجاء وقمعز قدام عماد
العميد:شوف ياعماد انت لو في وقتها سكتت ومحكيتش ولا كلمة راهو انا عرفت كيف نجيب حق البنت صوفيا بس انت الي درتة ضيع حق البنت بكل لأنك خذيتة في نفس الوقت
عماد:عمومآ حصل خير وانا نعتذر منك وانتمنى توافق وتوقع على الاستقالة لأني بجديات حتى انا شغل في المستشفى ومنقدرش
العميد:من هوا الي حـ يستقيل الكلام هذا مفش منه بكل مفش حد ح يمشي انا توا نكلم صوفيا والدكتورة وكلة ينتهي في المكتب هذا،ياريت بس تسكت وتسمع فقط
عماد:به حاضر
وبعد تقريبآ 5 دقائق جت صوفيا وقمعزت جنب عماد وبعدين جت الدكتورة
الدكتورة:شوف يادكتور انا والله غلطانة بجد لأنها عصبتني وهكي بس الي كان يجي ويحاسبني انت،انت العميد مش هوا
العميد:معلش كلكم غلطتو صوفيا غلطت لأنها ممكن تناقشت معاك بأسلوب مش محترم وعماد غلط لأن خش هكي قدام كل الطلبة ومش ناسي ابدآ ان ضرب الباب برجلة،وانتي عاد غلطتك كبير بكل لأنك اهنتي بنت واحرجتيها قدام كل الطلبة
عماد:انا ساكت منبش ندوي يادكتور بس هذي اكثر من اهانة تعرضتلها صوفيا
الدكتورة:اوكي تمام بس انت شن دخلك عشان تجي تحاسبني
العميد:معلش يادكتورة عماد هوا الي حط صوفيا في الجامعة،المهم توا هالوقت حـ تطلعو من هنا متراضيين وهذا امر مش بس طلب اما بالنسبة للي صار الطلبة يومين ثلاثة وينسو كل شي هيا عاد انا عندي شغل اهم من هكي منبش نراضيكم مش قاعدين في مدرسة نحنا
وانتهت اللحظة هذي والكل تراضى وسلمو على بعض وطلعو عماد وصوفيا
صوفيا:مش مصدقة مش قادرة نحط عيني في عين الطلبة
عماد:هما وين قاعدين اصلآ
صوفيا:توا انت عندك محاضرة والكل يستنى فيك
عماد:كيف ح نعطيهم هكي بس شوفي شن لابس ومش معايا المنهج بكل
صوفيا:ساهل خش وخلاص
وخش عماد على الطلبة وبدا يحكي
عماد:شوفو انا بجديات جيت حطيت استقالتي اليوم على مكتب العميد لكن هوا رفضها،ردوا بالكم تقولو استقال عشان مشكلة او هكي لا الحاجات هذينا يصيرن في اي مكان حتى ممكن في الحوش يصيرن مشاكل وسوء فهم احيانآ،كلنا نغلطوا وكلنا معرضين للغلط لكن انا بجديات اليوم كنت ناوي نستقيل لأن كسرت حاجز بيني وبينكم هوا حاجز الاحترام،سامحوني واجد واي انسان يغلط وانتمنى تنسوا الي صار،عمومآ انا اليوم مش عارف شن ح نعطيكم لأن مش معايا شي ممكن نكملوها نراجعو شويا لأن انتو خلاص قريبآ و ح تخشوا على العملي وهوا يعتبر اخر سنة وبإذن الله بعدها ح تكونوا دكاترة
مشا باقي الوقت عادي بكل عماد كمل وطلع مع صوفيا وطبعآ في نظرات شك واجد من الناس تجاه علاقتهم القوية هذي 
مالك كان راقد وناض وشاف الساعة لقاها 3
مالك:معقولة انا راقد لعند توا هكي كيف صار بس
وفجأ رن تليفونة وكان وسام
مالك:اهلين وسام
وسام:تي وينك انت مبدري منحصلش فيك
مالك:كنت راقد توا غير فتحت التليفون
وسام:معقولة راقد لعند توا هكي
مالك:اها كساد شن ندير
وسام:باهي قولي شنو امك قالتلي عماد وافق
مالك:اها تمام وبكرا ماشيين نخطبوا والله تمنيتك تكون معانا
وسام:تي عادي هذي خطبة عادية ياحيوان انا مازلت ح نديرلك احلا زفة ان شاءالله
مالك:ههههه باهي باهي شن الجو عندك
وسام:والله كويس قاعد هيا صكر انا بياخذوا مني التليفون
مالك:باهي تمام
وصكروا الخط
مالك:ياعيني عليك ياوسام الشهادة بالله انك راجل راجل يعني،الدنيا صقع ومطر ونحنا تحت البطانية وهوا مسكين قاعد يعاني عشان يكون كيف مايبي،يستحق الاحترام الراجل هذا
وطلع مالك برا وشاف امه
مالك:صباح الخير ياامي
منال:صباح النور يامالك
رشا:قولي مساء الخير ياعمتي
رودينة:مساء الصيدليات0_0
مالك:مش ناقصكن انتن الاثنين وين ماشيات صقع
رشا:للسوق
مالك:اها يااستاذة رشا تطلعي وتسيبي في عيالك عندنا
رشا:مش شورك انت وبعدين عند عمتي انت شن دخلك
رودينة:توا نشوفوها الي ح تجي الجديدة هذي
رشا:والله قلبي يادونا يقول انها هكي متعرفش ادير ولا حاجة
مالك:واو انا نبي نشرب قهوة اطلعن خلاص انا اسف
مشا باقي الوقت عادي مفش اي جديد لين تقريبآ جت ساعة 8 الليل كان مالك يكلم في يارا الي ح تكون خطيبته
يارا:مش مصدقة انا والله بكرا يعني خلاص
مالك:اكيد صدقي ياحبي
يارا:باهي انت وين طالع توا صقع برا
مالك:والله ياعيني نبي نمشي لشباب اصحابي ليا زمان ماشفتهم مش ح نطول عليك اكيد
يارا:باهي تمام روح بدري نستنى فيك
كان واضح على يارا انها بنت طيبة ومحترمة معندهش اي خبث ابدآ وواضح انها بنت حلال ومالك يستاهلها ح نشوفوا هل قصتهم تنتهي تمام ولا فيها مفاجأت لأن انتو عارفين انا ضروري مانخرب الدنيا مرة مرة
كان يوم عادي مفش جديد بكل لين جت تقريبآ ساعة 10 الليل وكان عماد وصوفيا زي كل يوم كملو الشغل
عماد:لحظة ياصوفيا بس خليك معايا
صوفيا:باهي تمام
عماد:الو معين كيف حالك
معين:تمام شن جوك انت
عماد:والله تمام وين قاعد
معين:في الحوش والله تعبان كنك في حاجة
عماد:لا شي نبي نقولك بكرا بس ساعة 5 نبيك معايا في مشوار
معين:وين ؟
عماد:ح نمشو نخطبو لخويا مالك
معين:ههههههه تدوي جديات انت معقولة مالك يديرها وبدون مايقولي والله يشوف مني الحقير ههههه مازلت ماشفته انا اصلآ
عماد:عاد هكي صار
معين:هههههه والله انا خلاص من الضحك باهي كيف في وسام شنو يبي يفوته ولا شنو
عماد:ههههه ياراجل شن نديرلة بس انا مش ذنبي شي
معين:باهي باهي بكرا موعدنا توا نجيكم في الحوش ونطلعو
طلعو عماد وصوفيا
صوفيا:مشاءالله بكرا ح تخطب لـ خوك
عماد:اها والله ان شاءالله بكرا
صوفيا:باهي على خير وربي يتمم على خير
عماد:بكرا الحالات شنو نظمي الجدول على اساس نشتغلو لعند الـ 4 بس
صوفيا:تمام
عماد:هيا تعالي نروح بيك
صوفيا:لا يادكتور منبش نتعبك
عماد:والله مستحيل نسيبك في الصقع هذا
صوفيا كانت عينها على الابتوب وفعلآ عماد سيبة على المكتب بس مش قادرة تقنع عماد ان يسيبها
‏‎ركبت معاه في السيارة ووصلها عماد ونزلت صوفيا
‏‎وكانت الدنيا مطر فوق راسها موقفتش بكل بكل
‏‎صوفيا:لا مستحيل نسيب اليوم هذا يمشي هكي انا لازم ندير شي هذي فرصتك ياصوفيا
‏‎وقفت صوفيا تاكسي وردت بسرعة لعند المستشفى وخشت على طول للمكتب وولعت اللابتوب وبدت تشتغل
‏‎صوفيا قعدت تقريبآ ساعة وطلعت بسرعة وقفت تاكسي ومشت للسكن متاعها
‏‎خشت صوفيا وكانت المطر عبت كل حاجة فيها 
‏‎صوفيا:احم احم شكلي ح نمرض انا
‏‎وكالعادة كانت مكالمة مجهولة زي ديما
‏‎صوفيا:اوكي باهي تمام انا درت كل شي وهوا مش ح يحس بحاجة لأن هوا بروحة وصلني هنا........لالا مفش شي الامور كلهن تحت السيطرة.....باهي بس انا هكي خايفة نأذي ناس ملهمش اي ذنب حرام انا بس جاية لـ عماد في ناس مش ذنبهم.......مش ناسية والله مش ناسية شي انا اصلآ فرحانة لأني بديت نخش لحياتة............باهي باهي اوكي
‏‎وصكرت صوفيا وكانت هكي حزينة من روحها لأنها اليوم دارت حاجة ممكن ح تأذي ناس ملهمش اي ذنب مش بس عماد
‏‎طلعت الشمس وجاء ثاني يوم والامور عادية جدآ عماد مشا للجامعة
‏‎شاف صوفيا قدام عيونة طول
ولأول مرة يخش عماد في الموضوع على طول وميقولش لـ صوفيا صباح الخير ولا اي شي
‏‎عماد:صوفيا صوفيا
‏‎صوفيا:نعم يادكتور0_0
‏‎عماد:هوا انتي امس ليش من بعد ما وصلتك رديتي للمستشفى اخرى0_0
‏‎صوفيا:.....................0_0
‏‎عماد:.........................0_0يتبع الحلقة السابعة عشر