جريمة صوفيا

الحلقة(30) والأخيرة

الحلقة الثلاثون 30 والاخيرة من رواية #جريمة_صوفيا مؤلف القصة انا #إبراهيم_رشيد
             (الحلقة الأخيرة)
محمود:في ستين الف داهية المهم انتو من بكرا اتصرفوا عادي خلاص ساعات عماد الاخيرة توا
سراج:ومش ناسي وسام
محمود:عندي ياسراج انا قتلك عندي
معين:حـ تصير فتنة كبيرة وانا خاطري نشوف شن يبي يصير انا متشوق بكل
مشا الوقت عادي وطبيعي ومفش اي حاجة صارت
عماد كمل الشغل وكان طول اليوم يشتغل بدون اي نيه
طلع عماد من المستشفى وكان يمشي في الباركين ووصل وفتح سيارتة0_0
فتح عماد باب السيارة وركب وقبل مايصكر الباب حس ان في حد مسك الباب0_0
برم عماد وجة عشان يشوف من0_0
وفجأ يشوف وسام قاعد قدامة وحاط المسدس في راسة............0_0
عماد طبعآ انصدم من المشهد هذا بكل لأن في حياتة كلها ماتوقع ان وسام يرفع عليه السلاح
عماد حط عينة في عين وسام
ووسام كان هكي عيونة مدمعات وعلى وشك ينزلن
عماد:وسام جنيت انت
وسام:للأسف ياريتني نكون جنيت ياعماد انا بكامل قواية العقلية درت هكي
عماد:شن شنو رافع عليا انا السلاح مش عيب عليك
قبل نص ساعة
مشهد غريب شويا
وسام كان قاعد قدام محمود وكان حزين
محمود:عارف شغلك توا ولالا
وسام:عارف
محمود:كلفتك انت بالمهمة نشوفك قدها ولالا ولو متقدرش قدم استقالتك بكل عادي
وسام:انا من اول ماجيت هنا وانا عارف روحي شن نبي فـ ياريت تسيبني نشتغل كيف مانبي
محمود:عماد مجرم ولازم يتعاقب وانت الي حـ تمشي تقبض عليه هذا امر ومش طلب ياوسام
وسام:تمام
محمود:وسام انسى ان هوا خوك بكل هذي جريمة ولازم نقبضوا عليه وانا نبيك انت بس
وسام:تمام
محمود:انا مروح توا وفي خلال نص ساعة عماد يكون هنا
نردوا لـ وسام وعماد
وسام:هذينا اوامر ياعماد وانا لازم انفذهن انا كنت نستنى فيك تطلع لأن منبش نخش ناخذك من جوا وندير فضيحة
عماد برم وجة على اليمين شاف سيارتين شرطة قدامة
عماد:تي شن تدوي ياوسام تي انا شن داير
وسام:امشي معايا غادي حـ تعرف كل شي
عماد:تي شنو جاي تاخذ في خوك كأن مجرم
وسام:انا اسف بكل ياعماد اسف بجديات حـ نحط في يدك الكلبشات بس قدامهم ياريت تسامحني
عماد:تي حطهن بس نبي نعرف انا شن داير عليش هكي جايين كأنكم تبو تاخذوا مجرم ولا ارهابي
وسام قرب من عماد
وسام:سامحني ياعماد عطيني يديك
عماد:شوف شغلك ياوسام بس واقسم بالله عمري ماتوقعتها منك
وسام:اسف واجد لازم ندير هكي
وسام حط الكلبشات في يد عماد وحطة في سيارة الشرطة وكأن مجرم وارهابي وعماد مستغرب مش فاهم حاجة
يعني موقف صعب بكل اخ يقبض على خوه بكل برود هكي
قبل مايوصلوا ونعرفوا شن صاير خلونا نمشو مع بعضنا للحوش شويا
صوفيا من اول ماروحت من الاجتماع كانت مستغربة واجد وتفكر
صوفيا:يعني محمود شن هدفة من القصة هذي كلها،مش مصدقة ان هوا صاحب بابا ويبي يرد حق بابا،وفي حاجة ثانية ياصوفيا فكري وركزي كويس محمود قالي ان اب عماد مات مقتول والقاتل مجهول لعند اليوم بس رودينة قالت سكتة قلبية يعني محمود يكذب عليا في حاجات مجهولة واجد وانا لازم نتأكد لأن المسكين عماد اكيد توا في مركز الشرطة ياريتني تأكدت قبل ماندير هكي
رودينة:صوفيا صوفيا
صوفيا:نعم نعم
رودينة:ليا ساعة نكلم فيك في شنو تفكري
صوفيا:ولا حاجة بس شردت شويا كنك
رودينة:انا نبي نرقد شويا لأن نومي متلخبط ومرقدتش بكل
صوفيا:باهي لينا وين
رودينة:لينا تعبتني بكل تبكي وخلاص تبي امها لكن انا مسيبتهش بكل لين رقدتها الله غالب حـ نخلي معاك سراج بس 
صوفيا:باهي تمام امشي ارقدي وحتى عمتي منال رقدت اصلآ
وخذت صوفيا سراج
صوفيا:ياحسرتي عليك ياحبيبي قعدت بلا أم من توا و حـ تقعد بلا اب،لازم ندير حل واقسم بالله نبي نتأكد معندش الا طريقة وحدة بس،توا اذكرت في المستشفى سلموني حاجات المرحومة رشا وكان معاهن مفتاح وهوا مفتاح شقتها فوق لازم نركب انا
صوفيا خشت خذت المفتاح وركبت تجري فوق وفي يدها سراج
خشت صوفيا طول على دار عماد ورشا وحطت سراج على السرير
صوفيا:سراج حبيبي اسكت شويا بس
صوفيا:وينها الخزنة متاع عماد تمام اهيا والرمز نفس رمز اللابتوب
صوفيا فتحت الخزنة وقعدت تشوف في الاوراق
كان حتى هوا مشهد غريب ومجهول صوفيا شافت اوراق واجد بكل بكل وقعدت متحسرة وتبكي
صوفيا:غبية ياصوفيا تي لا انا خربت كل شي تي انا خربت كل شي تي معقولة هكي معقولة لازم ندير حل لازم
في نفس الوقت هذا كان مالك قدام الحوش ويكلم في يارا
طبعآ عرس مالك ويارا تأجل بكل خلاص
مالك:والله مش عارف شن ندير تعرفي حوشنا كئيب بكل وحزين والكل هنا مش طايق حياتة
يارا:الله غالب يامالك هذا حال الدنيا والله انا شايفتها كم مرة بس وزعلت عليها بكل يابال انتو
مالك:هذا هوا حال الدنيا يا يارا الله غالب صكري توا لأني وصلت نبي نخش شويا جوا نشوف امي
يارا:تمام
صوفيا كملت وكانت نازلة بسرعة من فوق وفي يدها سراج وفجأ شافها مالك0_0
مالك:صوفيا0_0شن كنتي اديري فوق
صوفيا:لا شي غير نجيب في دبش لـ سراج
مالك:اها باهي امي وين
صوفيا:راقدة راقدة
مالك:كنك تبكي في حاجة
صوفيا:لا شي غير لما خشيت فوق حسيت بـ رشا بس مالك نبي منك طلب
مالك:تفضلي شن في
صوفيا:افطن لـ سراج شويا انا لازم نمشي لمكان توا ضروري
مالك:وين تبي تمشي في الوقت هذا
صوفيا:ارجوك ارجوك متسألنش لازم نطلع قبل ماتخرب الدنيا
مالك:تي شن تدوي انتي اين دنيا تبي تخرب
صوفيا:يامالك ارجوك رد مالك من سراج بعد حـ تعرف بعدين امسك بس
وخذا مالك سراج وصوفيا طلعت تجري.
مالك:تي كنها هذي تعال ياعمو نخشوا جو صقع عليك
نردوا مع بعضنا لـ وسام وعماد
عماد:هكي ياوسام تجيب خوك بـ فضيحة كبيرة بكل واقسم بالله عيب منك
وسام:عماد افهمني ياعماد انت داير مصيبة كبيرة بكل تي هذي جريمة
عماد:جريمة شنو احكي واقسم بالله مش داير حاجة بكل انا
وسام:لا داير ياعماد وحط في بالك انا قررت نجيبك ومرفضتش لأن منبش فضايح
عماد:والي صار هذا مش فضيحة
وسام:عماد تي انا نبي نساعدك افهمني
عماد:اختصر ياوسام بسرعة شن التهمة
وسام:بيع وتجارة في الاعضاء البشرية0_0
عماد:تي شنو شنو شنو جنيت انت ولا كيف
وسام:شوف هذا الملف قدامك شوف واقرا وشوف العقود وكلهن بتوقيعك وختم المستشفى
عماد فتح وكان مصدوم بكل بكل بعد شاف كل بعيونة
وسام:شنو ياعماد فهمني هذينا شنو وكيف هذينا عقود رسمية وبتوقيع منك وشوف الميزانية ضخمة وكبيرة
عماد:وسام لا واقسم بالله مش انا
وسام:فهمني شن يدير توقيعك هنا وشن يدير الختم هنا
عماد:مش عارف مش عارف اكيد في حاجة غلط
وسام:للأسف ياعماد واقسم بالله التهمة لابستك وجاية فيك انت
عماد:تي مش هكي افهمني بس انا مدرتش هكي
وسام:القصة كلها مكتوب ان الجثث الي يطلعن من المستشفى يتم اخذ منهن في اعضاء بشرية والتجارة بيها في السوق وتهريب
عماد:تي مفش منة الكلام هذا مش انا الي ندير هكي وبعدين لو انا درت هكي صاح تي كنت حـ نكون اغنى واحد في البلاد تي كنك ياوسام متعرفنش انت ولا شنو
وسام:انا معاك باهي ومصدقتك حلها ليا توا هيا حلها ليا شن نكتب في المحظر فهمني
عماد:لالالا انا مش مستوعب القصة هذا توقيعي صاح وهذا ختم المستشفى
وسام:ونقولك شي عقد الامور زيادة وخرب الدنيا بكل شرطة الجنايات ردت فتحت على القبور وفعلآ تحليل الطبيب الشرعي طلعن انهن ناقصات الجثث اي جثة تطلع من المستشفى يتم اخذ منها اي حاجة سليمة وتستاهل التبرع
عماد:تي في شنو تحكي انت تي اكيد ملخبطين ياوسام
وسام:متقولش ملخبطين ياعماد الدنيا كلها خربت فوق راسك تي هذي فيها اقل شي 10 سنوات سجن
عماد:وسام تي ليش انت متبش تصدقني واقسم بالله ورحمة رشا مش انا الي درت هكي
وسام:فهمني انا شن ندير باهي قولي خويا متهم وانا ماسك القضية شن ندير قولي اول خطوة شنو
عماد:تي لازم تصدقني تي كنك انا عماد عارفني مستحيل ندير حاجة حرام وبعدين واقسم بالله الفلوس هذينا مش معايا
وسام:تي عندك العلم اليوم طلع امر انهم يصكروا المستشفى بكل ياعماد خلاص يعني المستشفى راحت بكل وانت من احسن دكتور في البلاد قعدت مجرم وتاجر اعضاء بشرية
وفجأ فتح الباب0_0
وسام:شن في يازفت تي مش انا قلت محد يخش عليا
الشرطي:في وحدة برا ولازم تشوفك
وسام:من تكون هذا
وفجأ خشت صوفيا0_0
الشرطي:ياابلة ميصيرش هكي
عماد:صوفيا0_0
وسام:صوفيا؟خلاص اطلع برا وصكر الباب
صوفيا كانن عيونها لونهن احمر بكل وفي يدها شنطة معبية اوراق
عماد:صوفيا كنك شن في
وسام:شن سبب الزيارة هذي
صوفيا:وسام عماد بريئ من كل حاجة خليه يروح
وسام:كيف هذي
عماد:من وين تعرفي بالموضوع انتي
صوفيا:انا السبب في كل حاجة وانا الي درت الجريمة هذي حاسبني انا
عماد ووسام من كثر الصدمة برموا وحطو عينهم في عين بعضهم
وسام:واقسم بالله عمري ماتريحتلك انتي
وصبا ناض من مكانة وجاء قدام صوفيا
وسام:احكي بسرعة منو انتي احكي
عماد:وسام اصبر خلينا نفهموا منها كملي ياصوفيا كيف انتي الي درتي الجريمة هذي
صوفيا:انا المسؤولة وعماد بريئ منها
وسام:قمعزي هنا قدامنا نحنا الاثنين وزي الشاطرة اعترفي
وسام قمعز جنب عماد وكانت صوفيا قدامهم وبدت تحكي قصتها كلها
صوفيا:اسمي الحقيقي صوفيا علي عيد
عماد:انتي بنت علي عيد0_0
وسام:منو الراجل هذا
عماد:نعرفة وكنت صغير بكل وقتها انا،هذا كان شريك باتك وصاحبة واجد وكان باتي ديما يحكيلي عليه 
صوفيا بدت تحكي وتبكي
صوفيا:خليني نكمل ارجوك خليني نكمل ياعماد انا صوفيا علي عيد ومش يتيمة ولا اي شي عندي هوية وعندي اصل وفصل مش لقيطة زي ماانتو تعرفوا من زمان بابا كان صاحب باتك ياعماد واجد بكل وانا كنت صغيرة ممكن كان عمري 11 سنة وبابا كان رجل اعمال وغني بكل وانا وحيدة معندش لا خوت ولا خوات كنت عايشة مبسوطة وكنت طفلة بابا مدللني بكل وكنت نحبة موت،في يوم مشيت انا وبابا وماما لمزرعتنا هيا بعيدة وبرا المدينة مهما نوصف جمال اليوم هذا مستحيل تصدقوني كان الجو ربيع وماما وبابا قاعدين يلعبو فيا ولكن فجأ تصير حاجة حاجة غيرت حياتي بكل من يومها حياتي قعدت جحيم في جحيم
وسام:شن صار كملي كملي احكي
صوفيا:كنا مبسوطين بكل وكانت عائلتنا سعيدة وانا عشت طفولة سعيدة بكل مع بابا وماما فجأ خشو علينا ناس منعرفوهمش كانوا لابسين اسود ووجوهم مغطيات ومش باينات بكل كان عددهم واجدين بكل ومنقدرش نقوللكم كم المهم واحد مسكني انا والثاني مسك ماما والباقي قعدوا يضربوا في بابا قدامنا،تي يضربوا فيه وكأن شخص مجرم وقاتل كانوا يضربوا في بابا في كل مكان في جسمة وبكل وحشية وانا بديت نبكي ومش فاهمة شي بكل استمر الوقت وماما تعيط وتصرخ تبي مساعدة من اي حد بس للأسف قعدوا يضربوا في بابا وانا نعيط بأعلى صوت بابا بابا ومفش حد سامعني بكل وفجأ نذكر واحد منهم مسك بابا وبابا كان دايخ والدم مغرق وجة وكل مكان في جسمة وضربة بـ طلقة في نص راسة وبعدين هربوا وقعدنا انا وماما نبكو ونبكو على بابا وبابا خلاص مات،بعدين الكل طمع فينا وهكي ولكن بابا كان مسجل كل شي بأسم ماما ومشن الايام ماما مرضت بكل لأنها كانت تحب بابا واجد وبعد سنتين ماما ماتت من الحسرة وقعدت وحيدة وكنت طفلة صغيرة صاح بس كان في قلبي حقد غريب بكل وحلفت يومها اني ناخذ حق بابا من الي دار هكي،عشت كم سنة مع خالي ولكن كانت معاملتة معايا قاسية بكل لين بديت نكبر ووصل عمري 18 طلعت هوية ومشيت من عندة ومن الجحيم الي كنت عايشة فيه،كنت مش عارفة وفاهمة حاجة غير ان عندي املاك واجد بكل مش عارفة شن ندير بيهن وحساب بابا في البنك فيه فلوس مينعدنش بكل بكل لو جبت الف الة حاسبة مستحيل تقدر تعدهن
عماد ووسام تأثروا بكل بـ قصة صوفيا
عماد:باهي كملي القصة كملي شن صار بعدها
صوفيا:في يوم جاني شخص هكي وقالي ان هوا كان صاحب بابا ويبيني معاه ومستعد يجيبلي حقي عارف الشخص هذا منو ياوسام الشخص هذا محمود اها محمود اب خطيبتك محمود هوا نفسة الي جابك للشغل هنا وحب يساعدك بس الراجل هذا مجرم كبير
وسام:محمود0_0وشغل شنو معلش شن دخلة هوا بالموضوع هذا كلة
صوفيا:محمود كان يعرف بوكم وكان فعلآ صاحب بابا وكان شخص فقير ويحب الفلوس وبس وكانت وقتها حالتة المادية عادية بكل قالي انا نعرف العائلة الي قتلت باتك وعطاني دلائل واجد بكل وفعلآ كان في نظري بوكم هوا المجرم
عماد:وعليش يعني شن شفتي منه
صوفيا:المستشفى هذي ملك باتي انا وهوا قالي ان بوكم زور الاوراق وخذاها المهم بدا يجهز فيا وعطاني الخطة هذي لكن كانت تبي سنوات واجد عشان انفذوها،شرط الخطة اني نخش طب ونحاول نجي نقرا ونكمل قرايتي وتدريبي في اخر سنة عندك في المستشفى ولما انت بديت تعطي في الجامعة اتفقنا نكون طالبة عندك الاول ياعماد وانت سهلت عليا كل شي سهلت كل حاجة عليا شغلتني وخليتني حتى نعيش معاكم وقربت مني واجد،ومحمود قرر يلعب على الجميع وطلعلي اوراق اني من دار الايتام
عماد:وهكي كانت جزاتي ياصوفيا لأني ساعدتك ومن وين تعرفي معين انتي
صوفيا:جايتك في الكلام ياعماد
وسام:انا نبي نعرف ونفهم كل شي توا مش حـ تطلعي من هنا لين نعرف محمود خدعني تي كيف هذي
صوفيا:معين هذا حط يدة في يد محمود عشان يخونك ياعماد ونقولك الخطة كانت لما انت تخش للحبس يجيك معين ويقولك اكتبلي المستشفى بأسمي وبهكي المستشفى مش حـ تأثر بكل و ح تجي فيك انت شخصيآ بس وطبعآ انت كنت حـ توافق لأنك تحسابة صاحبك وعمرة ما حـ يخونك ابدآ
عماد:مش مصدق معين يكون خاين هكي تي واقسم بالله انتي وحدة كذابة
صوفيا:والله مانكذب في حرف ولو انت مكذبني حـ تشوف لما يجي يزورك هنا ويقولك سجلها بأسمي كلها وحق اهلك محفوظ
عماد:ياحقير ياكلب ياخاين
صوفيا:ومازال الشخص الرابع هوا سراج سراج حتى هوا حط يدة مع محمود وقعد يشتغل عندة ووعدة ان يردلة المرحومة رشا بعد تطلق منك وسراج وراء كل مصيبة صارت معاك انت ورشا وهوا كان يحاول يحكي معاها بس هيا الله يرحمها كانت محترمة وشريفة
وسام:شوفي ياصوفيا لو انتي تكذبي علينا واقسم بالله مش حـ نطلعك من هنا غير ميتة
صوفيا:والله مانكذب هذي كل الحقيقة
عماد:تي وااو انا جنيت ودخت شن دخل سراج في معين في الزفت محمود وفي قصتك انتي
صوفيا:كلنا هدف واحد وهوا تدمير عائلتكم بكل ونردوا حقنا منكم ويكون في علمك ياوسام انا الي وراء قصة نبيل وانا الي دزيتلك رسائل
وسام:انتي0_0
صوفيا:اها انا نبيل كان يبيني نسرق منك اوراق ولو مدرتش هكي كان حـ يفضحني ويخرب كل هوا كان عارف بكل شي بس من وين يعرف الله اعلم
وسام:باهي نبي نفهم حاجة وحدة بس انتي يجهزوا فيك من سنين شن غير رأيك توا ليش جيتي اعترفتي
عماد:ليش وانتي ضيعتي عمرك كلة مهمومة وتبي تنتقمي ولما جاء الوقت غيرتي رأيك
صوفيا:لأن من اول ماعشت معاكم عرفت انكم ناس طيبيين وناس محترمين ومتستاهلوش الا كل خير حسيتكم كأنكم عائلتي عاملتوني احسن معاملة ومن يومها قررت نرد حساباتي من اول وجديد واليوم عرفت الحقيقة كلها بوكم بريئ وشراء المستشفى هذي من بابا بـ فلوسة وهيا من حقة ولكن الشخص الي قتل بابا فـ ميكونش الا محمود
عماد:كيف عرفتي باتي بريئ
صوفيا:فتحت الخزنة الي فوق في شقتك ياعماد وشفت عقد البيع كلة
عماد:وكيف عرفتي الرمز
صوفيا:بعدين حـ نقولك مش وقته توا
وسام:وتوقيع عماد والختم
صوفيا:التوقيع مزور هذي لعبة دارها محمود كلها والختم جابة لنا معين في فترة غياب عماد
عماد:معين ياكلب ياحقير
وسام معش تمالك اعصابة وجاء مسك صوفيا بالقوة وحط المسدس على راسها
وسام:ياحقيرة يامجرمة انا ح نقتلك اليوم
عماد مسك وسام
عماد:وسام اهدا ياوسام
وسام:فهميني توا شن دليلك شن دليلك ضدهم كلهم
صوفيا:هذينا الاوراق كلهن تفضل وتسجيل مكالمات وفيديوهات لأجتماعاتنا كلهن موجودات
عماد:نبي نفهم انا حاجة سراج وفهمنا كان يحب رشا معين وطامع ويبي تكون المستشفى بأسمة الزفت محمود هذا ليش ليش شن يبي 
وسام:وصفقات تجارة الاعضاء البشرية وين؟
صوفيا:واقسم بالله انا مانعرف عليهن حاجة محمود ومعين وسراج هما يديروا فيهن انا صاح ساعدتهم لكن فلوس مشفتش حاجة ابدآ
وسام:ماشي ياصوفيا حـ ناخذوا اقوالك توا ونثبتوهن مع كل دليل عندك
صوفيا:والكلاب الثانيين ومحمود امتى حـ تجيبهم
وسام:سراج اسهل واحد حـ نطلع امر بالقبض عليه توا ويمشو يجبوه،ومعين حـ يكلمة عماد توا يجي ع اساس في مشكلة وهكي ويكون جاني بروحة من دون تعب لكن الراس الكبير محمود هذي شغلتني انا بروحي
عماد:توا شن حـ يصير ياوسام
وسام:عماد انت حـ تطلع تستنى برا شويا نبي نقعد مع المجرمة صوفيا
صوفيا:مش مجرمة انا والله مش مجرمة
وسام:شاركتي في كل شي ياصوفيا وبالنسبة ليا انتي كيفهم بالضبط نبي نفهم حاجة ليش انتي حاطة ثقة في محمود مش خايفة يغدر بيك
صوفيا:في الاوراق هذينا في الفساد الي يدير فيه محمود كلة ومن المستندات هذينا خلاص اظن محمود مش حـ يشوف الشمس مرة ثانية
عماد طلع وكانت حسرة في قلبة كبيرة بكل
اولآ مازال حزين وزعلان على رشا وثانيآ صاحبة ورفيق عمرة وحياتة معين طلع خاين وقليل اصل معاه وصوفيا الي يحبها طلعت بنت مجرمة
عماد:كل حاجة تبيها ياعماد قاعدة تضيع من يدك معقولة معين يطلع خاين معقولة
بعد تقريبآ ساعة طلع وسام وجاء الشرطي خذا صوفيا وحطها تحت في السجن
عماد:وين مشت صوفيا
وسام:لـ جهنم الحمراء شن دخلك بيها انت
عماد:وسام صوفيا مغرر بيها وهيا جت واعترفت ياوسام
وسام:ميهمنش انا،انت خش توا استنى جوا في المكتب نبي نجيب الكلب محمود بروحي ورن على معين بس وانا حـ انبه عليهم اول مايخش يمسكوه
عماد:تمام
وسام طلع بروحة بدون لا شرطة لا شي وعماد خش للمكتب
عماد رن على معين
عماد:الو معين
معين:خير ياعماد كيف حالك
عماد:مش وقته يامعين المهم ضروري تجيني توا انا مسكوني الشرطة
معين:الشرطة تي عليش ياعماد
عماد:مش عارف قصة صايرة في المستشفى ضروري تجي
معين:حاضر قولي وين قاعد بس وانا مسافة الطريق
وسام وصل لـ حوش محمود ورن الجرس
طبعآ وسام كان خطيب ندى ولقطة بايخة يزورهم في وقت زي هكي
محمود فتح الباب وشاف قدامة وسام0_0
محمود:وسام اهلين
وسام:كيف جاك قلب ادير هكي
محمود:شنو ياوسام شن تحكي
وفجأ جت ندى0_0
ندى:بابا بابا منو على الباب،وسام0_0
وسام:قرار القبض عليك يامحمود مازال ساخن ووقع عليه مساعد الوزير
ندى:القبض على بابا تي شنو تحكي ياوسام
وسام:هيا معايا بسرعة تي هيا
محمود:خشي جوا يابنتي انا حـ نعرف نتفاهم معاهم
ندى:وسام في شنو ادير انت
وسام:الشرطة توا على وصول وحـ تجي معانا يا محمود او يامجرم
وفي نفس اللحظة وصلن سيارات الشرطة
ندى:بابا وين واخذينا ياوسام تي فهمني
وسام:لو تحبي تفهمي تعالي ورانا ياندى
وسام حط الكلبشات في يد محمود وطلعوا بيه
طبعآ في نص ساعة بس قبضوا عليهم كلهم سراج ومعين ومحمود
وسام كان قاعد مع عماد
عماد:وسام ممكن نشوف معين
وسام:ممنوع ياعماد بس انت منقدرش نقولك لا تعال
وطلع وسام وعماد وشاف ندى جاية
ندى:كيف تسمح لـ روحك انت تقبض على بابا من تحساب روحك
وسام:اهدي اهدي وحركات المحاميين هذينا مش عليا انا خشي استني جوا توا جايك تعال انت خوذ عماد لـ معين
ومشا عماد مع الشرطي وندى خشت جوا مع وسام
وسام:تفضلي شوفي
ندى:هات
وسام:اقري كويس بس
عماد نزل للسجن وشاف محمود وسراج ومعين
معين:عماد عماد ياصاحبي انا نبي نفهمك حاجة اسمعني بس
عماد:اسكت منبش نسمع منك اي كلمة ياحقير ولا اي كلمة،تي انت عارف اني الاثنين الكلاب هذوما واقسم بالله مش زعلان منهم نهائي لكن منك انت تجي يامعين ياصاحبي واقسم بالله واعرة بكل وعمري ماتوقعتها تي انت كنت بالنسبة ليا كيف وسام ومالك بالضبط تي نحنا اصحاب من الثانوي ياراجل كنك انت معقولة تخوني عشان فلوس ياخاين ياحقير معقولة خزي على معرفتك ياخاين شن حصلت توا فهمني توا ينفعك محمود ياتافه ياحقير
وطلع عماد.
معين:شنو توا شن يبي يصير
محمود:حـ يكون اخر يوم في حياتك ياصوفيا
سراج:محسبتهش كويس انت وهيا خربت علينا كلنا
وسام وندى
ندى:مش مصدقة بابا مجرم وعندة قضايا اختلاس وسرقة وغسيل اموال واخيرآ تجارة اعضاء بشرية
وسام:هذا الي صار ياندى معندش مانقولك اكثر من هكي ولو تبي تقعدي المحامية متاعه صدقيني كلة على الفاضي وبكرا الكل حـ يمشي للنيابة العامة خلاص وبعدين للمحكمة
ندى:نقدر نشوفة ياوسام؟
وسام:عادي
روح عماد للحوش وقاللهم كل شي صار معاه وحكالهم قصة صوفيا من البداية للنهاية تقريبآ قعد ساعتين وهوا يحكي
رودينة:الله ياصوفيا هذا كلة صاير معاك كنت ديما نحس فيك مخبية حاجة
منال:معقولة قاتلين بوها قدام عيونها وتحسابة من بوكم انتو
مالك:تي شنو شنو هي انتم حسيتكم تعاطفتوا معاها تي هذي مجرمة في ستين الف داهية
رودينة:حرام يامالك تقول هكي وبعدين هيا الي انقضت عماد مسمعتش القصة انت ولا كيف
منال:تي واحقر واحد طلع معين الله لا يربحة ولا يوجهلة الخير
رودينة:ولولا صوفيا مكانش حد حـ يعرف وكانت حـ تجي القصة كلها في عماد
مالك:وباهي توا الشرطة صكرت المستشفى حلوها ليا هذي بس تي هذي هيا الي عايشين منها
عماد:تنحل حـ تنحل واقسم بالله 
عماد ركب فوق ورقد على السرير وقعد يفكر
عماد:معقولة ياصوفيا انتي وراك القصة هذي كلها
وقعد عماد يذكر في كل حاجة من اول يوم شاف فيه صوفيا مع معين لعند ما صارت القصة هذي
الصبح رن وسام على عماد
عماد:الو وسام
وسام:بصراحة عندي خبر ممكن يزعلك
عماد:تي كنك شن في
وسام:صوفيا،صوفيا حاولت تنتحر وتوا في المستشفى ووضعها خطير
عماد:شنو شنو تحكي في اين مستشفى
وسام:في مستشفى................... تعال ضروري
وصل عماد وخش وشاف وسام ومعاه اثنين من الشرطة
وسام:اهدا ياعماد بس مفش حاجة
عماد:شن في ياوسام
وسام:نزلت نشوف فيها لقيتها تبي تنتحر والدم مغرق الدنيا مش عارف من وين جاب سكين وفتحت يدها
عماد:يستر الله وخلاص قولتك صوفيا بريئة ياوسام
وسام:والله شوف صوفيا عندها مواقف بس انا نقول لو عينت محامي شاطر ممكن تطلع منها والله اعلم في النهاية شنو
عماد:وسام نسيت مواقف صوفيا انت بسببها بنتي لينا عايشة لعند توا والبنت انهارت بكل خلاص
وسام:والله مش عارف بعد الي صار كلة حتى انا مش قادر نكرها البنت هذي
طلع الدكتور وطمنهم عليها ولكن قال لازم تقعد هنا اليوم
وسام:خلاص حـ نخلي عليها الحرس هيا ياعماد نحنا نمشو
عماد:اها هيا امشي وانا جاي وراك
بعد شويا صوفيا كانت راقدة ووضعها بدا يستقر
خش عليها الدكتور ومعاه ممرضة
وصوفيا فتحت عيونها
الدكتور:هدي روحك انتي كويسة ومفش حاجة صارت معاك وانا قلت لازم تطلعي بكرا،انا الدكتور ونكون صاحب عماد، عماد ناوي يهربك من هنا هيا البسي لبس الممرضة بسرعة
بعد نص ساعة جاء تليفون لـ وسام وكان وسام في المكتب
وسام:تي كيف تي كيف صار هكي عماد هرب بـ صوفيا في شن تقول انت وانتو وين،اسمع بلغ كل الدوريات وحاصروا المنطقة في نص ساعة نبيك تمسكهم نص ساعة بس تي صكر صكر الله يخربيتكم بكل
وصكروا الخط.
وسام:لا ياعماد لا ارجوك ياعماد رد هكي حـ تخرب كل شي
وفجأ خش الشرطي
الشرطي:المحامية ندى برا
وسام:خليها اتفضل
وخشت ندى
وسام:شنو ياندى قررتي ادافعي على باتك
ندى:لا انا حـ نكون المحامية الخاصة بالبنت صوفيا ومش شوري بالباقي
وسام:صوفيا وهيا وين صوفيا اصلآ
ندى:كيف0_0
وقاللها وسام كل شي.
ندى كانت تشوف في شغلها وتكتب
ندى:في تاريخ 3/4 سجلت المحكمة القضائية حادثة غريبة الشكل وهي هروب الجاني والمجني عليه مع بعضهم لـ بعض
وسام:وقفي ياندى وقفي ارجوك شويا بس عطيني ساعة ولو عماد مسلمش روحة ارفعيها للمحكمة
ندى:نستنى ساعة عادي
وسام كان يرن على عماد ويدزلة في رسائل وخلاص
صوفيا وعماد
صوفيا:ليش درت هكي
عماد:لأني متأكد انك بريئة
صوفيا:انا بريئة قدامك بس القضاء لاه رأي ثاني
عماد:معقولة كنتي ناوية تموتي كافرة
صوفيا:حياتي كلها غلط في غلط ياعماد
عماد:صوفيا انا حـ نكون جنبك ديما
صوفيا:عماد المرحومة رشا مكانتش تعرف انا من وقبل ماتموت وصتني على لينا وسراج بس انا مش قدها المسؤولية هذي انا مجرمة ياعماد
عماد:متقولش هكي ياصوفيا
صوفيا:رشا قالتلي بالحرب عيالي امانة عندك وقولي لـ عماد اني مسامحتة واجد
عماد:وحياتك مفش حد حـ يلمس شعرة منك بما اني انا عايش
صوفيا:ردني للحبس ردني منبش حد يتورط معايا عيش حياتك ياعماد عيالك مازالو محتاجينك
عماد فتح التليفون ورد على وسام
وسام:ارجوك هكي انت حـ تخرب كل شي ياعماد
عماد:وسام الحب يدير اكثر من هكي ياوسام
وسام:لو تحبها خليك جنبها وتعال سلمها ياعماد والله حـ تخرب كل شي انت في جنبي ندى خطيبتي محامية شاطرة ودايرة توكيل انها ادافع على صوفيا ياعماد تعال محتاجين بس توقيع صوفيا وتبدا شغلها
انتهت القصة هذي وعماد سلم صوفيا وصوفيا ردت للسجن مرة ثانية
     ((بعد مرور شهر))
جاء يوم المحكمة والكل كان حاضر
وسام مالك ورودينة ومنال وفاطمة وعماد
رودينة:يارب صوفيا تطلع بريئة
فاطمة:ندى قالت انها موقفها كويس
وسام:هيا خشو المحكمة تبي تبدا
بدت المحكمة وكان القاضي قاعد وقدامة ندى وطبعآ زحمة وناس واجد
صوفيا كانت قدامهم ومقابلها سراج ومعين ومحمود
بدت المحكمة ودافعت ندى على صوفيا اشد الدفاع وجاء وقت الحكم والكل يستنى
القاضي:حكمت المحكمة حضوريآ على كلآ من سراج...... ومعين.......... بالسجن 12 عامآ بعد ثبات تورطهما في تجارة الاعضاء البشرية ويطبق الحكم من تاريخ صدوره،وعلى المتهم اللواء السابق محمود ........ بالسجن مؤبد بعد ثبوت تورط اللواء السابق بـ اربع قضايا  قضايا وهم اولآ قتل شخص يدعى علي عيد من 13 عامآ وثانيآ قضية اختلاس وغسيل اموال وثالثآ التجارة في الاعضاء البشرية ورابعآ اللعب بعقل فتاة قاصرة وصغيرة في السن ويطبق الحكم من تاريخ صدوره،واخيرآ حكمت المحكمة حضوريآ المتهمة صوفيا علي عيد بالسجن 6 اشهر مع وقف التنفيذ كـ حق عام بعد ثبوت انها كانت في تلك الفترة فتاة قاصرة وتم اللعب بعقلها ولا يوجد عليها مسؤول ودفع غرامة وقدرها نص مليون تعويضآ لمستشفى الدكتور عماد..........
الكل فرح لأن صوفيا طلعت بريئة
صوفيا:استاذة ندى انا ممنونتلك طول العمر
ندى:ولا يهمك انا درت الي عليا ياصوفيا المهم انتي اطلعي معايا هيا
صوفيا:لا انا لازم نطلع من الباب الخلفي مش حابة حد يشوفني
ندى:بس الكل يستنى فيك وفرحان برا
صوفيا:خوذي المسج هذا لـ عماد ياندى نشوفك بخير وفي مبلغ ح يوصلك بكرا فيه كل اتعابك الشهر الي فات
ومشت صوفيا تجري.
ندى طلعت وكلهم طلعوا معاها
عماد روح وفتح المسج:
صوفيا:عماد انا مننكرش اني حبيتك انا كنت في صراع كبير بكل بين عقلي وقلبي كنت في حرب نفسية كبيرة بيني وبين نفسي انا اسفة ياعماد مش حـ نقدر نكون قد الثقة الي سلمتها ليا رشا انا في نظر الجميع مجرمة وخاينة انتو ناس طيبين ومتستاهلوش وحدة كيفي ابدآ سلم على رودينة وعمتي منال وقوللهم صوفيا حبتكم ومازالت تحبكم وبوسلي لينا وسراج واجد،اخيرآ ياعماد انا نحبك بكل بكل خليكم مبسوطين وفرحانين والمبلغ حولته لحسابك رد افتح المستشفى وصلح الي انا خربته نحبك ياعماد واجد
عماد مسح دموعة وصكر الرسالة
في نفس اليوم في الليل
وسام وندى كانوا مع بعضهم
وسام:يعني شنو
ندى:وسام انت عارف شن معناها وحدة تجي تصبي قدام بوها واطلعة مجرم ولالا
وسام:شن دخل هذا كلنا فينا
ندى:انا اسفة واجد منقدرش ياوسام بكل معش نقدر نكمل معاك
وحولت ندى الخاتم وحطاتة قدام وسام ومشت
وسام كان حزين بكل بكل
وندى مشت لكن وقفت
وسام:لو تبي تمشي امشي بس انا مش حـ نحب بعدك ولا حـ نعطي قلبي لوحدة لأنك انتي الاولى والاخيرة
ندى مرة وحدة ردت تجري وحضنت وسام
ندى:انا توا معندش حد غيرك في حياتي كلها ياوسام انت كل حاجة انا مستحيل نسيبك نبي نعيش معاك العمر كلة
((جاء ثاني يوم))
وسام:تي هيا يامالك حـ اتأخر على الطيارة
رودينة:خلاص بكاء ياماما خلاص
منال:رد بالك من روحك ياحبيبي رد بالك من روحك ربي يوفقك في حياتك
مالك:يارب يارب خسارة والله كنت نبي نشوف سراج بس راقد
عماد:تي هيا حـ تريح عليكم الطيارة
مالك مسكين سافر ورد لـ فرنسا كان في خاطرة يرد مع يارا ولكن للأسف بعد موت رشا الكل حزن عليها وطبعآ العرس تأجل بكل
((بعد مرور 6 شهور))
رودينة:بيسان بيسان طالعة حلوة انا صاح
فاطمة:واقسم بالله قمر بكل
بيسان:اهي جاوبت فاطمة
رودينة:باهي باهي شنو برا شن صار
فاطمة:الكل في انتظارك انتي بس هيا اطلعي
بيسان:اليوم حلفة صدور اول كتاب لكي يارودينة خليك هادية لأنك ح تطلعي تقولي كلمة بخصوص اليوم هذا
رودينة:والله متوترة بكل يابيسان خايفة الرواية تكون شينة وتفشل
فاطمة:تي كلة حـ يكون تمام
رودينة:يارب يارب ويارب محكمة الاستئناف تقبل الطعن وتردي لـ شغلك يافاطمة
فاطمة:يارب
كانت اليوم حفلة منظمتها رودينة وكانوا الكل موجودين جميع شخصيات الرواية
ندى مع وسام ومنال وعماد وحسن وإيمان وفاطمة وبيسان وايضآ حظور ناس ثانيين استاذة جامعة وصديقات رودينة
رودينة بدت تحكي على المسرح قدام الجميع
رودينة:مبسوطة جدآ بحظوركم معايا اليوم،انا اليوم اصدرت اول كتاب ليا رسميآ كـ كاتبة وفي وجود عائلتي كلهم زادت فرحتي يأسثتناء خويا مالك،وزوجتة اخي وصديقتي المرحومة رشا،الحقيقة محتوى الرواية غريب جدآ المحتوى كانت قصة بنت يتيمة تعرضت للظلم من قبل الجميع ومفش حد قرر يوقف معاها بكل انا رودينة قررت ندير كتاب عليها لأنها بجديات قصتها غريبة جدآ ومؤثرة وضروري تنتشر على اوسع نطاق رحبوا معايا بـ بطلة الرواية صوفيا
خشت صوفيا والكل تفاجأ وعماد كان فرحان بكل بكل
كملت الحفلة.
وسام:شنو ياصوفيا معش في اجرام خلاص
صوفيا:لالا توبة خلاص
عماد:يعني معقولة المدة الاولى اتواصلن مع بعضكن ومحد يعرف
رودينة:هذي فكرتي انا ولو درتها حـ تنكشف فـ عشان هكي اليوم كانت مفاجأ
ندى:انا نستأذن منكم صوفيا مبسوطة اني شفتك اما فاطمة موعدنا بكرا نحنا بكرا
منال:اذنك معاك يابنتي،بصراحة ياصوفيا انا حابة نطلب يدك لـ عماد
رودينة:ماما مش هكي
منال:كيف نقولها باهي
عماد:ههههه منال طلباتك خلاص
صوفيا:من بعد كلامها انا معندش كلام
وسام:على بركة الله معناها عرسكم معايا انا وندى
رودينة:ونسيتوا مالك ولا كيف
وسام:والله فكرة نحنا الثلاثة في يوم واحد شن رايك ياعماد
عماد:ياريت عادي
منال:لالالالالالا انا مستحيل نديرها حـ تجيكم عين لالالالا
رودينة:ياماما غير اهدي بس خلينا نفرحوا ساد الحزن الي عشناه
بعد مرور فترة جاء يوم العرس
عماد:تي حول يامالك من قدام وجي المراية كبيرة قاعدة
مالك:ياراجل خلينا نجربوا الشعور هذا شويا انت مجرب من قبل
عماد:هههههههه
وسام:شن رايكم ياشباب جنتل ولا شنو
مالك:تي احلى واحد طالع انا
عماد:ماهو لازم تقلد يامالك مفش الا اللبسة هذي خذيتها
مالك:ياراجل انا مش معدل عليك بكل من اليوم حـ نعيش مع حب حياتي ياهو افهمو
وسام:وعلى اساس نحنا يعني جايبينهن من الشارع
مالك:تعالو نصوروا هيا شويا ويرنوا علينا نمشو
عماد:بصراحة جديات خايف من العين يعني ثلاثة في يوم واحد معقولة
مالك:كان جت ياريت تجي في وسام قاعد زي الساس مشاءالله
وسام:غير هيا بس خوذوا كم سيلفي بسرعة معش في وقت
كان جديات عرس كبير بكل بكل وكل حاجة مشاءالله لا قوة الا بالله
الثلاثة خشو وكان الكل خايف عليهم من العين
كل واحد جت عينة على عروستة وبس
انتهى اجمل يوم في الدنيا وبدت حياتهم كلهم تمشي احسن واحسن من قبل
ثاني يوم.
عماد:عليك ازعاج رودينة ترن
صوفيا:رودينة رد عليها
عماد:الو رودينة
رودينة:عماد في راجل جاء تحت ويبيك يستنى فيك في الصالون الي برا ومعاه بنت
عماد:باهي باهي جيت
ونزل عماد بسرعة وخش عليه وتفاجأ ان هذي نور وباتها0_0
الراجل:سامحني واجد بس انا جاي نشكرك واجد بكل بنتي شفت من المرض الحمدالله
عماد:الحمد والشكر لكي يارب تعالي يانور سبحانك ربي الحمدالله الي صارت معجزة
صوفيا حطت صورة كبيرة لـ رشا في الحوش
صوفيا:الله يرحمك ويسامحك ياحبيبتي
عماد:احلى حاجة فيك طيبة قلبك والله كذاب الي قال عليك #جريمة صوفيا
صوفيا:رشا صاح ماتت لكن واقسم بالله عايشة في قلوبنا كلنا
عماد:الله يرحمها ويسامحها صورة حلوة بكل
صوفيا:عماد انا قررت قرار ولازم تكون جنبي انت
عماد:شنو قررتي
صوفيا:بابا مشاءالله مسيب املاك واجد بكل بكل بكل يعني وعشان هكي قررت نبيعهن كلهن ونتبرع بيهن على روح باتي وامي ورشا
عماد:على راحتك ياصوفيا وانا نحبك واجد
صوفيا:وانا نحبك واجد بكل بكل ونحب لينا ونحب سراج واجد
وعاش الجميع في امن وامان واستقرار وصحبتهم دامت سنوات وسنوات
والكل في النهاية خذا الانسان الي يحبة والدكتورة فاطمة ردت لـ شغلها من جديد وحطت صورت رشا في المكتب كـ نوع من الذكرى
.............النهاية...........
مش حاب نطول عليكم في الختام وبعد نهاية رواية جريمة صوفيا ياريت تكونوا خذيتوا منها عبر واستفدتوا كلكم منها حبيت نوضح ظاهرة الزواج عن طريق الام وكيف هوا غلط في غلط ووضحت كل حاجة من خلال المعاناة الي عاشتها رشا مع عماد وبرضوا حتى عماد كان يعاني واجد رد بالك ياصديقي تختار بنت متعرفهش ولا هيا تعرفك يعني بالعربي زواج باب الحارة انتهاء من زمان،وبرضو نصيحة للبنات ردي بالك توافقي على شخص بس عشان فلوسة وكم ثروتة لأنك انتي الي حـ تتعبي بعدين
العبرة الثانية وهيا قضية وقصة صوفيا،شخصيآ حاب ننصح الجميع رد بالك تحكم على حاجة انت مش شايفها بعينك مهما كانت كبيرة او صغيرة خليك ديما واعي وشوف بعيد وصكر وذنك
العبرة الثالثة الي صار مع معين وعماد وكيف كانت علاقتهم قوية وزي الاخوات وممكن اكثر ولكن في النهاية خان صاحبة وكذب عليه بكل صدق
وبرضو الي صار مع فاطمة ورشا،احفظوا اسرار بعضكم مهما كانت الظروف
ونصيحة اخيرة مديرش كيف سراج متجرش وراء حاجة ضاعت خلاص ومعندكش فيها نصيب
سيناريو جريمة صوفيا كانت متعب بكل وخذا مني مجهود واجد لأن الرواية مرتبطة ببعضها واجد ونمتنى تكون نالت اعجابكم
وشكرآ للجميع على المتابعة الطيبة هذي وسامحوني على حرق الدم وسامحوني لو زعلت حد منكم
رمضانكم مبارك يارب وكل سنة وانتم طيبين جميعآ وادعولي بالتوفيق وربي يحفظكم كلكم
اصدقائي بإذن الله بعد يومين ح انزل رواية من تأليفي بعنوان #حلم_السنين انتطروها❤️