جريمة صوفيا

الحلقة(9)

الحلقة التاسعة 9 من رواية #جريمة_صوفيا مؤلف القصة انا #إبراهيم_رشيد
قراءة ممتعة
رشا:ضروري يعني0_0
عماد:ضروري بكل بكل بكل
عماد كان ماسك يد رشا وعينه في عينها
عماد:تي هيا قوليها
رشا ردت حضناته بالقوة
رشا:نحبك ياسراج نحبك واجد بكل ياسراج
رشا في اللحظة هذي عرفت روحها دارت مصيبة كبيرة بكل ومكانتش حاسة على روحها ابدآ فعلآ كان صايرلها حاجة كيف السحر
عماد حط عينه في عين رشا من جديد
عماد:ههههه كنك ياروحي سراج اهو قاعد راقد
طبعآ عماد مسكين كان مش عارف حاجة ابدآ
رشا ردت عليه بكل خوف وارتباك
رشا:اها اها صح سراج راقد وانا ارتبكت ومكنتش مركزة بس عماد انا مش متعودة عليك هكي اسفة شويا ونجيك
ومشت رشا تجري وخشت غسلت وجها وشافت في المراية
رشا:انسيه يارشا خلاص انسيه وركزي في حياتك وفي حوشك وفي عماد وبس مش عارفة انا شن درت كيف قلتيها بس يارشا كيف صارت هذي حرام عليك عماد قاعد يدير في اي حاجة عشان يخليني سعيدة وانا قاعدة نفكر في غيرة
عماد كان قاعد ويفكر وخذا صورته هوا ورشا وهما عرسان من جنب السرير
عماد:معقولة هيا هكي؟للدرجة هذي انا كنت سيء بكل غبي ومغفل ياعماد نسيتك واهملتك واجد وكنت مخلي حياتي كلها شغل شغل شغل شغل شغل ربي يعطيني عمر يارشا ونعوضك ونعيشك احلا ايام انتي فعلآ بنت حلال وتستاهلي كل خير
مشا اليوم هذا على خير وطلعت الشمس وجاء الصبح
عماد:والله حتى اليوم خاطري نفطر معاك وبروحنا
رشا:لا عمتي تزعل ياعماد
عماد:بس انا مازلت ماشبعت منك
رشا:احم احم انا واخذة لينو ونازلة كمل لبس انت والحقنا وسراج راقد
عماد:ههههه ماشي تمام
عماد قعد يلبس وكان اليوم انيق بكل بكل
رشا:صباح الخير ياعمتي معقولة تبدي في الفطور بروحك
منال:صباح النور لا عادي ولا يهمك خير يالينو
رشا:نعاليا منها لينو هذي متعبتني بكل ياعمتي
منال:كنها خير
رشا:كل حاجة تاخذها وتكسرها فوق قعدت خايفة على الاثاث كله والله
منال:ههههههه اي بيبي في السن هذا هكي يارشا متخافش
رشا:مش هكي اي حاجة تاخذها وتقرب منها ضي وهكي وانا نخاف عليها
منال:انتي بس راقبيها وخليها ديما تحت عينك شوفي انا عماد ووسام ومالك الله يسامحهم كانو هاديين بكل اما رودينة تعبتني بكل بكل
رودينة:احم صباح الخير سمعت اسمي
رشا:هههه عمرك طويل نحكو عليك وانتي بيبي
رودينة:كنت اكيت واحلا وحدة في الدنيا ربي يحفظني ياناس
حطو سفرة الفطور وعماد نزل
رودينة:قولي انت كنك انيق اليوم هكي
عماد:شن فرقت مو ديما نفس اللبس والشكل
رودينة:لا بس اليوم زيادة شويا حسيت هكي وعطور وجو
عماد:هيا نحنا طولنا المحاضرة تبي تبدا
رودينة:تمام
وطلعو عماد ورودينة وركبو للسيارة
عماد:قوليلي مالك يرن عليك ولالا
رودينة:هكي مرة مرة نحكو مش بشكل يومي
عماد:رنيت عليه ونسيت نعاودلة بكل والثاني وسام نرن عليه مقفل
رودينة:غريبة شنو سر الاهتمام هذا
عماد:عادي يعني ماهو خوتي الصغار وواجبي نسأل عليهم
رودينة:بديت متغير واجد ياعماد
عماد:واو معش عرفت كيف نراضيكم انا بكل
رودينة:باهي خلينا نصورو سيلفي خاطري فيها من زمان وانت تقولي لا لا
عماد:هيا باهي
رودينة:نعاليا والله طلعت صورة سمحة بكل نبي انزلها
عماد:نعن جد تنزليها ؟
رودينة:توا معلش انت عارف اختك مشهورة بكل بكل يعني لو جاء يوم وطلبوني في التليفيزيون ح تقولي لا
عماد:واو عليك بنت صاطمة اسكتي خلاص
وصلو عماد ورودينة وزي كل يوم كل واحد مشا للكلية متاعة
عماد:صباح الخير صوفيا
صوفيا شافت عماد انيق بكل ونظرتله بنطرة اعجاب
صوفيا:صباح النور دكتور عماد
عماد:شنو ان شاءالله جاهزة موعدنا قرب راه
صوفيا:اكيد بس في حاجة بسيطة
عماد:شنو هيا
صوفيا:هوا انا يعني ح نركب معاك في السيارة هكي ديما؟
عماد:شنو المشكلة انتي عندك اعتراض؟
صوفيا:لالالا مش هكي بس انت متزوج ونخاف بس نديرلك مشكلة
عماد:هههههههه لا مفش حاجة زي هكي رشا زوجتي متفاهمة بكل ومعندهش على جو الغيرة
صوفيا:غريبة كيف متغارش
عماد:مش هكي بس هيا عارفة انها متزوجة واحد ضروري يكون ديما مع النساء زي الطالبات والممرضات وهكي
صوفيا:باهي كويس وانت مشاءالله كل يوم نسمع عليك في الراديو او في التليفيزيون يحكو عليك وفي ناس واجد يدعولك
عماد:الحمدالله ربي العالمين انا تعبت واجد عشان وصلت للمجال هذا الدور توا عليك انتي
صوفيا:انا بما اني في السن هذا درستني انت وبإذن الله ح نشتغل معاك انت فـ اكيد ح نوصل لطموحي
عماد:يارب يارب هيا نخشو للمحاضرة
وبعد ساعة تقريبآ نمشو مع بعضنا شويا لـ رشا
رشا كانت سعيدة وطايرة من الفرحة لأن الشخص الي قدامها مش عماد هوا شخص ثاني بكل
كانت رشا تلبس وهكي لأنها تبي تطلع وفجأ رن تليفون وكانت مكالمة واتساب
رشا:اووو مالك
مالك:يااهلآ وسهلآ بـ زوجة اخي نوارة حوشنا
رشا:كيف حالك وكيف حال فرنسا
مالك:تمام التمام كنك معش تكلمي فيا بكل
رشا:والله انت عارف العيال ومشغولة وهكي
مالك:باهي باهي كويس شنجوكم كلكم
رشا:تمام قاعدين احكيلي عليك انت كيف حالك
مالك:كويس الحمدالله نبي نروح قريب يارشا
رشا:باهي مشاءالله والله مرايفين عليك واجد
مالك:والله حتى انا واجد بكل
رشا:باهي قولي لو جيت كم ح تقعد
مالك:هوا عندي عطلة طويلة ممكن شهرين او ثلاثة
رشا:باهي كويس ح تقعد معانا واجد معناها
مالك:اكيد بس بصراحة انا جاي حتى نبي ناخذ خطوة جديدة يعني
رشا:زي شنو
مالك:يارشا انا منخبش عليك في شي انا بصراحة نحب وحدة واجد ولما نجي ضروري نخطبها او ندير اي شي خايف تضيع مني
رشا:باهي كويس بكل شد الهمة وتعال معناها نخطبوها لكي
مالك:منش عارف خايف عماد يرفض
رشا:انت غير تعال بس وعماد شوري انا
مالك:والله طول عمرك ماركة اصلية بكل
رشا:لا مش بيناتنا وعماد شن يبي يقول يعني هذا اختيارك وهوا مدخلش بكل
مالك:باهي بس انا نبي منك خدمة ثانية
رشا:شنو هيا
مالك:البنت الي نحبها ونبيها تشتغل في صيدلية وانا حاب انتي اول وحدة تمشيلها واتعرفي عليها
رشا:حاضر والله عادي بكل نمشيلها ليش لا
مالك:تمام التمام ح نعطيك يوم ونقولك وين عنوانها
رشا:مفش مشكلة بس لو روحت وجيت بدون ماتجيبلي الي نبيه من فرنسا صدقني مش ح يصير خير
مالك:هههههه والله حافظهن حاضر عطر (جي لا روش) وشكولاطة فيريرو روشيه
رشا:ايوا شاطر ومن شارع شانزيليزيه نبيهن،وفيريرو كثر منها واجد
مالك:تم تم حاضر
صكر مالك من رشا رن عليه عماد طول
عماد:تي وين من مبدري نكلم فيك يطلعلي يجري مكالمة اخرى
مالك:لا غير كنت نحكي مع رشا بس
عماد:اها باهي كيف حالك
مالك:والله الحمدالله كويس
عماد:وشن جو القراية ماشي تمام
مالك:اكيد عندي عطلة بس شهرين او ثلاثة نبي نجي نشوفكم ونشوف امي
عماد:تمام شنو حجزت ولالا
مالك:لا الايام الجاية ح نحجز ونقوللكم امتى نبي نجي كيف حالك انت وين قاعد
عماد:طلعت من الجامعة وماشي للمستشفى اسمع بس امشي لشركة الحوالات حولتلك مبلغ كويس ودزيتلك الكود
مالك:باهي عليش انا عندي واموري تمام
عماد:اكيد تبي تجيب هداية وهكي عيش بيهن هذينا
مالك:منور ياولد امي والله مانك عادي بكل
عماد:هههههههه هيا خلاص صكر
وصكرو الخط.
مالك:عماد؟هههه غريبة بكل
عماد كان يسوق وفجأ رن تليفونة شافة وسام ورد على طول
عماد:الو ياوسام نرن عليك مقفل مقفل
وسام:ماهو واخذين التليفونات يعطوهن لنا شويا بس في اليوم
عماد:باهي شن الجو وشن الامور
وسام:والله من الصبح اليوم تعب ومطر وتدريب
عماد:باهي المهم انت كويس
وسام:لا انا تمام التمام طمنوني عليكم انتو
عماد:تمام التمام انت تبي حاجة قولي ولا ناقصتك حاجة
وسام:لا ياعماد نبي سلامتك صكر توا بس خليني نلحق نطمن امك عليا
عماد:تمام كلمها لأنها مشغولة عليك
وسام:تمام اوكي
وصكرو الخط.
عماد:إن شاءالله تردوا انتو الاثنين واحد دكتور وواحد ضابط شرطي والبنت الثانية هذي تكون احسن كاتبة،والله خاطري تكونوا احسن ثلاثي في الدنيا
وصل عماد للمستشفى وزي ديما بدا الشغل
وبأختصار رشا طلعت وكان عندها جلسة مع فاطمة
فاطمة:مشاءالله اليوم وجهك منور ومبسوطة
رشا:مش عارفة يافاطمة عماد يبي يجنني بكل
فاطمة:كنه خير؟
رشا:منش عارف تغير وانقلب 360 درجة معايا حب وغرام ويدير في روحة مرايف ومشتاق وحاجات واجد ورايح رومانسي بكل والله معش فهمت شي
فاطمة:هههه شنو باهي زيدي احكي
وكملت الجلسة وكانت فاطمة مبسوطة واجد لأن واضح ان رشا فرحانه من عماد
وطلعت رشا وفاطمة رنت على عماد
فاطمة:وين وين داير شغل سمح والخاتم سمح بكل
عماد:ههههه شن رايك بس
فاطمة:طلعت شاطر وتسمع في الكلام
عماد:هههه وجك توا عندي شغل مش فاضي توا في الريست نجيك
فاطمة:هههه تشاو
مشن الايام بسرعة عادي مفش اي جديد والكل ملاحظ تغير عماد التام وكيف قعد مهتم بخوته وبـ رشا ولينا وسراج عماد فعلآ ادرك ان الحياة مش بس شغل وتعب وخلاص في ناس في حياتنا تستاهل الاهتمام وتستاهل نكون جنبها
جاء اليوم الي شرفت فيه صوفيا لأول مرة للمستشفى مع عماد وكان قاعد يشرحلها في كل التفاصيل
عماد:تمام ياصوفيا اي حالة تجي ح تسجلي بياناتها هنا وياخذ الرقم متاعه والساعة الي فيها الكشف والحجز نبي منظم
صوفيا:تمام انا فاهمة عليك وهذا الشغل قاعد كلة قدامي اطمن
عماد:تمام على بركة الله وبالنسبة للراتب مش ح نقصر معاك
صوفيا:بارك الله فيك^^
عماد:لا هذا حقك ياصوفيا خلينا نبدو في اول حالة
بدا الشغل وبدا عماد طبعآ يكشف وهكي
لين جت تقريبآ ساعة 5 العشية
عماد:صوفيا هيا في راجل كبير برا خليه يخش قبل الحالات
صوفيا:بس شويا في عندك مفاجأ اليوم
عماد:شنو هيا
صوفيا:في دكتور برا يبي يقابلك ضروري ومعاه عيل صغير حوالي عمرة 8 سنوات
عماد:تمام خليهم يخشو
اندهش عماد من المنظر الي هوا شافة لأن كان الطفل هذا عنده شلل ومش قادر يمشي وكان داير حادث كبير بكل وباته وامة ماتو لكن هوا عاش
العيل هذا خش على عماد ومعاه الدكتور متاع العلاج الطبيعي
الدكتور:دكتور عماد شوف المفاجأ
عماد:ايهم ياوحش الف الحمدالله على سلامتك
ونزل عماد وحضن الطفل ايهم
ايهم:دكتور عماد انا انحبك واجد بكل بكل قالولي انت السبب اني رديت نمشي
عماد:حبيبي والله الفضل لربي ياايهم
ايهم:بس انا كان في خاطري بابا وماما يكونوا معايا ويشوفوني كيف انا ح نقعد نمشي ومش ح نتعبهم معايا
عماد عيونه دمعن وصوفيا بدت تبكي على طول
عماد:ايهم بابا وماما توا في مكان احسن من هكي تخيل بابا وماما قاعدين في الجنة توا
الدكتور:عماد عندي لكي مفاجأ ثانية بكرا على ساعة 8 انت ضيف في قناة......... ومعاك ايهم
عماد:معقولة انا عماد نطلع في قناة كيف هكي والعالم كلة يشوفني لا انا مش مصدق
طار عماد من فرحتة وطبعآ لما روح قالها لأهلة وهكي
رودينة:را يصيبك الغرور يااخي العزيز
عماد:اسكتي انا مش قادر نستوعب الفكرة انا بمجرد مانشوف الكاميرة مش ح نعرف نحكي كلمة
منال:بس والله جزاك الله خير رضيت تعالج ايهم بالبلاش
رشا:عماد اطيب واحن قلب في الدنيا كلها
جاء ثاني يوم وعماد كان في المستشفى وبرضو زي ديما ضغط بكل عليه ومشغول
صوفيا خشت عليه وفي يدها باقة ورد
عماد:شنو ياصوفيا؟
صوفيا:دكتور هذي جابها لكي حد متاع خدمة توصيل وفيها رسالة
عماد:هههه تمام حطيها
توقع عماد انها من رشا او حد من اهلة خصوصآ ان اليوم مهم بكل بالنسبة لاه لأن ح يطلع في قناة مشهورة بكل
عماد مسك الباقة وفجأ فتح الرسالة وبدا يقرا وكان مكتوب فيها
(اهلين دكتور عماد الحقيقة من الرغم من انك انسان ناجح بكل الا انك مغفل واغبى واحد في العالم زوجتك رشا تخون فيك وتحب واحد غيرك وانت مش داري ولا حاس بحاجة انت مغفل بكل وزوجتك هذي وحدة خاينة ومش محترمة و..........و........و........... والدليل.................)0_0
عماد:..........................0_0
انا وانتو:............................0_0يتبع الحلقة العاشرة