جريمة صوفيا

الحلقة(23)

الحلقة الثالثة والعشرين 23 من رواية #جريمة_صوفيا مؤلف القصة انا #إبراهيم_رشيد
قراءة ممتعة
صوفيا:اليوم انت كنت اكثر دقة في الشغل عشان هكي تعبت
عماد:الله غالب خايف يتكرر الموضوع متاع عبد الرحمن من جديد الناس هذي امانة في رقبتي
فجأ رن تليفون عماد وكانت رودينة
عماد:الو رودينة
رودينة كانت تبكي وخلاص وتبكي جديات
عماد:تي كنك تبكي يابنت احكيلي حد مزعلك قولي بسرعة
رودينة:كارثة كارثة ياعماد
عماد صبا على طول
عماد:تي كارثة شنو تي احكي
رودينة:ماما ياعماد ماما
عماد:تي كنها امي شن في
رودينة:تعبت وداخت وطاحت علينا في الحوش
عماد:تي شن تحكي انتي كيف صار هكي
رودينة:عماد ارجوك انزل بسرعة نحنا قاعدين في قسم الاسعاف تحت
عماد:باهي باهي جيت هيا جيت صكري صكري
وصكروا الخط.
صوفيا:شن في الوالدة فيها حاجة
عماد:مش عارف مش عارف تعالي معايا قاعدة في قسم الاسعاف
نزل عماد ووراه صوفيا وكان عماد يجري بسرعة بكل وصوفيا تحاول توصل فيه
نزلو تحت وشافو رودينة ومالك
عماد:شن في كنها امي كنها
رودينة:مش عارفة ياعماد والله تعبت ودايخة قاعدة
مالك:خذيتها وجينا هنا طول
صوفيا:اهدوا بس ان شاءالله مفش شي خطير
معين جاء يجري على طول
معين:شن في بلغوني توا عمتي منال وين
عماد خش هوا وصوفيا ومعين
معين:تنفس بسرعة ياصوفيا بسرعة
عماد:امي امي ردي عليا
معين:عماد اطلع برا انا هكي مش ح نعرف ندير شي
صوفيا:دكتور اطلع هكي مش ح نعرفوا نديروا حاجة
عماد:تي لا مش ح نطلع انا ضروري نكون جنب امي
معين:ياراجل اطلع وخليني نشتغل اطلع قتلك
معين مسك عماد بالقوة وطلعة برا
عماد ورودينة ومالك كانوا منهارين بكل بكل ورودينة تبكي
عماد:امي كنها جاوبوني
مالك:واقسم بالله كان مافيها شي باهي كانت كويسة وفجأ داخت
رودينة:ماما شن فيها ياعماد قولي
عماد:يارب يكون الي في بالي غلط بس يارب
رودينة فتحت التليفون ورنت على وسام وحكتلة
وسام:شنو شنو تحكي انتي امي في المستشفى تي باهي انا جاي توا بسرعة
وصكر وسام الخط.
محمود:خير ياوسام في حاجة
وسام:امي امي في المستشفى انا نبي نطلع
محمود:تمام اطلع ورن بلغني ياوسام طمني عليها
وسام:تمام تمام
وسام طلع وهوا يجري لين وصل في السيارة وولعها ومشا بسرعة بكل
كان وسام يسوق بسرعة متهورة بكل ورن تليفونة
وسام:الو فاطمة
فاطمة:اهلين وسام كنت نبي نحكيلك على موضوع القضية بس
وسام:فاطمة بعدين بعدين
فاطمة:كنك في حاجة
وسام:امي مش عارف كنها كلموني قالولي قاعدة في المستشفى وانا توا ماشي غادي
فاطمة:عمتي منال0_0تي باهي باهي حتى انا توا طالعة
وصكروا الخط بعد شويا وصل وسام ووراه فاطمة وقعدوا الكل يستنوا على نار
طلع معين ووراه صوفيا
معين:عماد عمتي منال تحتاج عملية ضروري وانا بلغتهم يجهزوا غرفة العمليات بسرعة
رودينة:تي شن في قولولي
عماد:معين امي كنها
معين:متخافوش عندها جلطة دماغية بس مش قوية وانا ضروري توا نديرلها عملية
مالك:جلطة دماغية
وسام:تي كيف صار هكي
رودينة:تي لا ماما
فاطمة:وسعي بالك يارودينة قال جلطة خفيفة يعني ساهلة
صوفيا:دكتور غرفة العمليات جاهزة
معين:تمام هيا
عماد:معين مش ح نخليك بروحك ضروري نخش معاك
معين:عماد انت اطلع منها وانا نعرف شغلي كويس متخافوش والله عملية بسيطة والجلطة مش قوية واجد
فاطمة:كلام معين صاح عماد انت مش لازم تكون معاهم خليك هنا بس
وطلعت منال وعلى وجها جهاز التنفس الاصطناعي والكل وراها لين خشت لغرفة العمليات
عماد:فهموني امكم كنها بس شن صار
وسام:تي ياعماد الف مرة سألت وقالولك مفش شي
عماد:لا في هذا كلة بسبب ضغطها كان عالي بكل وجت الجلطة
رودينة:والله نحنا روحنا من عند رشا عادي ومفش شي
فاطمة:خلاص ياعماد مش وقتة هذا كلة توا
وبعد ساعة رن تليفون فاطمة.
فاطمة مشت لـ نهاية الممر وردت
فاطمة:الو بيسان
بيسان:اهلين فاطمة نكلم فيك مقفل الحمدالله فتحتي تليفونك
فاطمة:اها والله بس بنقولك توا انا قاعدة في المستشفى عمتي منال جتها جلطة دماغية وتوا قاعدة في العمليات والكل قاعد هنا
بيسان:معقولة ياحرام باهي شن دايرة توا
فاطمة:والله مش معروف لعند توا في العمليات والكل قاعد هنا مشغول
بيسان:باهي باهي طمنيني يافاطمة لو صارت حاجة
فاطمة:تمام
وصكرن الخط.
رشا:شنو طمنيني وفاطمة منو هذي
بيسان:هذا فاطمة صديقتك قصدي الي كانت صديقتك
رشا:شن في ومن امتى في بيناتكم مكالمات اصلآ
بيسان:مش مهم توا المهم عمتي منال لما طلعت من هنا روحو بيها للحوش وجتها جلطة دماغية وحاليآ هيا في غرفة العمليات
رشا:لا عمتي منال تي تحكي جديات انتي
بيسان:واقسم بالله هذا الكلام الي قالاته ليا فاطمة وقالت الكل معاها في المستشفى
رشا:بابا بابا
الحق الكل كان يحب منال واجد بكل لأنها كانت حنونة على الكل
الكل كان على نار وخلاص ويستنى وبعد شويا عماد شاف حسن ورشا جايين ومعاهم إيمان
طبعآ جت رشا ومشت شور فاطمة ورودينة على طول
رشا:شن في عمتي منال كنها
فاطمة:اهدي يارشا مفش حاجة خطيرة ان شاءالله
في الجيهة المقابلة مالك ووسام وعماد وحسن
حسن:الف لاباس على الوالدة شن اخبارها
عماد:الله لا يوريك باس
مالك:والله كلنا نستنوا في الدكتور معين لين يطلع
حسن:ان شاءالله يطلع يطمنا متخافوش مفش حاجة خطيرة
وبعد تقريبآ نص ساعة طلع معين
عماد:شن في طمنا يامعين
رشا:احكي يامعين
رودينة:وين ماما نبي نشوفها
معين:اطمنوا اطمنوا عمتي منال وضعها كويس بكل والحمدالله من الاول قلت كل شي تحت السيطرة وجت خفيفة بس
وسام:الحمدالله يارب
مالك:باهي امتى نقدروا نشوفوها
معين:عادي شويا وتشوفوها مش مشكلة بكل
فاطمة:باهي تمام
معين:نستأذنكم عماد تعال معايا شويا للمكتب
وخشو كلهم على منال وكانوا جنبها
الا حسن كان برا
حسن:وينها إيمان هذي ورشا هيا نمشو خلاص
معين وعماد خشو للمكتب
عماد:شنو طمني يامعين
معين:وضعها تمام ياعماد وامورها طيبة متخافش
عماد:وامتى تطلع باهي
معين:ممكن اليوم تكون في المستشفى وبكرا تقدر تطلع عادي
عماد:باهي اشرحلي طبيآ امي شن صارلها
وقعدوا يحكو شويا
عماد:نفهم من كلامك ان مش ح يرد كل شي كيف الاول
معين:تي طبعآ ياعماد كنك انت دكتور وعارف شن معنى جلطة دماغية عمتي منال انا نعرفها كويس تحرق في دمها عليكم واجد وديما تحوس في الحوش وتتعب هذا كلة بعد اليوم ياعماد منبش لأن لا سمح الله لو تكرر الموضوع ح يصيرن حاجات مش كويسة عشانها
عماد:لا تمام مستحيل خلاص معش تقرب ولا حاجة في الحوش وانا حاس اني نبي نجيبلها من يخدمها في الحوش
معين:ياعيني عليك يكون احسن ممرضة معاها تمام بكل بكل
عماد:اكيد ضروري لأنها تحتاج رعاية طبية كاملة الفترة الجاية
معين:باهي كويس المستشفى مليانة اختار الي يعجبك وخوذ
عماد:نفكر في صوفيا يامعين شن رايك0_0
معين:صوفيا كويس بنت كويسة بس انت ياعماد كأنك واثق في البنت هذي زيادة عن اللزوم
عماد:صوفيا كويسة بكل وبنت متربية والاهم مش ح نلقا خير منها بكل لأن عندنا ازمة ممرضات الحق
معين:عادي شوفها بس البنت تقرا وهكي
عماد:لالا نحنا بكرا اخر يوم في الجامعة وبعدين عندنا عطلة شهرين
معين:على راحتك المهم اعرف منو تجيب لحوشك لأن هذي تبي تقعد عايشة معاكم فترة وجيزة
عماد:لالا تمام صوفيا حـ نحكيلها انا وهيا اكيد توافق
معين:تمام وبعدين ح نسلمك تقرير عمتي منال
عماد:تمام خليني نمشي نشوفها انا توا
ومشا عماد ولقا الكل جنب امة
عماد جت عينة في عين رشا
عماد:لا هكي غلط وسعولي شويا نبي ست الحبايب
مالك:هههههههههه تعال بكرا مفش مكان توا
عماد:الحمدالله على سلامتك يااحلى ام في الدنيا
منال:الله يسلمك ياعماد
وقعدوا معاها شويا وبعدين جت صوفيا
صوفيا:معلش هكي غلط خلوها ترتاح شويا الزحمة هذي مش كويسة عشانها
عماد:كلام صوفيا صاح هيا اطلعوا
الكل كان يبي يطلع
منال:عماد ورشا
رشا:نعم ياعمتي
عماد:نعم ياامي
منال:تعالوا جنبي شويا
عماد جاء من اليمين ورشا من اليسار
رشا:عارفة عارفة شن تبي تقولي انا اسفة بجد طلعتي من عندي زعلانة وحاسة كل الي صار بسببي
منال:متقولش هكي يارشا الي صارلي نصيب من ربي
رشا:خلاص ياعمتي الي تبيه ح يصير و ح ندير اي شي عشان خاطرك
منال:عماد انا امتى ح نطلع من هنا
عماد:معين قالي بكرا
منال:باهي كويس من بكرا نبي رشا تجي للحوش
عماد:حاضر
عماد كان معندش وجه يحكي مع رشا اصلآ ولا يحط عينه في عينها
رشا:خلاص انتي تبي هكي معناها ح يصير سلامتك ياعمتي
وطلعت رشا ومعاها عماد
حسن:الف سلامة على الوالدة ومع الف سلامة
حسن كان يبي يمشي هوا ورشا وإيمان
عماد:عمي حسن
حسن:نعم
عماد:بعد اذنك انا بكرا نبي نجي ومعايا الشيخ عشان نرد رشا
حسن:تمام في انتظارك
وكملوا طريقهم ومشو.
رودينة:شنو الخبر السمح هذا قصدك رشا وافقت
عماد:اها تمام الامور
وسام:باهي تمام بكرا امتى نمشولها ياعماد
عماد:مش عارف ممكن نطلعوا امك قبل بعدين توا نمشو لـ رشا
مالك:امي امتى تطلع اصلآ
عماد:معين قال بكرا اسمعوني شويا انتو الثلاثة
فاطمة:انا نستأذن منكم ان شاءالله ح نجي نزورها لما تطلع
رودينة:خليك شويا يافاطمة
فاطمة:لا غير مسيبة مراد بروحة بس
عماد:فاطمة انا وانتي ضروري نحكو
فاطمة:لما تفضى كلمني،المهم الف لاباس على عمتي منال
ومشت فاطمة.
وسام:شنو تبي تحكي ياعماد احكي
عماد:شوفوا واسمعوني كويس انا مبدري كنت عند معين وقالي كل شي على امي وحالتها
رودينة:هوا قال كويسة ياعماد
عماد:هيا كويسة ماقلت شي انا بس مش ح يرد كل شي كيف قبل
مالك:حسب مانعرف انا ان ممكن ترد عليها من جديد
عماد:عليك نور يامالك
وسام:شن الحل باهي
عماد:الحل ان امكم تقعد طول اليوم مديريش في شي يعني لا تخش للمطبخ لا تغسل ولا اي شي كل حاجة ح اتغير الايام الجاية
رودينة:تي باهي هذا كلة ساهل غير هيا تطلع بس
عماد:وضروري الفترة الجاية تكون تحت الرعاية الطبية حتى وهيا في الحوش
مالك:باهي انا قاعد ياعماد
عماد:انت بروحك متكفش وانا ديما مش فاضي فـ عشان هكي انا نبي نجيبلها حد يرعاها في الحوش و ح نجيب صوفيا
رودينة:صوفيا قصدك البنت الي توا هذي
مالك:يعني صوفيا احسن مني
عماد:اها احسن منك انا بصراحة امي منقدرش نأمنها عندك انت
وسام:باهي ياعماد لو البنت ثقة جيبها عادي
عماد:خلاص توا انتو روحو للحوش وانا ح نجي بعدكم
مالك:بس كيف امي تقعد بروحها
رودينة:لا انا منبش نسيب ماما اليوم
عماد:الكل هنا معاها شن ح تقدموا انتم يعني وبعدين رودينة روحي عشان تجهزي الغرفة الفاضية الي عندنا لـ صوفيا
رودينة:باهي حاضر
وسام:قصدي هيا وافقت ياعماد
عماد:ح نحكي معاها وان شاءالله ح توافق
وسام:تمام
وطلع وسام ومعاه رودينة ومالك.
مالك:هيا يارودينة
رودينة:لا امشي في سيارتك انا نبي نمشي مع وسام
مالك:به
وركبت رودينة مع وسام.
رودينة:ياوسام فهمني شن قاعد يصير
وسام:منش عارف شي يارودينة من كم يوم رشا كانت خاينة وخوك طلقها وبكرا يبي يردها واليوم شفتي شن صار مع امك انا مش فاهم حاجة
رودينة:والله مش عارفه ح نشوفوا شن يصير يستر الله وخلاص
مالك كان يسوق ويكلم في يارا
مالك:لا امورها تمام توا وانا مروح في الطريق
يارا:يامالك عيب عليك مش قتلك لما تكون جنبها عطيني نكلمها
مالك:يا يارا والله قعدنا معاها ربع ساعة بس لما تروح ح نخليها تكلمك
يارا:باهي ياحبيبي سوق توا ولما تروح كلمني
مالك:تمام باي
وصكرت يارا الخط.
نجاح(ام يارا):طمنيني يابنتي كيف حال عمتك
يارا:قال كويسة مالك وبكرا تبي تطلع
نجاح:باهي كويس
يارا:ماما هوا نحنا عادي نمشو نزوروها
نجاح:اكيد ح نمشو يابنتي عيب دايرة عملية لازم نقوموا بواجبها
رودينة ووسام ومالك وصلو للحوش..
وسام:كنكم شنو في
رودينة:مش مستعوبة فكرة يجي حد يعيش معانا
مالك:حتى انا
وسام:شن نديروا ماهو هذي هيا حالة امكم ضروري تبي رعاية
رودينة:بس قصدي قاعدة انا وبكرا ح تجي رشا
وسام:شكلكم مفهمتوش شن قال عماد تبي رعاية طبية مالك احكيلك كلمة مش انت ح تقعد دكتور
مالك:باهي ياوسام قصدي كيف ح ناخذوا راحتنا
وسام:وعليش يعني الحوش مشاءالله كبير بكل وفاضي مفش حد وانا اصلآ منقعدش بكل انت الي 24 ساعة هنا وبعدين البنت مش ح تضايقك
رودينة:باهي يستر الله
وسام:جهزي الدار بس كيف ماقالك عماد وانا نبي نرقد شويا فكوني من الهرجة
عماد كان في المستشفى يشوف في حالة امة وهكي
صوفيا:متخافش ح تقعد كويسة
عماد:الحمدالله على كل شي وخلاص،تعالي ياصوفيا نبيك برا شويا
صوفيا:نعم
وطلعت صوفيا مع عماد
عماد:شوفي ياصوفيا انا منكذبش عليك حالة امي مش مستقرة 100% وانا ضروري نجيب حد يرعاها طبيآ وهكي للحوش ويقعد معاها فترة وانا بصراحة ملقيتش احسن منك ف لو موافقة تجي للحوش وتقعدي مع امي مرحبتين بيك و ح نعطيك المبلغ الي تطلبيه
صوفيا:انا ونجي نعيش معاكم0_0
عماد:اها لأن زي ماقتلك مفش حد احسن منك ومفش حد نقدر نحط فيه الثقة هذي وردي بالك تفكري انك جاية خدامة لا سمح الله لا انتي تراعي امي وبس مش شورك بشي ثاني
صوفيا:شوف يادكتور انا ح نوافق لأن بس عارفة مفش وحدة ترضا تجي معاك لأن زي ماتعرف الكل هنا عندهن اب و ام ولو معندهنش اقل شي في اهل فـ الاكيد مش ح يسمحو بالشي هذا يصير مش ح نردك دكتور عماد
عماد:وهذا هوا عشمي فيك ياصوفيا
صوفيا:باهي نبي نفهم كيف يعني انا ح نسيب شغلي عندك
عماد:هذا موضوع بروحة شغلك عندي ملش اي علاقة  لما تستقر حالة امي ح تردي تلقي مكانك فاضي،اما توا ح نحط وحدة بدالك
صوفيا:تمام
طلعو عماد وصوفيا ووصلها عماد ومشا
صوفيا ركبت وكانت محتارة بكل
صوفيا:مش عارفة هل ح تكون خطوة ايجابية ولا اني نبعد على المستشفى؟بس الي نعرفة بما اني ح نخش في حوش العيلة هذي ح تسهل عليا حاجات واجد بكل ربي يوفقني في الي جاي بجد انا بديت متحسمة اكثر
وبعد شويا هكي رنت صوفيا وزي ديما مكالمة مجهولة
صوفيا:اها اكيد قريت المسج متاعي...........شن نبي ندير انا المستشفى خلاص قررت نفوتها حاليآ شويا وبعدين لما نعيش معاهم ح تسهل عليا المهمة...........لا مش هكي افهم عليا انا هكي ح نقعد قريبة منهم اكثر هكي قعدت بعيدة بكل خصوصآ بعد قررت نغير الخطة...........ماهو الخطة الاولى لقيتها ح تضر الناس وخلاص عماد مش ح تصيرلة ولا اي حاجة،المهم من بكرا ح نحكو مسجات وبس 
روح عماد وخش للحوش وشاف مالك
عماد:الاخ مالك سهران
مالك:اها اكيد
عماد:وين رودينة
مالك:جهزت الدار ورقدت
عماد:باهي تمام وانت عليش قاعد هنا تستنى فيا ولا شنو
مالك:اها كنت نستنى فيك
عماد:شن في
مالك:حكتلي رودينة على صوفيا هذي قصدي كيف ياعماد
عماد:كيف شنو امالا عليش قعدت ساعة نشرحلكم في المستشفى انا
مالك:لا مش هكي بكل قصدي انا قصدي البنت من دار الايتام صاح
عماد:ووين المشكلة
مالك:عماد انت مركز في شن تقول يعني هذي بنت لقيطة لا اصل ولا فصل
عماد:اوكي كلامك صاح بس صوفيا يكون في علمك تشتغل معايا ومأمنها على كل شي وصاح بنت من دار الايتام بس متربية وتعرف الصح من الغلط كويس بكل
مالك:ح نشوفوا ياعماد بس حط في بالك اني مش متريح
عماد:به
في اللحظة هذي لأول مرة ح نمشو لحوش محمود
ندى:بابا بس شكلة وسام هذا كويس ويشتغل كويس وذكي
محمود:اها اكيد،نسيت نسأل على امه والله مريضة قالي
ندى:ام وسام وكنها؟
محمود:منش عارف كان معايا مبدري وكلموه قالوله امك في المستشفى وطلع يجري بكرا ح نطمن عليها تصبحي على خير يابنتي
ندى:قدامك الخير يابابا
وصبا محمود وندى كانت بروحها
ندى:نتصل ولا ولا،تي لا عيب الوقت متأخر عيب بكل بكرا إن شاءالله نكلمة
جاء ثاني يوم وطبعآ الكل ناض بدري
وسام مشا لشغلة وعماد حتى هوا على السريع كان ماشي للجامعة ورودينة ومالك للمستشفى
عماد:باهي ياوسام تمام حتى انا قتلك باهي
وسام:يعني شنو نكلم الشيخ على ساعة كم
عماد:قولة ساعة 4 هكي كويس بكل
وسام:تمام ياعماد اوكي
عماد:تمام
وصكر وسام طول رن تليفونة وكانت ندى
وسام اول ماشاف الاتصال على طول عيونة قعدوا قلوب قلوب
وسام:الو
ندى:اهلين وسام كيف حال الوالدة توا
وسام:لا الحمدالله توا تمام
ندى:الف الحمدالله على سلامتها شن صار معاها
وسام:هكي جلطة دماغية بس خفيفة ودارولها عملية وتوا تمام اليوم تطلع
ندى:باهي تمام وسوري واجد نبي نكلمك من امس بس بابا قالها ليا متأخر شويا
وسام:لا ولا يهمك،وقريب ح نجيك عشان نعطيك اتعابك في قضية فاطمة
ندى:لالا توا مش داعي بكل ياوسام خليها عليا
وسام:لالا انتي تتعبي وتمشي وتجي وتصرفي ضروري ديريلي فاتورة تمام
ندى:ان شاءالله والف الحمدالله على سلامة الوالدة من جديد
وسام:الله يسلمك
وصكروا الخط.
ندى:ح يقول هذي رانة على الفلوس والله ان شاءالله ميفهمش غلط،وين القهوة يارانيا
وسام:نعاليا عليك صوت وعليك شخصية،عليها عيون سماح بكل ونظرات شرسة بكل النوعية هذي مفش الا في الافلام الامريكية بس
صوفيا في الوقت هذا شافت عماد
عماد:شنو ياصوفيا الباين انك مبسوطة ان اليوم اخر يوم وبعدين عطلة
صوفيا:لا والله وبعدين الشهرين هذينا ح يمشن بسرعة بكل
عماد:سامحيني لو انا ضايقتك في العطلة وهكي
صوفيا:لا عادي وبعدين هوا هوا نفس الشغل كنت ح نجي للمستشفى يعني
عماد:اها باهي اليوم امتى يناسبك نجي ناخذك
صوفيا:تخليها على المغرب هكي عادي ولا بعد المغرب؟
عماد:عادي بكل
عماد كل لما يشوف صوفيا تزيد تعجبة اكثر يعني يوم عن يوم يزيد اعجابة بيها وتخش لقلبة اكثر
مشا الوقت شويا وصوفيا كانت تبي تروح من الجامعة وتكلم في التليفون وفجأ في حاجة ح تصير توا تستنوا فيها من زمان انتو0_0
كانت صوفيا تمشي وتكلم في التليفون
صوفيا:تمام باهي
الراجل:ضروري نشوفك قبل ماتمشي لحوشهم عشان نفهمك شوية حاجات وهكي
صوفيا:باهي تمام امتى نتلاقو نحنا
الراجل:توا لو تحبي
صوفيا:ماشي تمام وين نجي
الراجل:تعالي لـ نفس العنوان بس ردي بالك يكون في حد وراك ولا حاجة
صوفيا:لا اطمن توا ح نوقف تاكسي ونجيك استناني غادي
صوفيا وقفت تاكسي ومشا التاكسي ووقف وين ماتبي صوفيا0_0
نزلت صوفيا وكانت تمشي وكانت خاشة لمكان هكي مهجور0_0
كأن مدرسة قديمة او مصنع قديم الخلاصة مكان مش مفهوم الا ان قديم بكل
خشت صوفيا وكانت تمشي وفجأ فتحت الباب0_0
صوفيا ابتسمت وقالت
صوفيا:ليا تقريبآ 4 شهور مشفتكش.....................
وفجأ الراجل يبرم وجة ويطلع..........0_0
صوفيا:.........................0_0
الراجل:.......................0_0يتبع الحلقة الرابعة والعشرين