جريمة صوفيا

الحلقة (1)

الحلقة الاولى 1 من رواية #جريمة_صوفيا مؤلف القصة #إبراهيم_رشيد

زي بداية اي رواية المطلوب فقط التركيز وحفظ اسماء الشخصيات
البداية كـ العادة بالبطل وعائلته
البطل اسمة عماد وعمرة 32 سنة شاب متعلم ومثقف ومحترم جدآ جدآ دكتور كبير ومن رغم صغر سنه الا ان يدير في شغل كبير وعظيم
متزوج من رشا 28 عام وعنده منها بنت لينا وعيل اسمه سراج و ح تعرفوا تفاصيل حياتهم بعدين
رشا:بسم الله الرحمن الرحيم اصبحنا واصبح الملك لله عماد عماد هيا صبي ح تأخر على شغلك
عماد:باهي شويا هي
رشا:لا تعالي يالينو بابا ميبش ينوض من نومه
لينا صغيره وعمرها سنتين وسراج شهور قليله شهرين بس
رشا مسكت لينا وحطتها على عماد
رشا:هيا عاد شنو الكسل هدا عماد انا نازله لعمتي البس وانزل وهات معاك لينا وسراج راقد
عماد يسكن فوق اهلة و ح نتعرفوا عليهم بعدين
عماد:باهي باهي وانتي كلامك واجد على الصبح
عماد مسك تليفونه وشاف جنبه لينا
عماد:خير ياحبي خير صباح النور تي غريبة نايضه بدري مش من عوايدك يعني,خليك هنا ياعيوني شوي بس ونجيك تي والله انتي الحب كلة
رشا نزلت تحت وخشت للحوش
طبعآ حوش العيله بيكون كبير بكل وهكي بس الي عايشين فيه ثلاثه
(منال ام عماد) (رودينة اخت عماد) (وسام اخ عماد) ركزوا على وسام لأن شبه القصة كلها تتمحور عليه هوا بس
بالاضافة ان عندهم اخ رابع اسمه مالك يقرا في فرنسا وعايش من سنوات غادي وهوا اصغر واحد في الشباب
رشا:اهلين عمتي صباح الخير
منال:اهلين بنتي صباح النور
رشا:شنو شنو معقولة اديري الفطور ليش مااستنيتي لين ننزل
منال:لا يارشا تمام ديري الشاهي بس وردي بالك من القهوة قاعده على النار
رشا:تمام رودينه وين مازالت راقده
رودينه:اهلين صباح الخير
طبعآ اسم رودينة دوخني شويا كل واحد يكتب فيه شكل بس لقيت ان الانسب هكي
رشا:اوو عمرك طويل بكل
رودينة:نعاليا اصلآ عارفه روحي خيال
رشا:شن جو الامتحانات
رودينة:تمام والله كويسات
رشا:هيا خليهن يكملن واكتبيلنا رواية جديدة كسدت بكل انا راهو
(رودينة تقرا في كلية الاعلام عمرها 22 سنة ولكن ايضآ بنت موهوبة جدآ جدآ في حاجه اسمها كتابة وروايات)
رودينه:والله حاضر خلاص جايه رواية جديدة قريبه بكل
رشا:واسمي يكون بطوله ايوا متفقين نحنا
رودينة:لا متفقين خلاص كلمه وحده هيا
منال:يابنات انا ماشيه نصلي هيا بلا كلام زايد وحطن الفطور
رشا:تمام ياعمتو
وطلعت منال....
رودينة:كويس ان ماما طلعت رشا شوفي قصة وسام وعماد وربي ملينا من المشاكل
رشا:خوك عماد هدا راسه يابس بكل واقسم بالله
رودينة:تي حتى انا مليت بكل من وسام بارد وراسة يابس بكل
رشا:ساهل توا نشوفوا اي خوت يصير بيناتهم مشاكل عادي
رودينة:لكن مش لدرجة هكي عماد يضرب وسام تي هدي اول مرة تصير في التاريخ
وسام طلع من الدار متاعه للصاله وشاف امه
(وسام شاب مشاءالله طول في عرض وشخصيه غريبه نوعآ ما يخدم شرطي مرور وعمره 27 سنه)
وسام:خير ياامي تقبل الله
منال:اهلين وسام وين طالع بدري هكي
وسام:امي في حد هنا ولالا
منال:رشا بس قاعده كنك
وسام:كويس بكل خليني نطلع قبل ماينزل عماد
منال:لعند امتى هكي ياوليدي عيب عليك هدا خوك الكبير
وسام:خويا الكبير انا شنو نديرلة مثلآ هزبني وضربني واحترمته مرديتش عليه بكلمة وحدة
منال:انت ياوسام غلطان وديما تحكي في كلام غريب
وسام:انا طالع ياامي عندي شغل
وطلع وسام وصكر الباب
رشا ورودينة حطن سفرة الفطور
رشا:عمتي وسام وين
منال:والله يارشا انا عيالي هذوما ح يجيبولي الجلطة
رودينة:ليش شن صار اخرى
منال:وسام توا طلع ورافض حتى يشوف عماد ويحكي معاه