جريمة صوفيا

الحلقة(28)

الحلقة السابعة والعشرين 28 من رواية #جريمة_صوفيا مؤلف القصة انا #إبراهيم_رشيد
قراءة ممتعة
عماد:اسمك سراج صاح،تمام تفضل ياسراج قولي شن فيك
سراج:معلش ح نقولك بس ياريت نكونوا بروحنا
عماد:تمام حقك هذا اطلعي برا شويا
الممرضة:حاضر
وطلعت الممرضة وصكرت الباب
عماد:وهذي طلعت الممرضة قولي ياسراج شن صايرلك مع انك شاب وحسيتك طبيعي
سراج:لا ماهو انا مش جاي نعالج0_0
عماد:كيف مفهمتش عليش جايني معناها
سراج:انا سراج حبيب زوجتك السابق ورشا اختارت يكون اسم ولدك على اسمي0_0
عماد في ثانية وحدة تغير شكلة وتغيرن ملامحة وبسرعة وقف قدام سراج
عماد:في شنو قاعد تحكي انت ياحقير منو تكون قولي
عماد مسك سراج من الجاكة متاعة
سراج:زي ماسمعت وانت تعرف الوجه هذا كويس لكن شكلك ناسيني
عماد:في شنو تحكي انت من تكون قول بسرعة
سراج:انا حبيب زوجتك السابق ياعماد انا جيت نقولك في السر الي انت غافل عليه من سنين
عماد:شوف واقسم بالله انا ندفنك في ارضك توا ياحقير
وعماد ضرب سراج على وجة
سراج:يدك ثقيلة يادكتور
ورد عماد مسك سراج :
عماد:توا اذكرتك ياحقير انت مرة ضربتك في الجامعة
سراج:بالضبط انا والكلام الي وصلك عليا اني نبي نخطب بيسان كذب في كذب انا نكون حبيب رشا السابق وانت خطفتها مني تي انت خربت اجمل قصة حب
عماد:معش تجيب سيرة رشا على لسانك ياحقير وانت كذاب مستحيل نصدقك
سراج:هي نزل يدك خلاص سكتتلك واجد انا ولو مش مصدقني امشي اسأل رشا ولو تبي اسأل خوك وسام يعرفني كويس
عماد:معناها انت هوا الي تبي تخرب بيناتنا ياحقير وكنت ترن عليا ووحق ربي انا ح ندفنك وانت عايش
سراج:لا مش انا واسأل خوك وسام هوا عارف اني مش انا وبعدين رشا صاح عندك توا لكن واقسم بالله عمرها مانستني وانا توا ماشي ونتمنى معش نشوف وجك بكل مرة ثانية
عماد:واقسم بالله حسابي معاك مازال مكملش ويجي يوم ونحطك تحت رجلي ياحقير
طلع سراج وصكر الباب بالقوة.
عماد قمعز على الكرسي وكان منهار بكل.
عماد:توا عرفت ليش الاصرار هذا كلة من رشا انها تسمي سراج هكي واقسم بالله يارشا ح نقتلك قتل
طلع عماد بسرعة.
عماد:معش في حالات اليوم خلاص صكرنا خلي الناس هذي كلها تروح
الممرضة:بس في حالات ضروري يادكتور
عماد:انا اليوم معش نبي نشتغل رديلهم فلوسهم كلهم يقدروا يمشو لـ مستشفى اخرى شنو مفش الا نحنا يعني
عماد كان متعصب بكل وطلع بسرعة
فجأ سمع واحد وراه يجري
الراجل:دكتور عماد يادكتور عماد
عماد برم عليه وشاف واحد ماسك بنت صغيرة في يدة
عماد:نعم شن في
الراجل:اليوم عندنا مراجعة عندك يادكتور ضروري ارجوك
عماد:انا اليوم معش نبي نشتغل خلاص تعال بكرا
الراجل:ارجوك يادكتور هذي بنتي نور اذكرتها
عماد:نور منو؟
الراجل:بنتي نور الي عندها سرطان في العظام شوف انا والله درتلك جميع التحاليل والصور الي انت طلبتهن عطلت بس لأني مقدرتش نوفر المبلغ متاع الصور والتحاليل ارجوك يادكتور اكشف عليها توا ارجوك
نور كانت بنت صغيرة ممكن عمرها 5 سنوات بس
عماد تأثر بكل بالموقف هذا
عماد:اها نور توا اذكرتها ياراجل ليش ليا شهرين نستنى فيك
الراجل:والله الصور كانن يبن مبلغ كبير وانا توا كيف وفرتة
عماد:ليش ماجيت قتلي عليش راهو درتهن لكي في نفس اليوم وعلى حسابي
الراجل:المهم توا ياريت تكشف عليها ياريت
عماد:تعالو للغرفة هذي
عماد طبعآ في موقف زي هذا كان ديما يتخيل في الشخص الي قدامة ان هوا خوه او بنته او امة
عماد خش وقعد يشوف في التحاليل والصور
عماد:تفضل تريح حط نور هنا
عماد قعد يشوف في كل حاجة وبجديات كان متأثر بكل
عماد نزل الصور وحط يديه الاثنين على وجة
الراجل:شنو يادكتور طمني
عماد:حطلي نور على السرير شويا
وقعد عماد يكشف عليها ولكن كان قريب يبكي خلاص
الراجل:يادكتور وضعها في اخر فترة تعبت بكل ياريت لو في دواء تقدر توصفه لها او كيماوي
عماد كان ماسك دمعتة ومش عارف شن يقول
عماد:مش عارف شن نقولك بجد لا اله الا الله
الراجل:قولي ارجوك
عماد:السرطان في المراحل الاخيرة والكيماوي فات اوانة خلاص حاليآ مفش حل الا الدعاء شد حيلك
الراجل طبعآ لأنها بنتة قعد يبكي طول
الراجل:كيف هكي يادكتور كيف قول غير الكلام هذا
عماد:واقسم بالله هكي صار انا معش نقدر ندير شي ولو مشيت لأي مستشفى في العالم هكي حـ يكون الكلام ياريت تدعولها وربي يشفيها بجديات كنت نتمنى نقولك غير هكي بس نور خلاص
الراجل:خلاص شنو قولي يعني بنتي حـ تموت
عماد مسيطرش على روحة وعيونة قعد فيهن دموع
عماد:شوف الاعمار بيد الله طبيآ واقسم بالله معش في فايدة السرطان في كل مكان في جسمها ارجوك ادعولها
الراجل:لا ياربي لا هذي بنتي الوحيدة يارب شن ندير وكيف حـ نبلغ امها بس
عماد:ضروري تكونوا جنبها نور خلاص ممكن اخر شهور في حياتها توا يعني التحاليل والصور سيئات بكل بكل
الراجل:بنتي يادكتور هذي ارجوك دير حل ارجوك
عماد:لا حول ولا قوة الا بالله العظيم وسع بالك واستهدي بالله بس
الراجل:لا اله الا الله لا اعتراض على حكمك يا الله 
عماد:في طريقة وحدة بس نسبة نجاحها بسيطة بكل وممكن مفش نسبة نجاح اصلآ
الراجل:قولي ياريت قولي
عماد:اني نبدا نعطيها جرعة كيماوي ونشوف شن يصير بس والله منوعدكش الوضع صعب لكن ربي يساعدني وخلاص
الراجل:ياريت ياريت ابدا عطيها ونحنا معاك بالدعاء
عماد:وضعها صعب ومستحيل ياخذ مفعولة حاليآ بس حـ نجربوا والي كاتبة ربك يبي يصير
الراجل:يارب اشفي بنتي يارب يارب
عماد:تاخذ الدواء هذا اسبوعين وبعدين تجي حـ تبدا في الكيماوي
الراجل:تمام يادكتور تمام
عماد:شد حيلك والله ربي رحمتة واسعة،وخوذ الدواء من الصيدلية الي عندنا في المستشفى كتبتلهم رسالة مش حـ ياخذوا منك حاجة
الراجل:بارك الله فيك يادكتور ربي ينور طريقة
وطلع الراجل وهوا ماسك بنتة ويبكي
عماد:استغفر الله العظيم يارب يارب اشفيها يارب البنت خلاص تعيش في اخر ايامها يارب ساعدني يارب،فعلآ واقسم بالله دنيا فراقة بكل ونحنا عايشينها في نكد وحقد على بعضنا
طلع عماد وركب في سيارتة وكان مش عارف شن يدير كمل الوقت كلة يدوي بروحة
عماد:قبل ماتلوم رشا ياعماد حط اللوم عليك الاول انا سبب كل حاجة وحياة رشا معايا جحيم في جحيم عمري ما حسستها بالأمان طول الوقت هاملها عمرها ماكانت زوجة سعيدة معايا،وبسبب هذا كلة هيا منستش حبها الاول لا واختارت تسمي عليه اخرى،لوم روحك ياعماد حتى انت خنتها وقاعد تخون فيها بتفكيرك في صوفيا،الي داراته رشا غلط في غلط بس انا متأكد مليون في المية انها عمرها ماخانتني مع الحقير هذا ياربي شن ندير بس الدنيا هذي ليش هكي معايا،عندي فلوس وعندي املاك ولكن معندش السعادة وراحة البال شن ندير ياربي شن ندير
عماد كان مش مركز في ولا اي حاجة ولقا روحة قاعد قدام الحوش ونزل.
نزل عماد وركب لـ شقتة طول
خش وشاف رشا قاعدة حزينة وتفكر وجاء جنبها بدون مايحط عينة في عينها
الاثنين كانت عينهم على الارض
عماد:رشا
رشا هزت راسها وخلاص
عماد:انا عرفت كل شي يارشا عرفت كل حاجة
رشا:شن الي عرفته ياعماد
عماد:عرفت السر الي انتي طول عمرك داستيه عليا،السر هوا نفسة الي مكرهك فيا
رشا:باهي كويس كنت متأكدة يجي يوم وتعرف
عماد:عرفت كل حاجة وعرفت ليش اسم ولدي سراج
رشا:تعرف من قبل كان يهمني الامر ونخاف انك تعرف بس توا والله معش تفرق عادي
عماد:ليش هكي يارشا معقولة انتي تحبيه للدرجة هذي
رشا:هكي هيا الدنيا ياعماد صاح انا من نصيبك بس لا انت تحبني ولا انا نحبك وانت في نظري توا واحد خاين وبس وانا غلطت لما سميت ولدي هكي صاح معاك اني غلطانة بس واقسم بالله عمري مافكرت نخونك ونكلم غيرك زي ماانت درت
عماد:رشا ياريت تحكيلي كل شي من الاول بكل ياريت بما ان خلاص معش في اي حاجة متخبية خلاص
رشا بدت تحكي وعماد  كان مصدوم
رشا:شوف ياعماد انا وسراج حب من سنين ومن قبل ماانت تجي تخطبني ولا حتى نعرفك اصلآ،كنت في الجامعة وكانت في بيناتنا علاقة حب قوية وكان ناوي يجي يخطبني ولكن ظروفة كانن صعبة بكل ولو جاء الاكيد ان بابا حـ يرفضة،وبعدين انت جيتني وخلاص الكل وافق عليك ولقيت روحي موافقة وكل شي صار بسرعة وقلت حـ ننسى سراج بس بعد عشت معاك انت وشفتك كيف انسان اناني ولا عمرك حبيتني لقيت روحي كل نغرق ونزيد نحب سراج لأنك انت محاولتش تنسيني
عماد:عارفة واقسم بالله انا لو كنت نعرف انك تحبي غيري را مخذيتكش
رشا:صار الي صار والدنيا نصيب وشوف ياعماد انا واقسم بالله عمري مافكرت نخونك ولا حـ نديرها
عماد:من اول ماعرفت كنت ناوي ندير مصيبة كبيرة وفي وقتها كنت متعصب بكل بس بعدين جت حالة بنت صغيرة عندها سرطان في العظام تعيش في اخر ايامها تأثرت بكل وحسيتها هذي لينا قدامي،رشا الدنيا فراقة ومفش حد ضامن عمرة انا وانتي منستاهلوش الي قاعد يصير فينا هذا يابنت الناس انا وانتي في بيناتنا شيطان شيطان هوا الي مكرهنا في بعضنا
رشا:اعوذ بالله من الشيطان الرجيم
عماد:رشا انا وانتي الطلاق مش حل لنا،عيالنا حـ يتشردوا لو مفش بيناتنا عيال صاح كنت ح نقولك يابنت الناس خلاص انتي من طريق وانا من طريق،لكن توا فات الاوان خلاص
رشا:انا لو نبي الطلاق را من امس لما عرفت معش شفت وجي بكل لكن عيالي يتربوا ويكبروا بلا اب صعبة 
عماد:تعرفي لو انا مش داير شي واقسم بالله را توا كسرت الدنيا على راسك،بس عارف روحي مش مقدملك اي حاجة ولا عمري حسستك بالحب وظلمتك واجد واتهمتك بالخيانة وطلقتك وانتي مظلومة،انا يارشا لو عطيتك حب جديات وكنت زوج صالح لكي وعرفت انك درتي هذا كلة من ورايا والله توا مكنتش ح نخليك معايا دقيقة
رشا:وانت شن درت من اول ماعشت معاك وحياتي جحيم عارف شن معناه الجحيم ولالا
عماد:يابنت الناس مفش حل بيناتنا الا نحاولوا نتقبلوا بعضنا بأي طريقة من الطرق
رشا:كيف بس وانت قلبك مع وحدة ثانية
عماد:حـ ننسى يارشا واقسم بالله حـ ننسى
رشا:ههههه تنسى شنو وهيا عايشة معاك في حوش واحد ولو مشت خلاص هيا تشتغل معاك وطالبة عندك
عماد:رشا نحنا توا في بيناتنا حل من الاثنين يـ طلاق وفراق وعيالنا يتشردوا يااما نعيشوا مع بعضنا ونحاولوا نتقبلو بعضنا وكل واحد فينا يعطي فرصة ثانية لـ قلبة
رشا:انا مستعدة نعطي فرصة ثانية لـ قلبي بس انت لا
عماد:رشا انا واقسم بالله ونوعدك من الايام الجاية حـ نكون لكي انتي بس انتي وعيالي
رشا:وعدتني من قبل ياعماد بس تغيرت طول
عماد:نوعدك وعد شرف عطيني فرصة وحاولي اتقبليني بس
رشا:ان شاءالله خير ياعماد والحمدالله انك عرفت لأن هذا التأنيب الضمير كان متعبني من فترة ومش حابة نسألك كيف عرفت
عماد:يكون احسن يارشا
طلع عماد وولع سيارتة.
رشا كانت متأثرة بكل بكل
جت لعند المراية وكانت حزينة واثر الحزن باين على عيونها ووجها
رشا بدت تغني في اغنية اليسا
رشا:يا مرايتي من كم سنة لليوم قد ايش تغيرت؟يا مرايتي من كم سنة لليوم انا كم مرة خسرت؟  يامرايتي ياللي بتعرفي حكايتي انتي بتعرفي شو شفت وبتعرفي  من شو خفي كم مرة بوجهك وقفت قلتلك هيدي نهايتي يا مرايتي ياللي بتعرفي حكايتي زهقانه من كل الدنيا تعبانه مدري شو بني كل يوم عم عيشوا سنه معقول هيدي نهايتي؟
         (عند وسام)
وسام كان يشتغل ولكن فجأ رن تليفونة
وسام:الو عماد
عماد:وينك ياوسام
وسام:في الشغل كنك
عماد:انا جيتك في الشغل قاعد برا
وسام:تمام خش وشوف اي حد على الباب وقولة انك خويا توا يوصلك ليا طول
عماد:تمام هيا
وركب عماد وخش على وسام
وسام:يااهلآ انست مكتبي لأول مرة
عماد:مشاءالله تبارك الله
وسام:خش قمعز جيبلنا اثنين قهوة،قولي ياعماد غريب انت كيف طلعت من المستشفى توا
عماد:وسام انا جايك في موضوع ضروري
وسام:قول شن في
عماد:فهمني قصة سراج هذا من الاول بكل وشن صار بينك وبينة
وسام:سراج من هذا0_0
عماد:وسام انت فاهم قصدي كويس احكيلي في البداية شن صار لأني عرفت كل حاجة خلاص
وسام:دقيقة بس انت شن عرفك بالقصة
وحكالة عماد كل شي.
وسام:هكي يعني الحقير جاء لعندك في المستشفى وبلغك على كل شي
عماد:اها فهمني توا انت من وين تعرفة
وبرضو وسام قالة كل شي
وسام:وهذي هيا القصة كلها
عماد:هكي يعني ياوسام انت وفاطمة كذبتوا عليا وحتى بيسان
وسام:عماد انا مقلتش ولا كلمة لكي لأني عارف رشا متخونش فيك وكنت متأكد حتى لو اختارت الاسم هذا هيا غلطت صاح لكن خيانة لا
عماد:يعني الحقير مش هوا الي كان يكلم فيا ومش هوا سبب الي صار كلة
وسام:انا جبتة هنا وطلع لأن مفش لا شكوى ولا اي شي وبعد انت عرفت الحقيقة الحق معش دورت الموضوع
عماد:مش عارف شن نقولك واقسم بالله الله يسامحك وخلاص كان المفروض تبلغني من اول يوم مش نعرف بالطريقة هذي
وسام:ياعماد صار الي صار وانا مقلتش الموضوع هذا لحد بكل شن صار انت بينك وبين رشا
وقالة عماد كل شي صار
وسام:انت مقصر في حقها ومتقدرش تلوم عليها ياعماد انا من الاول فكرت هكي
عماد:معاك حق معاك حق
وسام:وبصراحة رشا شاكة فيك تخون فيها رد بالك ياعماد
عماد:مفش حاجة زي هكي ومنخونش فيها انت بس شايف المسؤولية الي فوق راسي
وسام:باهي تمام وانا لما كنت نقولك رد بالك ياعماد من حوشك الفترة الاولى مكانش ع الفاضي انا نقصد الموضوع هذا بالتحديد
عماد:تمام ياوسام انا طالع توا
وسام:وين كمل القهوة
عماد:لا نبي نمشي ضروري
وطلع وسام مع عماد برا وشافوا محمود.
وسام:تعال ياعماد صدفة سمحة هذي هذا عمي محمود اب ندى
عماد:اهلين بيك استاذ تشرفنا
محمود:بيك زاد الشرف هذا خوك الدكتور
وسام:استاذ شنو هذا اللواء محمود
محمود:ههههه لا عادي متركزش ياوسام نحنا عائلة وحدة توا
عماد:والله سامحني انا كنت ناوي نجي نطلب يد بنتك بس شفت استعجال وسام لقيته مكمل كل شي بروحة
محمود:لا ولا يهمك النية واصلة وان شاءالله نتلاقو في الفرحة الكبيرة
عماد:ان شاءالله نستأذن منكم انا توا
محمود:مع الف سلامة
ومشا عماد.
محمود:لكن مفش بيناتكم شبه بكل ياوسام
وسام:اها نحنا مختلفين
محمود:باهي كملت الاوراق ولا مازال
وسام:بعد ساعة حـ يكونن على مكتبك ونبي نقولك انا نبي نطلع مشوار ضروري
محمود:ماشي ياوسام متعطلش بس
وسام:لالا بسرعة بسرعة
وطلع وسام وركب في سيارتة ومشا
سراج في اللحظة طلع من المحل وركب في سيارتة
ولكن فجأ جاء وسام وركب جنبة وسراج تفاجأ بكل0_0
وسام كان حاط المسدس على راس سراج 
وسام:شوف ياحقير كلمتين نبي نقولهن بس ونمشي
سراج:شنو تبي مني انت اسمع الدنيا مش سايبة زي ماانت تبي
وسام:لا وحياتك سايبة وانا مش منخافش الا من يلي خلقني وزي ماتشوف الدنيا نهار وقررت نجيك توا عشان تعرف وسام من ياحقير ياكلب يا............
سراج:اسمعني انت
وسام قاطعة.
وسام:تي انا الي ندوي امتى مانبي بس وانت تصكر فمك وتسكت وتحط في فمك كندرتي هذي ياحقير فاهم ولا
سراج:نزل السلاح وتعال نمشو راجل لـ راجل
وسام:عرض سمح اطلع من هنا امشي لمكان فاضي ونشوفوا من الي يطلع راجل ولع واطلع بسرعة
كان سراج يسوق ووسام جنبة وماسك السلاح عليه
وقفوا في مكان مقطوع هكي ومفش ولا اي مخلوق
وسام:هيا انزل قدامي يابطل
ونزل سراج ووقف قدام وسام
وسام:هذا السلاح ونزلتة هيا
وسام عزق السلاح في الارض
سراج:هكي توا راجل لـ راجل جديات تعال ياكلب تعال
وسام:واقسم بالله انت مش من مستوايا بكل لكن ح نربيك
سراج:قرب قرب قاعد اتمرجل بس بالسلاح الي عندك
وبعد معركة بين الاثنين خليني نقوللكم ان وسام ضرب سراج في جميع اعضاء جسمة،ومن دون مايلمس سراج وسام ابدآ
سراج من قوة الضرب طاح على الارض وكان شبه دايخ
وسام:ها شنو توا قولي مبسوط هكي ياحقير ياكلب مش كان سكتت وصكرت فمك بدون نفخ عضلاتك عليا،المهم ياحقير انا جاي نقولك كلمتين تذكر المرة الاولى قتلك انا وسام طيب وكويس وولد ناس لكن الي يوصل في حد من اهلي نتحول لـ شخص شرير بكل تذكرها صاح؟وانت اليوم وصلت في خويا المرة الاولى مضربتكش والمرة الثانية ضربتك وشفقت عليك الثالثة صدقني رصاصة طول،وحاجة اخيرة ح نطلع طيب معاك وسيارتك ح تلقاها قدام المحل متاعك والمفتاح ح تلقاه في المحل عند اي واجد
سراج كان يسمع في كلام وسام ولكن مش قادر يصبي ولا ينوض من جديد بكل
ولع وسام السيارة ومشا لعند قدام محل سراج وحط المفتاح في المحل وطلع وركب في سيارتة ومشا
وكان يكلم في ندى.
وسام:اسف واجد ياحبي بس كنت في مشوار ضروري بكل
ندى:لا ولا يهمك بس حبيت نطمن عليك
وسام:والله كنت ناوي نرن بس قلت اكيد مشغولة
ندى:لا انا توا طلعت من المكتب ونبي نروح تعبانة بكل
وسام:عليش كنك تعبانة
ندى:امس الخطبة وهكي وسهرنا مع بعضنا واجد وانا متعودة نرقد بدري
وسام:هههههه خربت عليك انا يعني
ندى:لالا مش هكي عادي عادي المهم لما تفضى كلمني باهي
وسام:حاضر من عيوني
وصكروا الخط.
ندى:يهبل هوا وصوتة
وسام:شن داير ياوسام حاجة خير في حياتك عشان ربي رزقك بوحدة هكي انا مش مصدق اني ح نعيش معاها اصلآ
نمشوا بعضنا شويا للحوش ومع صوفيا ورودينة.
صوفيا:والله يهبلن بكل بكل رواياتك بديت نقرا فيهن وعجبني كلهن تشويق
رودينة:شكرآ لكي ياصوفيا
صوفيا:والله بجد تشويق وقعدت غير نقرا وخلاص قوليلي مش ناوية اديري كتاب
رودينة:لا اكيد ناوية والرواية الجاية قررت تكون في كتاب
صوفيا:ربي يوفقك بجديات ابداع
رودينة:ايام بابا عايش كان هوا الي يحفز ويشجع فيا ولكن توا شوفة عينك مفش حد وحيدة وبروحي
صوفيا:اها رودينة هوا باتك من شنو مات
رودينة:سكتة قلبية للأسف ماما تنوض فيه في الصبح لقاتة ميت
صوفيا:شنو شنو0_0
رودينة:المهندسة رشا شرفتنا وينك يابنت
صوفيا:رشا انتي شن دايرة0_0
رودينة:قصيتي شعرك
رشا:اها بصراحة قررت ورنيت على الكوافيرة وهيا جت لـ عندي
رودينة:ليش والله كان شعرك طويل ويهبل وديما نتمنى شعري يقعد كيف شعرك
رشا:شوية تغيير وخلاص مليت تعبني بكل
صوفيا:هههه هيا رشا تحب نادين نجيم وممكن بس ستايل نادي الاخير قررت تكون كيفها
رشا:هوا هكي وبعدين انا بيضاء تمشي معايا القصا يعني
رودينة:والله انا زعلت عليه بكل امشي خلي ماما تعطي رأيك
صوفيا:ليش يعني والله انا عجبني بكل
صوفيا برمت وجها وكانت تفكر وتحكي في سرها
صوفيا:كيف هكي كيف في حاجة مش معقولة هما قالولي باتهم مات مقتول؟؟هكي فهمني سراج والاثنين الثانيين تي شن في انا لازم نرد ونعيد حساباتي من جديد 
مشا باقي الوقت عادي ووضع طبيعي جدآ لين جاء الليل وكانت صوفيا تحكي مع سراج
صوفيا:تي ليش مش قتلي موعدنا بكرا
سراج كان متأثر بكل من الضرب الي خذاه من وسام
سراج:هوا قالي هكي شن نديرلة يعني قالي مش بكرا موعدنا وتأجل
صوفيا:تي بس ضروري ياسراج نتلاقو نحنا وكل واحد يعرف شن حـ يصير لأن زي ماتعرف الي درتة قرب يبان
سراج:تي انا خاطري نولع الحوش كلة في العائلة الحقيرة هذا ونقتلهم كلهم
صوفيا:وسع بالك ليش الكلام هذا توا الي درناه نحنا انسب حل وفتنة كبيرة حـ تصير صدقني خير من الف طريقة
سراج:باهي باهي المهم حبيت نبلغك ان بكرا مفش لقاء لما يقولوا امتى ح ندزلك انا
صوفيا:باهي باهي
وصكروا الخط.
صوفيا:ليش يحكي هكي هذا وشن سبب التأجيل تي نحنا لازم نتلاقو ضروري
عماد روح للحوش وخش وشاف رشا
عماد:رشا شن دايرة انتي؟
رشا:الي تشوف فيه
عماد:كيف تقصي شعرك هكي وبدون حتى ماتقوليلي
رشا:وعليش يابعدي نقولك انت عمرك جيت وقتلي شعرك سمح ولا حتى تغزلت بيه
عماد:معاك حق يارشا تمام
نردوا للحوش لوطة
وسام:شنو شنو كنكم انتو صوتكم عالي في نص الليل
مالك:منش فاضي انا
رودينة:مش فاضي شن بيكون عندك معلش بس قولي شن بيكون عندك قاعد 24 ساعة معندكش شي
وسام:هي ندوي انا كنكم
رودينة:ياوسام انا بكرا عندي مشوار ضروري في العشية ونبي حد يوصلني وانت مش قاعد وعماد مش قاعد وهذا ميبش
مالك:ماهو مش بمزاجك هيا
وسام:اسكت انت شويا مشوار وين؟
رودينة:في معرض الكتاب الدولي وحابة نمشي نشوفة ونشري شوية كتب
وسام:تمام بكرا تشيل اختك وين ماتبي تمام وتقعد معاها اخرى تنزل وتمشي معاها ومنبش نعاود كلامي مرتين يامالك
مالك:تم ياوسام باهي
جاء ثاني يوم بسرعة وكان يوم طبيعي وعادي
رودينة:هيا عاد طولت
مالك:باهي باهي اطلعي هيا
وطلعوا رودينة ومالك.
صوفيا كانت بروحها في الحوش ومنال راقدة
صوفيا تشوف من الروشن ولكن فجأ شافت رشا ولينا قاعدات برا في الجنان ورشا كانت تبكي0_0
صوفيا طلعت بسرعة
صوفيا:رشا كنك شن في من مزعلك
رشا:مفش شي ياصوفيا مفش شي
صوفيا:تي قوليلي ليش تبكي هكي وعليش ماسكة لينا في حضنك هكي نزلي البنت خليها تلعب
رشا:صوفيا انا ممكن نطلب منك طلب
صوفيا:اطلبي يارشا كنك
رشا:ممكن نطلع توا ونسيب لينا معاك
صوفيا:عادي اطلعي بس ليش تبكي انتي في حاجة
رشا:مفش شي بس ياريت تردي بالك منها وسراج راقد جوا باهي
صوفيا:باهي بس يارشا مشغولة عليك
رشا:لا مفش حاجة شويا ونقعد تمام ماما لينو ردي بالك اتعبي صوفيا شويا ونجي انا باهي ياماما
وطلعت رشا.
صوفيا:كنها رشا تي شن فيها تبكي هكي ياساتر وخلاص
صوفيا وقعدت تلعب مع لينا لعند ما جاء المغرب والدنيا قعدت ليل
صوفيا:لينو هيا ياحبيبتي نخشوا نشوفوا سراج والدنيا صقع قعدت
ولكن فجأ صوفيا تشوف عماد جاي0_0
طبعآ من اول ماصار الموقف الي بينهم عماد مقعدش مع صوفيا بكل
عماد:صوفيا ممكن نحكو شويا
صوفيا:تعال نحكو عادي
عماد:شوفي انا غلطان في حقك واجد بس سامحيني والله الي صار غصبآ عني وياريت تنسي كل حاجة قلتها
في اللحظة هذي جاء وسام وشاف مالك ورودينة مروحين
مالك:وين الاخ وسام مروح بدري
وسام:مروح وين ياعمي مالك جاي ناخذ في اوراق وطالع بس شنو يارودينة تمام امورك
رودينة:تمام ياويسو دارلي كل حاجة نبيها ولما ميبش كنت نهدد فيه بيك يخاف طول وشريت كتب واجد يهبلن
مالك:باهي ياخفيفة خشي جوا شويا نبي وسام شويا
وخشت رودينة شافت صوفيا ولينا وعماد
رودينة:حبيبة عمتو تعالي شويا عندي
ومشت لينا لـ رودينة
رودينة:شويا ونطلعوا ياصوفيا خليك
صوفيا:باهي تمام على طريقك شوفي سراج
وخشت لينا ورودينة
عماد:سراج0_0ورشا وين
صوفيا:طلعت رشا
قدام باب الحوش كان قاعد مالك ووسام
وسام:تي احكي ياراجل تعبتني عندي شغل ومستعجل قتلك متفهمش انت
عماد وصوفيا.
عماد:توا نكملوا بعدين ياصوفيا توا زحمت بكل
وفجأ رن تليفون عماد وكانت رشا0_0
عماد:اهيا رشا ترن
ورد عماد ولكن تفاجأ ان مش صوت رشا هذا0_0
عماد:الو معلش منو انتي
البنت:وسع بالك شويا يااستاذ انت شن تعرف صاحبة التليفون
عماد انصدم بكل وصوفيا كانت تسمع مش فاهمة شي
عماد:تي تكون زوجتي وينها هيا
البنت:معلش زوجتك دارت حادث خطير بكل وهيا توا سعفوها قاعدة في المستشفى
عماد:تي شن تدوي انتي امتى صارت هذي ورشا وشن حالتها ووين المستشفى
البنت:في مستشفى................ ياريت تجي بسرعة
وصكروا الخط
صوفيا:تي شنو تدوي انت رشا كنها
عماد:لا رشا رشا دايرة حادث ياصوفيا
وطلع عماد بسرعة ووراه صوفيا وشافوا مالك ووسام
وسام:تي شن في
مالك:كنكم طالعين تجروا هكي
عماد:رشا رشا دايرة حادث وفي المستشفى الحقوني بسرعة
صوفيا ركبت جنب عماد ومالك ركب مع وسام وكانوا وراء عماد
صوفيا:وسع بالك ياعماد ان شاءالله حاجة بسيطة يارب يارب
عماد:تي اسعفوها للمستشفى قالتلي
وصلو وطبعآ كانت مش مستشفى عماد
خش عماد يجري ووراه صوفيا ووسام ومالك
عماد:معلش في حالة طوارئ توا جت بأسم رشا
الممرضة:تعالوا معايا من هنا
وكان الكل وراها ويمشو بسرعة بكل
الممرضة:هذا الدكتور المسؤول على الطوارئ
عماد مسك في الدكتور بالقوة
عماد:ارجوك ارجوك رشا وينها وشن صايرلها
الدكتور:من تكونوا انتو
عماد:انا زوجها وهذوما خوتي ياريت تقولي كنها
الدكتور:بصراحة زوجتك تعرضت لـ حادث خطير وانا توا نبي نخششها للعمليات
عماد:باهي باهي ممكن نكون معاك شوف انا نكون دكتور ياريت توافق نكون معاك
وسام:لا ياعماد مش ح نسمحلك خليه يشوف شغلة الراجل
الدكتور:عادي معندش مشكلة بس انت بحالتك هذي حـ تلبكني وخلاص
صوفيا:عماد خليك ياعماد انا حـ نخش معاه انا نكون ممرضة يادكتور
الدكتور:تعالي بس ردي بالك تقولي حاجة حـ تسببيلي مشكلة
وخشت صوفيا مع الدكتور
عماد كان منهار بكل ويفكر وخلاص
وسام:اهدا ياعماد ربي يمشي الليلة هذي على خير
مالك:يارب اشفي رشا يارب
رودينة طلعت هيا ولينا ولكن تفاجأت مفش حد بكل
رودينة:بسم الله الرحمن الرحيم وين تبخروا توا كانوا هنا0_0
صوفيا كان جوا مع الدكتور وتساعد فيه
وبعد تقريبآ نص ساعة طلع الدكتور0_0
ووراه صوفيا وكانت صوفيا تبكي
عماد:شن في
وسام:ارجوك طمنا
مالك:رشا شن صارلها
الدكتور:انا اسف شدوا حيلكم فقدنا المريضة...................0_0
عماد:..........................0_0
وسام:.............................0_0
مالك:..............................0_0يتبع الحلقة التاسعة والعشرين(ماقبل الاخيرة)
الحلقة الجاية حـ تكون الحلقة ماقبل الاخيرة