جريمة صوفيا

الحلقة(22)

الحلقة الثانية والعشرين 22 من رواية #جريمة_صوفيا مؤلف القصة انا #إبراهيم_رشيد
قراءة ممتعة
مشا باقي اليوم عادي فاطمة انعرضت على النيابة وطلعت روحت بس كان موعد المحاكمة مازال
جاء الليل وعماد كان قاعد في الحوش ورن تليفونة0_0
عماد:الو صوفيا
صوفيا:خير يادكتور انا نبيك في موضوع ضروري بكل
عماد:شنو احكي0_0
صوفيا:انا معايا دليل برائة رشا0_0
عماد كان يكلم في صوفيا وهوا راقد ومن اول ماسمع الكلمة هذا صبا على طول
عماد:شنو شنو تحكي ياصوفيا
صوفيا:زي ماقتلك زوجتك بريئة والي داير هكي مفبرك كل شي
عماد:قصدي كيف عرفتي انتي
صوفيا:تعال توا نتلاقو وياريت تهدي روحك بس عشان نعرف نفهمك
عماد:ماشي تمام
عماد خذا مفتاح السيارة ولبس جاكة التوتة وطلع يجري
عماد كان يجري بسرعة متهورة بكل وتقريبآ وصل في ربع ساعة
عماد:الو صوفيا انا قاعد تحت
صوفيا:هيا لحظة انا نازلة
ونزلت صوفيا وفتحت باب السيارة وركبت جنب عماد
عماد:احكي بسرعة كيف عرفتي
صوفيا:اول شي اهدا بس وثاني شي انا غلطت وسامحني
عماد:غلطتي في شنو وليش نسامحك
صوفيا:انا عطيتني التليفون هذا وقلت امانة وانا بصراحة فتحتة واسفة واجد
عماد:باهي مش مهم هذا كلة فهميني كيف رشا بريئة
صوفيا:شوف يادكتور عماد انا والله احساسي كان يقول انها مظلومة وقعدت سهرت سهرت واجد على التليفون لين عرفت القصة كلها لأني انا عندي شوية خبرة زمان في دار الايتام علمونا شويا
عماد:صوفيا ارجوك انا اعصابي خلاص
صوفيا:باهي تمام ركز معايا عشان تبدا تفهم
عماد:باهي ركزت وفهميني كيف مبفرك وكل الرسائل برقم رشا عاد منبش ننجن انا مش مجنون هذا رقم رشا
صوفيا:اوكي رقم رشا بس الجهاز هذا كان عليه برنامج والبرنامج هذا مسحوه قبل مايوصل عندك
عماد:به وشن طبيعة البرنامج معلش؟
صوفيا:شوف يادكتور البرنامج هذا خطير بكل واسمة Fake Text message يعني رسالة نصية مزيفة وتقدر بالبرنامج هذا تفبرك اي محادثة على رسائل الشفرة وبصراحة خليني نقولك ان الشخص هذا الي دار هكي مبدع بكل لأن من كم شهر وهوا يدير في محادثة على اساس بينة وبين رشا
عماد:صوفيا انا مافهمت شي بالله عليك قوليلي
صوفيا:ح نشرحلك على التليفون عشان تفهم اكثر شوف انا نزلت البرنامج في تليفوني تعال تفرج على هذي
عماد:معاك وريني
صوفيا:شوف هذا رقمك صاح وشوف انت شن باعتلي
كانت الرسالة مكتوب عليها صوفيا انا نحبك ومن رقم عماد0_0
عماد:لالالا مستحيل انا مدزيتلكش حاجة هكي بكل
صوفيا:خلاص هيا نفسها اسمها رسالة مزيفة انا نقدر ندير اي شي نبيه والبرنامج هذا وقفوه على فكرة لأن سبب مشاكل واجد في العالم
عماد:لا ياربي كيف تبي تسامحني توا رشا انا اهنتها بكل
صوفيا:شوف يادكتور والله انا مدخلنش بالموضوع بكل واسفة لأني فتحتة بس انت وهيا حرام بينكم عيال وهكي
عماد:تي انا معندش اي وجه عشان نقابل رشا افهميني
صوفيا:ممكن الحل يحكي معاها حد من اهلك،انا فتحت التليفون بس عشان شايفتها مرة يعني وواضح انها بنت محترمة مع ان كان لقاء مش تمام بيناتنا بس زوجتك مش وحدة خاينة ابدآ
عماد:والله ياصوفيا انا خلاص غلطان بكل بكل
صوفيا:انت تسرعت والشي هذا واضح عليك بس صدقني كل شي مفبرك وانت تأكدت بنفسك
عماد:لازم نعرف من هوا ورا هذا كلة لازم لأن هذا حاطني في راسة من زمان
صوفيا:مش مهم هذا كلة المهم بس ترد زوجتك لأن حرام عندكم اطفال صغار
عماد:بارك الله فيك ياصوفيا لولاك مكنتش حـ نعرف شن ندير
صوفيا:ولا يهمك واجبي وهذا الابتوب متاعك وهذا التليفون وموفق ان شاءالله
عماد:مشكورة واجد بكل
ونزلت صوفيا وعماد مشا.
صوفيا كانت تكلم بالتليفون
صوفيا:اها الي في راسي درتة..............وبعدين انت الغلطان نحنا متفقين على الصراحة من اول يوم لكي قريب 5 شهور ادير هكي وانا معندش علم...........خمسين الف مرة قتلك انا موضوعي مع عماد رشا هذا معندش بيها اي صلة ولا نعرفها...........وغيرت كل البيانات على الابتوب مش ناقصني ناس تموت بسببي انا.............مش ناسية مش ناسية ولا حاجة وصوفيا مازالت كيف الاول ومازال في فرص واجد قدامي................عارفة كل باب نفتحوه يتصكر بس انا قتلك لو في طريقة ثانية بدون ما واحد يموت عادي
عماد كان يسوق ويحكي بروحة
عماد:انا اغبى انسان في العالم،واخذ الدنيا كلها شغل شغل وفلوس وخلاص وهيا تحملتني واجد سامحيني يارشا واقسم بالله غلطت فيك واجد،واخرى قلتلها مريضة نفسيآ كأني نسيت اني انا السبب في انها تعالج نفسيآ،تعالجت نفسيآ بسبب غبائي انا ويوم عيد زواجنا زعلتها واجد بكل لا انا لازم ندير حل ولازم نردها
عماد خش للشقة وقمعز في الصالة يفكر
وسام كان تعبان بكل بكل وجاء رقد على السرير وعلى طول التليفون رن
وسام:تي عليك قصة وخلاص والله ليا يومين بلا نوم
وشاف التليفون
وسام:الو عماد
عماد:وين ياوسام
وسام:في الحوش عليش؟
عماد:تعال نبيك فوق شويا ضروري
وسام:باهي تمام
وصكرو الخط.
وسام:اوووووف الواحد ميرقدش بكل في الحوش هذا واقسم بالله
ركب وسام فوق ولقا باب الشقة مفتوح وخش وشاف عماد في الصالة
وسام:خير كنك قاعد زعلان هكي
عماد:وسام مصيبة كبيرة بكل صارت
وسام:خير احكي شن في
عماد:رشا بريئة ياوسام وانا ظلمتها
وسام:وعليش تقول مصيبة بالعكس هذا خبر يفرح بكل
عماد:تي الكارثة كيف ح تردلي توا
وسام:قولي بس شن صار وكيف عرفت
عماد:صوفيا صوفيا عرفت كل شي
وسام:صوفيا وشن دخلها اصلآ في الموضوع
وحكالة عماد كل شي
وسام:الله يسامحك ياعماد ظلمت بنت الناس بكل تي انا اصلآ تذكرها يوم ماجيتك في المستشفى قتلك لو نشوف بعيني مستحيل نصدق
عماد:مش عارف شن ندير حسرة في قلبي حسرة كبيرة بكل
وسام:ياراجل ولا يهمك اي انسان يغلط وكلنا بشر في النهاية
عماد:مش هكي انت مش عارف كيف انا جرحتها بكلامي وكيف طردتها تي من الاخير مستحيل تردلي
وسام حط يدة على كتف عماد
وسام:والله ح نحاولوا كلنا معاها ولا يهمك بكرا من الصبح ح تنوض امك واحكيلها كل شي
عماد:لا معندش وجه نحكي لحد بكل ولا عندي وجه نقابل حد
وسام:كنك محسسني انك داير عملية سطو مسلح ولا جريمة خلاص الي صار صار توا وموضوع امك خليه شوري
عماد:نكون ممنولك ياوسام
وسام:متقولش هكي بس قولي انت عليش واثق في صوفيا للدرجة هذي
عماد:كنها البنت شن فيها
وسام:مافيهش حاجة بس حسيتك سلمتها كل شي
عماد:بالعكس بنت كويسة وتستاهل بكل شوف هيا حلت القصة هذي
وسام:لا جديات بارك الله فيها المهم انا نازل نرقد وبكرا نحكي لـ امك عشان تمشي تقنع رشا
عماد:تمام انزل
ونزل وسام وخش للدار
وسام:طيرت من عيوني النوم ياعماد فيها دخان ع السريع قبل مانرقد
وسام كمل الدخان وكان يبي يرقد
مالك من باب الدار
مالك:وسام وسام
وسام:تي كنك تي شكلي مش ح نرقد منكم اليوم
مالك:الدخان كمل عليا ومعندش نيه نطلع ديرلنا حل
وسام:تعال خوذ من هنا واطلع برا بسرعة
مالك:ماهو الحديث طال بيني وبين يارا عرفت والحكاية ضروري تبي دخان
وسام:خوذ واطلع برا وقول لـ يارا ربي يعينك على ما ابتلاك وخلاص البنت هذي حظها مش تمام بكل
مالك:هههههه باهي
وخش مالك لـ دارة
مالك:الو حبيبي
يارا:الو كنك طولت وانت داير كتم
مالك:ماهو قتلك ماشي ناخذ في دخان من وسام
يارا:باهي قولي مازالت مشكلة رشا وعماد
مالك:لا متشغلش بالك غير هكي مشكلة بسيطة و حـ ترد بعد كم يوم
وقعدوا الليل كلة يحكو في التليفون زي اي اثنين مرتبطين ومخطوبين
جاء الصبح وطلعت الشمس وجاء يوم جديد.
وسام ناض الصبح شاف رودينة في المطبخ
وسام:امك وين
رودينة:الناس يقولوا صباحو الاول
وسام:صباح الخير امك وين
رودينة:في دارها قاعدة تقرا في قرأن
ومشا ياوسام
رودينة:يالطيف عصبي بكل من الصبح هكي
وسام:امي
منال:تعال ياوليدي
وسام قال لـ امة كل شي حرفيآ
منال:باهي ياوليدي فهمت بس فهمني قصة البرنامج هذا بس لأني مافهمت شي
وسام:امي المهم رشا نبيك تمشي تحكيلها وتقوليلها نبو نردوك وهكي ومالك ح يشيلكم لأني انا والله اليوم مش فاضي بكل بكل و ح نحكي لـ رودينة القصة ع السريع وهيا ح تفهمك
وسام على السريع لبس وطلع وقال لـ رودينة كل شي
عماد من الصبح كان في الجامعة
عماد:سامحني يادكتور على الغياب بس والله شوية ظروف
العميد:ولا يهمك ياعماد انا بس شاغلني اللجنة كل يوم تاخذ في الغياب وعشان الخصم وهكي
عماد:مش مهم عادي
وطلع عماد.
صوفيا:صباح الخير يادكتور
عماد:صباح النور ياصوفيا هيا المحاظرة ح تبدا 
الكل كان في شغلة الا فاطمة كانت حاطة الملح على الجرح وقاعدة تلوم في نفسها وطبعآ تليفونها مقفل بكل
بيسان حاولت توصل في فاطمة ولكن مصارش شي لأنها حابة تفهم شن صار في قصة سراج ومكانش عندها اي وسيلة اتصال بـ وسام
نمشو مع بعضنا لـ وسام في الشغل
محمود:مشاءالله عليك ياوسام واخيرآ قبضنا على مجرم الابتزاز هذا
وسام:والله الشخص هذا انا حققت معاه بنفسي طلع واحد تافه ولا في تشكيل عصابي ولا شي هكي انسان تافه وخلاص
محمود:المهم ماعلينا منه توا موضوعة في النيابة نحنا مش شورنا المهم انت كتبت المحظر
وسام:كتبته تمام
محمود:باهي كويس بكل بكل المهم قولي شن صار في قصة عماد خوك
وسام:انت عندك الاخبار كلها معناها
محمود:عيب عليك شن تشوف فيا هنا نبيع في كباب مثلآ
وسام:ههههه لا حشاك خويا امورة تمام وطلع
محمود:بس عجبتني اللقطة الي درتها انت
وسام:اين لقطة0_0
محمود:انك هكي مسمحتش لـ خوك ان يقعد في السجن ولعند الصبح كان في المكتب ولا الثانية هذي الاعلامية فاطمة انت توسطلها عشان حتى هيا تطلع
وسام:تي كيف عرفت هذا كلة انت
محمود:عيب ياوسام تسألني هكي وبعدين انت مش عارف ان نبيل يكون ولد خويا اصلآ
وسام:ولد خوك0_0عدت عليا هذي
محمود ناض من المكتب وقمعز قدام وسام
محمود:ههههههه انت ياوسام مازلت جديد على العمل وسام نصيحة مني لو انت ناوي تكون في يوم من الايام في مكاني هذا افصل مابين اهلك واصدقائك ومابين شغلك صدقني هكي احسن بواجد
وسام:باهي كويس ان شاءالله،بس نبيل ماغيرة ولد خوك
محمود:والله ولد خويا كنك ياوسام
وسام:لا مفش بس انصدمت
محمود:المهم امشي لمكتبك توا ح نبعتلك كم ملف هكي اقراهن كويس واستعد للجديد يابطل
وسام:تمام نستنى فيك
وطلع وسام وصكر الباب وكان يحكي بروحة
وسام:حيرني الراجل هذا عارف كل حاجة وكل حاجة نديرها يعرفها مش فاهم شي انا،هات قهوة للمكتب
وخش وسام وفتح تليفونة ورن على ندى
وسام:السلام عليكم
ندى:وعليكم السلام اهلين وسام
وسام:اهلين ندى كيف حالك
ندى:الحمدالله
وسام:رنيت عليك بس نبي نسألك على قضية فاطمة
ندى:والله ربي يذكرك بالخير انا توا كنت نبي نتصل بـ فاطمة تشرف عندي للمكتب هنا عشان نتفاهموا
وسام:تمام بارك الله فيك ياريت متقصرش معاها واي اتعاب مادية كلميني انا
ندى:ولا يهمك ان شاءالله يارب نحاول ناخذ اقل حكم من القاضي
وسام:ان شاءالله
وصكرو الخط
وسام:حتى صوتها سمح وحنون،تي شن صار في القهوة
وصكرت ندى من وسام ورنت على فاطمة طول
ندى:اهلين دكتورة
فاطمة:اهلين بيك
ندى:كلمتك عشان نقولك ممكن تشرفيني للمكتب وتشربي معايا قهوة وبالمرة انتناقشوا في المهم
فاطمة:تمام ابعتيلي العنوان بس
ندى:تمام ح يوصلك توا على الواتساب
فاطمة على طول طلعت ووصلت لـ ندى
وقعدت تحكي معاها وهكي.
فاطمة:يعني في تقديرك هكي هل القصة فيها حبس ولا ارجوك حاولي تكون لا لأن انا واخذة حضانة ابني من طليقي ولو انا انحسبت ح ياخذة طول
ندى:فهمني وسام على النقطة هذي صدقيني انتي لما اعترفتي القاضي ح يكون معاك
فاطمة:باهي نبي هكي نعرف اقصى العقوبة شنو
ندى:بصراحة اقصى العقوبة هيا الحبس بس واقل عقوبة ممكن غرامة مالية والمتوسطة نسيبيآ وهذا المتوقع ان يصير ياخذوا منك شهادتك ويسحبو منك المهنة بكل
فاطمة:عادي عادي بكل المهم حبس لا منبش نبعد على ابني
ندى:هوا في شي مهم لو ممكن تواصلنا مع الحالة الي انتي فضحتيها ووقعت هيا على انها مسامحتك الشي هذا ح يساعدني واجد
فاطمة:انا منقدرش نقوللها ارجوك اعفيني منها
ندى:لالا انا منبش ابدآ انك انتي اتواصلي معاها هذي شغلتي بس اكتبي هنا معلومات عليها رقم تليفونها و عنوان بيتهم وهكي
فاطمة:تمام بكل مشكورة،بس ياريت تعطيني فاتورة اتعابك عشان المرة الجاية ندير حسابي ونجيبهم
ندى:لالا يفضل الموضوع هذا نحكو فيه بعد القضية بكل
فاطمة:بس حرام هكي انتي قاعدة تتعبي معايا
ندى:انت من طرف وسام وانا بصراحة ح نعاملك معاملة خاصة بكل
فاطمة:مشكورة واجد بس قوليلي امتى موعد المحكمة
ندى:على الاغلب في اليومين الجايات هما ح يبلغوني وانا ح نقولك
مشا باقي اليوم عادي بكل.
مالك كان واخذ امة ورودينة عشان يمشو لـ رشا وكانوا في الطريق
منال:رد بالك يامالك تقول لخطيبتك ان عماد طلق زوجتة وهكي
رودينة:اها ح يقولوا علينا عائلة مشكلجية
مالك:تي لالالا ابدآ مجبتش سيرة طلاق بكل
رودينة:ماما رشا ح توافق ولالا
منال:والله مش عارفة يابنتي،مالك انت انزل معانا اقعد مع بوها
مالك:لا لا نقعد معاه لا يقعد معايا يومتها جاء وكان جان جنونة ع الاخر وعيونة كبار وشكلة يخوف فكوني منه انا ح نستنى برا ولا نمشي ونرد عليكم ساهل
وصلت منال ومعاها رودينة وفتح حسن الباب
حسن:يااهلآ وسهلآ خير ابلة منال تفضلو تفضلو
وخشت منال وشافت بيسان و(ايمان ام رشا)
إيمان:اهلين منال خشو تفضلو
رودينة:خير بيسان كيف حالك
كان سلام عادي مليان بالود والاحترام
إيمان:عاجبك الي صار توا يامنال
منال:والله مش عاجبني وكلنا مع رشا وولدي غلطان وانا جاية بس نبي نراضي رشا ونردها
إيمان:مستحيل ترضا يامنال الي دارة ولدك محد يتحملة
منال:رودينة خوذي بيسان وامشو جوا
بيسان:حاضر يااعميمة تعالي يارودينة
ومشت رودينة مع بيسان
رودينة:وين رشا نبي نشوفها ومرايفة على لينا وسراج موت
بيسان:تعالي قاعدة فوق في دارها
وخشت رودينة على رشا.
منال:يا إيمان نحنا جايين نهدوا النفوس وعيب كلامك هذا مش نحنا الي يقعد بيناتنا طلاق ومحاكم
إيمان:منال انتي على راسي من فوق بس ولدك غلطان
منال:انا حكيتلك كل شي وانا من اول يوم عارفة رشا بريئة وبعدين رشا انا نعرفها كويس وعارفة اختياري من الاول وانا نحبها بكل وهيا عارفة غلاوتها عندي زي رودينة بالضبط
إيمان:انا عارفة والله وعارفتك تحبيها وهيا تحبك بس الي صار مش ساهل هذا طلع بنتي خاينة ومش محترمة والله بوها من يومها مريض وقريب صارتلة حاجة لا سمح الله
منال:ولدي غلطان وعارف غلطة والله انا جيتك مديت يدي للخير وللصلح
إيمان:سامحيني يامنال انتي لا سمح الله لو في يوم صار الشي هذا مع بنتك رودينة شن ح اديري
منال:انا فاهمة عليك وصدقيني حتى انا انقهرت بكل وكأن الشي هذا صار مع بنتي وقلت لو نشوف بعيني رشا مستحيل ادير هكي،وتوا انا نبي نشوف رشا
رودينة طبعآ شافت رشا وهكي وحكتلها كل شي صار
وبعد ربع ساعة جت رشا ومعاها لينا وسراج مع رودينة
منال:اهلين يابنتي تعالي قمعزي جنبي
إيمان:بيسان تعالي معايا
وطلعو وسيبوهم بروحهم
منال:بنتي رشا انتي عارفة انا كيف نحبك ارجوك ردي معانا الحوش بلاك وبلا العيال والله شين بكل
رشا:عمتي منال انتي جيتك هذي فرحتني واقسم بالله بكل ونعزك ونحبك انتي ورودينة ووسام ومالك بس الي صار والله مانقدر بكل
رودينة:ليش تقولي هكي يارشا
منال:يارشا عشان خاطري عشان خاطري قتلك لو عندي عندك خاطر احكي مع باتك عشان عماد يجي ويردك
رشا:انتي اكثر وحدة تعرفي خاطرك ومعزتك عندي كبيرة بكل بس انا معش نقدر خلاص مستحيل نرد نعيش مع عماد مرة ثانية
قعدوا شويا هكي وطلعو.
حسن:شن صار ياإيمان
إيمان:ولا شي جايين يردوها وقالو البنت مظلومة وهكي وعماد توا عارف الشي هذا
حسن:عماد هذا مش كيف اهلة بكل والله ناس محترمين وطيبين ووسمعتهم كيف المسك
إيمان:حتى هوا محترم وكويس طول عمرة بس المرة هذي طلع ولا حاجة
حسن:ورشا شن قالت
إيمان:تي رفضت طبعآ
الكل روح وهوا زعلان وخلاص
مالك:تعالي يارودينة فهميني شن صار
رودينة:والله رشا رفضت بكل حتى بعد ماما قالتلها عشان خاطري البنت مصكرة راسها
مالك:بيني وبينك والله احسن البنت الحسرة الي فيها مستحيل حد يحس بيها هذا كلة من غباء عماد من الاخير كل غبي
رودينة:باهي عماد بشر واي واحد يغلط وبصراحة رشا غلطت ماما تجي لعندها وتردها
مالك:ماهو يادونا الموضوع مينحلش بـ عشان خاطري ردي وهكي مش هكي بكل تصرف عماد من الاول غلط
رودينة:شن كان يدير مسكين لعبو بعقلة والحمدالله مشت على هكي كان واحد ثاني راهو قتلها بدون مايعرف الحقيقة
مالك:متقعدش تافها وسطحية معلش التصرف الصح تاخذ البنت بالرسائل هذينا وتشيلها لـ اهلها وتقوللهم القصة فيها وفيها مش اطلقها طول وتطردها وبعدين تحطنا في مواقف بايخة زي الي صار مع امك اليوم تي امك مريضة والمفروض منزعلوهش بكل
رودينة:والله عندك حق ماما روحت زعلانة بكل ويستر الله
                        (بعد ساعتين)
عماد وصوفيا كانوا في الشغل وكالعادة زحمة بكل بكل
عماد:معش نقدر انا ياصوفيا خلينا ناخذوا راحة شويا
صوفيا:اليوم انت كنت اكثر دقة في الشغل عشان هكي تعبت
عماد:الله غالب خايف يتكرر الموضوع متاع عبد الرحمن من جديد الناس هذي امانة في رقبتي
فجأ رن تليفون عماد وكانت رودينة
عماد:الو رودينة
رودينة كانت تبكي وخلاص وتبكي جديات
عماد:تي كنك تبكي يابنت احكيلي حد مزعلك قولي بسرعة
رودينة:كارثة كارثة ياعماد
عماد صبا على طول
عماد:تي كارثة شنو تي احكي
رودينة:......................0_0
عماد:...............................0_0
صوفيا:..................................0_0يتبع الحلقة الثالثة والعشرين