جريمة صوفيا

الحلقة(12)

الحلقة الثانية عشر 12 من رواية #جريمة_صوفيا مؤلف القصة انا #إبراهيم_رشيد
قراءة ممتعة
حوالي ساعة 4 الفجر صارت حاجة غريبة بكل بكل
رن تليفون عماد لأول مرة في الوقت هذا
رشا:شنو هذا
عماد فتح عيونة
عماد:يستر الله من مكلمني توا
وخذا عماد تليفونة وشاف التليفون بعين وحدة
عماد:رقم غريب تي منو هذا
عماد رد.
عماد:الو؟ من معايا
الراجل:انا نفس الشخص الي دزيتلك باقة الورد ياعماد انا معايا دليل خيانة زوجتك لكي0_0
عماد في اللحظة هذي قلبة دق بسرعة بكل بكل وتغيرن ملامح وجة
بس طبعآ كان ظلام بكل ورشا متشوفش في وجه عماد
عماد تلخبط بكل في ثواني وطلع برا يجري
رشا:عماد عماد
عماد:الو الو
ومشا بسرعة وفتح بلكوني متاع الصالة وطلع وكانت الدنيا صقع بكل
عماد:الو انت من ياحقير وشن تبي مني وكيف تحكي هكي على زوجتي
الراجل:انا فاعل خير وانت راجل محترم ومتستاهلش الانسانة الي عايشة معاك
عماد:واقسم بالله لو انك راجل مدزش رسالة للمستشفى تعال واجهني ووقتها بس فهمني شن عندك
الراجل:اوعى كويس ياعماد انت قاعد غافل على حاجات واجد بكل انت يومك كلة في المستشفى ومراتك ادير في حاجات مش كويسة من وراك
عماد:انا مراتي واثق فيها ثقة عمياء فاهمها هذي ولالا واقسم بالله لو بس نقابلك نقتلك قتل ووحق ربي على الكلام الي كتبته على مراتي في الرسالة لكن بيناتنا يوم وعارف نقولك شي مهم انا لو قتلتك محد يقدر يلمسني لا شرطة لا قضاء لا غيرة لأن كله كله طعن في الشرف ودفاع على الشرف حركات رخيصة بكل بس خاطري نعرفك من
الراجل:والله ياعماد انت بجديات واجعني بكل بكل ومسكين انت لما تطلع وتصكر في الباب عارف روحك من تسيب وراك ولالا
عماد:انت عليش قاعد تاخذ وتعطي معايا بنقولك بس ح يجي يوم ونتلاقو
الراجل:وقريب الدليل ح يوصلك على طاولة المكتب متاعك
وصكر عماد على وجة
عماد في لحظة تحول من شخص مسالم تمامآ الى شخص عدواني ويهدد بالانتقام لـ رشا لأن بجد تمادى وطعن في شرفة وعرضة وهوا يديه متربطات
عماد قعد يشوف في الشارع شويا وفي حسرة كبيرة على وجة وخش وصكر البلكوني
رد للدار شاف رشا راقدة قعد يشوف فيها شويا وبعدين جاء جنبها
عماد في حيرة كبيرة بكل بكل وكمل الوقت في تفكير ويلتفت يمين ويسار
بعد حوالي ساعة سمع عماد صوت ولدة سراج وهوا يبكي
رشا فتحت عيونها طول
عماد:خليك كملي نومك توا انوضلة انا
استغربت رشا من عماد لأن لأول مرة يدير هكي
ناض عماد ومسك سراج
رشا:عماد من الي رن عليك
عماد:لا شي بس مريض عندنا في المستشفى كلموني يستفسرو على شوية حاجات
رشا:اها غريبة اول مرة تصير
وردت رقدت رشا
المهم مشا الوقت لعند ما جت ساعة 8
عماد صبى على طول لبس وطلع حتى بدون مايشوف امة
رودينة:مش مريحني عماد
رشا:عادي يادونا اكيد عندة شغل
منال:اول مرة يديرها ومينزلش يسلم عليا في الصبح
رودينة:عادي صاح مسكين هوا بين الجامعة والمستشفى،ماما امشي للصالة شويا ونجيبولك قهوتك
وطلعت منال.
رشا:بيني وبينك عماد مش مريحني بكل اليوم
رودينة:كيف توا هالوقت كنتي تقولي في عكس الكلام هذا
رشا:مش هكي بس انا محبيتش نحكي قدام عمتي،امس تليفون عماد رن على الفجر وطلع برا يكلم ولما سألته قالي لا هذا مريض كلموني عليه من المستشفى
رودينة:وباهي بلكي بجد كلامة صاح عادي شن فيها تصير هوا دكتور واكيد اكيد ح يتعرض للأشياء هذي
رشا:به تمام بس كيف قعد نايض للصبح وشفته مرقدش بكل بيني وبينك والله خايفة البنت هذي الي اسمها صوفيا تكلم فيه
رودينة:معقولة تي لالالا اسأليني انا خوتي ونعرفهم قوليلي مالك صاح لكن عماد مستحيل مش نسونجي
رشا:والله جنس ادم مفيهمش ثقة
رودينة:ياهمي عماد ونعرفة كويس انا تي انتي شوفي بنات الجامعة كلهن طايحات فيه وهوا مش معدل عليهن يعني بالله عليك لما يبي يخونك يبي يخونك مع بنت يتيمة
رشا:كل شي ممكن
منال بصوت عالي من الصالة
منال:القهوة يابنات
رودينة:هيا هي
رشا:بيني وبينك في خاطري نبي نفتح ونشوف تليفونه
عماد لما طلع كان بجديات مخنوق بكل بكل من جيهة يقول خاطري نقتلة لأن طعن في شرفي ومن جيهة ثانية يقول كلام الراجل فعلآ ممكن يكون صاح
عماد:تي لالالالالا ياعماد شنو هذا شن تقول انت رشا بنت ناس ومتربية كويس وبعدين انا من سنين لما امي شافتها سألت عليهم كويس وقالولي ناس محترمين،تي بس منو هذا اصلآ وليش يدير هكي فيا الله اعلم وشن يبي بس
وفجأ جا رسالة من رشا
رشا:حابة نزعجك انا ماشية لأهلي اليوم ونبي نروح بعد المغرب
عماد كان معندش نيه لا يمشي الجامعة ولا اي شي قعد يبرم ويفكر وخلاص شاف الساعة لقاها 10 ونص
كان ماشي للمستشفى ورن تليفونة
صوفيا:الو دكتور عماد خير
عماد:الو صوفيا خير
صوفيا:دكتور انت اليوم مجيتش للجامعة وانا جيت توا للمستشفى وانت مش قاعد
عماد:صوفيا صوفيا اجلي كل شي اليوم انا مش ح نخدم الجدول كلة حطيه لبكرا
صوفيا:بس يادكتور انت المفروض عندك عملية اليوم وهكي الجدول ح يتلخبط بكل
عماد:عملية الراجل الي على الكتف مش مستعجلة بكل خليهم يبلغوه ان بكرا وقوليله اليوم هذا قعدتك على حساب المستشفى
صوفيا:ماشي تمام توا انا نقعد على الجدول والمنظومة ونغير كل شي
عماد:ماشي تمام اوكي
صوفيا:دكتور دكتور قبل ماتصكر
عماد:نعم ياصوفيا
صوفيا:نبي نعرف بس وين نلقا الدكتور فاطمة المذيعة متاع الاذاعة بصراحة المستشفى كبير وانا معش فهمت وخاطري نشوفها ونصور معاها
عماد:اها فاطمة تلقيها في الدور الرابع اركبي فوق توا يدلوك
صوفيا:ماشي تمام شكرآ
وصكرو الخط
صوفيا:غريب كنه هذا؟توا نشوف شغلي ونمشي للدكتورة فاطمة والله تعب بكل معقولة هكي بنغير كل شي لبكرا معلش ياصوفيا تحملي تحملي هانت خلاص
عماد وصل للمستشفى ونزل بسرعة
عماد:معين وين؟
الممرضة:قاعد يادكتور في غرفته
عماد:به عندة حالة ولالا
الممرضة:لالا تقدر تخش عليه
وخش عماد على معين
معين:هلا ياغالي زارتنا البركة
عماد:خير يامعين شن جوك
معين:والله تمام غريب في العادة انا الي نجيك كنك
عماد:لا اليوم انا عندي شغل برا منبش نخدم بس بنقولك نبي منك خدمة
معين:ادلل عيوني لكي
عماد:في صاحبك الي مرة حكيتلي عليه يشتغل في شركة الاتصالات
معين:خليل باهي كنه
عماد:منش عارف اسمة بس عندي رقم متعب رشا ويعاكس ويرن نبي نعرفة بأسم من حطيته على الكاشف لقيته اسم وهمي
معين:تمام حاضر بس حطة في الحظر وساهل
عماد:حطيناه في الحظر قعد يدز في رسائل المهم يامعين بالله عليك شوفلي الاسم شنو
معين:حاضر والله ولو عرفناه نفتحو فيه محظر في المركز عادي جدآ يعني
عماد:جيبلي اسمه بس والباقي ساهل
معين:تم ياعيني توا هالوقت نرن عليه
عماد:اها وحاجة ثانية نبي سيارتك ضروري لأن سيارتي هكي وضعها مش مريحني هاليومين
معين:تمام امسك المفتاح
عماد:وهذا مفتاح سيارتي لو تبي تطلع ولا حاجة خليه معاك بس شنو انا ماشي مشوار مهم وبعيد خايف تخرب بيا
معين:لا انا مش ح نطلع اليوم دوامي لـ ليل
عماد:تم معناها بيناتنا لقاء
معين:تمام عماد عماد
عماد:نبي نمشي مستعجل كنك
معين:نبو نديرو انا وانت اجتماع عشان الجرد السنوي قرب
عماد:تمام بعدين توا نتفاهموا
وطلع عماد يجري بسرعة
معين:غريب عماد اليوم عندة دوام لـ ليل عليش طلع وليش اصلآ خذا سيارتي وهوا سيارته جديدة وسمحة
طلع عماد ووقف قريب من حوشهم
عماد بجديات كان حاب يوصل لـ حل وينهي شوية الشكـ الي عنده تجاه رشا
كانت فكرة عماد ان هوا يمشي ورا رشا وين ماتمشي
رشا:تمام يادونا انا ماشية لماما والله ياريتك تمشي معايا نغيرو جونا شويا بيسان
رودينة:والله حتى انا في خاطري بس نبي نكتب اليوم المفروض نكتب 3 حلقات
وطلعت رشا وركبت في سيارتها ومشت وكان عماد وراها بسيارة معين
والوضع طبيعي بكل كانت ماشية عشان عندها جلسة مع فاطمة وهكي
رشا طبعآ مشت لأمها حطت عندها سراج و لينا وطلعت اخرى وبرضو عماد وراها
رشا وقفت سيارتها في باركين المستشفى ونزلت مسكت تليفونها ورنت على فاطمة
رشا:شنو يافاطمة نركب
فاطمة:يابنتي اركبي الوضع امان ومفش حد يعرفك هنا وعماد اكيد في عيادته
عماد كان يشوف فيها من بعيد
عماد:التليفون هذا اكيد لـ فاطمة عشان اتأكد اني مش قاعد
صوفيا كملت الشغل وصكرت الباب وطلعت مشت لفاطمة
صكرت فاطمة من رشا وطول تسمع صوت يناديها من وراها
صوفيا:السلام عليكم
فاطمة:وعليكم السلام تفضلي
صوفيا:يزيد فضلك لا بس انا جاية نسأل على دكتورة هنا اسمها فاطمة ومذيعة في راديو في نفس الوقت
فاطمة:وصلتي يااختي انا فاطمة نقدر نخدمك بحاجة
صوفيا:لا بس انا بصراحة من اشد اشد اشد متابعينك وكان في خاطري نشوفك من زمان والحمدالله توا شفتك 
فاطمة:يااهلا وسهلآ بيك شكرآ واجد ربي يحفظك
رشا كانت جاية وشافت فاطمة مع صوفيا جت ورا الساس عشان ماتشوفهش
رشا:شن ادير هذي هنا معلش والله مش متريحتلها بكل البنت هذي في من وراها حاجة كبيرة
صوفيا:والله بجد مش حابة نعطلك ابدآ غير ان نبي نقولك استمري برنامجك حلو وصوتك حلو وشكلك حلو وبجد في خاطري نصور معاك
فاطمة:ياسلام عادي ليا الشرف
وجت الممرضة صورتهم وهكي
صوفيا:اسفة اسفة بجد لو عطلتك وهكي
فاطمة:لا ولا يهمك بس قوليلي انت وصلتي لعند هنا معناها تخدمي في المستشفى
صوفيا:اها ماهو انا نكون حاليآ مساعدة الدكتور عماد هوا نفسة صديقك وهوا دلني عشان نجي هنا
فاطمة:اها تمام تمام حلو بكل وموفقة يارب
ومشت صوفيا وعلى طول جت رشا
رشا:شن كانت تبي منك البنت هذي
فاطمة:توا غير خشي جوا وبعدين ساهل
وخشت رشا مع فاطمة
رشا:كنها هذي ليش جاية
فاطمة: من وين تعرفيها انتي اصلآ
رشا:نعرفها هيا نفسها مساعدة عماد توا يومها صار بينا سوء تفاهم
فاطمة:عادي قالت انها معجبه بيا وهكي
رشا:غريب توا مش وقت شغل عند عماد كيف طلعت
فاطمة:ممكن يكون ريست او هكي خلينا بس نبدو
عماد كان يستنى وهكي وشاف صوفيا طالعة من المستشفى
وقعد يستنى وكملت رشا الجلسة مع فاطمة وطلعت
وطلعت رشا وبعدين مشت لأهلها وكانت حركتها عادية جدآ جدآ جدآ
عماد:من الحوش لـ مستشفى وبعدين لحوش اهلها رشا عادية بكل يعني مشت لمشاويرها الطبيعية
عماد قعد هكي ربع ساعة وبعدين
عماد:احسن شي نمشي نرقد شويا بس للحوش منبش نروح الاحسن نمشي لشقة معين
ورن عماد على معين
عماد:معين نبي نمشي نرقد في شقتك شويا توا كان روحت صداع العيال وهكي
معين:ههههه صداع العيال ولا هيا طاردتك من الحوش
عماد:هههه لالا مش هكي بس فعلآ خاطري نريح راسي شويا
معين:ياغالي امشي معاك مفتاح احتياطي وعدي الشقة فاضية
عماد:تمام بس راك تطلع جايب وحدة للشقة
معين:هههه لالا الجو تمام امشي ارقد وعيش حياتك وانا ح نحاول نروح بدري ونديرو تكسيدة
عماد:تمام بس شوف صاحبك يامعين
معين:كلمتة وقالي ح نشوف ونرد عليك
عماد:تم
مشا عماد لشقة معين وعلى طول طاح رقد لأن امس كان شبه مش راقد
عماد كان في سابع نومة وناض على صوت تليفونة
فتح عيونة وشاف الدنيا برا ظلام
عماد:الو معين
معين:الو عماد وين
عماد:مازلت راقد انا
معين:معقولة هذا كلة نوم
عماد:منش عارف شن صايرلي توا ساعه 8 
معين:باهي تمام انا جاي توا و ح نجيب معايا عشاء
عماد:خير ماتفعل ياصديقي جعان بكل انا
معين:تم تم مسافة الطريق
وناض عماد وكان يبي يدير قهوة
عماد:هذا وين يحط في السكر
نمشو مع بعضنا لـ رشا وحوش اهلها
حسن:اقعدي يابنتي عندنا اليوم
رشا:لا يابابا نبي نروح خلاص وقت
ايمان:ردي بالك من الطريق يابنتي
بيسان:رشا رشا نسيتي هذي
رشا:تعالي معايا طلعي سراج للسيارة
بيسان:هيا باهي
وطلعت بيسان مع رشا
رشا:في حاجة جديدة ولالا على سراج
بيسان:لا ابدآ والله معش كلمني ولا اي شي
رشا:باهي تمام هيا تشاو انا نبي نروح
وطلعت رشا ووصلت للحوش
نردوا على معين وعماد
عماد:ياعيني عليك كنت متأكد انك ح تجيب من المطعم هذا
معين:صحة صحة اها نسيت نقولك كلمني صاحبي وقالي اسم الشفرة اسم شخص هكي وهمي واخرى انفتحت ثلاث ايام وصكرت
عماد:كيف هذي معلش
معين:تصير ياعماد عادي يديرو اسم وهمي ويقعدو يطلبو منه تأكيد الاسم 72 ساعة وكان مدارش تأكيد يصكروها وبعدين انت عليش مدقق للدرجة هذي شن في يعني واحد مكسد ويعاكس حظر وتنتهي القصة
عماد:هوا هكي صدقت
معين:وسيارتك ياعيني مافيها شي قتلي خاربة انت
عماد:منش عارف قتلك حسيت
معين:عماد انت مخبي عليا حاجة
عماد:شن نبي نخبي عليك غير تشوف في الشغل ومتلخبط
معين:هههههه من يوم ماطلعت في القناة مع ايهم وانت مش على بعضك بكل الشهرة تغير شكلها
عماد:تي اين شهرة تشوف فينا قاعدين حياتنا كلها في المستشفى
معين:والله صدقت اليوم كلة غادي انت نومك تلخبط كيف ح تنظم نومك
عماد:تي عادي ح ناخذ حبة منوم بعدين
وقعدوا عماد ومعين لعند تقريبآ ساعة 11 مع بعضهم بعدين طلع عماد مشا للحوش لقا الكل راقد وخذا حبة منوم وطاح رقد
طلعت الشمس وجاء ثاني يوم وزي اي روتين صباحي للعائلة كان يوم عادي جدآ وطبيعي بأستثناء رشا وعماد كان الجو بيناتهم متوتر شويا
المهم عماد مشا للجامعة عادي وبعدين طلع هوا وصوفيا للمستشفى وبدت الخدمة وطلع عماد من العملية وكانت معاه صوفيا
حوالي جت ساعة 5 جت رسالة لعماد من رشا
رشا:انا طالعة نبي نمشي لـ فاطمة في حوشها
عماد طول رن على رشا
عماد:الو رشا
رشا:الو عماد
عماد:شنو مفهمتش شي من الرسالة
رشا:قتلك انا طالعه ماشية لفاطمة في حوشها كلمتها توا،ونبي نمشي لمركز التجميل عارفة انت وعارف مكانه وين قريب وبعدين كنك مركز ياعماد هكي
عماد:مش مركز عادي امشي
وصكرو الخط
عماد لأن كان في نسبة شك في رشا رن على فاطمة
فاطمة:هلا يادفعة
عماد:خير يافطوم سريع نبي نسألك
فاطمة:نعم
عماد:اليوم شفتي رشا؟ولا كلمتيها
فاطمة:لا ابدآ اليوم معندهش رشا وبعدين انا طلعت من مبدري وتوا ماشية مع مراد لمدينة الالعاب
عماد:اها يعني رشا اليوم مكلمتوش بعضكم بكل
فاطمة:عماد كنك بالضبط
عماد:لالا شي نحساب ان اليوم رشا موعدها معاك نسيت جدولها بس اوكي فطوم توا
وصكر عماد الخط
وقعد قلبه يدق بسرعة
عماد:صوفيا صوفيا
صوفيا:نعم
عماد:كم مازال في حالة
صوفيا:اااو واجد يادكتور
عماد:هاتي حالتين بس في شخصين كبار في السن والباقي قوليلهم بكرا
صوفيا:بس يادكتور من امس اجلنا واليوم اخرى حرام
عماد:منش فاضي الي مش عاجبة يمشي يشوف دكتور ثاني بكل
انفعل عماد وصوفيا زعلت من طريقته وفعلآ كشف على اخر حالتين وطلع بسرعة
عماد:مازلت منبش نظلمها انا ح نمشي نتأكد بنفسي في مركز التجميل
وطلع عماد يجري ووصل قدام المركز ونزل
عماد:سيارة رشا مش قاعدة بكل نخش نسأل عليها
وخش عماد وشاف بنت في الاستقبال
عماد:لو سمحتي انا زوجتي جوا قاعدة ونبيها
البنت:اوكي مفش مشكلة خليني نشوف اسمها
عماد:هوا الي يجي هنا ضروري يكتب اسمة عندك صاح
البنت:طبعآ يااستاذ شن اسم زوجتك
عماد:رشا حسن
البنت:رشا حسن رشا حسن امممم مفش يااستاذ حد بالاسم هذا
عماد:كيف هذي زيدي تأكدي
البنت:نقولك مفش شوف بعينك لا حجز ولا اي شي مفش حد بالاسم هذا
عماد طلع يجري برا وكان مش فاهم شن الي قاعد يصير
عماد:نرن عليها ولا شن ندير،واقسم بالله اليوم ح نوريها ونعرف وين كانت ماشية،لو صار الي في عقلي واقسم بالله مش ح تقعد على ذمتي يوم واحد بس تكذب عليا تقولي فاطمة ومركز تجميل والكلام هذا مفش منه بكل بكل انا الحق عليا طالقها هكي تطلع كيف ماتبي الله اعلم كم دارتها مرة الحركة هذي انها تطلع ومتقولش لكن تمام يارشا ح تروحي وين ح تمشي مني
قعد عماد ثلاث بالضبط محتار بكل ومش عارف شن يدير وبعدين قرر يروح للحوش
وقف عماد قدام الحوش وشاف سيارة رشا قاعدة
عماد كان متعصب بكل بكل ونزل يجري وركب فوق طول لشقته وصبى قدام الباب
عماد:من الغباء متاعي نسيت المفتاح في المستشفى
وقعد يخبط على الباب
رشا:هيا هيا منو هذا كنها رودينة تخبط هكي
وفتحت رشا الباب وجت عينها في عين عماد
رشا:عماد
عماد:اها عماد
وخش عماد بسرعة وتجرأ لأول مرة شد رشا من شعرها بالقوة
رشا استغربت بكل وقبل ماتقول اي حرف
عماد:وين كنتي طالعة ياكذابة ياحقيرة0_0
رشا:......................0_0
عماد:........................0_0يتبع الحلقة الثالثة عشر