" أثـر "

" أثر " / 4

مسحت دموعي أخيرًا ، ونضت غسلت وجهي ونزلت فجنب خواتي .
أني : منتهى شن رايك نطلعوا اني وياك ولبنات ، ناقصيني حاجات وبنمشي للمكتبة بناخد كتابات .
منتهى : شوفي بابا وعادي .
سألت بابا وقالي تمام بس م تعطلوش ، هالة قالت باهي لكن سبأ قالت عندي قرايا وبنقعد مع ماما مرات الضي يهرب ويكون بابا طالع ، خليتها ع راحتها ، ركبت لبست وطلعنا في سيارتي ، مشينا للسوق خدينا الي ناقصنا وبعدها مشينا للمكتبة ، نزلت اني بس ، خديت كتاب ل أيمن العتوم وشوية فواصل ومذكرة قررت نكتب فيها أحداث أيامي الجاية الي ممكن يكونوا صعبات ، خلصت وطلعت حطيت حاجاتي فالسيارة فجنب البنات وسألتهم شن خاطرهم يشربوا ، وخشيت للمقهى ، وقفت على الوليد وقتله شن نبي ،

نظراته كأنه يعرفني ، واني برضو حسيت روحي شايفاته في مكان بس م قدرتش نذكر ، ويا مكتر الوجوه العابرة ، الي مع الوقت حتستوطن خيالنا قبل الواقع ..

عطاني طلبي ولما جيت بنخلص ، قالي خليها علينا ، مديتله الفلوس وقتله بنبرة حادة منين المعرفة ! ، قالي شكلك تنسي فيسع ومد ايديه باش ياخد الفلوس ، نصدمت لما شفت العلامة الي على ايديه الايمين وفيسع قمت ايدي الايسار ونحيت اللصقة فيسع وقعدت نقارن ، شن هالصدفة !
معقولة نفس الأثر فنفس المكان بإختلاف الإيد !!
فقت من سرحاني على صوته وهو يقول : هييي يا أبلة !
خديت طلبي وطلعت ، وطول الطريق نفكر ، وين شايفة هالوجه وشن قصة الأثر الي ف ايديه ، معقولة التشابه للحد هذا ، كنت طول الوقت ساكتة للحد الي خلا خواتي يركزوا ،
هالة : ماسة حطيلنا اغنية
أني : ....
خبطتني ع كتفي : نكلممم فيك ياهو حطيلنا اغنية
شغلت الراديو طلعت أغنية شيرين " مشاعر " ،
قعدت نتبع فالأغنية بودني واني نفكر شن القصة الي صارت ، وصلنا للحوش نزلت وسيبت موضوع الولد فالسيارة ، ولسان حالي يقول في ورانا هلبا مواضيع مش وقت نفكروا في هالحاجات توا ..

خشيت للدار غيرت حوايجي وصليت درت قهوة وقعمزت نحاول نقرأ كتابي الجديد ..

بعد م كنت حاطة احتمال انه يكون فيا هالمرض ، ولا بين م نتأكـد من صحـة الكلام ، قررت اني نستفيد بكل دقيقة وندير كل الحاجات الي نحبهم الي ممكن معاش نلقى ليهم وقت .
خلوني نقوللكم حاجة : اني ماسة الوقت ، ماسة الجروح الهلبا ، ماسة القوة ، مريت في حياتي بهلبا حاجات خلو عودي يقوى ، عشت تجربة عاطفية فاشلة بإمتياز ، خشيتلها رهيفة طلعت منها بقلب رزين م يهزاش لا بنادم ولا ظرف

شخصيتي أخر فترة كان مستقرة على بر الـثبات ، سواء على الصعيد العاطفي الإجتماعي وحتى النفسي ، راسمة لحياتي خطة نبي نمشي عليها ، تتمحور على النجاح المهني والدراسي ، أخر فترة برضو ملتّ للقراءة أكتر من أي وقت تاني ، من لما كبرت نقرأ ، بس حاليًا بادية نأكل فالكتابات ، درت في داري مكتب صغيرون ، معبي بكتب الفلسفة التاريخ وعلم النفس حتى ، تعلمت السواقة وخدالي بابا سيارة ، خشيت لكورسات لغات وحاسوب وتنمية بشرية ، كانت حياتي تأخد في مجراها بعيد على المجتمع كَكُل ، مكنتش نخالط في حد ولا نمشي لحد ، سواء المناسبات الإجتماعية ولا حتى الزيارات العائليـة ..

كنت نحاول نستفيد من كل شئ باش نثبتت لروحي قبل الناس اني قوية ، واني منطيحشّ ، اليوم اكتشفت قداش الدنيا مفيهاش تقـة ، مش الناس بـس ، فجاءة بديت حاسة انه كل الي كنت ندير فيه م فادنيش توا .. بس الحمدلله
اني اليوم حتى لو متت حنخلـي أثر صغيرون وراي ، حنخلي سرير فحوشنا وبيجامات هلبا فالدولاب ، صوت ضحكتي مع خواتي ، ونصائحي لسبأ ، والليالي الي سهرتهم نقري في هالة لإمتحاناتها ، أيام رمضان الي نوتي فيهم فالفطور بروحي ونخلي فيهم راقدات ، الأفلام الي كنت نحمل فيهم لمنتهى ف عيد ميلادها ، والشوكلاتات الي نروح بيهم من الجامعة كل يوم لـهالة ، والروايات الي كل م نقرأ وحدة منهم نرفعها نحطها ف جنب سرير سبأ .. سماعي لفضفضة بوي لما اضيق بيه الدنيا ، وطبطبتي على كتف أمي لمـا تتعصب ، اليوم تأكدت انه العيلة أولًا ودائمًا ، العيلـة قبل الكل ومابعدها حد .

فنص سرحاني وتفكيري الهلبا حسيت روحي نبي نمشي للبحر ، بس طبعًا مش حنقدر نمشي توا ، حطيت كتابي وخشيت سريري نحاول نجيب النوم ونريح عقلبي وقلبي وجسمي حتى .. النوم الي من لما جيت ع الدنيا كان مكاني الي ندس فيه فروحي ، رققدت ليلتها واني عارفة انه يوم غدوا صعب ، والصبح الي كان محطة أملّ ليا  ، ممكن لي كل يوم جديد جاي حيجيبلي خبر م يفرحنيشّ ..

فقت الصبح بكري ، اول حاجة طاحت عليها عيني الجرح الي ف ايدي ، نحيت اللطقة بالشوي والجرح جابلي الولد متع المقهى وقعدت نفكر فيه ..

يتبـع / نُـورا نصـر .