" أثـر "

" أثر " / 23

" أثر "/ 23

اعذروني عالتأخير ، زابطين حوسة العيد ..

-

خواتي كلهم رقدوا ، واني صدري ضايق مش قادرة نرقد ، نحوس ف الحوش وخلاص ..
فاقت امي الساعة 10 .. هدرزنا شوية وقتلها صدري ضايق

امي : بري افتحي الدولاب الفوقي متع الكوجينة تلقي فيه شيشة امية مقرية اشربي منها واغسلي بيها وجهك ..

مشيت فتحت الدولاب وصبيت طاسة مية وشربتها .. وغسلت بيها وجهي .. طلعت للصالة بدت بطني توجع ، ألم مش طبيعي ووجهي عرق ومعاش نشوف في شي ، فجاءة حسيت روحي بنرجع ودايخة .. خشيت للكوجينة وقعدت نرجع ، نرجع ف حاجة سووودة ، وحاسة روحي بتطلع ، من الصدمة رعشت وقعدت نبكي ، جت ماما تجري ، شافت الحاجات السودة نخلـعت ..

طلعت قعمزت برا ودارتلي ماما كسبر باش يهديلي اعصابي ..

بعد م هديت وكل شي جت ماما قعمزت فجنبي ...
ماما: عزوزتك وحمواتك شن جوهم معاك !
اني : كويسين هلبا ياماما والله ..
ماما : متأكدة!!!!
اني: اي ياماما اقسم بالله ..
ماما : لمن مشيتي غيرهم وغيرنا !!
اني : م مشيت لحد " وراحت من بالي وفاء "
ماما : انتِ ياماما موكلينك سحر عندك علم !
اني قعدت نشبح ومش فاهمة شي !
ماما : تفكري وين مشيتي بالضبط وعند من كليتي !!!
اني مش مركزة وناسية كل شي : مشعارفة يماما .. كيف الحل توا !!
ماما : غر اتصليلي براجلك قوليله تبيك امي تعالى ..

اتصلت بياسينّ قتلهّ تعالَى ماما تبيكّ ..
جـي ياسين لقاني راقدة ومريضة ، حكتله ماما لصار ، وقعد هلبا خايف ومش فاهم شئ ،، زينِي يعنِي بالضبـط ..

مامـا قالتله لازم تمشي لشيخ .. واني وقتها بجديات خفت هلبا ، وحسيت روحي خاشة لمعمعة ملياش فيها ، سحر شني وشيخ شني وشن الحاجات الي طلعتهم من بطني ..

طول الطريق واني وياسين ساكتين .. وصلنا للحوش نزلت وسادني هو ، لآن حتى رجليا معاش قدرت نمشي عليهم .. كان فيا خمول وتعب مش طبيعي ، كل شئ رزين حتى الكلام ..

خشيت طول للدوش .. دوشتّ ولبست بيجامتي وخشيت للسرير .. جي ياسين فجنبي : أسف حبيبي .
اني نشبحله ومش فاهمة شن قصده : على شن ؟
قربني ورقدني على صدره من غير م يجاوب .. رقدت من كتر الإرهاق الي كنت حاسته .. ومحسيتش بشئ ل قريب الساعة 11 فالليل فقت لقيت ياسين مش فالدار ، ناديـت عليههّ ، جاني من الكوجينة : ندير فالعشي 👨🏻‍🍳
قعدت نضحك : جي ساعدني باش وقفت وطلعت معاه لقيته مداير مكرونة ريحتهـا تجننّ ، قعدنا نهدرزوا لين طابت
حطلنا وكليت منها لين شبعت ، خشيتّ صليت الصلوات الي فايتني وخش ياسين يغسل فالماعين 🥺.

سهرنا ليلتهـا هلبا ..  للـصبحّ كنت مستاحشته هلبا ومستاحشة داريّ ، كانت ليلة معبيا كلام ، حكالي هلبـا وخدي مكان خواتِي فاللعب بشعراتِي ، حسدتّ روحي فيـه ليلتهـا ♥️.

وقتها كنت ناسية كـلّ شئِ .. ومكنتش حاسـة بشئ لا بريحته الي نحبه متغلغلة فـيا .. رقـدتّ من كـثر الراحة والصعبّ كله كان ف عداد النسيان والتجاهـل ..

فاتوا تانِي يومينَ بلا اي شي يندكر .. طول الوقتّ فسريري ، تعبـانة ومريضةَ وياسين ف جنبي م خلانيش دقيقةَ ..

جتني امي اليوم العشية هيا وخواتي ، اول مرة يخشوا حوشي ، كنت نتنمى يجوني اول مرة ف ظرف أحلى ، نتكون ضيافتي مش ناقصها شئ ، لابسـة حاجة قنينة عرايسية ، ريحة الوقش قنينة ومعبيا الحوش ،، كنـت هلبا متمنية هالشي ..
بس مصارش ، جوني واني راقدة على سريري معنديش جهد انوض نستقبلهم فالصالة .. وجهي شاحبِ ، وراجلـي هو الي دارلهم القهوة لـو م حلفتلاش منتهى انه هيا الي حديرهَا .. طلع ياسيـن بعد م سألني " حبيبي م تبي شئ " !

هالة قعدت تضحك : احلى حاجة ف ياسين انه واخد راحته م يتحشمش منا 🤣

قعدوا عندي ليلتها تعشوا ، وناضـوا هما دارو العشيّ .

قداش العيلة حلوا ،. حوشنا المعبِي بالحُب زاد فاض منه اليوم ، بدوشة خواتي فالكوجينة وريحة بُصلة الكسكسي متع ماما ، بصوت بابا وياسين فالمربوعة ، بالحوسة وبالضحك وبكـل تفصيل روتيني صغير ، كـان كل شئ مرتبّ وحلو ، وللسبب هـدا كنت نتخطى فكل الهموم متعِي ،  وزي م قدرت نتحملى مرحلة المرض ، حنطلع من هالمرحلة واني كويسة ، وهـاذي قناعتي .. بوجود عيلة تخففّ وراجـل ينسند عليه وقلبّ مؤمن انه كلّه فيـه خيرة ♥️.

ومع كل هالتعب كنت فرحانة .. هلبـا فرحانة ♥️.

بعد م بديت نصّح ، ياسينّ قالي انه لازم نشوفوا شيخ ، كنت خايفة بس مع ذلك استمريت نقنع فروحي انه السحر مذكور فالقرأن وحاجة واقعية هلبـا ومفيها شئ لو عالجِت ..

بعدها بأيام قالي ياسينَ انه في ولد قالع ع شيخ وكلمه وبنمشـولهّ غدوا ، رقدت ليلتهـا واني نفكِر شن وراي وشن مزال يراجِي فيـا أكثر من الي شفته .

نورا نصـر / يتبع .