" أثر " / 22
تنهـد ياسين .. وكمـل : بعد آيام من عزي نزار امي فاقت الساعة 4 فالليل لقت وفاء فالجنان تدفن في حاجة ..
دارت روحها مشفاتهاش ، والصبح مشت امي لنفس المكان وتنصدم انه المدفون كان شعر صفاء وفانليا لأية وصورنا كلنا فيه علامة ❌ وطلاسم مش مفهومة .. نصدمت امي ونهارت وبعد م سألت صفاء وربطت الاحداث اكتشفوا انه موت نزار كان نتيجة سحر اساسًا .. لآن نزار كان رافض وفاء نهائيًا بسبب تدينّه وبسبب قـلة أخلاقها ..
وهكي امي خيرتّ فراس بينا وبينها .. ولآن كان مسحور زينا اختارها ببسَاطة ومن يومهـا قاطعنهَ ، لـين قبل سنتين تلاقيت اني وياه بالصدفة فقهوة ، ورجعت علاقتي معاه بدون علم حد ..
سكت واني برضو مش قادرة ننطق حتى بكلمة ..
استمـر ياسين : ماسة حبيبي ، خوي فراس مش سيئ خوي طيب هلبا ، لكن حظه ونصيبه مش كويسات ، وهو مس متحكم ف تصرفاته ، وفاء ساحراته سحر قوي مخليه مش قادر يدير اي قرار من غير م يرجعلها ، ماسة م شفتيشي لما يبكي ويترجى فيا نقعد معاه وم نقطعاش .. زي البيبي ياماسة وربي 🤷🏻♂️🥺..
الصدمة عبتنيِ .. معقولة فيـه قصص زي توا ، وفي ناس قلوبها حجـر! ، قعدت سارحة: ياسين م خفتشّ انها اديرلي حاجة !!
ياسين : معندهاش مصلحـة ..
اني : لكن هادي م تخافش ربي .. مرات انتقام من امك ادمرلنا حني حياتنا 💔.
ياسين سكت ، خدي وضعية النوم وغمـض عيونه في حضنيِ ..
كنت نلوم فيه بيني وبين روحي .. هذا تصرف مستهتر ، كيف يرفعني ليها برجليـا .. قعدت نخمم هلبا وقررت انه هاذي اخر مرة حنتلاقى مع هالمخلـوقة ع قطع رقبتـي ، ملاكِي كان راقد زي البيبي ، كنت نتأمل فيه وقررت انه حننسى الموضوع ونسـامحـه ♥️.
مع المغرب فقت .. كان ياسين قاعد راقد ..
مشيت درت العشي ع النار .. اووو قداش جعانة 🤦🏻♀️🤦🏻♀️
ودرت قهوة وفيقت ياسين .. وقعمـزنا
ياسين كان جوه واضح عليه مضروب .. يشرب فالقهوة وساكت على غير العادة ، بس ب بوسة طبعتها على خده في غفلة واني قايمة سفرة القهوة ، عيونه ضحكـوا وتغير الجـو بينـا 🌺♥️، وهكي الدنيا ماتبيش الا لمسة حنينة وتصرف عفوي وقلب كبير يسامح ويعطي .
خش معاي ياسين للـكوجينة اني ندير فالعشي وهو يهدرز ، وليلتها كلينا كأنه اول مرة ناكلوا 🤪🥴 ، كلينا وضحكنا وهدرزنا ، بعدين نضت اني نضم فالكوجينة وخش هو فتح فيلم ونظم الجو ، سهرنا ليلتها لـين طلع النهار ، بداية الليلة على الصالون نتفرجوا ، ونهايتهـا في دارنا 😀♥️.
فـاتوا الآيام .. كـانت علاقتي بياسين تقوى وتحلو على كل الأصعـدة ، ومـكانش ناقصني شئ الا الـحاجة الي تتمنى فيها كل بنت لمـا تتزوج ، فـرحة الأمومة الأولى ، طفل أو طفلة يحمل جيناتي وجيناته ، ملامحي ونظراته ، رسمة عيونه وطريقته فالكلام وقلـبه 🤷🏻♀️🌺♥️ .. كنت بفارغ الصبر نستنى في اليوم الي نجي نقول لياسين اني حامل ، بطفلك الي انت حطيته فيا ، بـس ربي لتوا مأذنش ، وكـنت نقول انه كل تأخيرة فيها خيرة ، ياسين م يفتحش فالموضوع معاي ، بـس كنت لحوحة بيني وبين روحي ، لحوحة بتجربة شعور الأمومة ، لحوحة بفكرة انه نكون ماما لولده ، والأقدار كالعادة م تعطيش فينا فكـل شي فيسع وكيف م نبوا 🤷🏻♂️ ، ديما لازم يكون في حواجر ضروري نتخطوها باش لما نوصلوا لمبتغانا يكون طعم النصر والوصول غير ، و احلـى ♥️🌺...
-
فقتّ الصبح بكري لآن كنا معزومين فحوشنا عالغدي ، ضميت الحوش وتيت حوايجي وفيقته .. فـاق فطر ودوش ولبس زبونه ، وزي الغزال كالعادة 🤦🏻♀️🤷🏻♀️ ، حطني ومشي هو وبوي لصلاة الجمعة ،، خشـيت لقيت خواتي يستنوا فيا كالعادة ، قعمزنا هدرزنا هلبا وضحكنا ، كـل وحدة تحكيلي على حاجة ، وكل وحدة تقولنا في موقف ، صوت ضحكنا كالعادة ينسمع من الزنقة التانية ، سكتنا على صوت بوي لما خش وقال ياماسة تعالي يبيك راجلك 😀 ، ويسأل فأمي :شن صار فالغدي ؟
طلعتله برا فالمربوعة : نعم ياراجلي 🤪♥️.
ياسين يضحك : استحشتك بس 🤷🏻♂️
اني : اسكت خير م يجي بوي ويسمعك 😀🤦🏻♀️
ياسين : اي خلي يجي اصلًا قتله استحشتها ناديهالي
اني 😳 : بلا برادة رد بالك نتحشم من بوي عاد مش للدرجة هادي ، اني غر قالي تعالي يبيك راجلك حسيت روحي مدايرة عملة 🤦🏻♀️🤦🏻♀️🤦🏻♀️🤦🏻♀️🤦🏻♀️ .
ياسين يضحك كالعادة : باهي شكله التقعميزة مع خواتك تحلي فيك 🥴🤨
نضت وقفت : انت مكسد يابيبي واني عندي م ندير 😀😊
جيت طالعة من الباب ، ياسين قالي نحبك يابيبي 🤪♥️
فالباب تلاقيت اني وبوي 🤦🏻♀️ ، تحشمت وهربت فيسع .
خشيت نحكي لخواتي فالموقف ، بعتلي ياسين رسالة : شكله البابا سمعنا 🤷🏻♂️ ، لذلك بعد الغدي تعالي بـاش م نخشش فوسطهم المرة هادي ونطلعك بالسيف 🤨
بعتله : بيبي بلا برادة تراه ، خيرك بتهبـل ! 😒
ولان م ردش ، عرفت انه ناويها ، بعد الغدي بوي خش للكوجينة طلعت ففيسع 🤷🏻♀️
ياسين : خوافة جيتي 🤤♥️
اني : 🙄🙄 ياسين بلا بسالة تراه اكبر .
قربلي نضت وقفت : بتفضحنا ؟ قول خاطرك تفضحنا 🙂
بدي يضحك : غبية انتي ؟؟ 🤨 مرتي انتي شن بتفضحنا متعك .
قعدت نشبحله : اسمع ماما قالتلي اقعدي باتي من لما تزوجتي م بتيش عندنا 😀
ياسين : وانـي ؟ 😒
اني : انت روح للحوش يابيبي ورد بالك تحوسه 🤷🏻♀️
ياسين : معنديش مراة تبات برا 😏
اني : بنبات ياروحي ، قول باهي توا خير م نحرش بوي يجي يتفاهم معاك 🥳
ياسين : حبيبي حرام عليك ، شن بتباتي اهيا ، اني من بيقعد معاي ملا .
قعدت نضحك : تخاف ؟
ياسين : اي اي نخاف 🥺 ..
سكتت .
ياسين : باهي عادي نبات حتى اني ؟ 🥺
قعدت نضحك هلبا المرة هادي : حبيبي انت كبير توا خلاص 🤪♥️ ، وطلعت وخـليته ..
ليلتها بتتَ فحوشنا ومكالمة ياسين م تسكرتش ، كل شوي يتصل يقول حاجة ولا يسأل على حاجة ، اني كل مرة نرد ونضحك اخر شي قالي اني بنرقد خليك معاي وديري كتم عادي كان بتهدرزوا 🥴🤪 ، ضحكت عليه ودرت زي ما قال ، نسمع في صوت نفسه وهو راقد ، اما اني وخواتي ف لين طلع الضي مفيناش وحدة رقدت ، نهدرزوا ونضحكوا وناكلوا كأننا لينا سنين م شفناش بعض 🤷🏻♀️♥️🌺.
وهـادي الحياة ، تتجدد بلمة عيلة وبضحكة اصحاب وبحضن وقُبلة من الاحباب ♥️🌺.
نورا نصر / يتبع
أنت تقرأ
" أثـر "
Romanceقصـتنا الجديدة ح ادور على حياة بنت في بدايـة عشرينياتها ، الدنيا حتخلـي عليها أثـر مش حينمحـى ، حتعلمنا الصبر ب أبهى أنواعه ، حنعرفوا معاها كـيف البنادم يقدر يعيش ويمجـد قوته ، كيـف يقدر يحارب كـل شئ ويوقف على رجلـيه ، حتكون الفارقّ ، وحتورينا انه ب...
