" أثـر "

" أثر " / 9

" أثر " / 9 .

غدوا طيارتي ، فقت اليوم الصبح ومفيش ف راسي آي شئ الا اني نبي نشوف ياسين ، نبي نشبع منه باش لو صار وم روحتش نموت مستريحة ، فقت الساعة 10 مع اني مكنتش راقدة الليلة كويس ، لبست حوايجي ومشيتله وين م اتفقنا ووين م تعودنا نتلاقوا ، لقيته واصل قبلي كالعادة ، قتله صباح الخير ، رد عليا بـ : انتِ كل يوم تنوضي آحلى من اليوم الي قبله ولا شن قصتك فهميني ؟ ، داريت الحشم بضحكة كالعادة ، بعد شوي هدرزة م لقيتش روحي الا نبكي بلا وعي وبلا سبب حتى .
ياسين : دموعك يتعبوا فيا ، ارحميني وفهميني خيرك .
كأني كنت نستنى فيه يسأل باش ندوي : خايفة ياسين ، من كل شئ قاعد يصير ، خايفة من حلاوة الشئ ل نعيش فيه معاك ، وخايفة من غدوا وخايفة من الموت ، متخيل انه ممكن معاش نروح ؟ ، وحتى طول فترة العلاج كيف حنقعد بلا م نشوفك ! ، قلبي مش قادر يتحمل الفكرة ، مكأنش عاش قبلك ، ياسين اني تعبانة ، حاسة روحي نظلم فيك بقربي ، حاسة روحي حنموت ياسين .
لمحت الدمعة الي فيسع مسحها وقربلي لدرجة فات مسافة الآمان الي كانت ديما بينا ، المسافة الي مخليتلي قصور فقربه قرب ايديه الزوز على وجهي يحاول يمسح بحر الدموع الي متفجر ، وبنبرة هادية : من قالك مش حتشوفيني .
نحى ايديه وحطها فجيبه باش يوريني آحلى تذكرة سفر شفتهت فحياتي : يابنتي اني وين م تمشي لاحقك ، متخيلة بنسيبك ؟
لقيت روحي نضحك ونبكي ومصدومة نقوله ياسين تبصر ؟
بدي يضحك بالطريقة الي تعودت تسحرني : لا يعمري م نبصرش .
مقدرتش نصدق انه غدوا حنكون اني وياه على نفس الطيارة ، قعدت نضحك وايدي على وجهي ودموعي م بطلوش ينزلوا .
ياسين : استريحنا هكي ؟
بتلقائية : هلبا هلبا استريحنا .
قطع عليا ب : نحـبك .
تحشمت هلبا نزلت عيوني وسكتت ، وياسين كالعادة يستغل فحشمي ويقعد يضحك هلبا .

فات هداكا اليوم واني فرحتي مش سادة الدنيا ، كنت فخاطري نقول حتى كان بيلاقيني الموت مدامه ياسين قريب عادي يهون ، ليلتها رقدت اني وياه عالخط وفقنا من الصبح مع بعض ، كانت منتهى توتي في كل شئ واني م ندير فشئ الا نكلم ف ياسين ، وقداشني بديت نحب ياسين ..

فـي المطار :

كنت مقعمزة اني وبابا وخواتي ، وكان ياسين مقعمز مـش بعيد علينا ، سبأ وبابا يهدرزوا اني قمت تليفوني وبعتت لمنتهى رسالة : " شفتي الولد الي لابس التيشرت الأسود ، هداكا ياسين " .
منتهى : من ياسين 🙂😒 ؟
اني : هههههههههههههههه حبيبي 🙂.
منتهى : تتسهوكي 😒😡؟
اني : لا وربي حبيبي شوفي مقنينته 🤤♥️
منتهى : ماسة وربي نضربك قدامهم ، ادوي زين هدا شن يدير هني ؟؟
اني : بيسافر معاي منتهى خيرك 🥺
منتهى : الصببببر امتى هدا لحق !! م ليكمش شهرين تعرفوا بعض الهم الاحرف بيسافر معاك حتى .
اني : منتهى اسسس تربحي ، خليني نفرح فرحتي المؤقتة سيوري حنموت .
منتهى : ضمي فمك بالله عليك .
حطيت تليفوني فالشنطة ، وعيني ف عين منتهى .
منتهى : ماسة نوضي بنشري امية سايريني .
بابا : اهو توا نمشي اني نجيبلكم .
منتهى : لالا بابا خليك مستريح توا نمشي اني وماسة .

نضت اني ومنتهى فيسع ، كيف منتهى بدت تسأل فيا ، نسمع فصوت ياسين من وراي .

وقفنا ..
ياسين : كيف حالك منتهى .
اني مقدرتش نشد روحي بديت نضحك .
منتهى : ماسة اكبري 🙂.
ياسين برضو بدي يضحك .
سألها على حالها ومشت هيا تجيب ف امية وقعدت واقفة اني وياه ساكتين .

ياسين : اسمعي
أني : نسمع
ياسين : مدامنا فالمطار وهكي ، شن رايك ناخدك ونهربوا ؟
اني بديت نضحك : عارفني منقولش لا .
ياسين بحركة عفوية شدني من ايدي وقالي هيا .
مقدرتش نسيطر على روحي وبديت نضحك ونقوله نقص برادة ، قعد يقولي ماسة عارفتيني نديرها اسس .

مشينا خدينا قهوة ، واتصلت بيا منتهى تقولي هيا سبأ اتصلت قالت خيركم عطلتوا ، سيبت ياسين بعد م قتله آول نحبك وجه لوجه .

خليته فرحان هلبا ومشيت واني واخدة من فرحته هلبـا .
ركبنـا الطيارة وتحركـنا ..

آي مكان فيه ياسين هو مكاني اني وقلبـي ، كان الآمان يلبس فيا طول م هو قريب ، ووين ما ياسين وين م فرحتي حاضنتني ، هكي كان احساسي ديما ، البنادم الوحيد الي من آول يوم عرفته حسيت روحي رسيت على بر الأبدية ، البر الي بعده معش حيكون فـيه تعب ابحار ، يـا بموت ويا بحـياة ، والحيـاة طقت على بابي مع اول يـوم عرفته فيهّ ، كنت نتأمل في الآثر الي فـ ايدي ، واني نفكر فـسنيني الجاية ، زعما بنعيشهم فـ فحضنه ولا الموت بيفوز ، وياقلب ياوجعني ، كالعادة الدموع يتعاندوا باش يطلعوا وفيسع حاولت ندرقهم على بابا الي مقعمز في جنبي ، فتحت أغنية أدهم الي نحبها ، وغمضت عيوني ، وقلبي يرد على آدهم آي نعرف هالشعـور مزبوط ❤️.

نورا نصـر / يتبـع .