اسكربات بقلمي/menna Mohamed

اسكربت

_عايزه اتكفل بطفل
_نعم ايه اللي انتي قولتيه ده
_كلامي واضح جدا عايزه اتكفل بطفل ياروان
_ايوه يااسيل بس دي خطوه كبيره اوي وهتسمعي كلام يوجع اووي
_مش مهم المهم اني هعمل حياه جديده وجميله لطفل برئ
_ماشي ياستي بس لازم تكوني متجوزه
_لا علفكره مش لازم مين قالك كده
_بجد مش لازم
_اه والله طالما عديت سن التلاتين خلاص اقدر اتكفل بالطفل
_طيب تفتكري اهلك هيوافقو ولو جالك عريس هتعملي ايه
_اهلي انا هعرف اقنهم وبالنسبه للعريس مش هعمل حاجه ياخدني انا وابني غير كده هرفض
_مش عارفه بس حاسه انها خطوه كبيره اوووي
_ايه يابنتي التوتر ده انا مش متوتره زيك
_خايفه علي الطفل يتظلم يااسيل
_متخفيش ياقلب اسيل انا عمري مهسمح لحد يظلم ابني
_طيب خلاص كلميهم وربنا يستر
الاول هعرفكم بيا انا اسيل العسوي عندي 32 سنه ولسه متجوزتش بحب الاطفال ونفسي جدا ابقي ام وفي يوم وانا قاعده علي الفيس لقيت قدامي بوست حد مشيره عن صفحها اسمها الاحتضان في مصر اسم الصفحه عجبني جدا وخليني متشوقه اعرف هدف الصفحه فدخلت وفضلت اقرأ البوستات والكومنتات وعرفت كل شروط التكافل عجبتني الفكره جدا وقلبي دق كتير اول مفكرت اني ممكن ابقي ام لطفل برئ وقررت فعلا اني اخد الخطوه دي وبلغت بيها صحبتي وعشرة عمري روان وبعد ما اقنعتها بالفكره رجعت البيت فرحانه ومتوتره اني هفاتح بابا فيها بس مش عارفه ردة فعله ايه بس الاكيد انه مش هيوافق بسهوله ابدا علشان كده اخدت نفس عميق ودخلت سلمت عليه وقومت غيرت هدومتي وقعدت انا وبابا وفضلت ساكته لحد ما بابا قالي
_ايه هتفضلي ساكته كتير متقولي اللي عايزه تقوليه يابنتي
_بصراحه كده يا بابا انا نويت اتكفل بطفل
_نعمممممم انتي اتهبلتي علي كبر ولا ايه تربي طفل مش ابنك ليه ان شاء الله لا وكمان ملهوش اصل
_بابا لو سمحت حرام عليك تظلم الطفل ده هو مش ذنبه ابدا انه اتولد يتيم ومن غير اصل ليه بس حضرتك بتفكر كده كمان انا متجننتش ولا حاجه بالعكس انا عقلت وهتكفل بطفل
_وانا مش موافق يااسيل انتي كده بتخالفي العادات والتقاليد
_عادات ايه وتقاليد ايه اللي تمنع التكافل انك تكون سبب في فرحة طفل صغير انك تقدم له حياه جديده وجميله
_يابنتي التكافل حراام
_لا يا بابا التبني هو اللي حرام لاكن التكافل حلال
_ايه الفرق بقي ياناصحه
_ياحبيبي التبني الطفل بيتكتب علي اسم اب وام مش اهله وكمان بيورث لاكن التكافل الطفل فيه بيتكتب بأسم اهله ولو مجهول النسب بيتكتب بأسماء وهميه وبيشيل بس لقب عيلة الام او الاب المحتضنين وكمان مش بيورث بس طبعا الام والاب يقدرو يأمنو مستقبله بالطريقه اللي شايفنها مناسبه
_ايوه يابنتي بس المجتمع والناس هتقول ايه
_ياحبيبي ناس مين بس ومحتمع ايه احنا ايه اللي يجبرنا نمشي ورا محتمع متخلف وناس بتفكر بالطريقه العقيمه دي انا هحتضن طفل يابابا وده اخر قرار اخدته ده الرسول صلي الله عليه وسلم قال انا وكافل اليتيم كهاتين في الجنه
حضرتك ليه عايز تحرمني من مصاحبة رسول الله عليه افضل الصلاة والسلام في الجنه
_بصي انتي كبيره كفايه انك تاخدي القرار وطالما انتي مصره يبقي علي بركة الله
اول مسمعت موافقته جريت عليه وحضنته وبوسته ومن تاني يوم مستنتش ابدا وروحت وزارة التضامن الاجتماعي وابتديت اعمل الخطوات وعرفت كمان ان لازم يبقي معايا ثانوي عام علي الاقل والحمدلله انا معايا كليه تجاره المهم خلصت كل الخطوات في خلال 3 شهور وبقيت اقدر اروح واخد الطفل اللي قلبي هيدقله ابني حبيبي وفعلا اخدت روان وطلعنا علي دار الرعايه ودخلنا وبعد مقعدنا مع بعض واتكلمنا دخلت غرفة من غرف الدار لقيت قدامي اطفال جمال اوي في غاية البراءه بجد فضلت اروح لكل واحد منهم وابوسه لحد موصلت لعند واحد منهم حسيت قلبي عمال يدق جامد اوووي وكأنه بيقولي هو ده ابنك انتي مستنيه ايه ساعتها جريت عليه وحضنته جامد اوي والمفاجأه انه ضحك ببراءه جميله اووي خطفت قلبي بجد وساعتها بصيت لمديرة الدار وقولتلها بحب_اسمه ايه
_اسمه سيف ولو حضرتك عايزه تغيريه مفيش مشكله
حضنته بحب وحنان وقولتلها_لا هو هيفضل سيف انا بحب الاسم ده اوي
_ربنا يحفظه ليكي من كل شر ويجعله في ميزان حسناتك
_اللهم امين يارب العالمين
_انتي عارفه ان سيف مكنش بيسكت مع حد خالص انتي اول واحده يسكت معاها
بوسته كتير اوي وانا بضحك كده وبقوله:ياقلب ماما انت ربنا يحفظك لماما ياروحي
وبعدها بصيت لها وقولتلها_عنده اد ايه
_عنده 4 شهور وعلفكره هو مجهول النسب
_تمام ممكن حضرتك تكملي الخطوات علشان اخده
_تمام اتفضلي معايا
اخدته وروحنا كملنا الخطوات وهو في حضني وبعدها روحت لقيت بابا مستنيني جريت عليه واديته سيف لقيته بصله ودمع وبصلي بحب وقالي_مبروك عليكي ابنك يابنتي ده خطف قلبي من اول ما بصتله حفيدي حبيبي
ساعتها فرحت اووي بقبول بابا له وروحت بوسته من راسه وقعدنا نتكلم شويه وانا قاعده واخده سيف في حضني لحد ما لقيته عيط فحضنته جامد واستأذنت بابا ودخلت اوضتي وغيرتله البامبرز ورضعته مهو انا روحت لأخصائية رضاعه طبيعيه عطتني علاج واتفقنا علي خطه عملناها والحمدلله قدرت ارضعه 5 رضعات متفرقه ومشبعه وبعدها اتفقنا اني هكمل رضاعه له طالما مفيش خطر علي صحتي وكده هو بقي من محارمي المهم بعد ما رضعته اخدته في حضني وفضلت اقرأ قرأن لحد منام خالص ساعتها فضلت اتأمله كتييير اووي وفضلت ابوسه في كل حته في جسمه وانا بشكر ربنا انه رزقني بيه احلي رزق في الدنيا كلها وفضلت ساعات بتأمله بتأمل كل حاجه فيه عيونه وبوقه الصغنن وكل حته فيه وانا حاسه نفسي بحلم اني قدرت اعمل كده اخيرا واتكفلت بطفل وبقي عندي طفل هو كل حياتي زي ماانا هبقي كل حياته وبوعده اني هكون ليه الام اللي تستحقه وهربيه احسن تربيه
وعدت سنين منكرش طبعا اني واجهت كتير اوي وسمعت كلام يضايق ويوجع بس عمري مندمت علي القرار ده والنهارده سيف حبيبي كمل السنتين ونص ودول كانو احلي سنتين عشتهم وهو في حضني ومنور حياتي كلها المهم اني ابتديت اتابع مع دكتوره نفسيه واتفقنا اني هقول لسيف الحقيقه حاليا علي هيئة حدوته ولما يكبر شويه هقوله انه بطل الحدوته دي وفعلا ابتديت احكيله حدوتة بومة ماما كريمه اللي سمعتها علي صفحة الاحتضان في مصر وفي يوم كنت قاعده بلعب مع سيف حبيبي لقيت بابا بيقولي_في عريس جايلك
_وماله ياحبيبي بس اهم حاجه قولتله علي سيف
_لا مش لازم يعني اقعدي معاه الاول
بصتله كده بلوم انه برضو مش عايزه يعترف بسيف مهما حاولت اقنعه انه قبلي في اي جوازه بس برضو مش بيقتنع اتنهدت واستغفرت ربنا وبصيت لسيف وقولتله_سيفو حبيب مامي ممكن تاخد اللعبه بتاعتك وتدخل اوضتك تلعب بيها لحد متكلم مع جدو واجيلك علشان ننام
بصلي ببراءه وطفوله وقالي بأعتراض_بث انا مس عايز ادخل اوضتي
ساعتها فتحتله دراعي فجري عليا واترمي في حضني كعادته فقولتله وانا ببوسه بهدوء وحب_معلشي ياروحي انا مش هتأخر عليك
_طيب هتحكيلي حدوتة بومه ماما كريمه
_اه ياحبيبي هخلص مع جدو واجي احكيهالك
_ماثي انا هدخل مث تتأخلي بقي
بوسته وقولتله_حااااضر
وبعد متأكدت انه دخل اوضته قعدت جمب بابا وقولتله بهدوء_بابا حبيبي سيف ابني وعمري مهتنازل عنه حتي لو هفضل طول عمري من غير جواز
_طيب وانا قولت ايه بس مهو لما تقعدي معاه ابقي قوليله
_طيب وليه حضرتك متقولوش من الاول
_اللي حصل بقي
_تمام يابابا هدخل انا لسيف علشان ميزهقش
وبوسته من راسه ودخلت لسيف اللي جري عليا اول مشافني فشيلته وحضنته جامد وانا بفكر اني عمري مهقدر ابعد عنه حتي لو كنت هرفض كل العرسان
_مامي
فوقت من سرحاني علي صوته وهو بينادي عليا فقولتله بحب_نعم ياقلبي
_عايز انام
_طيب تعالي يلا ندخل ناخد دش وبعدها ننام
_ماثي يلا بينا
وفعلا اخدته وحميته وبعد ما لبسته هدومه نيمته علي السرير ونمت جمبه واخدته في حضني وحكتله حدوتة بومه ماما كريمه وعلي ما خلصت الحدوته كان هو نام ساعتها فضلت ابصله بحب وحنان بجد وبمعني الكلمه انا عمري مندمت علي اني اتكفلت بيه هو فعلا ابني وحته مني دلوقتي بس صدقت ان الام اللي بتربي وبتتعب وبكتبر وبتسهر وبتلعب مش الام اللي بتخلف وبس يمكن اه كل ام بتحس بطفلها وبتحبه وهو في بطنها بس بتحبه اكتر وبتخاف عليه لما يجي علي الدنيا لما تلمسه بأيديها وتسهر طول الليل جمبه وهو ده اللي حصل معايا هو ابني سهرت جمبه في تعبه وفي فرحه هو ابني اللي ربيته وتعبت معاه ولعبت كتير معاه هو كل حاجه حلوه في حياتي بجد سهل جدا انك تجيبي طفل علي الدنيا بس الصعب انك توهبي حياه جديده وجميله لطفل اتحرم من الحياه دي
وانا قاعده بفكر نمت وصحيت تاني يوم علي عياط سيف جريت عليه وحضنته وفضلت اهديه تقريبا شاف حلم وحش فطمنته وهديته وعادي قضينا اليوم في لعب وضحك وشويه تنبيهات وهكذا وعدي كام يوم وجه اليوم اللي المفروض هيجي فيه العريس وعادي صحيت الصبح روقت الشقه وفضلت قاعده مع سيف وقومت لبست فستان وطرحه ولبست سيف بنطلون وتيشرت وبعد شويه سمعت صوت الجرس وصوت ناس بتتكلم وبعدها لقيت بابا دخل عليا وقالي اطلع قومت مسكت ايد سيف وطلعت بثقه لقيت قدامي راجل قاعد قدامي شكله كويس وطول بعرض وفيه طفل قاعد علي رجله استغربت اوي بس دخلت سلمت وقعدت وبابا سابنا وخرج ومكنش فيه غيري انا وهو وسيف والطفل اللي قاعد علي رحله واللي تقريبا كده اد سيف او اكبر منه بشويه وطبعا فضلنا قاعدني في صمت لحد ما سمعته بيقول_ابني يوسف
بصتله بهدوء وبعدها بصيت ليوسف بحنان وشاورتله يجي فحسيته خايف بس لقيت باباه قاله حاجه خلته ينزل من علي رجله ويجيلي ولما جه مسكت ايده وبوستها بحنان وقولتله انا اسمي _اسيل وانت ياصغنن
بصلي ببراءه وقالي_اسمي يوسف هو صحيح انتي هتكوني مامي
_اممممم مش عارفه بس لو ربنا اراد اني اكون مامي فأكيد هكون مامي
ايه رأيك تقعد هناك مع سيف وتلعب معاه
_ماشي موافق
طيب تعالي واخدته هو وسيف وقعدتهم في حته قريبه مننا وجيبتلهم لعب ورجعت قعدت مكاني لقيته قالي_مكنتش اعرف انك عندك ولد
_ولا انا كنت اعرف ان عندك ولد
_بجد باباكي مقالكيش
_لا شكله كان عايز يخلينا ننصدم ببعض
_طيب ايه رأيك هتقدري تبقي ام ليوسف انا معنديش اغلي منه ومش هسمح لأي حد يأذيه
_انا عن نفسي اقدر و يوسف زيه زي سيف بس حضرتك اللي هتقدر تعامل سيف زي يوسف لاني مش هسمح لأي حد يأذيه
_انا كمان هقدر
_تمام وعلفكره سيف طفل انا اتكفلته
وحكتله كل الحكايه لقيته بيبصلي بفخر كده وقالي_يعني انتي رفضي كل العرسان اللي رفضو وجود سيف
_بالظبط كده
_متقلقيش سيف زيه زي يوسف بالظبط
الحمدلله اتفقنا وناديت بابا وجه وقرينا الفاتحه وبعد اسبوع كان كتب الكتاب والدخله وبدأت حياه جديده وعيشت احلي ايام في عمري كله وانا ام لأجمل طفلين وزوجه لأحن راجل الحمدلله ربنا عوضني احلي عوض عوضني بدل الطفل طفلين وعوضني راجل بكل الرجاله في نظري عوض ربنا بجد احلي عوض وكل لحظه بتمر عليا بشكر ربنا فيها الف مره علي انه عوضني بيهم عن كل اللي مريت بيه في حياتي وبعد مرور سنه ربنا رزقنا بتؤام ولد وبنت وسميتهم اياد وحور ووطبعا سيف عرف اني تكفلت بيه من وهو بيبي والحمدلله مع المتابعه مع الدكتور النفسيه تقبل الموضوع جدا وعمر ما حد فينا عامله علي انه مش ابننا لا هو ابني وحته مني ومن قلبي وحتي طارق جوزي بيحبه اوي وعمره ما فرق بين يوسف وسيف ابدا كلهم اولادنا وسيف ويوسف صحاب مقربين جدا قبل ميكونو اخوات والحمدلله انا وطارق صونا امانة ربنا لينا سيف ويوسف واياد وحور ربيناهم احسن تربيه وتعبنا معاهم بجد بس كل التعب ده بيهون اول مبشوفهم مبسوطين وفخورين بتربيتنا ليهم

بس كده خلص الاسكربت بقالي كتير مكتبتش ومكنتش عامله حسابي اني هكتب بس فعلا حبيت اشرك وادعم فكرك التكفل بالاسكريبت ده يااريت كل حد يقدر يتكفل بطفل ميتأخرش حتي اللي لسه متجوزش بس عدي التلاتين او الارامل او المنفصلين او اللي عندهم اطفال لو بأمكانكم تتكفلو طفل وتربوه مع اطفالكم ثوابكم هيبقي كبير جدا عند ربنا وخليكي ديما فاكرين ان الرسول صلي الله عليه وسلم قال انا وكافل اليتيم كهاتين في الجنه❤وكفايه بقي تفكرو في الايتام بالطريقه العقيمه دي الاطفال دي مش ذنبها انها اتولدت يتيمه او مجهوله النسب الانسان مينفعش يتحاسب علي اهله لان محدش بيختار اهله وكل واحد مسئول عن نفسه وبس وهما مختاروش ان اهلهم يموتو او انهم يرموهم رفقا بالاطفال دي غيرو تفكيركم العقيم وكفايه تخلف ورجعيه بقي💔يارب اكون قدرت اوصل الفكره دي واكون قدرت ادعمها واسم الصفحه فعلا حقيقيه وهي دي الصفحه اللي بدعم الموضوع ده واللي من خلالها عرفت كتير عنه واسمها الاحتضان في مصر