اسكربت جديد "مش هسامح"
_ولاااااااااء انتي يابت اصحي بقي
_عايزه ايه يازفته جايه تصحيني بدري ليه كده هنزل ابيع لبن
_بطلي ظرف بقي وقومي عايزاكي ضروووري ضروووري
_ضروري ضروري وفي الاخر هتطلع حاجه تافهه زيك
_بت اخلصي وبطلي لماضه
_استغفرالله العظيم يارب
استني لما ادخل الحمام وبعدها نشوف الضروري بتاعك
دخلت الحمام وبعد شويه طلعت ولاء وقعدت قدام صاحبتها
_اتفضلي قولي ايه الضروري بتاع سيادتك
_بصي بقي بصراحه كده ومن غير لف ولا دوران
مازن عايز يجي يخطبك ياولاء
_مازن مين
_ابن خالتي شافك مره وانتي عندي وقالي اجي اجس نبضك علشان لو موافقه اقوله يتقدم
_انتي ايه رأيك في اخلاقه طيب
_مكدبش عليكي انا معرفش عنه حاجه هو اه ابن خالتي بس انتي عارفه مليش اي اختلاط بأي ولد في العيله
_امممممم خلاص خليه يتقدم وفي الرؤيه اشوف اذا كان مناسب ولا لا
_اشطا هروح اقول لماما تقوله بقي
سلام هطير اناا
_بعد مصحتيني من نومي يا رخمه وبرضو علشان حاجه تافهه امشي روحي بدل ماانقض عليكي دلوقتي
ضحكت عليا وجريت ملحقتش امسكها الرخمه مش عارفه ايه ده بتحب تصحيني كل يوم بدري وكل مره علشان حاجه تافهه وبعدها تمشي وتسيبني انا قاعده هنا مش لاقيه اي حاجه اعملها
معرفتكوش علي نفسي انا ولاء عندي 20 سنه مكملتش دراستي معايا دبلوم تجاره بس وبشتغل في بوتيه فساتين فرح اسلامي
فكرة المحل عجبتي اوي علشان كده اشتغلت هناك انا مش ملزمه علفكره عادي عاديه زي زي اغلب البنات بصلي وبروح الحمدلله بس مش اكتر من كده وهدومي بلبس فساتين وطرح وبحاول اطولها شويه اكتر من كده مفيش بصراحه وكنت مقرره اني اعمل فرحي مختلط عادي زي كل الافراح اللي يحضرها بس لما اشتغلت في المحل ده وحكولي عن الافراح الاسلامي لان طبعا عندنا في المحل ان لازم بنت تروح تحضر مع العروسه علشان لو الفستان اتفه منها او حصل اي حاجه تقدر تتصرف معاه فانا روحت كذا مره بصراحه عجبتي اكتر الافراح الاسلامي كنا بنرقص وبنغني وانا بجد حاسه بالراحه عكس الفرح المختلط كنت ببقي عادي ولا راحه ولا مضايقه
المهم اني حبيت جدا الافراح الاسلامي وبفكر اخلي فرحي اسلامي انا بقي عن البت اللي كانت معايا دي منوووش حبيبتي وصحبتي مبقالناش كتير صحاب بس بقت اغلس حاجه في حياتي
بالنسبه لعيلتي فعادي انا بنت وليا اخت تؤام بس بابا زيه زي اي اي طول اليوم في الشغل ومش بيقعد في البيت خاااالص ماما برضو زي اي ست مصريه بتطبخ وبتعمل اكل وكل همها عيالها يتجمعوا حواليها علي الطبليه كل يوم وديما بتقولي انها بتعبر عن حبها لينا في الاكل اللي بتعمله وعلشان هي بتعمله بحب بيطلع احلي ما يكون بجد عمري ما دوقت اكل زي اكلها حقيقي بس رغم كده هي مش قريبه مننا اوي يعني عادي انا اختي بقي فطبعا تؤامي اللي بموت فيها بس احنا مش شبهه بعض خالص ولا شكل ولا شخصيه علشان كده مش ديما متفقين يعني ومش قريبين من بعض للدرجه اللي هي
طبعا النهارده اجازه ومفيش حاجه اعملها فروحت قومت لبست وروحت الدار اللي جانبنا دار الايتام وقعدت مع الاطفال نلعب ونغني ونجري ورا بعض هما عارفاني لاني باجي كل اسبوع ومن كتر حبهم ليا بيقولولي ياماما وبصراحه الكلمه بتضعفني اوي كل ما يغلطوا وابقي زعلانه منهم يجو يبوسوني ويقلولي بنحبك ياماما بياكلوا بعقلي حلاوه 😂علشان عارفين اني بضعف من كلمة ماما دي بصراحه اول مره سمعتهم منهم حسيت بأحساس مفيش حاجه في الدنيا كلها ممكن توصفه بجد
المهم فضلت العب معاهم لغاية ما نيمتهم في سرايرهم وسلمت علي المشرفه عليهم وروحت علي البيت وتاني يوم نزلت الشغل عادي لغايه ما جه اليوم اللي هيتقدملي فيه مازن
جه وطلعتله الشربات وقعدنا نتكلم وبصراحه اعجبت بيه جدا من اول لحظه فضلت اصلي صلاة استخاره وقلبي مقبوض كل يوم بصلي لمدة اسبوع وكل يوم قلبي مقبوض وبحلم احلام وحشه بس برضو ممشيتش ورا صلاة الاستخاره لاني كنت خلاص اعجبت بيه ووافقت عليه وجه هو واهله واتعرفت عليهم واتفقنا ان الجواز بعد شهرين
طول فترة الخطوبه كان محترم الا من بعض الحاجات كده زي انه كان بيعاكس البنات وانا معاه ويقولي انتي غيرهم
بس كنت خلاص حبيته واتعلقت بيه علشان كده كنت بعدي وبقول بكره يتغير واتجوزنا فعلا وطبعا رفض يبقي الفرح اسلامي وعملنا فرح عادي مختلط وانا مكنش فارق معايا المهم اني معاه
اتجوزت وعشنا مع بعض 3 سنين في خيانه وطبعا انا كالعاده كنت بعدي علشان بحبه غير خيانته وعينه الزايغه كنا زي الفل هزار وضحك ولعب وحب وكله لحد ما قررنا نروح نشوف موضوع الحمل ده اكتشنا اني مبخلفش وعمري مهخلف طبعا فضل ساكت خالص ومتكلمش ولا كلمه غير لما روحنا لقيته بيقولي_انا مش هعيش مع ارض بور انتي طالق
قالها بكل قسمه ومشي وسابني هو ده اللي فضلت اعدي كتير علشان بحبه هو ده اللي استحملت خيانته وعامله نفسي معرفش هو ده اللي حبيته هو ده اللي خسرت صحبتي علشانه
انا ومنة بعدنا من بعض الفتره اللي فاتت دي بسببه لانها كانت بتنصحني اني اطلق كانت بتقولي الحب مبيذلش وده ميتستاهلش حبك متذليش نفسك اكتر من كده بس انا مسمعتش ليها واتهمتها انها غيرانه مني علشان مازن تتجوزي انا وهي لا
حاولت اوصل لمكانها لانها عزلت هي واهلها من سنتين بس معرفتش
لحد ما عدي شهر واتفاجئت ان صحبتي اتجوز طليقي مهما اللي عملته فيها بس مكنش ينفع توجعني كده وتخوني وتتجوزه مش هو ده اللي مينفعش يتعاشر ازاي هي هتعاشره وتعيش معاه سنينها كلها اتوجعت اوي وجريت علي امي ووفضلت اعيط في حضنها كتير بعيط علي زوج ميستاهلش كلمة راجل وعلي صاحبه باعتني واتجوزت طليقي فضلت اعيط كتير لحد ما تعبت من كتر العياط ونمت
بعد فتره كبيره قررت اني هنزل اشتغل في المحل الي كنت بشتغل فيه وفعلا روحت وصاحبة الشغل رحبت بيا جدا
وبدأت شغلي هناك لحد محصل حاجه غيرت كل حياتي روحت مع عروسه فرحها ووانا قاعده بتفرج عليهم لقيت اخو العروسه داخل هو وجوزها علشان يلبسها الشبكه واستغربت جدا لما لقيته ببيبصلي وبيشاور عليا لأخته وفي اخر الفرح لقيت اخته مادتين علي جنت وقالتلي_اخويا عايز يتقدملك ياولاء
_ايوه بس مطلقه
_عادي يابنتي ايه المشكله كفايه تفكير عقيم بقي هي المطلقة ملهاش الحق تتجوز راجل عازب يعني المهم انتي ايه رايك
_مش هينفع صدقيني
_ليه
قولتلها وانا بعيط جامد_علشان انا ارض بور مبخلفش
سيبتها وطلعت اجري علي البيت وفضلت اعيط كتير اوي وكالعادة نمت وانا بعيط
وصحيت الصبح نزلت الشغل عادي بس اتفاجئت بيه واقف قدام المحل وبيقولي_ميهمنيش اذا كنتي بتخلفي او لا انا حبيتك انتي ومش هتنازل عن انك تبقي مراتي
فرحت اوي بكلامه بس لقتني بقوله_انا اسفه انا مش موافقه معنديش اي استعداد انك بعد متزهق تروح تتجوز عليا ولا تتطلقني وتتجوز
_ بس انا عمري مهعمل كده ابدا
انا عارف وراضي بيكي وعمري مهفكر اتجوز عليكي ابدا
بعصتله بشك فلاقيته قالي _استنيني بكره هاجي اتقدملك
سلام يازوجتي المستقبليه
ومشي من قدامي قلبي كان عمال يدق بفرحه وفي نفس الوقت بيدق بخوف من اللي جاي
دخلت كملت شغلي وانا خلصت و روحت وعدي اليوم عادي وتاني يوم جه عريس الغافله😂مراد
ودخلت وانا مكسوفه وحاسه كأني اول مره اقعد القعده دي
فضلنا نتكلم ونتعرف علي بعض وعرفت انه مش ملتزم زي وقولنا انناا نساعد بعض ونقرب من ربنا اكتر ومشي مراد وصليت استخاره لمدة اسبوع بس الفرق اني كل يوم كنت بحس بسعاده اكبر وبراحه وكنت بحمل احلام جميله بجد
علشان كده المرادي وافقت وانا مرتاحه بس هو طلب كتب كتاب علطول ومعرفش ليه بس لقيت نفسي وافقت وفعلا اتكتب كتابنا وقولنا الدخله هتبقي كمان سنه وعيشت معاه اخلي قصة حب عرفت معاه معني الاحترام والحب والمودة والرحمه ساعدنا بعض كتير وربنا من ربنا وقبل دخلتنا بشهر لقيت واحده بتكلمنى بتقولي ان فيه مريضه في المستشفي تعبانه وطلباكي ضروري ساعتها كان مراد عندي وكنت حكياله علي كل حاجه حصلت قبل كده
جه معايا طبعا وروحنا المستشفي واول مدخلت لقيت منة علي السرير تعبانه واللي فهمته انها هتدخل العمليات ومازن علي السرير اللي جنبها الاتنين بصولي وقالولي _سمحيني مقدرتش ارد و مقدرتش اسامحهم لقيت منة قالتلي اقرب ولما قربت لقيتها بتقولي _ولاء بنتي امانه في رقبتك ياولاء
وهنا الاتنين اتحركوا بيهم علي اوضه العمليات وشويه ولقيت الممرضة جيبالي بنوته عندها سنه تقريبا وبتدهالي مقدرتش ارفضها قلبي حن ليها لقيت نفسي باخدها في حضني وبطبطب عليها لحد ما نامت وقعدت انا ومراد اللي قالي_هتسامحي
_لا مش هسامح يامراد مش هسامح ومش هقدر اني اسامح ولا هو ولا هي حتي لو ماتو
كده الجزء الاول من الاسكربت خلص اللي مستني الجزء التانى يقولي😂هينزل بكره ان شاء الله❤اللي هيقول الجزء صغير هقوله عارفه😂لاني مقدرتش اكتب اكتر من كده😂بكره نكمله بقي😂قولولي رأيكم ايه في الاسكربت 😍حلو ولا لا😍
اللي مش هيعرفي يلاقي الجزء التاني بسهوله❤هيلاقيه في جروبي في الالبومات واللي عايز يشرفني في الجروب برضو 😍الجروب اسمه اجمل الروايات المشوقه مع منة محمد ونور ميسره😍و علفكره بكتب روايه جديده اسمها طريق القلوب هتلاقوها في جروبي وعلي الواتباد وعلي اغلب الجروبات اللي بنشر في الاسكربتات❤
بحبكم في الله😍
دمتم سالمين ومتابعين😍
بقلمي/منة محمد (منووووووشه) ❤
أنت تقرأ
اسكربات بقلمي/menna Mohamed
Roman d'amourاسكربات رومانسيه وكوميديه ودراميه هتعجبكم جدا ان شاء الله
