اسكربت جديد(انت سندي) الجزء الثاني والاخير😘
لحد ما جه يوم وواحده من سلايفي الاتنين راحت للتانيه وقالتلها اني شتمت عليها وعلي حماتي وعلي اخوات جوزي وقامت مشاكل كبييييير اوي لدرجة انا حماتي اصرت ان جوزي يطلقني
لما قالت كده منكرش اني خوفت شويه بس كنت مستنيه اشوف رد جوزي عليها وانا بقول لنفسي لو سمع كلامها يبقي ميستاهلش كل الحب اللي حبتهوله ده
فضلت ساكته مستنيه رده لحد ما اتفاجأت بحماتي بتقوله بزعيق_انت لسه كمان بتفكر انت ليه متمسك بيها كده ده انت كنت متجوزها وهي بايره فضلت للتلاتين ومتجوزتش ومصدقت انت اتقدمت راحت وافقت عليك علطول اه هي هتلاقي زيك فين عريس لقطه
كنت لسه هرد عليها لقيت هيما راح رد والصراحه اتفاجأت برده بس علي اد ما اتفاجأت علي اد ما فرحت اني اخترت صح
اصل هو قالها_حضرتك غلطانه ياماما انا مسكتش علشان بفكر انا سكت علشان ادور علي الكلام اللي ينفع ارد بيه عليكي لان مهما حضرتك تعملي هتفضلي امي بس انا متجوزتهاش علشان اجيبها لحضرتك ولمرتات اخواتي تهينوها
من يوم متجوزتها وهي بتراعي ربنا فيكم وبتعدي حاجات كتير علشان خاطري لكن لحد هنا وكفايه اوي
مراتي كرامتها من كرامتي وعمري مهطلقها حتي لو حضرتك اللي قولتيلي اعمل كده
دي مراتي وام بنتي وقبل ده كله دي حبيبتي
والخلاصه بقي علشان نقفل الموضوع ده مراتي قالت انها مقالتش حاجه تبقي مقالتش عايزين تصدقوا صدقوا مش عايزين براحتكم
بس انا عن نفسي هاخد مراتي وبنتي وهنروح نسكن في بيت تاني بعيد عن هنا علشان انا معنديش استعداد اعيش في مشاكل
وانتوا اهلي وعيلتي وعمري مهستغني عنكم ابدا وهجيلكم كل يوم جمعه انا ومراتي وبنتي نتغدي معاكم ونقضي اليوم كله واظن كده عداني العيب
اه وبالنسبه ياامي انها كانت بايره والكلام اللي حضرتك قولتيه ده فانا هعتبر نفسي مسمعتوش لان مراتي عمرها مكانت بايره دي الف من كان يتمناها بس هي اللي مكنتش بتوافق علي اي حد كده وخلاص
وبعدين الجواز قسمه ونصيب
عن اذنكم احنا طالعين شقتنا ومن بكره هننقل في شقتي اللي كنت واخدها وحضرتك رفضي اسكن فيها واصريتي اني اسكن هنا وانا علشان رضاكي وافقت بس اعذريني مش هينفع افضل عايش هنا بس في اي وقت هتحتاجيني انتي امي وعيوني ليكي
عن اذنكم يلا ياامل
خرج من الشقه وانا خرجت وراه ومعايا بنتي بس من جوايا طايره من الفرحه مش علشان هو وقف لاهله لا لكن علشان انا اتجوزت راجل بجد
فعلا انا صبرت ونولت فضلت للتلاتين من غير جواز بس ربنا عوضني بأحسن زوج في الدنيا مقبلش عليا الاهانه علشان هو راجل بجد بس رغم كل ده ورغم فرحتي انا مش عايزه اعمل زعل بينه وبين اهله مهما كان دول اهله وسنده وانا مرضاش ابقي السبب ابدا في الزعل بينهم وفي انه يسيبهم علشان كده اول مطلعت الشقه قولتله بجديه_احنا مش هنسكن بره ياهيما
لقيته بصلي باستغراب وقال_انتي اللي بتقوليلي كده انتي هبله ياامل ده احنا بقالنا خمس سنين متجوزين وبنتك عندها تلت سنين دلوقتي وطول المده دي عايشين في مشاكل وقرف
قولت ان اكيد انتي هتفرحي بكده مش هتقوليلي لا
_مقبلش اني اكون السبب في زعل بينك وبين اهلك ياهيما علشان هيفضلوا ديما شايفين اني السبب انك تسكن بره وانا مقبلش اني اكون كده فعلا
احنا هنفضل هنا وانا مش هنزل تحت عند حماتي غير لما انتي تيجي لكن لوحدي لا واظن ده حل كويس ومسيرها تعرف اني مش وحشه اوي كده زي مهي شيفاني
_انا مش عارف اقولك ايه بجد
ربنا ميحرمنيش منك يابنت الاصول
_طب افتح الباب علشان بيخبط ياسند بنت الاصول
أنت تقرأ
اسكربات بقلمي/menna Mohamed
Romanceاسكربات رومانسيه وكوميديه ودراميه هتعجبكم جدا ان شاء الله
