كسرت كبريائي
الفصل الرابع
بقلم مي عبدالله
ف بيت عم امين
بعد صلاه الظهر دخلت الحاجه زينب اوضه رؤي ومامتها عشان تصحيهم لصلاه الظهر والغدا
الحاجه زينب: رؤي اصحي يابنتي يلا
رؤي بفزع : انا ماعملتش حاجه
الحاجه زينب: بسم الله الرحمن الرحيم مالك يابنتي ماتتخضيش كدا انا جيت اصحيكم عشان تصلوا الضهر
رؤي وقد وعت لما هي فيه :انا اسفه جدا ياطنط هو احنا امتي
الحاجه زينب بحنان : ماتتأسفيش يا بنتي احنا بعد الضهر يلا صحي ماما لغايه ما احضر الغدا قبل عمك امين ما ييجي عشان نتغدي كلنا
رؤي : حاضر ياطنط
خرجت الحاجه زينب من الاوضه
رؤي :ماما اصحي ياماما
حنان بنعاس : رؤي احنا امتي
رؤي بابتسامه : احنا بعد الضهر ياحبيبتي
حنان بتكاسل : ياااااه دا انا نمت ومحستش بنفسي
رؤي : طيب يلا ياحبيبتي عشان نصلي
حنان بقلق : رؤي احنا هنفضل هنا كتير
رؤي بتفكير : ما تخافيش ياماما هنلاقي حل يلا بقي عشان نصلي
قامت رؤي ومامتها عشان يصلوا
ف نفس الوقت عم امين وصل البيت
الحاجه زينب : حمدالله علي السلامه
الحاج امين :الله يسلمك ياحاجه فين رؤي ومامتها
الحاجه زينب :صحيوا وبيصلوا
الحاج امين :طيب روحي حضري لنا الغدا عشان الحق انزل المحل تاني
طلعت رؤي ومامتها من الاوضه وهما مكسوفين
الحاج امين : ايه ياجماعه هتفضلوا كده كتير يلا روحوا مع الحاجه زينب حضروا الغدا
رؤي ومامتها :حاضر
بدات الحاجه زينب وحنان ورؤي ف تحضير الغدا
بعد شويه
الحاجه زينب :يلا يا حاج الغدا جاهز
جه الحاج امين وبداوا يتغدوا ماعدا رؤي اللي كانت قلقانه تساله عن الشقه
الحاج امين بابتسامه : مابتاكليش ليه يا رؤي
رؤي بتوتر :لا باكل اهو
الحاج امين : انا عارف انك قلقانه عشان الشقه مش كدا
رؤي ساكته خايفه يصدمها ان الشقه راحت
الحاج امين : ماتقلقيش صاحب البيت وافق انكم تأجروا الشقه وبعد الغدا هنطلع نشوفها عشان تقولوا رأيكم ولو كدا نكتب العقد وتستلموها
رؤي بفرحه : بجد ، بجد ياعمو امين وبعدين رجعت حزينه تاني
الحاجه زينب :مالك يابنتي زعلتي ليه
رؤي : اصل الشغل و
عم امين بتفهم : ماتقلقيش يارؤي انتي هتنزلي معايا المحل وربنا يكرمنا
انا عارف انها شغلانه مش. مناسبه ليكي بس انتي هتقفي معايا ف المحل لحد مانلاقي شغلانه احسن
رؤي بسعاده :انا مش عارفه اقول لحضرتك ايه بجد
عم امين بضحك :تشكريني بانك تتغدي عشان نطلع نشوف الشقه
رؤي :حاضر
بدأوا يتغدوا وبعد ماخلصوا الغدا طلع عم امين ورؤي ومامتها والحاجه زينب عشان يشوفوا الشقه اللي كانت عباره عن اوضتين وصاله
عم امين : ها ايه رايكم يا جماعه
رؤي : حلوه خالص
عم امين :علي بركه الله هانزل لصاحب البيت نكتب العقد وانتوا بقي نظفوا البيت عشان يكون مناسب ليكم
الحاجه زينب : ماتشيلش هم يا حاج اتكل انت علي الله امضي العقد واحنا هنخلي البيت زي الفل
فضلت رؤي ومامتها والحاجه زينب ينضفوا البيت لحد ما خلصوه تماما
بعد العشا
الحاجه زينب :ااااه يا اني
ام رؤي : تعبناكي معانا يا ام رقيه
الحاجه زينب :ماتقوليش كده يا ام رؤي دا ربنا العالم انا حبتكم ازاي
رؤي : ربنا يخليكي لينا يارب يا طنط
الحاجه زينب : يلا بقي ننزل نحضر العشا قبل الحاج ماييجي رؤي :مفيش داعي يا طنط خلينا احنا هنا
الحاجه زينب : والله ازعل منكم انتوا مصريين تعملوا فرق بينا
ام رؤي :رؤي مش قصدها تضايقك يا حاجه زينب احنا بس مش عايزين نتقل عليكم
الحاجه زينب :ماتقوليش كده يا ام رؤي ويلل ننزل قبل ما الحاج ييجي
رؤي ومامتها :حاضر
نزلت رؤي ومامتها والحاجه زينب شقه عم امين وبدأوا يحضرواالعشا
بعد شويه وصل عم امين البيت
عم امين :السلام عليكم
الحاجه زينب ورؤي وحنان :وعليكم السلام ورحمه الله وبركاته
الحاجه زينب :حمدالله علي شلامتك يا حاج يلا عشان العشا جاهز
الحاج امين :ماشي ياحاجه
بدأوا ف تناول العشا
عم امين :الحمدلله انا كتبت العقد مع صاحب البيت
رؤي :مش عارفه اشكر حضرتك ازاي ياعمو
عم امين : مفيش داعيللشكر يا بنتي تحبي تنزلي معايا المحل من امتي
رؤي : من بكره باذن الله هاكون جاهزه
عم امين :لو حابه ترتاحي يا بنتي كام يوم براحتك
رؤي : لا يا عمو امين انا عايزه انزل معاك بكره ان شاء الله الساعه سابعه هابقي عند حضرتك .يلا تصبحوا علي خير
عم امين والحاجه زينب :وانتوا من اهله يا بنتي
طلعت حنان ورؤي الشقه فتحوها ودخلوا
رؤي بفرحه : اخيرا يا ماما بقي لنا بيت لوحدنا محدش يتحكم فينا فيه
حنان :الحمدلله يابنتي بس
رؤي : بس ايه ياماما
حنان بحزن : معقول بعد احلامك انك تدخلي الجامعه ومجموعك اللي جبتيه ف الثانويه العامه تشتغلي بياعه ف محل
رؤي بالم :معنديش اختيار تاني يا ماما لو كنا فضلنا مع بابا كان حكم عليا بالاعدام وجوزني غصب عني
بابا هو اللي وصلنا لكدا مكنش قدامنا حل تاني
بس الحمدلله علي كل حال اكيد ربنا هيعوضنا
مسحت رؤي دمعه نزلت من عنيها
يلا يا ماما ننام عشان نصحي بدري
*********
بدأت رؤي تنزل الشغل مع عم امين واتعلمت البيع والشراء بسهوله وعم امين بقي مبسوط منها خالص
بعد مرور عده ايام
كانت رؤي واقفه ف المحل زهقانه
عم امين : مالك يا بنتي
رؤي بحزن :سلامتك يا عمو امين مفيش
عم امين :يعني انا مش عارفك
رؤي بخنقه : انا مخنوقه خاااالص
عم امين : من ايه بس يا بنتي
رؤي : حاسه ان صاحبتي الوحيده ف ضيقه بس مش عارفه مالها
عم امين : لاحول ولاقوه الا بالله طيب يابنتي ماتحاولي تكلميها تطمني عليها
رؤي : بس انا مش معايا موبايل
عم امين : بسيطه يا ستي اتفضلي موبايلي اتكلمي زي ما انتي عايزه
خدت رؤي الموبايل منه وطلبت رقم مرام وهي متردده خايفه ليعرفوا مكانها بس قلقها علي صحبتها كان اقوي
قطع شرود رؤي وتفكيرها الرد علي التليفون
مرام بعياط : مين
رؤي بلهفه : انا رؤي يامرام
مرام بعياط وشهقات مستمره :رؤي كده تسيبيني لوحدي يارؤي
رؤي بخوف : مالك يامرام ايه اللي حصل
مرام :انا ف مصيبه يا رؤي
رؤي : مصيبه ايه
ف نفس الوقت سمعت مرام خبط علي باب اوضتها
مرام بخوف : هاكلمكتاني يا رؤياوعي ترني انتي انا اللي هارن عليكي
قفلت مرام
رؤي : مرام مرام ردي عليا يامرام
ياتري ايه المصيبه اللي مرام فيها وايه رد فعل رؤي لما تعرف وايه مصير مرام كل ده هنعرفه الحلقه الجايه من كسرت كبريائي
