سلما للسماء 🖤

part 4

بارت 2
كمت من السرير ووكفت كدام المرايه اباوع لشعري صاير هوسه مشطت وغسلت ونزلت لگيتهم كاعدين وماما دتحظر الريوم واوم احمد مرأه جبيره تجي تساعد ماما بشغل البيت بيتنا جبير متلحك خطيه وهم ماما تساعدها وتنطيها شهريه من راتب زوجها الشهيد
#ميران... صباحووو عسل كوجهي
#اثير... صباحو ورد يروحي يلا شوكت تخطبيلي صديقتج ترا عنست حصير 28 وممتزوج
#ماما... يمه اي يلا فرحني اريد ازوج واحد منكم عود ذاك عوفه بعدين نزوجه تقصد ع علي
#امير ... يلا ميرو تردين شي حطلع لشغلي بالج ع نفسج وبالج ع ماما
#ميران...ماشي الله وياك وبالك ع نفسك بس جيبلي وياك نمنمات طلعو امير واثير وبابا وماما بالمطبخ دتعزل هي واوم احمد وظلينا كاعدين اني وعلي دنتريك لان يتأخر يلا يروح لشغله عادي دااكل وجان يكول ...
#علي...مرمر شنو رأيج اليوم اطلعج اونسج هاا
#ميران... اي فدييييت ديحني احب الدياحه ههه ضحك ويباوعلي جان يكول بس تلبسين لبس اللي يعجبني يلا اطلعج وكوتله حاظر البس مثل متريد كملنا ريوك وساعدت ماما شوي هي خطيه متقبل اشتغل لان تخاف عليه اتخربط بس اني اضوج من الكعده وحتى اذا اتصفح الفون امل واضوج ف اظل افتر بالبيت الله اليوم علي يطلعني بعدين اتذكرت اليوم يجون الناس ؤؤف ضربت راسي ورحت لعلي فتحت باب غرفته هجوم سويت عااا علي اليوم يجون الناس شلون تطلعني شبيك نسيييت
#علي... هو اني ناسي حتى تذكريني ان شاء الله تنگلب بيهم السياره وميوصلون
#ميران... ياعلي شبيك خطيه يموتون ليش هيج تدعي عليهم بالله صار...بعدني ممكمله كلامي اشو هذا تقرب عليه حيل من الخوف رجعت ليورا ولزك ظهري بالباب واباوع لعيونه حمرر دمم عزا غير عصبي اعصابه دماار كارثه
#علي.... هي حجت هيج واني تخبلت بعدها ممكمله كلامها واتقربت عليها هي خافت ورجعت ليورا انوب خايفه عليهم للكبر شسويلهم انعل ابوهم ميرااان شدخلج بيهم يموتون ميموتون شعليج بيهم ليش خايفه عليهم هاا بس لا تعرفي ابنهم وعاجبج احجيييييي (بعصبيه)
#ميران... حجيت بخوف لا مقصدي وين شايفته ابنهم مره لو مرتين وبعدين بارحه كوتلك ماريد اتزوج بعد عليمن هالحجي لتزودها بس اني اقصد حرام تدعي عليهم ممسويلك شي هو
#علي... ها اشو تدافعين عنهم ولج مو يريد ياخذج مني هااا ولج تغشمين نفسج بعدين سكتت يربي هاي شحجيت اني جفصت شنو ياخذج مني
#ميران... شنو ياخذن غي منك وبعدين ليش عصبي وخرر حتى طلعه مااطلع وياك بعد يلا وخر طلعت من الغرفه وصعدت لغرفتي عزلت ملابسي واني معصبه هذا شبي يضوج بدقيقه ويعصب وبالدقيقه الثانيه اشوفه يضحك ويوزع ابتسامات خيطييير عايزه شلعان گلب اني ...
#علي.... طلعت لشغلي اشتغلت شوي ومليت ورجعت للبيت كوتلهم لتكعدوني عالغدا تعبان انام طبيت كالعاده اباوع صورها وبوستهم ونمت للعصر كولش كعدت غسلت وحظرت ارگيله جان تنزل الشالعه گلبي زعطوطه گلبي وهي تشم بريحه الاركيله تحب ريحتها وكعدت واني ادخن وانفخ عليها ...
#ميران... هاي ليش خبيث لتنفخ عليه لتصير بيه ريحه ترا جااين الناااس بعدني ممكمله الحجايه هو شمر الارگيله عالمحجر اني جفلت متت بمكاني هذا شبي تخبلللل
#علي... اباوعله خايفه واني عصبت متت يربي ناويه تموتني كمت جريتها من ايدها وصعدتها لغرفتها طببتها وطبيت وياها وقفلت الباب وعفت امي دتنظف الكاع من الكزاز لزمتها من ايدها حيل باوعي بعيوني بااوعي زين شنو دتشوفين هاا احجييي
#ميران... علي شبيك ششوف شنو شدااتحجي ليش هيج تعصب دااقصد لتصير بيه ريحة دخان عيب من النااس
#علي... ولج ليش مهتمه هيج بيهم حييل ترا خبلتيني ترفضي وغصبا ع راسج فاهمه ترفضي لااسحلج سحللل خوووش ودفعتها حيل ع جربايتها وطلعت برا البيت شغلت السياره لان اذا ابقى يمها اموتها خلاص وهي مبيها ضربه
#ميران... صفنت هذا شبي هيج يتخبل هزيت ايدي وكمت اتحظر حتى اذا ارفضهم مستحيل اطلعلهم مبهذله فتحت كنتوري شلبس امممم طلعت فستان بينصل اسود ولبست حذاء احمر وخليت شال ع راسي اسود وبي من الطرف احمر ورتبت وجهي بمسكارا وحمره خفيفه ههه واكو شامتين فوك شفايفي لونهم فاتح ف طوختهم شوي المهم طلعت حلوه والشامات زادني جمال صعدتلي ماما وهي تكولي شوي وانزل لان اجوي حتى يشوفوني بالله خل اشوفه شلون صاير هذا هشام انوب عليه عريس الغفله اتذكر شايفته مره او مرتين بس من زمااان حيل
المهم رشيت عطر ونزلت وهمه كاعدين بالصاله امه وابو وهو الولد وكاعد بابا وامير وماما وعلي يفتر من المطبخ للصاله يلوب مدري شبي مثل المنتظر مرته بصالة العمليات  شافني بسرعه تقدم عليه راد يجيني همزين بابا شافني جان يكول تعالي بنيتي اني طفرت طبيت للصاله سلمت عليهم وكعدت يم امير امه كاعده مدري شبيها تباوع من فوك لجوه قرقوز كدامج شبيج خاله شبيج حجيه
وهو كاعد حلو مرتب طويل وستايله حلو ولحيته وكفشته عجبني الصراحه مطيه انتي ميرو شبيج علي ميخليج تتزوجين لو تركعين راسج باكبر حايط ...من بعد كلام هواي راحو الناس ويرجعون بعد يومين اذا انطيتهم موافقتي صعدت لغرفتي داابدل واطلع فلم اتابعه وانام انفتحت الباب رأسا سويت نفسي نايمه
غمضت عيوني حيل وحسيت خطوات بطيئه دتقترب مني بعدين حسيت يمشي ايده ع شعري ووجهي وشفايفي طبع بوسه خفيفه ع خدي وكال (احبج يروحي اموت اذا تضيعين مني) وطلع من الغرفه عزاا اني هنا انصدمت هذا صدوك يحبني يربي احسه مثل اخويه شبي هذا والله احبه ك اخو الي مااحس تجاهه غير مشاعر والله بطران خل انام احسلي ...
#علي... هاليومين خلصتهن بس افكر اذا ميران وافقت عالولد شسوي يربي والله اتخبل انوب اليوم يردون جواب منها ؤؤؤف كمت طلعت للحديقه هي كاعده ع كرسي ولابسه برموده وبدي اباوعلها يربي تجنن الشعر شطوله ومغمضه عيونها ودتسمع بسماعات التليفون اكو كرسي يمها كعدت عليه وهي محاسه اخذت تك سماعه وسمعت وياها متت ضحك دتسمع اغنيه كوريه مدري شنو بس عجبني لحنها هي عگدت حاجبها وباوعتلي بأنزعاج ...
#ميران... ها شبيك تضحك معاجبك لتسمع منو گلك تسمع وياي احد جابرك هاا
#علي... شبيج اكلتيني وشربتيني كلشي ماافهم من الاغنيه شديكول ماادري
كومي اطلعج وغمزتلها ادري بيها تحب الدياحه ...
#ميران... لامبيه حيل اليوم بطني توجعني حيل وراسي يأذيني كلت هيج ورأسا جرني طببني جوه ...
#علي... كومي لبسي اخذج للطوارئ كومي ..
#ميران... لاعلوش ميحتاج هسه اخذ علاجي وارتاح شوي ...
#علي... جبتلها علاجها شربته واخذتها لغرفتها ودتنام ميرو تدرين اذا صار بيج شي شيصير بيه؟ وتدرين اليوم يجوج الناس ويردون جوابج توافقين لو شنو هاا حبيبه ...
#ميران... صوته بي نبرة حزن ومنكسر هيج احسه وعيونه مدمعه بقت ترن بأذني حجايته لما گال (تدرين شيصير بيه) ؤؤف يربي حجيت بكلبي علي لتحبني والله ماافيدك ماريد اعذبك وياي واليوم اتخذت قراري صافنه بوجهه جان يكولي يلا حبيبه نامي ارتاحي وبلليل اطلعج لو باجر بكيفج انتي ...وراد يطلع كمزت لزمته وحضنته هو ليش تفاجأ؟ ؟! متعوده احضنه هو وامير واثير هذا شبي ..
#علي... صافنه بوجهي واحسها دتفكر بكلامي يربي كون ترفض والله مااتحمل تصير لغيري اكتلها واكتل نفسي خلاص فاجئتني لما حضنتني وصفنت بوجهي وهي تكولي اسفه بس ع شنو؟ ! كرصت خدها وطلعت لغرفتي وافكر شسوي شسوي لازم اخليها ترفض اوف لو اني ابن عمها جان نهيت عليها والله ؤؤف ؤؤف يربي تعبت حلها من يمك اريدها منك يااموسى الكاظم فدوه لأسمك اريدها منك ...
#ميران... نزلت لماما وساعدته شوي بالعشه خطيه اليوم اوم احمد مجتي كلت اساعدها ..اكول ماما عندي ملابس بعد مااحتاجهم ندزهم للجمعيه يودوها لناس محتاجين ؟
#سرور... اي ماما حظريهم ونزليهم ادزهم ويا اثير من يروح لشغله الصبح وهاا تعالي اسألج شفكرتي شنو جوابج ع ذولي الناس وكلت بكلبي رفضي ولج علي يحبج يمه ابني يحب بنت اختي شسوي يربي وهي تشوفه مثل اخوها ؤؤف والله صعبه
#ميران...جوابي جان السكوت ..اجه بابا كعد وكعدت بحضنه الله يساعدك ابو اميررر وعصرته بحضني ههه
#سرمد... هلا حبيبه لج تعبان جيبيلي مي وصيحي امج وتعاي اريدج
#ميران... ماشي بابا صحت ماما وجبت مي وكعدت يمهم
#سرمد... ها ميرو شنو قرارج
#علي... عمي عوفها متتزوج شكو مستعجلين بعدها صغيره هستوها كملت 18 وهم بعدلها شهر يلا تكمل شنو السالفه شبيكم لحيتو بالموضوع
#سرمد... خلص اني بس اريد اعرف شقررت يلا جيبو عشه جوعان بعدين نحجي ...
#ميران... دنتعشه وكاعدين كولنا حجت ماما يمه اثير اني تعبت شوكت تتزوج مو صار عمرك 28 عجوز شايب شوكت تتزوج اريد اشوف جهالك يايمه
#اثير...يوم خطبيلي وحده حلوه وعليج الله شعرها اريده طويل مثل ميرو وكون حلوه هاهي خطبيلي خل اخلص منكم
#علي... امي هلهلت وميرو تصفك واني وامير صافنين ودناكل ..واني شوكت تزوجوني حجيت هيج وباوعت لميرو جان هي تنزل راسها وجانت تصفك نزلت ايديها وسكتت
#سرور...يايوم اكيف والله ازوجكم ثنينكم
#امير...هههه اتزوجو ثلاثتكم بيوم واحد ونخلص
#علي... لاقصدك نتزوج ثنينا بيوم واحد اني واثير نتزوج ميرو ممتزوج وعفتهم وكمت طلعت برا التفتت ليورا وجان اشوف ...
#ميران... طلعت ورا علي اصبله جاي وانطيهيا اخذه من ايدي وجرني صرت جوه كتفه وحضني حيل وباسني من راسي علييييي عوووف شعرييي اهووو لتخربطه وروح جيبلي موطه ونمنمات
#علي... صار من عيوني ادللي جيبيلي محفظتي جوه والسويج
#ميران... اوك طبيت جوه جان بابا ديحجي متصلين عليه بيت ابو هشام ويردون الجواب بابا يحجي وياهم ويباوعلي ونها الاتصال طلعت لعلي انطيته محفظته والسويج وراح ورجعت كعدت يمهم هنا گلت كافي علي ماريده يتعلق بيه مدااحس بشي اتجاهه مجرد احبه مثل اخويه لازم اخلي ميتعلق بيه وقررت اوافق ع هشام اي خلص احسن حل وهو الولد مبي شي شخصية حلو وستايله حلو واهم شي علي يتركني اني ماافيده وهنا بابا نقذني من سألني وكوتله بابا بكيفك اللي تشوفه صح سوي واني وياك وجان جواب بابا السكوت وبقينا كاعدين بابا يتابع اخبار وماما تحجي ويا عمتي واني احجي ويا ناريمان واثير وامير حاطين اركيله وكاعدين عابت ولايستحون كدام بابا ويأركلون ولو هو بابا هيج عودنا وربانا نسوي كلشي كدامه ومنجذب عليه بشي وهنا سمعت علي اجه رأسا طفرت لغرفتي وغلقت فوني ودخلت للحمام غسلت وجهي ورطبته ومشطت شعري جان اندكت الباب يعني امير لأن بس هو يدك الباب قبل ليطب الباقين يسوون هجوم الله وكيلكم
اجه جايبلي علاگه بيها موطه 3انواع وجبس وشوكولا وبيبسي اعشقه وكرزات
ورا شوي طب علي عزا خفت اني وانوب طب اثير الحمدلله كملت السبحه اليوم الاحتفال بغرفتي وماخذين راحتهم اباوعلهم فدوه الله يخليهم اللي سندي ذولي والله من دونهم اموت ههه علي نايم ع جربايتي ويمه ماعون كرزات ويكرز وامير كاعد جوه واشرلي اجي اكعد يمه كعدت يمه ويكرزلي حب وفستق واثير يشرب بيبسي ويطلع صوت مقزز واحنا نعيط ولك اثييرررر ايع هاي شبيييك اشرب مثل الناس شهالاصوات هاي التطلع منك وهو يضحك وممهتم
اخير شي نامو امير وعلي واثير رجع لغرفته عزلت الهوسه الغرفه گلبوها گلاب
وتمددت يم امير ونمت محسيت للصبح كعدت وعادي استمرت الايام ماكو شي جديد غير انو حالة گلبي زادت صرت اتخربط هواي ويوجعني وراسي يوجعني واخذ علاج بس الالم يزيد مينقص استمرت ايامي عادي واجه اليوم اللي كبت بي العيطه جنت بغرفتي نايمه ودااحجي بفوني ويا ناريمان معندي غيرها اصلا معندي صديقات دائما جنت بالمدرسه منطويه ع نفسي ومااحب اختلط مو اجتماعيه ابد لهذا السبب اهلي ميشجعوني ع الاعلام لان هيج اختصاص يريد جرئه واني ابد مو جريئه جانت الساعه 12 بلليل وبعدني منايمه اجه علي وعيونه حمر ويخوفن اني فزيت وكفت وصار عندي غثيان قوي بسبب فقر الدم بس منظر علي يخوف يجوز عرف بموافقتي بهشام تقدم عليه بسرعه اني وكعت عالجربايه من الخوف والدوخه ...
#itsmemeha
‏يحدث ان تموت داخل نفسك ، والجميع يتعامل معك كأنك حيّ ..🎶🖤

بقلم الكاتبه #ميران الخفاجي ***
انتظروني بالبارت القادم ❤️