سلما للسماء 🖤

part 34

#علي... اليوم خميس وزواجنا يوم الاثنين يعني يوم الاحد الحنه والاثنين العرس كمت غسلت وبدلت ومريت ع ميرو اخذتها ورحنا للمستشفى سويت تحاليل الدم وطبعا ميرو الطريق كوله ساكته ومتحجي ابد گوه تطلع الكلمه منها هم عفتها براحتها ملحگت ترتاح كملت امتحانات وبدت تحضيرات العرس يعني تعبانه حيل وهي منا مريضه وضايجه عفتها براحتها المهم بطريقي مريت لمطعم اخذت غده ونزلنا للبيت ماما تلگتنا وتهلهل هي وسهى وجوكليت تفشخت بي اباوع لميرو تجاهلتنا كولنا وصعدت فوك ابتسمتلي ماما يعني لتهتم
طبيت لغرفتي مشتاقلها نمت ماعرف شكد مر من الوقت كعدوني ساعه 1:30 علمود اتغده كمت لكيتهم ملتمين كولهم وميرو صافنه وساكته ومعصبه اصلا اللي يحاجيها كلمه وحده تنفجر بوجهه كعدت يم اثير وامير واثير يكولي كوم اكعد يم مرتك دنجب وخر هي مرتي بحالي متشوفها هي بعالم واني بعالم ..
#بابا...اي علي اليوم شسويتو
والله عمو رحنا حللنا دم
#بابا...واني عبالي عقدتو محكمه اكول ياام اثير لعد شنو هذا الجوكليت
#علي... اي عمو امي فرحانه مسبقا ههههه طشت جكليت واحنا بعدنا معاقدين
#ماما...اسكت ولك واذا طشيت وبعدين اكو واحد يعقد محكمه بيوم الحنه
#امير...هههه اي ذولي همه مخابيل وطريقة زواجهم هم مال مخابيل وحيخبلونا وياهم مو صح ميرو
#ميران... شنوو ها (فاصله بغير عالم اصلا)
#علي... والله اليوم ردت اطلع للمحكمه بسرعه بس ملحكت وشفت ميرو تعبانه عفتها براحتها
#بابا...براحتكم وانتي بنيتي شكملتي
#ميران...صافنه ومسمعت سؤال ابوها
#ماما...ابو امير ميرو كملت كلشي تقريبا وهسه شوي ونروح للصالون نسويلها شعرها
#اثير... يبووو خرب بس لا تصبغون شعرها اصفر
#علي... لا يممممه شنو اصفر عوفو ع هذا اللون
#امير...انتو شعليكم بلون شعر اختي انجبو يلا
#بابا... ليش متنجبون والله مزعطه ابد متكبرون
#الولد ...شكرا حجي
#ماما.. انجبو وسكتو يلا ابو امير كوم نام وانتي حبيبتي ميرو كومي تجهزي حتى نروح للصالون وانتي سهى روحي ويانا وانت امير توصلنا
#اثير... خربيومج يمممه شهالاوامر هاي اخ ههههههه
#ماما...انجب انت
#الكل...ههههههههه
#ميران... ضحكت وكمت
#علي... ارتاحيت من شفتها تضحك صرلي هوأااي مشايف ضحكتها عفتهم ورحت لبيتي نظفته كوله ونمت حتى بلليل نروح اني وامير واثير نشتري ملابس العرس ..
#ميران... صارت الساعه 4 رحنا لصالون سوتلي شعري ع لونه بس خصل رفاع كولش رمادي كولش حلووو وناازك واني جسمي مسويته ليزر بالخطوبه يعني ميحتاج شسورت شعري وماما وسهى هم اشتغلن شعرهم ومرينا للسوك طبعا وحدنا نفتر بدون ولد ودوخة راسهم ماما اشترتلي اماعين وكل شغلات المطبخ واني اكول شمعرفني اطبخ وهي تكولي معليج نعلمج اني وسهى كملنا كلشي ورجعنا للبيت جانت الساعه 8:30 طبت ماما وسهى عالسريع سوو عشى تعشينا وحدنا وبابا ويانا لان الولد كولهم طالعين يشترون ملابس صارت الساعه 10 صعدت لغرفتي تصفحت بفوني شفت بيج من البيجات عدهم ملابس رجاليه اخذت قياس علي وطلبت بنطلون وقميص وتراكسود وبيجامتين وبلوزين حجزتهم وكالو باجر الصبح يوصلوهم وبعدين نمت كعدت الصبح ع هجوم من اثير وامير وسهى حتى انتي وياهم علموج تهجمين عليه
#سهى...ههههه يلا تأخرنا كومي نشوف حجز البدلات خاف يبدلوهن واني هم اريد احجز
#اثير... انتي شكو حبيبتي ترا حيصير سنه من تزوجنا شنو بعد
#سهى...يمه منك اسكت واذا
#ميران... طلعو اثير ومرته وكمت دااغسل واجاني امير جفلتي عاااا هاي شنو لسه مطلعت انت
لا ولج اوووف حشتاقلج كلببببي عمرررري اخيتي الغاليه
بسرعه بجيت
ليش هالدمووووع فدوه الهم كااافي اريدج ترفعين راسج دوم يروحي واريدج تفرحين لان هو الواحد بينا مره وحده يتزوج فلتضيعين فرحتج فرحي كافي حزن وتصفنين ترا علي والله يحبج ولج ثقي بالله
#ميران... اعررف بس خااايفه ومن شنو مااعرف
#امير... عوفج من هالسوالف هاي كلها وساوس شيطان بعدي هالافكار من راسج وسوي الكوتلج عليه يروحي وانتي هنا قريبه صح بيتج وحد بس قريبه علينه شتحتاجين بس رفعي تلفونج وتلكيني يمج
#ميران... حضنته وبجيت وراها طلع رحت غسلت وبدلت طبعا مطر وبارده حيل لبست بنطلون وبلوز وترواكه وبعدني بردانه لفيت شيلتي وتعطرت وطلعنا امير وصلنا وراح طبينا لكينا صاحب الفساتين والبدلات حاجته ماما واكدنا الحجز حجزت بدلتين وحده للحنه بيضه منفوخه ومن الصدر لحد البطن ماروني ودانتيل ماررني وبدله بيضه للعرس وطويله من ورا كولش ومشبكه
اخذتلهم صور بفوني وعنوان المحل وانطيتهم نص الفلوس ورحنا كبل لبيتي رتبت ملابسي وجان علي جايب الكاونتو ومرتب المطبخ ومنظف البيت وجايب غرفه الاخشاب اللي عجبتني وعالسرير ورد منثور المهم سفطت مكياجاتي وملابسي وكل اغراضي وماما سوت غده لعلي وعافته بالفرن وطلعنا رجعنا للبيت لكينه امير جايب غده تجمعنا وتغديناصعدت لغرفتي لكيت علاكه التوصيل ملابس علي وصلن اللي طلبتهم من البيج نزلت وسألتهم اكووول منو جان هنا لما اجه ولد التوصيل
#امير... اني وحاسبته
#ميران... هاا اوك المهم نمت وكعدت ويا الغده تغديت وسبحت لازم اغسل شعري كل يوم او باليوم مرتين لان اللون كلما ينغسل يصير احلا المهم مرو هاليومين وبيوم الحنه الصبح رحنا عقدنا محكمه اني وعلي وهم الطريق كوله ساكته مااصدك اليوم حنتي من شخص عشت ويا كل عمري وحكمل باقي عمري ويا اباوعله ملتهي بالسياقه لابس قميص ماروني وترواكه سوده وبنطلون اسود والحلقه والساعه واني ملابسه حلقه ابد مالبستها طول فترة خطوبتنا ملبستها
وجهه محدد بلحيه والشعر العالي بين قوسين كفشه والعطر غمضت عيوني واتذكرت هشام ماعرف ليش تذكرته بهاللحظه تعوذت من ابليس بصوت مسموع ..
#علي... ها شبيج شفتي جني لو تتعوذين مني
#ميران... اسكت مالي خلكك وها صدوك توصلني للبيت وتروح لو تظل يمنا اشو كملت كلامي ووكف السياره ع صفحه ها شبيك ليش وكفت
#علي... الله عليج عيدي شنو گلتي؟
شنو گلت تظل ويانا بالبيت لو تروح لبيتك
اولا كولي بيتنا مو بيتك لان هو بيتج ثانيا ليش تردين مني شي
اي اريد انطيك شي
شنو هو
اهوو راح يظل يسأل اسكت كافي
سكتنا اباوعلها واضحك بداخلي وجريت ايدها وبستها هي تباوعلي بغضب شلون تريدني هسه اكطع شفايفها اباوعلها واعض بشفايفي
#ميران... شبييك هاا
#علي... مبيه 😉
#ميران... لعد شكو تغمز
#علي... يابه هسه اني شمسوي ياالله حتى الغمزه حرام عرفت ميصير انحرف اكثر بس عاد الغمزه عاديه شنو كلما اغمز تمنعيني والله ياالله
#ميران... دسكت يلا نازله باي
وين باي اجيت وياج اوكفي
وخرر مااوكف ...طبينا وهم تفشخنا بالجوكليت وماما تهلهل وتهوس وسهى تضحك وامير وبابا دمعت عيونهم وهم يباركولي ورا شوي صعدت لغرفتي ارتاح شوي واروح للصالون طبيت لغرفتي بس نزعت شالي وحذائي وطب علي وهو يكولي مو تردين تنطيني شي؟  اي صح بس ليش مستعجل
بكيفي
اوك تعال اكعد
وهاي كعدت
رحت للكنتور طلعت العلاكه وانطيتها اله
هاي شنو
ذولي الك افتحهم وشوفهم واذا متريد بكيفك
#علي... ابتسمتلها وفتحت العلاكه بيها قميص وبنطلون وتراكسود ومدري شنو بعد مشفتهم باوعتلها ومبتسم شنو المناسبه
#ميران... لان نريمان كالت لازم العروس تهدي شي لزوجها بيوم الحنه
#علي... اهاا حلوات كولش عحبني ذوقج
#ميران... العفو ..داانزع ملابسي بديت ارفع بالقميص من جوه وباوعتله هاا متطلع اريد ابدل
#علي... بدلي كدامي ترا انتي باجر يمي وبحضني
#ميران... تحلممممم
#علي... هااا
#ميران... والله
#علي... الله كريم ...عفتها ونزلت ورحت لبيتي ارتاح شوي ومبتسم اباوع للملابس كويتهم وعلگتهم بالكنتور ردت انام وتجمعو عمام ميرو وولدهم وامير واثير ومخلوني انام وين اكو عريس ينام بيوم حنته اووف والله تعبان كمت سبحت طبعا الجو باارد ومطر يربي شهالحظ 😂حتى الجو معاند وياي طلعت من الحمام لبست بلوز بيجي والحافه اسود وبنطرون اسود ولبست ساعتي وحذائي وتعطرت من بعد مااشسورت شعري تذكرت جانت تشسورلي شعري فديتها شكد احبها طلعت للطرمه الولد جايبين كراسي وكاعدين واثير جايب كيك وعصير وديجي ويركصون امير كاعد ع جهه وكل شوي يجي يضربني ويكولي اذا بيوم تضوج ميرو ادفنك واني اضحك واثير حاير بكرشه ياكل وميبين بي ميسمن ..
#ميران... رحت للصالون واخذت بدلتي وياي اختاريت ميك اب نازك كولش بس ركزت عالعيون بظل اسود وايلاينر ورموش وهاا لبست عدسات رصاصي وشعري شالت منه شوي رفعته والباقي عافته نازل وتعطرت وصبغ اظافر اسود ولبست البدله وتجهزت وكلشي كملت ورا شوي اجتي عمتي وابنها وصعدنا اني وسهى وطبعا نريمان وياي وهنا انقبض گلبي ضايجه وخايفه وطاكه روحي من كلشي وصلنا للبيت ناس هواي اقاربي وناس غربه الجوارين حتى ناس مااعرفهم ومااشايفتهم اصلا هم جايين متكعد راحه نبع الحنان عازمه نص بغداد المهم نزعت البرنص وميته برد جنت بس بسبب الناس كاعدين هواي ف عادي محسيت ببرد وبدو يركصون ويهلهلون واني كاعده والموبايل بأيدي اباوعله وارجع اباوع للناس خلصت الحفله من بعد ماالبست كل فساتيني وهنا احس راسي حينفجر من التعب وجوعانه حيل صعدت لغرفتي طبيت سبحت وطلعت بردانه حيييل مشطت شعري وعفته مفتوح حتى ينشف مبيه حيل اجففه ولبست تراك ثخين لان بردانه حيل تعطرت ونزلت كلت اتعشه وارجع اصعد مبيه حيل لسوالفهم ابد جان امير واثير جايين واجوني واحد يشيلني وواحد يدغدغني كولهم متعشين حطينا الاكل اني وياهم دنتعشه وماما كالت خطيه علي وحده بالبيت منو يوديله الاكل كام زوج نريمان كال اني اوديله هالولد شكد حباب الله يساعده ع نريمان الظاهر حجيت بصوت مسموع ف سمعني امير وگال الله يساعد علي عليج 😒😒المهم عفتهم ورحت لغرفتي ردت انام ردت ماكو مجاني نوم رغم التعب التعبته بس مجاني نوم وهنا اتصل علي رفضته رجع دك ورفضته ورجع دك سويته صامت وغطيت راسي بالبطانيه وداانام اجتي نريمان وتكولي علي ديتصل عليج ليش متردين#ميران... ماارد مجاي ع بالي ارد اريد انام عفيه عوفوني براحتي طلعت نريمان واني ردت انام ماكو النوم طار من عيني ل3 يلا نمت كعدت الصبح ساعه 9 ع هوسه وركص وهلاهل والله بطرانين كمت مطنگره ومعبسه وجهي طبيت سبحت ومشطت شعري وجففته وبدلت ونزلت تريكت واثير ساعه يركص ساعه يباوعلي ويبجي وامير ميباوع بوجهي عيونه مدمعه احاجي وميباوع بوجهي خلوني ابجي ماما كالت روحي بدلي دنروح للصالون كمت سحلني البنات سحل للدرج لبست ونزلت لكيت عصام يودينا وهم عيونه مدمعه كاعده يمه بالصدر وضربته بوكس ببطنه شبييك عمووو ليش تبجي
لج انتي الله يساعد علي عليج نعلعلا ابوج
هههههه بابا شعليه
هيج بكيفي يلا وصلنا نزلو ومن تكملون خابريني ماشي حبيبتي
ماشي ياعمو الصاك الحلوو عموو اوكف
البنات يباوعن باوعتلهن عرفو اريد احجي وياعمو وحدنا ف طبو للصالون واني بقيت وياعمو احجي
ها مرمر احجي شبيج البربوره طلعيها عندج بربوره ( يعني عدها حجي تحجي 😂)
ها عصومي اي عندي
كولي شنو
عمو اني لحد الان مفرحانه وماريد هالزواج وابد محاسه بنفسي عروس وخايف من شي احس وكلبي قابضني احس هالزواج موزين عليه ولا ع علي وابد موزين من كل النواحي صفن عمو بوجهي دقائق واني ساكته اخير شي ضربني ع راسي حيل
اااخ عموو لييش
شنو الليش ولج انجبي وروحي اكو عروس بوقت دخولها للصالون تحجي هالحجي امشي تعوذي من الشيطان وبعدي هالافكار من بالج وريحي دماغج واقري قران ولتخافين علي حباب ويرفع الراس ومراح يغدر بيج
سكتت اني وهو باوعلي صفح وكال
اصلا اني اخاف ع علي منج مو اخاف عليج
#ميران... 😒🙁
#عصام... هههههههههه يلا طبي جوه وصيري حبابه خوووش
ماااحبكككك عصووميييي
حبتج حيه ام خشممم امشي طبي جوه
دخلت جوه وجانو اكو 3 عرايس واني الرابعه صارت الساعه 12 اجانه اثير جابلنه غده والبدله ورجع تغدينا وكملت وبدت الكوافيرا تشتغل اول شي شسورت شعري وسوتلي تسريحه طبعا ع ذوقي نازل شعري كوله ماعدا كم خصله رفعتهم ع الجانب وبرمتهم وبالجانب الثاني اختاريت بروش كولش حلو ونازك احلا من التاج وثبتتليا بمثبت الشعر وبنفس الوقت بي شوي لمعه حتى يثبت وميتأثر وتخرب التسريحه كولش نازك وحلو طلع وبدت تشتغلي المكياج اختاريته سموكي نازك كولش وراقي هالمره مخليت عدسات لان بارحه بيوم الحنه تأذيت منهم لان ممتعوده البس المهم كملت وهم ثبتتلي المكياج ولو الجو بارد ومراح يخرب المكياج لان مو مثل الصيف بسبب الحر يخرب كملت كمت لبست البدله وبدت الرجفه تزيد وتزيد بجسمي ثبتتلي الطرحه ع شعري صار شكلي مثل الهنديات بطريقة لبس الطرحه لان شمرته شمر ع راسي وثبتتليا بالبروش بشكل جانبي وجانت الطرحه طويله كولش بطول البدله اللي جانت اصلا كولش طويله من ورا وتسحل سحل ماخذه من الكاع مترين كعدت شوي وانوب كومتني الكوافيرا تعاي سوي هيج واوكفي هيج واكعدي هيج تريد تاخذلي صور والله بطرانه اني بيا حال المهم تصورت كم لقطه وكوتلها دزيهم عالخاص عمتي ونريمان كملو شغل وظلو يصلون ع محمد وعمتي تهلهل واني اختنت احس هاهي حتبدي تعاستي اكثر واكثر بعد غمضت عيوني وماعرف ليش اجه ع بالي هشام نزلت دمعتي مسحتها بهدوء واجه اثير ورجعنه للبيت صعدت لغرفتي بدون كلام والكل عفتهم متفاجئين بيه كوتلهم تعبانه وبعد وقت للزفه ...

احبكم فديتكم وفديت دعمكم وتعليقاتكم الحلوه انطوني ارائكم بالقصه وعلقو وصوتو بليززز

الكاتبه ** ميران الخفاجي **
1924 كلمه يعني قدرو تعبي 🤭