قيود / كاملة

11

دخلوا القاعـة على الساعة ٩ ونصف .. 

القاعة بقمة الروعة بـ الالوان الدافية الذهبي والبيج والبني والبرتقالي والأنوار بالأزرق و البنفسجي 
السجاد باللون العنابي الفخم ..
الأجواء باردة ..
عينت سودانيات لتفتيش 
ولتقديمات ومباشرة الضيوف سعوديات بلبسهم الموحد الاسود والابيض وتسريحة الشعر ذيل حصان 
ام عبدالعزيز تباشر وتشيك بالتقديمات لكل طاولة .. والورد الطبيعي بكل طاولة باللون الأورنج 
وقفت ببداية القاعة هي وريهام ومها وأم شاكر لترحيب الضيوف ..

العاملات يشيلون عباية الضيوف ب أرقامهم لغرفة خاصة
وصلت نرجس مع أمها وجلسوا بالكرسي 
ام نرجس باعجاب: ما شاء الله .. شغل عدل مو كأنه أحسن من قاعة مها ..؟ 

نرجس: اكيد يمه لا تنسي كل سنة العالم تتجدد وتتغير مها تزوجت قبل 5 سنوات ممكن ..

ام نرجس: لا اكثر الظاهر ..

نرجس: المهم أنها مدة كافية لتجديد وحتى الاذواق تصير احلى ..

دخلت فرح ومروة ومريم وسط ترحيب من ام عبدالعزيز وبناتها وخصوهم بطاولة مميزة على طلب راغده ..
مروة بفجعة: وش ذه ! معقولة ؟ 

فرح: قلت لكم خبركم قديم عنهم .. 

مريم: انا ما سمعت عنهم شيء ..

فرح: انا دايم اسمع ام زوجي تمدحهم كثير .. اسالي الناس عنهم ..

مروة: ابوها ميت نسأل عن مين بالضبط ..

فرح: اسألي عن عمها زوج امها فؤاد بن عبدالعزيز ال#### #

مريم باندفاع كأنها تذكرت شيء:اما عاد ذه عمها ؟! سمعت عنهم غثونا بسيرته زوجي يقول تعلمي من هالاسرة الكادحة .. اشــوف بس ..

مروة: اي ذه عمها انا اتكلم عن ابوها .. ماله صيت ..

فرح: مات الله يغفر له بريعان شبابه من وين يكون له صيت انتي وياها ..بس عمتي تقول أن أبوها له منصب ومعه فلوس ..

مروة بهمس: شوفوا عبير شغل عدل بوتيكس وجسم مرتب ..

مريم: اي هذا ألي معهم فلوس يحبون اعمارهم ..

مروة: صدقتي .. بطنها لاصق في ظهرها ..

فرح: امها من عمرها كذا عودها دقيق ..

مروة بضحكة: عدل ، عكس بنتها راغده سمنت فجأة ونحفت الآن فجأة ..

مريم: أنا أشوف هالراغده غامضة هم بين يوم وليلة قالت بكتب كتابي ! وبين يوم وليلة سمنت وهم نحفت ..