لعبة القدر ❤️

4

لعبة القدر
( الفصل الرابع )
ديجا خدت دارين وراحوا يتمشوا عشان مينفعش دارين تروح بالحالة اللي هي فيها دي ديجا ماشية جنب دارين وماسكة ايديها و بيتمشوا وهم ساكتين ديجا اخدت نفس عميق وبصت ع دارين.
ديجا : بطلي عياط متعيطيش ع حد ميتساهلش اصلا انتي عملاله قيمة وهو ميسواش 3 تعريفة ارجوكي خلاص مش بقدر اشوفك كدة.
دارين وقفت وبصتلها وقربت حضنتها جامد وديجا حضنتها جامد وفضلوا كدة شوية بعدين ديجا بعدت وبصت لدارين ،
ديجا : دارين من اللحظة دي ادم نكرة بالنسبالك عيشي حياتك بقى اخرجي واتفسحي واعملي كل اللي نفسك فيه متفضليش عايشة ف الوهم ده كتير ارجوكي حققي ذاتك ياحبيبتي ممكن ؟
دارين مسحت دموعها وهزت راسها وطلعت الفون كتبت ف النوت "معاكي حق ياديجا انا خلاص هفوق لحياتي واول حاجة هركز فيها هي اني اتعالج عشان صوتي يرجعلي من تاني"
ديجا قرات الكلام ،
ديجا : ايوه بقى هو ده الكلام وانا معاكي طبعا بس المهم دلوقتي ااااا...... ممكن نروح بقى عشان جعانة !!
دارين بصت لديجا وفضلت تضحك جامد وطبعا من غير صوت وبعد فترة ضحك دامت كام دقيقة دارين قربت حضنت ديجا حضن امتنان لوجودها ف حياتها .
وقفوا تاكسي و ركبوا وبعد نص ساعة وصلوا فيلا سامر المحمدي دخلوا الفيلا كانت الانوار مطفية و ف نور خافت ف الجنينة دارين وديجا طلعوا من باب الجنينة فجاة الانوار اشتغلت ودارين لقت نفسها ف دائرة والكل حواليها بيغنولها لعيد ميلادها كل اللي بيحبوها بصدق كانوا موجودين سامر وعائشة وميريام وكريم وطبعا لي لي الصغننة و سليم وكاميليا وديجا ومامتها وباباها و شاركتهم الحفلة دادة مروة اللي مربية دارين و لين بنت اخت دادة مروة اللي اتربت مع دارين .
بعد ماخلصوا غنا دارين طفت الشمع وباست سامر وعائشة وحضنتهم وبعدين عدت عالكل باستهم وحضنتهم وقعدوا واكلوا تورتة و بيتكلموا وبيهزروا و كانوا عاطيين لدارين مساحة انها تكتب عالورق عشان تشاركهم القعدة الجميلة دي . اليوم خلص وديجا مشيت مع اهلها وسليم وكاميليا مشيوا وميريام وكريم ولي لي مشيوا دارين حضنت عائشة وسامر و طلعت اوضتها خدت شاور وهي ف الشاور كانت عمالة تفكر كتير ف اللي حصل وقررت تبدا حياة جديدة خلصت شاور ولبست ونامت .
ادم رجع الفيلا الساعة 4 الفجر دخل براحة والانوار مطفية و ماشي براحة ورايح ناحية السلالم بهدوء الانوار اشتغلت بص لقى سليم واقف وع وشه علامات الغضب ادم اتوتر .
سليم : كنت فين يا استاذ لحد الساعة 4 الفجر .
ادم : ااااا كنت مع صحابي يابابا حبوا يسهروا كدة فقولت اسهر معاهم مرة من نفسي .
سليم : وهي المرة من نفسك دي بتبقى كل يوم !
ادم نفخ : بابا ف ايه انا مبقيتش صغير ومن حقي اعيش حياتي بقى .
سليم بصله وقرب منه واتكلم بنبرة هادية بس مخيفة : وانت بتتكلم معايا تتكلم باحترام وعنيك ف الارض والا انت عارف انا ممكن اعمل معاك ايه ماااشي اتفضل ع اوضتك ووانت طالع اوضتك عدى عالمكتب حط مفاتيح عربيتك واي فيزا معاك ولا اقولك حط مفاتيح عربيتك بس انا كدة كدة اتصلت بالبنك وقفت اي فيزا باسمك .
ادم اتغاظ ومقدرش ينطق نص حرف ع كلام ابوه : ماشي يابابا حاجة تانية .
سليم مردش عليه وطلع فوق ادم نفخ وطلع اوضته ونام ع طول من التعب .
تاني يوم ادم صحى وقام خد شاور وطلع لبس وجهز نفسه واخد فونه ومفاتيح عربيته ونزل سليم وكاميليا قاعدين عالسفرة بيفطروا وسليم بيقرا مجلة .
ادم :صباح الخير
كاميليا : صباح الفل والورد والياسمين
سليم : صباح الزفت ع دماغك مسيبتش مفاتيح عربيتك ليه زي ماقولتلك .
كاميليا : ايه ياسليم براحة عالولد
سليم : كاميليا لما اكون بتكلم مع الزفت ده مسمعش صوتك
ادم : احم انا قولت ان قلبك طيب ياحاج ومش ههون عليك يعني فخليت المفاتيح معايا
سليم : لا انا قلبي اسود وقاسي ومبيحسش المفاتيح تكون قدامي خلال 5 ثواني والا ..
ادم من غير كلام طلع المفاتيح وحطها عشان عارف ابوه ممكن يعمل فيه ايه لو هو عارضه.
سليم : تمام اقعد زي الشاطر افطر بقى
ادم نفخ وقعد عشان يفطر.
عددت الشهور ورجعت الدراسة من تاني وطبعا كان كل يوم خميس كالعادة سليم وعيلته بيسهروا مع سامر وعيلته بس دارين كانت بتسلم وبتطلع اوضتها تاني عشان متتعاملش مع ادم وبتتعالج نفسيا طبعا وديجا ع طول معاها و بيخرجوا ويتفسحوا وخلت دارين كمان ترجع للنادي وتكمل ف ممارسة الهوايات اللي بتحبها بس دارين من جواها لسه قلبها بيدق بأسم ادم .
جه يوم عيد ميلاد لميس كان عيد ميلادها الاول اخيرا الصغنونة هتكمل سنة والكل متحمس وعاملينلها حفلة عالبحر و الشاطىء متزين واصحاب سامر وسليم موجودين وكمان اصحاب كريم وميريام واكيد ديجا ومامتها مريم وباباها نبيل .
الكل كان لابس فساتين وبدل الا دارين كانت طبعا لابسة جينز وعليه سويت شيرت مقفولين عشان مفيش جزء من جسمها يبان ويتشاف التصبغات بالنسبالها كان كفاية اوي وشها اللي مليان تصبغات مشوهة شكلها فمش هتقدر كمان تظهر جسمها المتشوه هو كمان وطبعا ديجا لابسة زي دارين عشان ديجا عارفة ان دارين مش هتوافق تلبس فساتين او حاجة مفتوحة فلازم تكون زي صاحبتها الانتيم ف كل حاجة وده كان شىء مفرح دارين وديجا كمان ❤
واقفين ميريام وكريم وشايلين بنتهم والفوتوغرافر بيصورهم وسامر وعائشة بيستقبلوا المعازيم وفجاة ف صوت ضحكة عالية قلبت المكان الكل بص ع مصدر الضحكة دي كانت رؤى اللي متعلقة ف دراع ادم ولابسة فستان مفتوح جدا لونه ازرق بكتف واحد سليم كان بيغلي من ابنه ادم دخل وسلم ع سامر وعائشة وع ميريام وكريم وجاي يبوس لميس لميس صرخت ومرضيتش توافق انه يبوسها فميريام خدتها وبعدت ادم بص لقى ديجا ودارين بيبصوله وبعدين دوروا وشهم هو مهتمش واخد رؤى وراح لسليم وكاميليا .
سليم : مين المدام ؟
رؤى : انسة يا انكل
سليم بصلها بقرف وبص لادم وقاله عايزك وشده بعيد .
كاميليا كانت واقفة مع رؤى وشايفة انها جميلة اوي بس محتاجة شوية تظبيطات كاميليا زي اي ام عايزة تجوز ابنها ملكة جمال بس ف نفس الوقت متقومش من ع سجادة الصلاة كانت شايفة رؤى ناقصها شوية احترام وادب بس كانت مفكرة انها تقدر تكملهم فيها فكاميليا منفرتش من رؤى وعاملتها حلو .
عند سليم وادم بقى
سليم : مين الزبالة دي الانت جايبها معاك
ادم : ع فكرة ليها اسم اسمها رؤى والانت بتقول عليها زبالة دي انا بحبها وهتجوزها .
سليم : ع جثتي فكر كدة تعملها.
ادم : انا مش صغير ومحدش يقدر يمنعني .
سليم : انا اقدر امنعك .
ادم بعناد : طيب نشوف . وبعد لورا خطوتين وقال يااااجماااااعة بالمناسبة الحلوة دي وان لولو الجميلة هتكمل سنة انا عايز اخلي الفرحة فرحتين واقولكم اني قررت اتجوز هتجوز اللي خطفت قلبي واحتلت تفكيري و قرب من رؤى ومسك ايديها وباسها وقال هتجوز حبيبت قلبي رؤى .
الكل كانوا بيبصوا لرؤى ومش عاجباهم ومستغربين ازاي شخص زي سليم الهواري يوافق يخطب لابنه واحدة زي رؤى سليم كان محرج جدا لان رجال الاعمال صحابه هو وسامر موجودين ونظراتهم مش لطيفة . دارين كانت مصدومة سابت الحفلة كلها ومشيت وديجا راحت وراها . عائشة اندهشت ازاي ادم يحب واحدة زي دي واضح ان متعرفش كلمة عن الاخلاق اصلا . سامر شاف دارين لما مشيت واطمن ان ديجا راحت وراها عشان عارف ان ديجا بتعرف تحتويها ومن جواه بيموت عشان بنته اللي كل حاجة بتكون ضدها .
طفوا الشمع و الحفلة خلصت بسرعة عشان ادم بوظها طبعا ونكد عالكل باللي عمله ده وكل واحد راح ع بيته .
ف فيلا سليم الهواري .
سليم بكل قوته بيضرب ادم بالقلم وكاميليا صرخت ووقفت بين ادم وسليم .
سليم بيزعق وصوته جايب اخر الفيلا : انت اتجننت واقف قصادي انا وبتتحداني انااااا انت نسيت نفسك ولا ايه
ادم بزعيق برده : منسيتش نفسي انا ادم الهواري هتعمل معايا ايه هتاخد مفاتيح العربية وتمنع عني الفلوس بكرا تموت وكله يبقى ملكي انا ايه يعني هتعيش اكتر من اللي عيشته .
سليم اتصدم من كلام ابنه ازاي ابنه اللي رباه احسن تربية يتحول بالمنظر ده سليم كلام ادم نزل عليه زي الصاعقة خلاه مش عارف يرد .
ادم كمل وبزعيق برده : انت خلاص مش هتقدر تتحكم فيا تاني فااهم كدة كدة كل حاجة ملكي انا انا اللي هورث بعدك وانا عايز اتجوز رؤى ومفيش حاجة هتمنعني فاااااهم ! ومشى ادم من الفيلا كلها سليم قعد عالكرسي ومصدوم من اللي ابنه قاله وعمله كاميليا قعدت جنبه وبتعيط
كاميليا : سليم رد عليا ارجوك متزعلش من ادم انت عارف انه عيل ومش عارف هو بيقول ايه ياحبيبي ارجوك اهدى
سليم فضل قاعد ومبيتكلمش وكاميليا عمالة تكلمه ومش بيرد عليها وفجاة سليم قام دخل مكتبه وقفل ع نفسه بعد ساعة المحامي جه ودخل ع مكتب سليم ع طول وبعد 3 ساعات المحامي خرج ومشى كاميليا دخلت لسليم المكتب.
كاميليا : سليم مين اللي كان هنا ده ؟
سليم : ده المحامي
كاميليا : المحامي !! ليه عايز ايه ؟
سليم : ولا حاجة . وقام وسابها وطلع اوضته
الساعة 11 رجع ادم من برا سليم وكاميليا كانوا قاعدين ادم دخل من باب الفيلا وبيغني ومبسوط ورايح ناحية السلالم عشان يطلع اوضته سليم وقفه .
سليم : ادم
ادم نفخ ولفله : نعمم خير ؟
سليم : تعالى هنا شوية عايزك
ادم اخد نفس وراح قعد قدامه : ايوه ف ايه ؟
سليم : كان معاك حق يابني انا فعلا مش هعيش قد اللي عيشته وكل حاجة ف الاخر هتبقى ليك لوحدك ؛ ادم بص لابوه وبدا يبتسم بس الابتسامة دي مطولتش لما سليم كمل كلامه
سليم : بس انا كتبت وصيتي ووصيتي بتنص ع انك مش هتاخد جنيه واحد من فلوسي واملاكي الا لما تتجوز دارين وتخلفوا طفل و ساعتها بس املاكي وفلوسي هيبقوا ملكك وليك انت وحفيدي لحد الوقت ده انت ملكش حاجة غير طبعا لو حابب تدير الشركة تعالى وديرها بس عمرك ماهتملكها الا لما تتجوز والعروسة تكون دارين ..
نهاية الفصل الرابع .