لعبة القدر ❤️

19

لعبة القدر
( الفصل التاسع عشر )
يوسف : عمي سامر انا بطلب منك ايد لين انا عارف انها مسئولة من حضرتك فانا بطلبها من حضرتك وبتمنى مترفضش طلبي ده لاني والله العظيم بحبها اوي ومن قلبي.
ادم كان حاسس ان روحه طلعت واتردتله من تاني قعد عالارض بيستوعب ان يوسف مطلبش ايد دارين وانه بيحب لين مش دارين و فجأة قعد يضحك جامد الكل بصله ؛
سليم : مالك يا ادم ف ايه انت بتضحك ع ايه !
ادم وهو لسه بيضحك : لا ولا حاجة يابابا.
وقام ادم قرب من يوسف وقف قدامه وحضنه وخبط ع ظهره.
ادم : الف مبروك مقدما يا جو لين بنوتة كويسة ومتربية وتستاهل كل خير وانت جدع وتستاهلها.
يوسف مستغرب من ادم اوي ؛
يوسف : متشكر يا ادم ده من زوقك.
ادم ضحك وخبط ع كتف يوسف و بعد والكل مستغرب ادم .
يوسف بص لسامر ؛
يوسف : عمي سامر حضرتك مرديتش عليا !
سامر : والله يابني لين دي بعتبرها بنتي ومسئولة مني وزيها زي دارين وميريام وانا مش هلاقي احسن منك ليها بس القرار قرارها هي هي بس توافق وانا اجوزكم ع طول .
يوسف فرح اوي وقرب حضن سامر جامد .
سامر ضحك ؛
سامر : اهدى بس يا جو لما نعرف راي العروسة الاول.
يوسف : ايوه صح ياعمي مع حضرتك حق.
سامر بص لدارين ؛
سامر : دارين حبيبتي اطلعي نادي لين .
دارين : حاضر يابابا.
دارين طلعت الاوضة لقت لين قاعدة ودموعها بتنزل وديجا معاها هي وميريام وتقريبا بيحاولوا يقنعوها تنزل.
دارين جريت ع لين خدتها ف حضنها ؛
دارين : لينووو مااالك ف ايه ؟
ديجا : بنتحايل عليها تنزل ترد عالواد اللي هيموت تحت ده وهي مش عايزة وبتقول العلاقة دي متنفعش تكمل.
دارين بصت للين بتعجب ؛
دارين : متنفعش تكمل ليه يا لينو انتي مش بتحبي يوسف ؟!
لين بصت لدارين وبدات تعيط جامد ؛
لين : دارين ارجوكي افهميني انا....انا حالتي الاجتماعية مختلفة لولا ان باباكي شخص كويس وانتو ناس كويسين وحبيتوني كأني بنتكم انا مكنتش هوصل للانا وصلتله ده ماما متوفية و بابا شخص مش كويس ومعندهوش قلب و عشان هو كدة خالتو مروة خدتني اعيش معاها وكان شرط بابا انها تاخدني بس هي اللي تشيل كل مصاريفي من غير ماتطلب منه جنيه واحد انا مش زي يوسف يوسف مغني معروف والناس بتحبه وليه مكانته هيناسب واحد زي بابا ازاي ده غير الكلام اللي هيتقال عليا اني ضحكت عليه عشان فلوسه ومكانته ..
دارين : ...لين ..هو سؤال واحد بتحبي جو ولا لاء ؟؟
لين غمضت عيونها ؛
لين : بحبه بس انا بعشقه..
دارين : خلاص خلصت مفيش كلام تاني هتنزلي معايا وهتوافقي وموضوع باباكي ده ملكيش دعوة بيه مفهوم ؟
لين : بس يا دارين......
دارين : مفيش بس انتي بتثقي فيا ولا لاء !
لين : بثق فيكي طبعا انتي اختي انا لو عندي اخت مش هتكون ف مكانتك عندي .
دارين ابتسمت وقربت حضنت لين جامد ؛
دارين : ربنا يخلينا لبعض يالينوووو يلا بينا بقى الواد هيخلل تحت.
البنات كلهم ضحكوا ونزلوا سوا وهم بيضحكوا يوسف بص لدارين بقلق عشان خايف لين ترفض دارين ابتسمت وهزت راسها هو ابتسم واخد نفس عميق .
سامر قام وقف وقرب من لين و حط ايديه الاتنين ع اكتافها و ابتسم ؛
سامر : لين حبيبتي انتي عارفة ان من ساعة ماجيتي الفيلا وانتي عمرك 6 سنين وانا بعتبرك بنتي وانتي بنتي فعلا انا بحبك زي دارين وميريام وعمري مافرقت بينكم ف اي حاجة انتي عارفة اني عمري ماتخلى عنك بسهولة كدة صح ؟
لين : انا عارفة ده كويس يا بابا سامر.
سامر ابتسم : طيب انا بيجيلي ليكي عرسان كتير وبرفض لان انا مش هدي جوهرتي لأي حد بس النهاردة الشخص اللي هيحرس الجوهرة دي جه وهو كويس جدا وهيحطها ف قلبه وعيونه وانا بصراحة بحبه وموافق عليه .....
سامر بص ليوسف و ابتسم وبص للين تاني و كمل ؛
سامر : ياترى جوهرتي موافقة ولا عندها رأي تاني ؟
لين بصت ليوسف وبصت لسامر وابتسمت ؛
لين : انا متأكدة من رأي بابا حبيبي وطالما بابا شايف ان الشخص ده هيحافظ عليا انا مش عليا غير التنفيذ وبس .
سامر ابتسم : احم يعني موافقة ع جو ؟
لين خدودها احمروا ؛
لين : اللي تشوفه يابابا .
البنات صرخوا وحضنوا لين وفضلوا يغنوا يادبلة الخطوبة عقبالنا كلنا وفضلوا يهيصوا ومراد وكريم مع يوسف بيضحكوا معاه وادم انضملهم كمان والعيلة عمالين يضحكوا ع اللي البنات عاملينه يوسف باصص للين وعيونه بتلمع من الفرحة ساب الشباب وقرب منها وقف قدامها ؛
يوسف : مهما اتكلمت عمري ماوصف حبي ليكي انتي فعلا جوهرة جوهرتي انا ....بحبك.
وقرب يوسف باس لين من جبينها ..
البنات صرخوا والشباب سقفوا جامد لميس راحت شغلت المزيكا بصوت عالي والبنات بداوا يرقصوا ع خفيف عشان الشباب واقفين يوسف شد لين ومراد شد ديجا و كريم شد ميريام وبيرقصوا سوا ودارين بترقص مع لميس تحت تأمل من عيون ادم سامر و سليم ونبيل بصوا لبعض وابتسموا سامر وسليم ونبيل قاموا راحوا عند عائشة وكاميليا ومريم وركعوا ع ركبهم البنات والشباب وقفوا رقص وبصولهم ؛
سامر لعائشة : تسمحيلي بالرقصة دي ياملكة عمري وحياتي وتاج راسي .
سليم لكاميليا : تسمحيلي بالرقصة دي يا اوكسجيني.
نبيل لمريم : تسمحيلي بالرقصة دي ياحبيبتي يا كل حياتي.
عائشة وكاميليا ومريم ابتسموا وقاموا مع سامر وسليم ونبيل وبداوا يرقصوا معاهم البنات والشباب صرخوا جاااامد .
كريم : ايه يجماعة ده ده عمي سامر وعمي سليم وعمي نبيل حطوا علينا حطة وحشة اوي.
يوسف : شكلنا بقى وحش اوي خلي بالكم.
مراد : انتو لسه واخدين بالكم دلوقتي احنا مستقبلنا ضاع خلاص ف ثانية ضيعوا كل حاجة.
البنات سامعين الشباب وقاعدين بيضحكوا عليهم الجو كان جميل اوي والكل مبسوط..
رؤى بتبص عليهم من برا الشاليه وع اخرها هي مش عاجبها انهم مبسوطين وفرحانين وهي مش عارفة تعمل ايه تبوظ الفرحة دي فرجعت الشاليه اليوم خلص مع العيلة و الكل طلع ينام وادم رجع الشاليه عند رؤى وطلع نام تاني يوم الصبح بدري يوسف نزل بيجري عالبحر ادم شافه راح يجري معاه ؛
ادم : صباح الخير جو.
يوسف بص لقاه وابتسم ؛
يوسف : صباح النور ادم.
ادم ابتسمله وبيجروا وشوية وادم وقف يوسف وقف هو كمان وقرب من ادم ؛
يوسف : مالك يا ادم انت تعبت ولا ايه غريب مع ان جسمك رياضي جدا.
ادم : لا يا يوسف متعبتش بس حابب اتكلم معاك.
يوسف ابتسم : اكيد يا ادم تحت امرك.
ادم : تعالى نقعد ف اي كافيه قريب نشرب قهوتنا ونتكلم.
يوسف : يلا.
راحوا كافيه قريب وقعدوا وطلبوا اسبريسو ادم بص ليوسف ومتوتر واخد نفس عميق واخيرا بدا انه يتكلم ؛
ادم : .....انا اسف يا يوسف ..اسف ع كل حاجة انت شخص كويس اوي بس انا....غيرتي ع مراتي كانت اكبر من اي شىء انا....
يوسف : ادم ادم بس انت مش محتاج تقول كل ده عارف ان تصرفاتك كانت نابعة من....حبك لدارين كحبيبة قبل ماتكون زوجة ،
ادم بصله يوسف ابتسم وكمل ؛
يوسف : يابني انت مفضوح اصلا عيونك مبينة كل اللي ف قلبك انت بتحبها ومش من دلوقتي من زمان بس ع حسب كلام دارين ان الشيطانة اللي اسمها رؤى دي هي اللي كانت عاملة غشاوة ع عينيك و انت عشان بدات تفوق وتشيل الغشاوة دي بدات تشوف الحقيقة انت من حقك تعمل كل اللي عملته ده وزيادة لانك متعرفش طبيعة علاقتي مع دارين بس احب اطمنك دارين دي اختي انا بحبها اوي لاني بشوف فيها اختي الله يرحمها اختي كان عندها نفس اللي عند دارين بس اللي عند دارين كان مشكلة هرمونات انا اختي كان عندها البهاق نفسه ومكانش ليه علاج لحد مانتحرت فلازم تعرف اني عمري مابصيت لدارين بصة غير انها اختي وبنتي مش اكتر بخاف عليها زي ماكنت بخاف ع ملك اختي الله يرحمها.
ادم : انا اسف يا يوسف اسف بجد مكنتش اعرف كل ده.
يوسف : ادم انت زي اخويا و احنا رجالة زي بعض وانا فاهم تصرفاتك دي سببها ايه بس نصيحة مني متضيعش دارين من ايدك دارين ماسة غالية جدا متضيعهاش وحافظ عليها عشان لو ضيعتها تاني هتندم ندم عمرك.
ادم : بس هي مش عايزاني خلاص وعايزة تطلق.
يوسف : ما بسبب انك بتحكم عالاشياء من ظاهرها ولازم تثبتلها انك غيرت ده وبعدين .........اكتر شىء يضايق اي بنت ان ...ف واحدة تانية تقاسمها حبيبها او جوزها فااهم ؟
ادم : فاهم يا يوسف بس انا مقدرش اطلق رؤى كدة من غير اي سبب هي ملهاش حد غيري كمان فاهمني !
يوسف : فاهم يا ادم المهم انك تحاول تصلح مع دارين ع قد ماتقدر.
ادم : حاضر هحاول ....المهم دلوقتي اننا اتصافينا مش كدة ؟
يوسف : طبعا يا ادم انت لسه بتسال كمان.
ادم مد ايده ليوسف ؛
ادم : بداية صداقة لينا ؟
يوسف ابتسم وحط ايده ف ايد ادم ؛
يوسف : بداية صداقة لينا وبداية اخوة بينا.
ادم ابتسم و الاسبريسو جت قعدوا يشربوها سوا ويتكلموا ف حاجات كتير اوي .
ف الشاليه الكبير ؛
العيلة كلها قاعدين وبيتكلموا و لين مستغربة تأخير يوسف ده مبيتأخرش وقاعدة متوترة دارين اخدت بالها ومسكت ايديها وبصتلها وهزت راسها بأنها تطمن يعني لين هزت راسها وشوية ولقوا ادم و يوسف داخلين سوا بيتكلموا وبيضحكوا جامد الكل مندهشين ودارين مذهولة ومصدومة ازاي ده ادم ومع يوسف كمان ؟؟
دارين : ااا.. انتو كنتوا مع بعض ؟
ادم ابتسم : ايوه فيها ايه دي !
دارين : لا لا ولا حاجة .
ادم ويوسف بصوا لبعض وابتسموا وقعدوا والفطار اتحط وكلهم قعدوا يفطروا اليوم عدى عادي ودارين من جواها مبسوطة ان ادم ويوسف بدوا يقربوا من بعض اخيرا ..
بليل عالساعة 9 كدة وادم رايح الشاليه التاني دارين وقفته واخدته ع جنب ؛
ادم : ايه يادارين ف حاجة ولا ايه ؟
دارين : اه عايزاك ف حاجة مهمة بس مش دلوقتي هنتجمع كلنا الساعة 2 الفجر ف الجنينة الخلفية.
ادم ابتسم وحب يشاغب فيها لف ايديه حوالين وسطها ؛
ادم : احم هو انا وحشتك ولا ايه عايزاني متأخر عشان تستفردي بيا.
دارين اتوترت وبعدته : انت بتقول ايه لا طبعا الموضوع ميخصناش اصلا ومش هنبقى لوحدنا متقلقش يلا بقى امشي .
وسابته دارين وطلعت ع اوضتها جري ادم ضحك ورجع عالشاليه عند رؤى.
الساعة 2 الفجر ادم جه الجنينة الخلفية لقى دارين وديجا وميريام وكريم ومراد ويوسف جه قعد وبصلهم ؛
ادم : اومال فين لين ؟
دارين : نايمة احنا مقولنلهاش ع تجميعتنا دي.
ادم باستغراب : اشمعنا !!
دارين : والد لين شخص مش كويس هي من الاول كانت عايزة ترفض جو رغم حبها ليه بسبب باباها وباباها لو عرف انها هتتجوز واحد زي جو مغني مشهور ومعاه فلوس وكدة مش هيسيبها ف حالها لا هي ولا هو.
مراد : والمطلوب ؟
دارين : لازم نفكر ف حل نجيب بيه باباها عشان يكتب كتاب لين ويوسف وف نفس الوقت ميتعرضلهمش تاني.
الكل عمالين يتناقشوا وادم ساكت بيفكر وفجأة بصلهم ؛
ادم : خلاص يجماعة الحل عندي.
يوسف : هتعمل ايه طيب ؟
ادم : متفكرش كتير بقى بس حضر نفسك احنا كلها كام يوم ونرجع اليكس تاني يوم كتب كتابكم والفرح هيبقى ع مهلنا.
دارين : بس.....
ادم : مفيش بس متقلقيش خليكي واثقة فيا.
دارين بصتله واخدت نفس وهزت راسها؛
دارين : اتمنى مندمش.
ادم بصلها وهز راسه .
قاموا كلهم ودخلوا الشاليه وكل واحد راح ع اوضته دارين هتطلع ع اوضتها ادم مسك ايديها هي بصتله ؛
ادم : ......انا اسف يا دارين ..اسف ع كل حاجة وحشة عملتها ف حقك.
دارين بصتله وافتكرت لما اجهضت البيبي وانه هو ومراته التانية السبب ف ده بصتله بحزن ؛
دارين : للاسف يا ادم مفيش حاجة حلوة افتكرهالك انت كل حاجة وحشة عملتها ف حقي هي كل حاجة انت عملتها معايا ملكش ذكرى واحدة حلوة ...طلقني يا ادم خليني اعيش الباقي من حياتي مرتاحة.
وشدت ايديها وطلعت ع اوضتها وقفلت الباب ع نفسها وراحت عالسرير فضلت تعيط لحد مانامت من كتر العياط ادم كان مضايق اوي هي فعلا معاها حق ف كل كلمة هي قالتها حقها تقول كدة واكتر كمان بس هو مش هيقدر يتخلى عنها مش هيقدر هو بيحبها واوي كمان اخيرا اعترف لنفسه بده اخيرا..
عدى الاسبوع الاخير ليهم ف شرم ورجعوا اليكس تاني يوم ادم جمعهم كلهم ف ريو دارين وديجا ولين وميريام وكريم ومراد وجو .
كريم : خير يا ادم ؟
ادم : خير يا كريم متقلقش ......تقدروا تحددوا معاد كتب كتاب يوسف ولين وباباها جاهز ببطاقته وكله تمام .
لين مصدومة دارين خافت ليكون عمل حاجة مش قانونية مع الراجل؛
دارين : ادم عايزاك ثواني لو سمحت .
وقامت دارين طلعت برا الكافيه وادم وراها وقف قدامها وحط ايديه ف جيوبه دارين بصتله ؛
دارين : ادم اوعى تكون عملت حاجة غير قانونية مع الراجل ده مهما كان والد لين.
ادم ابتسم : متقلقيش يا دارين انتي وثقتي فيا وانا مستحيل اكسر ثقتك دي انا ماصدقت اخيرا تثقي فيا.
دارين اخدت نفس عميق وابتسمت ابتسامة خفيفة وهزت راسها وسابته ودخلت هو واقف بيبص عليها وهي داخلة وايديه ف جيوبه ومبتسم ؛
ادم لنفسه : يارب صبرني ع جمالها ده.
ونفخ ودخل وراها....
نهاية الفصل التاسع عشر.