لعبة القدر ❤️

14

لعبة القدر
( الفصل الرابع عشر )
مراد ضحك وشد ادم وقعده جنبه وادم فاضل باصص لدارين دارين راحت وقفت جنب ديجا ويوسف.
دارين بصت لسليم .
دارين : حضرتك اتعرفت ع يوسف ؟
سليم : اه ياحبيبتي وبجد وصفك ليه وكلامك الحلو عنه طلع ولا اي حاجة من الحقيقة بجد ماشاء الله عليه.
يوسف : انا ليا الشرف بجد اني اتعرفت عالعيلة الحلوة دي .
دارين : انت بقيت منها خلاص ياجو.
يوسف بصلها وابتسموا وضربوا كفوفهم بكفوف بعض وادم احساس الغيرة بيتولد جواه.
عائشة : ايه ياجماعة مش نقوم نتغدا بقى دودي ماكلتش حاجة من ساعة ماجت الصبح عايزة اول حاجة تاكلها البشميل وكفاية كدة بقى بنتي لازم تتغذى .
سامر ضحك : طب يلا حضروا.
عائشة : حاضر هقوم احضر.
دارين : لا لا لا تقومي تحضري ايه ياست الكل خليكي قاعدة مرتاحة مانتي عندك بناتك اهوه وحفيدتك الاوزعة دي احنا هنحضر خليكي زي مانتي . ومسكت دارين ايد عائشة وباستها عائشة ابتسمت وحسست ع شعر دارين اللي واصل لركبتها دارين بصتلها وابتسمت و راحت لديجا وميريام ولين .
دارين : يلا يابنات قدامي .
يوسف : نيجي نساعدكم انا وكريم ؟.
ميريام بخبث : اه تعالوا يلا ولا انتو بتساعدونا ف اميركا بس لا تساعدونا هنا كمان يلا.
ادم اضايق وف سره بيقول معنى كدة انه واخد عليهم اوي وكان بيساعدهم ف المطبخ .
ادم قام وقف ؛
ادم : استنوا انا ومراد كمان هنساعدكم .
الكل بصله باستغراب لانهم عارفين ان ادم مبيتحركش من مكانه ومتعجرف والخدم بيعملوله كل حاجة.
دارين : بس يابشمهندس حضرتك متعود عاللي يخدمك .
ادم : ....عادي نساعد برده.
دارين : ع راحتك .
ولفت دارين وخدتهم كلهم ودخلوا المطبخ ويوسف وكريم وراهم ويوسف ودارين بيهزروا .
مراد بص لادم
مراد : ايه ياعم مالك ف ايه من امتى وانت بتساعد ؟
ادم : مراد اخرس بقى مش وقتك هاه.
مراد : يخربيتك تكونش بتغير يا ادم !
ادم : اغير! انا اغير وع مين داارين !! بطل هبل مستحيل اغير عليها هي متهمنيش اصلا.
مراد ابتسم لان عارف ان صاحبه بيكذب وهيموت من الغيرة.
ادم : يلا قوم.
مراد ضحك : يلا
وقاموا وراحوا وراهم البنات كانوا بيحضروا الاكل والشباب بيحطوا العصير ويوسف بيغنيلهم وهم بيغنوا معاه ويهزروا كان جو رائع ولميس عمالة ترقص مع يوسف ادم بصلها وحتى دي اضايق منها لان لميس كانت بتكرهه وهي صغيرة لكن مع يوسف بترقص معاه وبتهزر.
مراد راح لديجا .
مراد : اساعدك ف ايه ؟
ديجا بصتله ووشها احمر :......اااا ولا حاجة .
مراد مد ايده وابتسم : انا مراد صاحب ادم....احنا اتقابلنا قبل كدة ف فرح ادم ودارين كانوا راكبين ورا وانا اللي كنت بسوق وانتي جنبي لو تفتكري !
ديجا مدت ايديها : اه افتكرتك ازيك انا ديجا.
مراد : فاكرك من ساعتها انتي متتنسيش .
ديجا وشها احمر جامد ونفسها اتقطع لين شافت منظرها خبطت ميريام ودارين فبصوا شافوا منظر ديجا ضحكوا كلهم .
ديجا بصتلهم وعارفة انهم بيضحكوا عليها سحبت ايديها بسرعة من مراد وراحت لدارين.
دارين : ايه يابيضة مانتي طلعتي بتتكسفي اهوه.
ديجا : اخرسي مسمعش صوتك ده انا نفسي راح يخربيتك.
دارين عمالة تضحك وتتكلم معاها وشعرها عمال ينزل ع عيونها .
دارين : كريم ممكن تيجي ترفعلي شعري بعد اذنك .
كريم : اكيد ياحبيبتي .
ادم قرب بسرعة .
ادم : انا هرفعه خليك انت.
كريم بصله وسكت دارين بصت لادم وكانت متوترة ادم قربلها ورفع شعرها بعيد عن عيونها وباصصلها بيتأمل كل حاجة فيها .
دارين بصتله : ....لو سمحت بسرعة شوية.
ادم : اها انا اسف.
ورفعه بسرعة وبعد ووقف بيفكر ازاي نسى نفسه بمجرد مالمسها ولمس شعرها غمض عيونه جامد وخد نفس عميق .
البنات حضروا الاكل وبقوا يطلعوا يحطوه عالسفرة ويوسف وكريم ومراد بيساعدوهم ادم كان تايه شوية عشان اول مرة يساعد وكدة دارين كانت مراقبة كل تفصيلة وعاملة نفسها مش شايفة حاجة .
اخيرا الغدا اتحضر العيلة كلها اتجمعت حوالين السفرة وقعدوا عائشة غرفت لسامر وكاميليا غرفت لسليم ومريم غرفت لنبيل وميريام غرفت لجوزها ادم مستني دارين تحطله اكل ف طبقه عائشة بصت لدارين انها تغرف لجوزها دارين خدت نفس وقامت غرفت لادم ادم فرح جدا وبصلها .
ادم : تسلم ايديك.
دارين مبصتلهوش : الله يسلمك .
قعدت دارين و بصت لديجا .
دارين : ماتغرفي لمراد ياديجا هو مش طايل المكرونة اغرفيله انتي.
ديجا اتوترت ولين وميريام كاتمين ضحكتهم .
ديجا : اااا.....حاضر.
ديجا غرفت لمراد مراد بصلها وابتسم.
مراد بهمس : الاكل هيكون روعة عشان انتي اللي غرفتيلي .
ديجا بصتله بتوهان وقلبها بيدق بسرعة غرفتله وراحت بسرعة قعدت.
يوسف : ايوه يعني كل واحدة غرفت لجوزها بالنسبالي انا ايه بقى كيس جوافة يعني.
لين ضحكت : اوووف يخربيتك باصصلهم كمان عشان بيغرفوا لاجوازهم ماتتجوز انت كمان وتخلصنا بقى من وجع الدماغ ده .
وقامت لين غرفت ليوسف.
يوسف : انتي غرفتيلي خلاص هستر عليكي واتجوزك.
كلهم ضحكوا
لين : يا اخي اتهد بقى وكل .
يوسف غمزلها وضحكوا وقعدوا كلهم ياكلوا مراد بيراقب ديجا وكريم بيهمس لميريام وادم عيونه متشالتش من ع دارين متابع حركاتها ونظراتها وجو ولين بيشاكسوا ف بعض كل ده تحت متابعة سامر وسليم ونبيل وعائشة وكاميليا ومريم متابعين ومبسوطين لان اول مرة يتلموا كلهم حوالين سفرة واحدة وحاسين انهم عيلة قوية بجمعتهم دي.
دارين : مامي تسلم ايديك بجد البشميل رائع انا بطني هتنفجر.
عائشة : صحة وهنا ع قلبك ياعيون مامي بس انتي مكلتيش كويس لازم تاكلي عشان تتغذي.
دارين : اتغذى مين بس ده انا هنفجر والله.
ميريام : ايوه ياماما قوليلها والنبي طول ال5 سنين مش بتاكل ومشغولة ف دراستها وشغلها اهيه خلصت دراستها ومش بترحم نفسها ف الشغل.
سليم : بس برافو عليكي يادارين انتي وديجا ماشاء الله عليكم بجد قدرتوا تثبتوا نفسكم ف وقت قصير قسمكم بقى الاول عالميا ف مجاله.
دارين ابتسمت : ميرسي يا انكل بس احنا معملناش حاجة احنا كنا بنعمل شغلنا وتعبنا وربنا كافئنا مش اكتر.
سامر : حبيبتي انتو عملتوا اللي محدش قدر يعمله لحد دلوقتي القسم ده دخلنا مبالغ ضخمة وسبب ف نجاح كبير لجروب الهواري والمحمدي انتو لو كنتوا شركة منفصلة ومش قسم ف شركتنا كنتوا زمانكم دلوقتي اسمكم ف السما.
دارين : لا يابابي انا حابة الشغل كله يكون تابع لجروب الشركة عشان انا مكملة مسيرة حضرتك وهخلي اسم المحمدي دايما فوق واكيد طبعا اسم الهواري لاننا جروب واحد وشركاء.
سليم : اكيد طبعا ياحبيبتي واحنا معاكي ولا ايه يا استاذ ادم ؟
ادم : طبعا يابابا ؛ بص ادم لدارين وكمل : وانا ف ظهرك يادارين اي حاجة محتاجاها انا موجود.
دارين من غير ماتبصله : ميرسي يا ادم بس كريم وجو معايا .
ادم : كريم دكتور ف الجامعة ويوسف مغني معتقدش يقدروا يساعدوكي زي مانا اقدر اساعدك.
دارين بصتله بتحدي ؛
دارين : والله مش انت اللي تقرر ده انا قسمي قسم تصميم حضرتك قسم هندسة اتمنى متدخلش ف شغلي كريم وجو يقدروا يساعدوني كويس جدا وخاصة جو كمان لانه كان معايا طول الفترة دي انا بقالي 5 سنين ف اميركا سنة واحدة بس اللي عيشتها من غير جو وكنت لسه اول سنة جامعة لكن باقي ال4 سنين جو كان معايا وعارف كل تفصيلة وعارفني بشتغل ازاي وعارف زوقي وكل حاجة وانا اللي اقرر عايزة مين يساعدني.
ادم اضايق اوي وحس انه بينسى نفسه وبيرمي نفسه عليها.
ادم : صح معاكي حق انا اصلا شاغل نفسي ليه ف حاجة ملهاش لازمة.
دارين تفوقت ف الرد عليه وبصتله : صحيح متفكرش بقى ف حاجات هايفة و ركز ف الحاجات المهمة اللي زيك .
وقامت دارين بتشيل الاطباق وراحت المطبخ ميريام وديجا ولين بصوا لبعض وابتسموا وقاموا شالوا الاطباق ووراها سليم وسامر كانوا مبسوطين اوي لان دارين راجعة قوية وواثقة ف نفسها جدا كاميليا اضايقت شوية ع ابنها بس كانت شايفة ان دارين بقت جميلة اوي ودي اللي لازم تكمل مع ادم ابنها مش العقربة التانية عائشة كان صعبان عليها ادم بس كانت مبسوطة بدارين لان ادم عذبها كتير وهي دلوقتي بقت واثقة ف نفسها وبترد عليه من غير ماتقلل من احترامه.
الكل قاموا غسلوا ايديهم وراحوا قعدوا كريم ويوسف ومراد وادم خرجوا الجنينة وقعدوا وادم قاعد متنرفز طبعا من جو شوية وجت دارين هي وميريام وديجا ولين ومعاهم صواني فيها اطباق كيك بالشوكلت و فناجين قهوة عطوها للشباب كريم داق الكيك .
كريم : رائع يالهوي بجد بقالي كتير مكلتهوش.
ادم : معاك حق ياكريم طعمه رائع بجد تسلم ايد طنط عائشة.
ديجا : مش طنط عائشة اللي عاملاه اصلا.
ادم باستغراب : اومال مين !
يوسف ابتسم : دي دارين اللي عملته.
ادم بص ليوسف ومصدوم وبص لدارين .
ادم : بجد انتي اللي عاملاه !!
دارين بصتله : ايوه انا ف ايه مالك ؟
ادم : اصل انتي مكنتيش بتعرفي تطبخي ولا تعملي حاجة.
دارين : انا فعلا مكنتش بعرف اعمل حاجة بس اتعلمت كل حاجة عشان مصيري يبقى عندي اطفال وساعتها لازم ياكلوا اكل صحي من البيت وانا حابة ساعتها انا اللي اعمل الاكل ده عشان هعمله بكل حب .
ادم بصلها باعجاب وابتسم وبص للطبق واكله كله وقعدوا البنات مع الشباب يتكلموا ويهزروا تطول القعدة ادم بيبص ع دارين .
الساعة بقت 3 الفجر والكل تعب الشباب والبنات دخلوا من الجنينة والكبار قاموا وسلموا كلهم ع سامر وعائشة ودارين عشان يمشوا لميس شبطت ف دارين.
ميريام : لي لي اسمعي الكلام يلا بينا هنروح بيتنا.
دارين : خلاص ياميرو سبيها معايا ماهي من ساعة ماجيتولي اميركا وهي ف فيلتي وف حضني ومش معبراكم.
كريم ضحك : صحيح والله ع رايك .
ادم كان متابع حوارهم ومبسوط باهتمام دارين بلميس لان هي بتحب الاطفال سليم كان واخد باله من كل نظرات وحركات ادم وقرب سليم عشان يسلم ع دارين سليم حضن دارين وقرب من ودنها .
سليم : انا فخور بيكي جدا ياحبيبتي فوق ماتتصوري.
دارين ابتسمت : حبيبي يا انكل حقيقي حضرتك دايما بترفع معنوياتي وثقتي ف نفسي.
سليم بعد وحط ايديه الاتنين ع اكتاف دارين ؛
سليم : ششششش بس انتي مش محتاجة كلام من حد عشان تثقي في نفسك انتي جميلة ف كل حالاتك وناجحة وبتشتغلي بمجهود عالي انتي طول عمرك طيبة وعمرك ماعملتي حاجة تغضب ربنا وده توفيق من ربنا ليكي انتي تعبتي كتير ف حياتك والله اذا احب عبدا ابتلاه وربنا ابتلاكي كتير ولما صبرتي كافئك وبيكافئك وهيفضل يكافئك انا بجد فخور بيكي.
دارين ابتسمت وحضنت سليم جامد وشوية وبعدوا ادم وكاميليا وسامر وعائشة كانوا باصينلهم ومبسوطين سلموا ع بعض ومشيوا كلهم ادم وكاميليا وسليم ركبوا عربيتهم وراحوا ع فيلتهم ادم طلع ع اوضة نومه دخل اخد شاور وخرج لبس ونام عالسرير ومش عارف ينام من كتر تفكيره ف جمال دارين وعقله عمال يعمل مقارنة بين دارين ورؤى اختلاف 360 درجة بينهم وهو مش عارف ازاي حب واحدة زي رؤى وهو ف ايده جوهرة زي دارين بس فجاة عقله فكره بكسفة دارين ليه عالغدا ادم اتنفض بسرعة وقال لنفسه لا رؤى اه فيها عيوب بس انا حبيتها ولازم اتقبلها بعيوبها واحاول اصلح منها لكن دارين متهمنيش بحاجة وقام طفى النوم ونام و بيحاول يسكت صوت ضميره اللي بيقوله اعترف انك غلطت بقى وان رؤى من الاول مكانتش تناسبك وانك ضيعت جوهرة غالية اوي من ايدك..
نهاية الفصل الرابع عشر.