لعبة القدر ❤️

6

لعبة القدر
(الفصل السادس)
دارين مصدومة وباصة لسليم ومش مصدقة اللي هو قاله فاقت من صدمتها وكتبت ف النوت  "انكل سليم حضرتك بتقول ايه انا وادم نتجوز !! ازاي بس ادم بيحب واحدة تانية وهيتجوزها ازاي يتجوزني اكيد حضرتك غاصب عليه انا مستحيل اوافق اتجوز واحد مش عايزني وبعدين اصلا ليه دلوقتي احنا عايزين نطمن ع بابا الاول ايه لازمته الكلام ده وهنا كمان ف المستشفى"
سليم قرا الكلام وبصلها
سليم : حبيبتي ابوكي عايز يطمن عليكي وهو مش هيطمن عليكي غير وانتي معايا وانا مش هضمنك مع حد غير ادم و ادم مش مغصوب ع حاجة هو موافق يتجوزك انا مأجبرتهوش ولو مش مصدقة هجيبهولك بنفسه يقولك الكلام ده .
سليم معطاش لدارين ترفض او توافق ونادى ع ادم ادم جاله .
ادم : ايوه يابابا.
سليم : انت موافق تتجوز دارين .
ادم : ايوه انا قولت لحضرتك اني موافق .
دارين كتبت ف النوت "ادم متعملش كدة لو هم ضاغطين عليك قولي وانا هعرف اتصرف بس متعملش حاجة غصب عنك"
ادم قرا الكلام .
ادم : دارين انا مش مغصوب ع حاجة محدش يقدر بغصبني ع حاجة اصلا وانا موافق اتجوزك القرار عندك دلوقتي .
دارين بصت لادم وسليم وسابتهم وراحت للممرضة وكتبتلها انها حابة تشوف باباها قبل العمليات الممرضة جهزتها و دخلتها لسامر دخلت دارين وقعدت جنب باباها ومسكت ايده ودموعها بتنزل ع حالة باباها اللي خايفة ان العملية متنجحش.
دارين كتبت ف النوت "بابي انت قولت لانكل سليم فعلا انه يجوزني لادم ؟"
سامر قرا الكلام وبصلها بصوته التعبان قال : انا مطلبتش ده ياحبيبتي انا كل اللي عملته وصيته عليكي انتي ومامي بس هو اللي صمم ان ادم يتجوزك وبيقول ان ادم موافق وانا عارف انك بتحبي ادم اوي من وانتي صغيرة عشان كدة وافقت . سامر اخد نفس عميق وكمل كلامه؛
سامر : وافقي يا دارين اعطي نفسك فرصة يابنتي تعيشي حياة جديدة مع الانتي بتحبيه.
سليم دخل ساعتها وقرب من دارين حط ايده ع كتفها .
سليم : وافقي يابنتي وطمني ابوكي عليكي وافقي .
دارين بصت لسامر اللي هزلها راسه وخدت نفس عميق وهزت راسها .
سليم : اعتبر دي موافقة يعني !.
دارين هزت راسها سليم ابتسم وقال هطلع اتصل بالماذون يجي يجوزكم قبل ماسامر يخش العمليات وطلع سليم واتصل بالماذون و نص ساعة والماذون جه لما العيلة شافت المأذون استغربوا سليم بصلهم
سليم : ادم ودارين هيتجوزوا دلوقتي.
الكل بصدمة :ايييييييه
سليم : ششششش مش عايز اسمع نص كلمة فاهمين !!. واخد كريم و ادم والدكتور كمان ودخلوا لدارين وسامر .
بعد حوالي 10 دقايق ...
'بارك الله لكما وبارك عليكما وجمع بينكما ف خير'
اتكتب كتاب ادم ودارين وبقيت مراته المأذون مشى و الدكتور باركلهم وطلع سامر مسك ايد ادم.
سامر : ادم لو حصلي حاجة ارجوك خلي بالك من دارين ومتقساش عليها يابني .
ادم : اهدى ياعمى متقلقش دارين ف عيني .
سامر ابتسم وكلهم خرجوا وسابوا سليم معاه بعد ساعتين اخدوا سامر للعمليات دارين سابتهم وراحت مسجد المستشفى اتوضت ولبست طرحة وفضلت تصلي وتدعي لابوها وهي عمالة تعيط .
ادم فونه رن كانت رؤى بعد عنهم وبيكلمها وحكالها اللي حصل وهي اضايقت اوي وقعدت تزعق ف الفون انه ازاي يتصرف من غير مايقولها وكلام كدة وهو بيسمع زعيقها وبيحاول يرد مش عارف لانها مش مدياه فرصة عينه جت ع دارين وهي بتصلي و رافعة ايديها للسما وعمالة تعيط بدون قصد قفل ف وش رؤى وفضل يتفرج عليها فاق ع صوت فونه بيرن تاني كانت رؤى بص للفون واخد نفس وطلع برا المستشفى يرد عدى 4 ساعات وسامر ف العمليات ودارين لسه ف مكانها عمالة تدعيله وتعيط ادم داخل من المستشفى وراجع للعيلة شاف دارين وهي بتغمض عيونها وتفتحها وبتعافر عشان تخلي عنيها مفتوحة حس ان فيها حاجة قرب منها ولقاه بتقع لورا جرى بسرعة وسندها قبل ماتوصل للارض وشالها وراح نادى دكاترة طلبوا منه يحطوها ف اوضة حطها وهم علقولها محاليل والكل جنبها ميريام خرجت و اتصلت بديجا وقالتلها اللي حصل لسامر وان ادم اتجوز دارين ديجا اتصدمت وجت عالمستشفى ودخلت ع اوضة دارين مسلمتش ع حد جريت ع دارين مسكت ايديها وقعدت تحسس ع شعرها ودموعها بتنزل دارين مكانتش لسه بتنزل سليم ابتسم
سليم : اهدي ياديجا دارين هتبقى كويسة هي بس جالها هبوط وداخت احنا هنسيبك معاها .
وخدهم سليم كلهم وخرجوا برا دارين بعد ساعة فاقت ديجا مسحت دموعها وقامت بسرعة
ديجا : دودي انتي كويسة ياحبيبتي حاسة بأيه قوليلي ؟
دارين بصتلها وحضنتها جامد وفضلت تعيط
ديجا : مالك يادارين ف ايه عمو هيبقى كويس والله اتفائلي بس انتي فيكي حاجة تانية ايه اللي حصل ادم ضايقك تاني احكيلي ؟
دارين بصتلها وطلعت الفون وكتبتلها اللي حصل كله ف النوت ديجا قرات اللي دارين كتبته واتصدمت.
ديجا بصوت عالي شوية : ليه يادااارين لييييه انتي عارفة كويس انه مش بيحبك وان اكيد وراه حاجة طالما وافق ليه وافقتي واتجوزتيه ده هيدمرك اكتر هيدمرك هو مش بيحبك هو عنده هدف من ورا جوازك فاتجوزك ليه مفكرتيش ف كدة ليه دمرتي نفسك لييييه ؟؟؟.
دارين بصتلها وقعدت تعيط لانها عارفة ان ديجا معاها حق بس حبها لادم كان اقوى من انها ترفض  ، ديجا اخدت نفس وبدات تهدى بصت لدارين وصعبت عليها قربت نامت جنبها واخدتها ف حضنها .
ديجا : خلاص انا اسفة متزعليش مني انا بس خايفة عليكي انتي اكيد عارفة كدة.
دارين هزت راسها.
ديجا : ماشي يادارين بس عايزاكي توعديني انك مش هتسمحيله يجي عليكي ويهينك زي ماكان بيعمل ماشي ؟
ومدت ديجا صوبعها الصغير عشان دي طريقتها هي ودارين ف الوعود دارين بصتلها وهزت راسها وشبكت صوبعها الصغير ف صوبع ديجا ، ديجا ابتسمت وحضنت دارين جامد وشوية وقامت جابت اكل ورجعت قعدت تاكلها العيلة دخلوا يطمنوا ع دارين وكانوا مطمنين بوجود ديجا مع دارين لان علاقة صداقة ديجا ودارين مش اي حد يفهمها صداقتهم فوق اي حاجة وكفاية حبهم الحقيقي لبعض ..
عدى 7 ساعات واخيرا العملية خلصت الدكتور طلع كلهم اتلموا عليه بسرعة.
سليم : خير يادكتور طمني ع سامر ؟
الدكتور ابتسم : العملية نجحت واستاذ سامر بخير الحمدلله هو هيتنقل اوضة خاصة بس ممنوع الزيارة دلوقتي خالص.
سليم من فرحته حضن الدكتور وكان مبسوط اوي وعمال يشكره الدكتور ابتسم ومشى وسامر اتنقل غرفة خاصة .
عدى اسبوع وسامر بقى كويس واخيرا طلع البيت وطبعا اتفق هو وسليم ان دارين مش هتروح مع ادم الفيلا الا لما تخلص امتحانات الثانوية عشان يعملوا فرح وساعتها يقدر ياخدها وسليم اصلا مكانش معترض وكان عايز كدة .
طبعا رؤى صالحت ادم واتاسفتله انها زعقتله كدة وقالتله انه خلاص مفيش حاجة وان جوازه من دارين مش هيكون عقبة قدامهم وان بعد مايتجوزها رسمي يخلف الطفل اللي ابوه عايزه وساعتها هيقدر يطلقها عادي وادم اقتنع بكلامها طبعا لان واضح ان رؤى عملاله غسيل مخ .
خلصت امتحانات الثانوية العامة ودارين وديجا قلقانين من النتيجة بس نجحوا دارين جابت 99.9% و ديجا جابت 99.7% سامر ونبيل والد ديجا عملولهم حفلة كبيرة جدا وعزموا فيها كل اصحابهم .
سليم اتفق مع سامر عالفرح ويوم الفرح كان الكل ف بيت سامر بيجري من الاستعجال دارين جابولها ميكاب ارتيست ظبطتلها وشها بحيث ان التصبغات اللي موجودة متظهرش خااالص وعملت نفس الكلام ع دراعها ورقبتها وظهرها عشان الفستان كان مبين ظهرها ورقبتها ودراعها دارين حرفيا كانت ف غاية الجمال و خاصة بشعرها الناعم اللي لون القهوة ده اللي واصل لنص ظهرها كانت جميلة زي الحوريات .
الساعة 8 جه ادم وسليم وطبعا مراد اللي مكانش ينفع يسيب صاحبه ف يوم زي ده وجم طبعا اصحاب العريس والزفة عشان يزفوا ادم ادم وسليم ومراد دخلوا الفيلا سليم سلم ع سامر وحضنوا بعض وادم سلم عليهم بعدين سامر استاذن وطلع خبط ع دارين ميريام فتحتله وابتسمت ووسعتله هو دخل وبص ع دارين اتصدم من جمالها كان مذهول قرب وقف قدامها وعيونه رغرغت بالدموع وقرب باس راسها وحضنها جامد بعدين بعد وبصلها.
سامر : انتي اميرتي و وردة حياتي ربنا يباركلي فيكي ويحرسك وتفضلي دايما نجمة منورة ف سمايا .
دارين ابتسمت وحضنت ابوها جامد وبعدين بعدت واتعلقت ف دراعه ونزلوا ادم ومراد واقفين بيتكلموا مراد شاف دارين اتذهل من جمالها ادم بص عالمكان اللي مراد بيبص عليه وشاف دارين مكانش مصدق ان هي دي دارين وف باله بيقول معقول التصبغات اللي عندها كانت مداريو الجمال ده كله ......بس للاسف الجمال ده مؤقت بمجرد ماتمسح اللي هي منيلاه ده هترجع زي ماكانت اخد نفس وقرب منهم سلم ع سامر وبص لدارين وقرب باسها من جبينها وعلق ايديها ف دراعه وخرجوا وسط الزفة ركبوا العربيات وراحوا عالقاعة اتصوروا الاول وبعدين الفرح بدا وادم نسى نفسه وكان مبسوط فعلا وده خلى الفرح حلو .
الفرح خلص و ادم ودارين طلعوا جناحهم ف الاوتيل ودارين دخلت غيرت وشوية وهو دخلها بصلها كانت لابسة وجاهزة وماسحة كل الميكاب فالتصبغات طبيعي كلها بانت هو كان هيتراجع بس افتكر ان لازم يخلف منها عشان يتخلص منها للابد قرب منها وحضنها وطفى النور وبدوا ليلتهم الاولى ..
بعد يومين سافروا شرم يقضوا شهر العسل وبعد شهر رجعوا ع فيلا سليم وكاميليا وطبعا سامر وعيلته كانوا موجودين عشان يستقبلوا بنتهم بعد غياب وصلوا واستقبلوهم و قضوا معاهم اليوم.
دارين وديجا قدموا مع بعض عشان يدرسوا تصميم الازياء لان ده حلمهم من صغرهم وكانوا مبسوطين اوي انهم بيحققوا الحلم ده اللي ياما حلموا بيه طبعا ادم كان بيعامل دارين بطريقة رخمة جدا ومش بيقبل منها اي حاجة وع طول بيزعقلها بس هي كانت صابرة عليه عشان عندها امل كله يتغير .
الداسة بدات اخيرا وكله كان تمام اول يوم دراسة ف الجامعة كان مرهق جدا لدارين وديجا وعدى اول اسبوع بسلام ف يوم كانوا طالعين من محاضرة ودارين مكانتش مظبوطة وتعبانة ديجا خدت بالها فسندتها.
ديجا : دودي مالك ف ايه انتي كويسة ؟
دارين هزت راسها بأه ولسه هيمشوا دارين وقعت ديجا صرخت والناس اتلموا وطلبوا الاسعاف ودارين اتنقلت عالمستشفى ديجا اتصلت بادم وسامر وقالتلهم والعيلتين جريوا عالمستشفى كلهم وصلوا سوا دخلوا والدكتور بتكلم دارين ودارين بتهز راسها سامر وعائشة جريوا ع بنتهم عائشة قعدت جنبها وماسكة ايديها سامر : خير يادكتور طمنينا مالها دارين ؟
الدكتور : اطمن ياسامر بيه دي حاجة طبيعية ...المدام دارين حامل .
الخبر كان صدمة ع ادم بس ف نفس الوقت فرحان انه خلاص كلها كام شهر هي هتولد وهو هياخد كل حاجة ويخلص منها الكل فرح جدا وباركوا لدارين وادم بس ديجا مكانتش مطمنة هي وميريام .
دارين طلعت عالبيت وعدى يومين وادم بيرجع الفجر ومش بتلحق تشوفه وكل ماتكتبله حاجة تتكلم معاه يعني يمسك الورقة يقطعه من غير مايقراه ف يوم ودارين وسليم وكاميليا قاعدين بيتفرجوا عالتليفزيون سمعوا صوت ضحك بيبصوا عالباب لقوا ادم داخل ومعاه رؤى وحاطط ايده ع وسطها وقريبة منه اوي وطبعا هدومها زي ماتعودنا ع الانسة رؤى هدوم بتظهر اكتر ماتخفي .
كلهم وقفوا ودارين باصة لادم ومش عارفة ايه اللي بيحصل .
سليم بعصبية : البت دي ايه جابها هنا ؟
ادم بابتسامة رخمة : ايه ده هو انا مقولتلكش يابابا اصل انا ورؤى اتجوزنا ع سنة الله ورسوله باركولنا بقى ..
نهاية الفصل السادس .