Adventure of Demon Lord [ VILLAIN GOD SYSTEM ]

Arc_2.3

ဂျိုးဆက်ဖ် သတိပြန်ရလာတော့ သူက ကုတင်ပေါ်မှာ လဲလျောင်းလျက်သားဖြစ်နေသည်။ အခန်းထဲက အလင်းရောင်က စူးရှလွန်းတာကြောင့် သူမျက်လုံးသူ လက်ဝါးဖြင့်ကာလိုက်သည်။ နောက်တော့မှ မျက်တောင်ပုတ်ခတ်ပုတ်ခတ်လုပ်ကာ အလင်းရောင်ကို အံတုလိုက်သည်။ မျက်လုံးများဟာ အလင်းရောင်နှင့်အသားကျသွားတော့မှ အခန်း၏ပုံစံကို အသေအချာမြင်လာရသည်။

သူရောက်နေသည့်အခန်းဟာ အနီရောင်တောက်တောက်များဖြင့် အလှဆင်ထားသည်။ အခန်းဟာ ကြင်စဦးဇနီးမောင်နှံအတွက် ပြင်ဆင်ပေးထားသည့်အပြင်အဆင်နှင့် အတော်လေးတူညီသည်။ သူ့ခေါင်းကတော့ အနည်းငယ်ထိုးကိုက်နေဆဲ။ ခဏလောက်ငြိမ်နေလိုက်မှသာ သက်သာသွားတော့သည်။

သူထမလို့လုပ်တော့ သူ့ကိုယ်ပေါ်တွင် တစ်ယောက်ယောက်ရှိနေတာကို ခံစားမိသည်။ ဒါကြောင့် ငုံ့ကြည့်လိုက်တော့ သူ့ကိုဖက်ကာ အိပ်ပျော်နေသော ကောင်လေးတစ်ယောက်ကို တွေ့ရသည်။

လန်ဒရီ?

သူ လန်ဒရီကို ဘေးကို အသာလေးတွန်းဖယ်ကာ ထထိုင်လိုက်သည်။ သူဘေးပတ်လည်ကို ကြည့်လိုက်တော့ အခန်းထဲတွင် သူနှင့်လန်ဒရီသာရှိသည်။ တခြားသူများကို မတွေ့။ သူ့Systemကိုလည်း မတွေ့ရ။

'System?..System!'
ဂျိုးဆက်ဖ် Systemကို စိတ်ချင်းဆက်သွယ်ကာ ဘယ်လောက်ပဲခေါ်ခေါ်၊ Systemကတော့ အကြောင်းပြန်မလာ။

[ရှောင်ဂျင်! ရှောင်ဂျင်...]
ခဏကြာပြီးနောက်မှသာ သူ့ခေါင်းထဲတွင် System၏အသံကို ကြားလာရသည်။

'ငါရှိတယ်။ မင်းဘယ်မှာလဲ?'
ဂျိုးဆက်ဖ် မေးကြည့်လိုက်တော့ ချက်ချင်းမဖြေ။

[ငါက နေရာမှာပဲကျန်နေခဲ့တာ။ မင်းတို့က ငါ့ရှေ့ကနေ ပျောက်သွားခဲ့တယ်။ ငါ မင်းတို့နောက်ကို လိုက်လာလို့မရဘူး]
Systemဟာ သတိချပ်နေသည့်အသံဖြင့် ပြောလာသည်။

[မင်းတို့တွေ ရောက်သွားတာက တားမြစ်ဧရိယာပဲ!]
Systemဟာ ကမန်းကတမ်းဖြင့် ထပ်ဖြည့်ပြောသည်။

"တားမြစ်ဧရိယာ'ဆိုသည့် စကားလုံးကြောင့် ဂျိုးဆက်ဖ် အတွေးများရသည်: တားမြစ်ဧရိယာဟာ ညို့ငင်နိုင်သည့်စွမ်းအားရှိသည်။ သူ့သားကောင်ကို ၎င်းဆီသို့ မရရအောင်ဆွဲဆောင်သည်။ နတ်ဘုရားများသည်လည်း ထိုနေရာကို ဝေးဝေးရှောင်သည်။ နတ်ဆိုးတွေတောင်မှ ထိုနေရာကို မသွားကြ။ ထိုနေရာဟာ အရမ်းကိုအန္တရာယ်ကြီးမားသည်။ ဘယ်လောက်ပဲအစွမ်းရှိတဲ့သူပဲဖြစ်ဖြစ်၊ ထိုနေရာရောက်ရင် အလိုလိုအားနည်းသွားရသည်။ သူဒီနေရာကို ဘယ်လိုရောက်လာရသလဲဆိုတာတော့ သူမသိ။ ကြည့်ရတာ သူ့ကို မုန်းတီးသူတစ်ယောက်ယောက်က သူ့ကို ဒီနေရာဆီပို့လိုက်တာဖြစ်ရမည်။ Systemကိုပါ ဖယ်ထုတ်ခဲ့တယ်ဆိုကတည်းက ထိုတစ်ယောက်ဟာ သူ့အကြောင်းသိနေလို့, သူ့ကို အခွင့်အရေး မရစေချင်လို့သာ ဖြစ်ပေလိမ့်မည်။