Adventure of Demon Lord [ VILLAIN GOD SYSTEM ]

Arc_2.2

ဂျိုးဆက်ဖ်သည် အသံလာရာအား ချက်ချင်းလှည့်ကြည့်လိုက်တော့ ကြောက်ရွံ့နေသော ဆူဆန်အားတွေ့ရသည်။ ဆူဆန်သည် စတီဗင်အား အသည်းအသန်ဖက်တွယ်ထားကာ မျက်ရည်များကျနေပါ၏။ စတီဗင်ကလည်း ဆူဆန်အား နှစ်သိမ့်ပေးနေသည်။
"ဘာဖြစ်လို့လဲ။ အချစ်လေး.."

ဆူဆန်သည် တုန်တုန်ယင်ယင်ဖြင့် သူမ၏အောက်ပိုင်းသို့ လက်ညိုးထိုးပြသည်။ သူတို့လည်း လက်ညှိုးညွှန်ရာကို ကြည့်လိုက်တော့ ဆူဆန်၏ဒေါက်ဖိနပ်ပေါ်တွင် အိမ်မြှောင်တစ်ကောင်ရှိနေတာကို တွေ့လိုက်ရသည်။ အိမ်မြှောင်သည် ဆူဆန်၏ခြေထောက်ပေါ်တွင် လှုပ်ယွနေပါ၏။ ဆူဆန်သည် မျက်လုံးမှိတ်ကာ တုန်တုန်ယင်ယင် ပြောလာသည်။
"စတိဗ့်.. အိမ်မြှောင်ကို မြန်မြန်ဖယ်ပေးပါ..ဟင့်.."
ပြောရင်းဖြင့် စတီဗင်၏လက်မောင်းအား ဖျစ်ညှစ်ထားသေးသည်။

စတီဗင်သည် ကယ်လ်ဗင်အား ကြည့်ကာ ခေါင်းငြိမ့်ပြလာသည်။ ကယ်လ်ဗင်သည် ဆူဆန်နားသို့ သွားကာ အိမ်မြှောင်အား လက်ချောင်းလေးများဖြင့်ယူလိုက်ရင်း အဝေးသို့လွှင့်ပစ်သည်။ ထိုအခါမှ စတီဗင်သည် ဆူဆန်၏ခေါင်းအား ပွတ်သပ်ပေးနေရင်းမှ ဆူဆန်၏နှဖူးပြင်အား ခပ်ဖွဖွအနမ်းခြွေကာ ပြောသည်။
"မရှိတော့ဘူးနော်။ မင်းလေးကြောက်တဲ့အကောင်မရှိတော့ဘူး။"

ဆူဆန်သည် မျက်လုံးဖြေးဖြေးချင်းဖွင့်လာလျက် သူမ၏ခြေထောက်အား မဝံ့မရဲကြည့်သည်။ အိမ်မြှောင်မရှိတော့တာ သေချာမှ သူမသည် စတီဗင်၏ရင်ခွင်ထဲမှ ထွက်ကာ သူမ၏မျက်ရည်များကို ခပ်ကြမ်းကြမ်းသုတ်ပစ်လိုက်သည်။ သူမသည် ငိုယိုထားသော်ငြားလည်း သူမ၏မျက်နှာပေါ်ရှိ မိတ်ကပ်များကတော့ မပျက်ယွင်းသွားပေ။ သူမသည် လှနေဆဲဖြစ်လေသည်။

ဆူဆန်သည် သူမ၏ခြေထောက်နားတွင် ကျနေသော သူမ၏ဖုန်းအား ပြန်ကောက်လိုက်သည်။ အခုနက အိမ်မြှောင်ကြောင့် သူမလန့်သွားကာ သူမလက်ထဲက ဖုန်းကို လွှတ်ချလိုက်မိသည်လေ။ သူမသည် တံတွေးမျိုချလိုက်ကာ ဖုန်းမျက်နှာပြင်အား ကြည့်မိတော့ သူမမျက်လုံးပြူးသွားရသည်။ အဘယ့်ကြောင့်ဆိုသော် သူမသွင်းထားသည့် ဂိမ်းအားဖွင့်သည့် ခလုတ်ကို သူမနှိပ်မိသွားလေပြီ။ ကြည့်ရတာ အခုနက သူမ ထိုခလုတ်အား မတော်တဆနှိပ်မိလိုက်ခြင်း ဖြစ်ရမည်။