Adventure of Demon Lord [ VILLAIN GOD SYSTEM ]

Arc_4[The Cursed Emperor](ဧကရာဇ်ဂျယ်ဟွမ်)

!unicode!

အချိန်အားဖြင့် မနက်ခင်းနေမထွက်ခင် တစ်နာရီအလို၊ ဂျူဆွန်းတိုင်းပြည်၏နန်းတော်၊ ဘုရင့်နန်းဆောင်အတွင်းတွင် အိပ်မောကျလျက်ရှိသောယောက်ျားသားတစ်ဦးရှိ၏။

ထိုယောက်ျားသည် ရင်ဘတ်ထိစောင်ခြုံလျက်သားဖြင့် ပက်လက်အိပ်နေကာ သေသပ်ပိရိသောမျက်ခုံးနှစ်ဖက်မှာတွန့်ခေါက်လျက်ရှိပြီး ခပ်မြင့်မြင့်ထုံးနှောင်ထားသောဆံထုံးမှာလည်း အနည်းငယ်ရှုပ်ပွလျက်ရှိသည်။

ထိုသူသည် ကြင်အင်လက္ခဏာမှာ အလွန်ပင်ခန့်ညားလွန်းလှကာ ပျားရည်ရောင်အသားအရည်၊ နှာခေါင်းချွန်ချွန်နှင့် ထူအမ်းအမ်းနှုတ်ခမ်းတို့မှာ ထိုယောက်ျား၏ရုပ်ရည်အား အားဖြည့်ပေးနေသည်။

ရုတ်ခြည်းပင်၊ ထိုယောက်ျား၏ခန္ဓာကိုယ်မှာ ဆတ်ခနဲလှုပ်ခါသွားပြီး မျက်ဝန်းများရုတ်တရက်ပွင့်လာကာ သွေးနီရောင်မျက်ဝန်းတို့ဖျတ်ခနဲလက်သွားပြီးနောက်တွင် အညိုရောင်မျက်ဆံအဖြစ်ပြန်ပြောင်းသွားခဲ့သည်။

ထိုယောက်ျားသည် သူ၏ခေါင်းကိုလက်တစ်ဖက်ဖြင့်ကိုင်ကာ ထထိုင်လိုက်၏။ ထို့နောက်တွင် အခန်းတစ်ဝိုက်ကိုဝေ့ဝဲကြည့်လိုက်ပြီး ပြတ်သားသောနှုတ်ခမ်းတို့မှာအနည်းငယ်လှုပ်ခတ်သွားကာ သြရှရှအသံထွက်ပေါ်လာခဲ့သည်။
"ငါ့ကိုနောက်တစ်ကမ္ဘာကို ချက်ချင်းပို့လိုက်တာလား။"

သူ့စကားအဆုံးတွင် သူ၏နံဘေးထက်၌ အရိုးခေါင်းပုံရိပ်တစ်ခုမှုန်ဝါးဝါးပေါ်လာကာ ထိုအရိုးခေါင်း၏ပါးစပ်လှုပ်သွားပြီး လူသားတစ်ဦးကဲ့သို့အလွန်အသက်ဝင်လှသော အသံတစ်ခုထွက်လာသည်။
[ အမ်း။ ဟိုကမ္ဘာကမင်းကိုဖျက်ဆီးဖို့ကပ်သီးလေးပဲလိုတော့တာ။ အဲ့ဒါကြောင့် မင်းကိုအဲ့ကမ္ဘာကနေအမြန်ထုတ်ဖို့ ဒီကမ္ဘာကိုချက်ချင်းပို့လိုက်ရတာပဲ။ ]
စက်ရုပ်သံလိုလိုအသံကပြန်ဖြေသည်။

ထိုသူကား ရှောင်ဂျင်ဖြစ်ပေ၏။ ရှောင်ဂျင်သည် အရင်ကမ္ဘာပျက်စီးခါနီးတွင် စနစ်၏အားထုတ်ကြိုးပမ်းမှုအရ ပွတ်ကာသီကာလွတ်သွားခဲ့ပြီး ယခုအိပ်စက်နေသောယောက်ျား၏ကိုယ်ထဲသို့ အလျင်စလိုကူးပြောင်းလာခဲ့ခြင်းပင်ဖြစ်သည်။