Adventure of Demon Lord [ VILLAIN GOD SYSTEM ]

Arc_2.9

ဂျိုးဆက်ဖ်သည် အခန်းပတ်လည်ကို ကြည့်နေရင်းဖြင့် ထွက်ပေါက်ရှာနေသည်။ သူတို့ရောက်နေသောအခန်းမှာ နံရံရော၊ မျက်နှာကျက်ကအစ တဖိတ်ဖိတ်တောက်ပနေသော အနီရောင်များဖြင့် ဆေးခြယ်ထားသည်။ တံခါးပေါက်တော့မရှိ။ ဒါပေမယ့် တစ်နေရာသို့အရောက်မှာ ဂျိူးဆက်ဖ်၏အကြည့်တို့ ရပ်တန့်သွားရသည်။

ဂျိုးဆက်ဖ်ဟာ အနီရောင်မွေ့ယာကြီးနှင့်မျက်နှာချင်းဆိုင်တွင်ရှိသော မှန်တစ်ချပ်ကို သေချာကြည့်နေသည်။ ဂျိုးဆက်ဖ်တစ်ယောက် မသက်ာဖြစ်မိတာတော့အမှန်။ မှန်၏အနံမှာ လူတစ်ယောက်စာအရှည်ရှိပြီး ၎င်းအား အနီရောင်အဝတ်စတစ်ခုဖြင့် အတိဖုံးလွှမ်းထားသည်။

ဂျိုးဆက်ဖ် ထိုမှန်ဆီသို့လျှောက်သွားလိုက်သည်။ လန်ဒရီကတော့ နံရံတွေကို စီစစ်နေသည်။ ဂျိုးဆက်ဖ် ထိုမှန်ကိုဖုံးထားတဲ့အဝတ်ကို အစွန်းကနေဆွဲလိုက်ကာ ဖယ်ချလိုက်တော့ အဝတ်မှာ ကြမ်းပြင်ပေါ်သို့ပုံလျက်သားလေးကျသွားရသည်။ မှန်ချပ်မှာ အတော်လေးထူးဆန်းသည်။ အမှန်တကယ်ဆို ပုံမှန် မှန်ကိုကြည့်လိုက်လျှင် ကြည့်သူ၏ပုံရိပ်နှင့်၎င်းနှင့်မျက်နှာချင်းဆိုင်ရှိ အရာဝတ္ထုများကို မြင်တွေ့ရမည်ဖြစ်သည်။
သို့သော်ယခုတွင်မူ မှန်မျက်နှာပြင်တွင် ဗလာနတ္ထိပင်။ မည်သည့်အရာမှမတွေ့ရ။ မှန်ဟာ ဗြောင်သက်သက်ကြီးဖြစ်နေသည်။

ဂျိုးဆက်ဖ်မျက်လုံးများမှေးကျဥ်းလိုက်သည်။ ယခုတွင် ဂျိုးဆက်ဖ်ဟာ မှန်နှင့်သုံးပေအကွာတွင်ရှိနေသည်။ အသေအချာကြည့်ရှုရန်အတွက် အရှေ့ကိုတိုးရင်းတိုးရင်းဖြင့် မှန်နှင့်တစ်လက်မသာ ကွာဝေးတော့သည်။

ဂျိုးဆက်ဖ်မျက်တောင်မခတ်ပဲနှင့် မှန်ကိုသာစိုက်ကြည့်နေသည်။

တစ်စက္ကန့်..

နှစ်စက္ကန့်..

သုံးစက္ကန့်..

"ဝုန်း"ဆိုသည့်မြည်သံနှင့်အတူ ခရမ်းရောင်သမ်းကာ လောက်ကောင်များပင် စုဝေးနေသော လက်မောင်းထိရှိသော လက်တစ်ဖက်ဟာ မှန်အထဲကနေ အားဖြင့်တွန်းလိုက်သည်။
ထို့နောက်တွင်တော့ နောက်လက်တစ်ဖက်ပေါ်လာကာ ၎င်း၏လက်သည်းများဖြင့် မှန်ကိုကုတ်ခြစ်နေသည်။ ၎င်း၏အင်အားမှာ သာမန်မဟုတ်မှန်း၊ မှန်ပေါ်ရှိ အက်ကွဲကြောင်းများကို ကြည့်လျှင်သိနိုင်သည်။