Adventure of Demon Lord [ VILLAIN GOD SYSTEM ]

Arc_1 [Doctor France] (ဒေါက်တာဖရန့်စ်)

#Unicode

ရှောင်ဂျင် သူ့ရဲ့မှိတ်ထားတဲ့ မျက်လုံးတွေကို မဖွင့်ခင်မှာပဲ သူ ခံစားလိုက်ရတာက သူ့ဆီကို တစ်စုံတစ်ခုက လျင်မြန်တဲ့အရှိန်နဲ့ ပြေးလာနေတာပင်။ သူ့မသိစိတ်ရဲ့ လှုံ့ဆော်ချက်အရ ဘေးကို လှိမ့်ပြီး ရှောင်လိုက်မိသည်။

သူ့ရဲ့ မျက်လုံးတွေကို ဖွင့်ပြီး ခုနက သူရပ်နေခဲ့တဲ့ နေရာလို့ ထင်ရတဲ့ နေရာကို ကြည့်လိုက်တော့ လူတစ်ယောက်ကိုတွေ့သည်။ ထိုလူက ခုနက ရှောင်ဂျင်ရပ်နေခဲ့တဲ့ နေရာကို သည်းကြီးမဲကြီး ကုတ်ဖဲ့နေသည်။ နောက်တော့ တစ်ခုခုကို သိသွားသလိုနဲ့ ရှောင်ဂျင်အခု ရပ်နေတဲ့ နေရာကို လှည့်ကြည့်လာသည်။ ထိုလူက အတော်ပင် စက်ဆုပ်စရာကောင်းလှသည်။ ထိုလူ့ရဲ့ မျက်လုံးတွေက အဖြူရောင်တွေပဲ ရှိပြီး ပါးစပ်ကနေလဲ သရေတွေ စီးကျနေသည်။ ထိုလူဝတ်ထားတဲ့ ဂျူတီကုတ်နဲ့ ဘောင်းဘီမှာလဲ ပြဲရဲနေပြီးတော့ သွေးတွေနဲ့ စိုရွှဲနေသည်။ ထိုလူက ​ရှောင်ဂျင်ရှိရာဘက်ကို ကြည့်နေပေမယ့် ရှောင်ဂျင့်ကို မြင်ပုံမရပေ။ နှာခေါင်းတရှုံ့ရှုံ့လုပ်ကာ အနံ့လိုက်ခံနေသည်။ နောက်တော့ အနံ့တစ်ခုခု ရသွားပုံရပြီး ရှောင့်ဂျင့်ဆီကို လေးဘက်ထောက်ပြီး ပြေးလာသည်။

[သူ့သရေတွေနဲ့ မထိမိစေနဲ့... မဟုတ်ရင် ဘာမှမလုပ်ရသေးပဲနဲ့ မင်းပဲသေလိမ့်မယ်]

System၏ အသံပင် ဖြစ်လေသည်။ ရှောင်ဂျင်လဲ ထိုအသံကို ဂရုစိုက်မနေပဲ အောက်မှာ ဘာရှိသလဲ ကြည့်နေတုန်းမှာ အောက်မှာကျနေတဲ့ ဆေးထိုးအပ်တစ်ခုကို တွေ့လိုက်ရသည်။ သူလဲ ဆေးထိုးအပ်ကို မြန်မြန်ကောက်ပြီး အရှေ့ကို မော့ကြည့်လိုက်စဥ်မှာပဲ ထိုလေးဘက်ထောက်ပြေးလာတဲ့ လူက သူနဲ့ အတော်လေး နီးကပ်လာနေပြီ ဖြစ်သည်။ ရှောင်ဂျင်လဲ ထိုလူ သူ့ကို ခုန်အုပ်မယ့်အချိန်ကို စောင့်နေလိုက်သည်။ ထိုလူ သူ့ရဲ့ အနီးကပ်ဆုံးကို ရောက်လာပြီး ခုန်အုပ်လိုက်စဥ်မှာပဲ ရှောင်ဂျင် ဘေးကို ရှောင်လိုက်ကာ ထိုလူ့ရဲ့ လည်ပင်းကို ဆေးထိုးအပ်နဲ့ ထိုးလိုက်သည်။ ထိုလူက သူ့လည်ပင်း သူကိုင်ကာ ဆန့်ငင်ဆန့်ငင်ဖြစ်နေပြီး နောက်ဆုံးမှာတော့ ငြိမ်သက်သွားသည်။ ရှောင်ဂျင်က ထိုလူရဲ့ လည်ပင်းမှာရှိတဲ့ သွေးလွှတ်ကြောကို ဆေးထိုးအပ်နဲ့ ထိုးစိုက်လိုက်တာဖြစ်သည်။ တကယ်ပင် ထိုဆေးထိုးအပ်ထဲတွင် ဘာပါသလဲဆိုတာကိုပင် မသိလိုက်ပေ။