Adventure of Demon Lord [ VILLAIN GOD SYSTEM ]

Arc_3(Extra)

!unicode!

လူသူကင်းမဲ့ကာတိတ်ဆိတ်လျက်ရှိသော အဝေးပြေးလမ်းမထက်တွင် ကားသုံးစီးသည် လျင်မြန်သောအရှိန်ဖြင့်ရွေ့လျားလျက်ရှိသည်။ အရှေ့ဆုံးနှင့် နောက်ဆုံးတွင်ရှိနေသော ကားများမှာ ရဲကားအသေးစားလေးများဖြစ်ပြီး အလယ်ရှိကားမှာတော့ တရားခံကိုသယ်ဆောင်လာသော ကားဖြစ်ပေသည်။

ကားထဲရှိရဲသားနှစ်ဦးကြားတွင် လက်ထိပ်ခတ်ခံထားရသော ယောက်ျားတစ်ယောက်သည် ခေါင်းငိုက်စိုက်ကျကာ မှိုင်တွေလျက်ရှိသည်။ ထိုသူ၏မျက်နှာထားမှာ အလွန်တရာပူဆွေးသောကရောက်နေဟန်ရှိပြီး ရွှေအိုရောင်ဆံပင်ဘုတ်သိုက်နှင့် မျက်တွင်းချိုင့်ကာ မုတ်ဆိတ်မွှေးရေးတေးတေးပေါက်နေသော မျက်နှာကား သူ၏ချောမောမှုကိုရုပ်ဖျက်ထားလျက်ရှိသည်။ သူသည် ကားအောက်ခြေကို မှင်သေသေကြည့်နေရင်းဖြင့် သူ၏လက်ဆီအကြည့်ရောက်သွားကာ လက်ကောက်ဝတ်တွင်ပတ်ထားသောကျစ်ကြိုးလေးကို ကြည့်လိုက်မိပြီး လက်နှင့်ခပ်ဖွဖွပွတ်သပ်ကာ သက်ပြင်းချမိသည်။
'မင်းအဆင်ပြေရဲ့လား...သောမတ်စ်...'

ထိုသူကား ရိုလန်တိုင်ဒါ၏ကောင်းမှုကြောင့် သေဒဏ်ကျခံရတော့မည့်ရစ်ချက်ဆမ်ဖြစ်ပေသည်။ ယခုအချိန်တွင် ရစ်ချက်ဆမ်ဟာ သူ့အားကြိုးပေးမည့်နေရာဆီသို့သွားနေရခြင်းဖြစ်သည်။
ရစ်ချက်ဆမ်မသေချင်သေးပေ။ သူ့၌ နောက်ဆံတင်းရမည့်လုပ်စရာများမရှိသော်လည်း သူတစ်စုံတစ်ယောက်ကိုစိတ်မချနိုင်သေးပါ။

သောမတ်စ်....

သူ့ရဲ့ပထမဆုံးနဲ့နောက်ဆုံးသောသူငယ်ချင်း...

သူ့ဘဝမှာအရင်းနှီးဆုံးနဲ့ အကောင်းဆုံးသူငယ်ချင်း....

သောမတ်စ်ဟာ သူလိုအပ်တဲ့အချိန်တိုင်း သူ့ဘေးတွင်အမြဲရှိနေပေးခဲ့သည်။ အခြားသူ၏အမြင်တွင် သူသည် သောမတ်စ်ကိုခိုင်းစားသည့်ပုံပေါ်နေပေမဲ့ သူ့စိတ်ထဲတွင် ထိုသို့မတွေးမှန်း သောမတ်စ်သိမည်ဟု မျှော်လင့်မိသည်။ သူက တကယ်တော့ စိတ်ခံစားချက်ကိုထုတ်ဖော်ပြတတ်သည့်လူစားမျိုးမဟုတ်ခဲ့ရုံပါ။

သောမတ်စ်နှင့်ပထမဆုံးအကြိမ်စတွေ့သည့်အချိန်ကို ရစ်ချက်ပြန်အမှတ်ရမိသည်။