Every Cloud Has a Silver Lining

developing feelings

ဘတ်ခ်ဟျွန်းဘဝမှာ သူ့ဘက်ကစပြီး လူတစ်ယောက်ကို နှစ်ကြိမ်ဖွင့်ပြောဖြစ်ခဲ့သည်။ နှစ်တွေအများကြီးရင်းထားတဲ့ခံစားချက်တစ်ခုကို သတ္တိကြောင်ပြီး မိနစ်ပိုင်းအတွင်းမစွန့်လွှတ်ပစ်လိုက်နိုင်လို့ဖြစ်သည်။

ချန်းယောလ်က အရင်ကနဲ့မတူဘဲအေးစက်သွားတာ‌ကိုတော့ နာကျင်ရပေမဲ့၊ မျှော်လင့်ချက်‌မျှင်မျှင်လေးကိုဖြတ်မပစ်ချင်ပေမဲ့ ချန်းယောလ်ဘက်က သူ့ကိုအခွင့်အရေးပေးလာသည်။ ခေါင်းညိတ်ပြလာတာနဲ့ သူ့လက်ထဲက တစ်ခုတည်းသော diary စာအုပ်လေးကို ဘတ်ခ်ဟျွန်းခွင့်ပြုချက်မ‌တောင်းဘဲဆွဲလုပြီး အိမ်အထိ သယ်လာခဲ့သည်။

ဘတ်ခ်ဟျွန်းကံက ကောင်းတစ်ဝက်၊ ဆိုးတစ်ဝက်။ အခုလက်ရှိလုပ်နေတဲ့ Club project ကအခုထိကိုမပြီးပြတ်နိုင်သေးတဲ့အပြင် နေ့ရက်တိုင်းနီးပါးက အလုပ်နဲ့မျက်နှာအပ်နေရသည်။ တက္ကသိုလ်တက်ရတဲ့အချိန်‌တွေတုန်းကလို နှစ်ယောက်လုံးအတွက် သီးသန့်အချိန်တွေပိုလျှံမနေတော့ဘူး။

Sat & Sun ကတော့အားတာကြောင့် တစ်ပတ်မှာနှစ်ရက်အပြည့်အဝအချိန်ရပြီး ကျန်တဲ့နေ့တွေကတော့ ညနေပိုင်းတွေမှာ ချန်းယောလ်အိမ်ဆီသွားသွားတွေ့ရသည်။

သူကအလိုက်တသိလည်းလာမခေါ်လို့ ဘတ်ခ်ဟျွန်းဘက်ကပဲတကူးတက အချစ်ရှိရာအိမ်ဆီကား‌လေးနဲ့ ဆိုက်ဆိုက်မြိုက်မြိုက်သွားခေါ်ရသည်။ သူ့အိမ်ကလူတွေကရိပ်မိနေလောက်ပေမဲ့ ဘတ်ခ်ဟျွန်းကတော့ခြံပြင်က လမ်းမီးတိုင်အောက်မှာပဲရပ်စောင့်တတ်သည်။

တွဲကြည့်မယ်ဆိုပြီး ငါ့အသည်းက relationship တစ်ခုရဲ့အခြေခံအချက်တွေတောင်နားမလည်ဘူးပဲ။ ဖုန်းလည်းဒီဘက်ကပဲဆက်ရတယ်..... ဟင်း..

အရင်က ချန်းယောလ်အပေါ် အနိုင်ယူမိသမျှဝဋ်လည်သလားပဲ။

ဒါပေမဲ့ နည်းနည်းလေးတောင် မငြိုငြင်ပါဘူး။ အရေးကြီးတာ သူ့မျက်နှာလေးကို နေ့တိုင်း မြင်နေ၊ တွေ့နေရရဖို့နဲ့ သူ့အနီးအနားမှာရှိရဖို့ပဲ။

အိမ်ကမိသားစုတွေက မမြင်ရတာကြာပြီဖြစ်တဲ့ ဘတ်ခ်ဟျွန်းရဲ့ တက်တက်ကြွကြွဖြစ်နေတဲ့ပုံရိပ်ကြောင့် အခုမှစိတ်ချမ်းသာနေရသည်။ အရင်နှစ်တွေကဆို မျက်နှာလေးကလန်းဆန်းမှုမရှိဘဲ မှိုင်တွေငေးမောလို့....