ولدتني مجرمة

الثالثه والعشرون

#ولدتني_مجرمة
الحلقه :الثالثه والعشرون
بقلم :فاطمه سالم الورفلي
........................................
....
واما بعد.. بعد حروب والكراهيه الازلية.. و تخطيطات الغير عاديه.. والهروب ورد الانتقام.. وبدا التاريخ يعيد نفسه بسبب مشاعر الكره.. ماذا سيحدث؟.. والي اين يصل بهم الحال؟.. ومن يكون ضحيه القرار!؟.. او بلاصح قراراتهم وافعالهم.. هل الضحيه هم الابناء ام هم؟.. ها قد اقتربنا من اجابة هذه الاسئله.. وربما تنتهي هذه المهزلة.. والحرب التي تقرع طبولها منذ سنين.. لنذهب معا.. ونعرف الى اين وصل بهم الحال والاحوال.. واين ذهبو.. من هذه الديار!؟
.........
عند هيام :
مشاعري مضطربة.. خليط بين الحزن والكره.. والحب.. نعترف ان حبيت بن يزيد لحبه واهتمامه بيا فقط لاغير.. نعترف انه ما حبيتاش هو.. لشخصيته لقلبه لروحه.. نعترف ان حبيته لشكله قبل كل شي.. حبيته للظاهر قبل الداخل.. او ليس الداخل.. نعترف اشد الاعتراف ان كنت او " ربما لازلت انانيه".. لكن ما نقدرش نمنع نفسي واني قاعده نشوف في بن يزيد متزوج غيري.. وان اني نخدعت فيه.. يمكن نيتي ولت عليا.. لان الحقيقه هلبا بنات عشمتهن بسبب بن يزيد .. ساعدته وعشمتهن فيه.. هدا كله باش نقربه مني ويكون تحت نظري .. ما توقعتش ابدا ونهائيا ان في يوم من الايام.. من الضحايا يتزوج بن يزيد.. او يتزوج بنت اقل جمال مني.. وجمالها تحت من العادي حتى.. اشياء صارت صدمتني تماما.. اما مهيب وما ادراك من مهيب؟.. مهيب زاد كرهي لي بن يزيد وخصوصا ميار   .. كل لحظه ننهان فيها سوى منه او من امه.. يزيد حقدي على  ميار  .. يزيد ويزيد لدرجه في يوم من الايام.. كنت نغسل في الماعين.. وتاعبه ومريضه.. منهكه تماماا.. فجأة خش خدي طاسه.. وعباها مايه وحطها على الرخامه.. خزرني بعيونه من فوق للوطا.. وضحك بهزوه.. وقال

مهيب : مش عارف اني كيف تزوجت وحده هك  "سكت شوي وقعد يشبحلي .. ضحك بهمهمة وقال ".. اصلا احسن حاجه  دارها بن يزيد تزوج غيرك.. المشكله حصلت فيك اني

-شوي سمعت صوت امه تنادي

ام مهيب :مهيب يا مهيب وينك

مهيب :ااني هنا هنا يام في الكوجينه

-شوي وسمعت خطوات تتقدم  . وجت ام مهيب  

ام مهيب بضحكه :اهاا انت اهني؟.. مع الخدامه

مهيب ضحك:ههه ايي

-كلامهم قتلنيي.. زعزعني.. غمضت عيوني.. وخديت نفس بعممق.. اضطريت بلعاني ان نقعد في الكوجينه لعنند يرقدوو.. وكل واحد خش لي داره.. وبشرى وبسمه اول ما تعشو رقدو.. نشفت ايديا بالمنشف.. وصكرت الشيشمه.. وبدون ايي تفكير.. رفعت راسي.. قابلني موس لحم حااد مسنون.. ماليشي اسبوعين بس كيف مسننه مهيب عشان عيد الاضحى.. خديته.. وطلعت من الكوجينه وصوابعي يرعشو.. ونتنفس بقوه.. لين جسمي ينتهض ويرتخى من التوتر.. خشيت دار ام مهيب.. على روس صوابعي.. وعيون مرتكزات عليها.. وجايه عليها بهرة ضي الحمام.. واني خطوه وراء خطوه . . وكل خطوه تحمل ذكرى .. وكل الـخطوات.. وكل الذكريـات.. مافيش منهن الذكريات.. ولا ذكرى.. ولا ذكرى وحده على اقل تغفر لها.. ولا كلمه ولا موقف.. ولا نظرة ليها عليا.." حلوه".. ديما مستهينه بيا.. تستهزى عليا.. واذا جو جيران تعاير فيا بي يا ام البنات يا شقاي ومشقاي لعند الممات.. وديما اطلع فيا المذنبة.. لي ما ننفعش.. لي مش كويسه.. وديما تختلق في المشاكل لدرجه خلت مهيب يمد ايده عليا وهي معاه تضرب فيا.. تعبتنييي.. مالقيتش روحي الا واني دموعي على خدي.. وغارسه الموس في رقبتها.. وهي عيونها مفتوحات وتستنجد.. اي للاسف غرسته غررسته وقتلتها.. وما اكتفيتش لعند هكي وبس.. شديتها.. وفتحت الحمام وحطيتها.. و خليتها غارقه في دمها.. ولبستلها شبشب حمام.. وطيحت السياقه والمكنسه ... خطيت بؤره الدم.. برجلي وخديت الموس جرحت روحي خدوش بسيطه .. ونظفته وخديت شرشف السرير لان تلبز بالدم.. وغسلته في الكوجينه.. ونشرته
.. وبعد هك مشيت لي دار ام مهيب كسرت الروشن وفتحته.. وبديت نعيط.. بعد خفيت كل الادلة.. وبعد جهزت الكذبه لي بنقولها.. وبديت نعيط ودموعي على خدي لي من عمايلها.. ودرتهن دموعي حزني على قتلها.. وبديت نصرخ بي كل ما اوتيت من قوه صوت.. لعند تلمدو الجيران والناس ومهيب وصغاري..

مهيب منصدم ويرعش مع بعضه :ه.. هد   .. هدا ششش.. شنوو ك.. كييف

هيام نخبط في روحي :هدا كله منك منك انت ياما قتلك سيب القضايا والشرطه.. وياما هددونا.. وتوا قريب قتلوني كله منكك

-ومن هديكا الساعه بدا كل ما مهيب يغيب عن حوش يرفعنا لشقه هديكا.. وبدا متخوف.. لدرجه خش على تهريب على اساس يبي يعرف من قتل امه هه.. شرطي على  الفاضي..
.........................
-حولت القلم من يدي.. ونشوف لمذكرتي لي  مليانه احرف من اعترافي ان اني مجرمه..وللاسف اعترف ان اني ام مجرمة ساحرة.. ودموعي على  خدي.. شوي سمعت صوت بسمه جنبي.. التفتلها..

بسمه :ماما وين بشرى؟

-ابتسمت ابتسامه باهته.. متناقضه لدموعي.. وملامحي الحزينه.. وروحي المخدوعه المهانه.. وقلبي لي يفتقر من المشاعر.. والامل..

بسمه مستغربه :ماما؟

هيام تنهدت تنهيده من وسط خاطري قتلها :عندك مصحف؟

بسمه :اي عادي في شنطتي

هيام :جيبيه

-مشت بسمه تجري.. وما هي الا لحظات وجت في يدها المصحف.. مدتهلي.. خديته منها بدون ما نرد على سؤالها السابق   .. فتحته برهبه.. ولهفه.. وشعور مزلزلني.. بلعت ريقي.. وفتحته على سوره الفاتحه.. وسميت بسم الله بخشوع.. وبديت نبكي ونقرا.. نبكي ونقرا.. لين عيوني يضببو وما نشوفش في الحروف.. نعصر عيوني.. ونرجع نقرا .. و نبكي خصوصا لما قريت "{ قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ * وَأَنِيبُوا إِلَى رَبِّكُمْ وَأَسْلِمُوا لَهُ مِنْ قَبْلِ أَنْ يَأْتِيَكُمُ الْعَذَابُ ثُمَّ لَا تُنْصَرُونَ * وَاتَّبِعُوا أَحْسَنَ مَا أُنْزِلَ إِلَيْكُمْ مِنْ رَبِّكُمْ مِنْ قَبْلِ أَنْ يَأْتِيَكُمُ الْعَذَابُ بَغْتَةً وَأَنْتُمْ لَا تَشْعُرُونَ } [الزمر 53-55]   ....
صدق الله العظيم
......
-ما نوصفلكمش قداش ارتحت لما قلتها قداش وقداش وقداش.. قداش كنت منعميه على عيوني.. قداش كنت تايهة في حياتي.. قداش مشتااقه لشعور الراحه لي اني فيه توا.. وقطع عليا صوت تقربيع باب و.... يتبع
............................................................................
بارت مخصص لهيام.. وبارت الجاي لي هو مقابل الاخير مخصص لمهيب.. حبيت نخصص بارتين ليهم عشان هم سبب كل شي.. فا حبيت نحكي عليهم بتفصيل ❤.. باش تعيشو كل لحظات قاربنا على الانتهاء هي حبايبي رايكم وتوقعاتكم وتفاعلوو❤
#فاطمه_سالم_الورفلي