ولدتني مجرمة

خامس عشر

#ولدتني_مجرمة
الحلقه :الخامسه عشر
بقلم :فاطمه سالم الورفلي
......................................
....
حقيقي تعبت وملّيت من كوني الشخص اللى ديما يعطي ويفكر أكتر؛ انا اللي نسأل أكتر ونصالح الأول وأهتم أكتر وأقدّر الظروف، ونهتم لتفاصيل..بسس بجد إحساس مش حلو بكل لما تحس فى كُل عِلاقاتك إنّك مُستغل من الطرف التاني وكإنك إتخلقت في الدُنيا  عشان بس تطي أكتر ما تاخُد.. اكتر حتى من طاقتك.. واكتر من الممكن لي انت مش لاقيه اصلا.. وحتى شبه من لي تعطي فيه حتى..
.........................
-هو المفروض توا اني جنب امي.. ونوريلهم في درجاتي هي وبوي واختي.. مرتاحين متونسين ببعضنا.. حنينين في بعضنا.. عيلة وحده مع بعضنا.. لكن هيهات تأتي الرياح بما لا تشتهي السفن   .. تعالو نحكيلكم شن لي صار..
...................................
عندي اني :
بسمه :بشرى بشرى اسمعي

اني نرعش مع بعضي :ها شن صار؟

بسمه:الراجل قعد يعارك وطلع.. وعمو بن يزيد عمو ولا قعد زعلان وطايرتله

اني شديتها من كتفها:بااهي تعالي اهني.. خشي معاش تطلعي

بسمه تعافر فيا :مانيش مانيش بنمشي

اني :قتلك لا توا هم زعلانين والجو متكهرب.. اسمعي الكلام خلاص هي كلمه

بسمه بدت تنقز وتقرز :مانيش مانيش نبي نمشي اني نبييي

اني:اسسس خلاص عاد باش تفهمي انتي.. خشي ارقدي في فراشك خلاص

بسمه تخبط في الوطا برجليها وتأفف :معاش تكلميني

اني :مش وقتك بسمه.. اسمعي الكلام واسكتي

...............
....
عند عمتي ميار:

-حال عقلي يقول "حي عليا زعما شن صاير؟.. يستر الله.. هدا طلع الولد حسه اصكر الباب!.. خلي نمشي لي بن يزيد نفهم منه ".. نضت من على الكرسي .. نمشي بشوي شوي.. وعقلي ياخد ويجيب.. لين وصلت فم المربوعه.. ولقيت بن يزيد يرعش

اني لقيت مالقي قدامي طول خديته وبزعت على بن يزيد :بسم الله بسم  الله.. يا حاج يا حاج.. نوض.. بسم الله شن صارلك يالطيف اللطف!

بن يزيد:اقري عليا اقري .. اقري عليا القران

-قربت منه وحطيت ايدي على راسه وبديت نقرا في سورة الفاتحه  .... واية الكرسي والمعودتين..

ميار :اشرب مايه اشرب بن يزيد..

-خدي مني المالقي وبدا يشرب تقول كان في الصحراء   .. والتفت شبحلي..

بن يزيد:تعرفي البنت بشرى.. قريب ضاعت البنت قرييب ضاعت.. الحمدالله يارب الحمدالله افتكت منه

ميار استغربت :ليش خيره؟.. شن في!؟..

بن يزيد تنهد: كان ناوي يدير فيها لي ما يندارش.. ويجرها لطريق الشعوذة.. هدا كله باش هو يسيبه الاشهب.. اخخ تخيلي طلب مني نساعده ويرشيني فلوس..