ولدتني مجرمة

الثانية والعشرون

#ولدتني_مجرمة
الحلقه :الثانية والعشرون
بقلم :فاطمه سالم الورفلي
.....................................
....
عند داير الليل:
ركب الاصنصير.. ودار رقم صفر.. ودقات قلبه يتسارعو.. وهوب شوي وانفتح الاصنصير.. وطلع من باب الخلفي يجري طول طلع مفتاحه من جيبه.. فتح السياره.. ومد ايده فتح الباب.. وركب  .. وهو ركب.. وبدو رجالة الشرطه يجارو.. وحاصرو الفندق.. اما هو اكتفى انه يولع السياره.. وسخنت شوي.. ومشي..يلقط في انفاسه براحه.. وداهش من الجري والتوتر والخوف.. وطلع من البلاد.. ومشي لحوشه.. درس السياره.. ونزل منها.. وتوجه للمربوعه.. لقي بابها مردود.. فتحها.. ولقي بن يزيد كيف نايض يدخن..

بن يزيد شبحله:ها شن صار؟

داير الليل:مشيت تعرف في اخر لحظات.. لو تأخرت شوي بس ره كل اوراقك عند الشرطه وما عندك كيف ادير

بن يزيد:او وينهن الاوراق؟

داير الليل:في شنطه.. في السياره

بن يزيد:صحيت صحيت والله لولاك يا ياسين ما عارف كيف ندير

داير الليل:بلا جميل يا غالي.. غر اسمع بس وخود مني الكلام.. مكانك و وصلته اقعد هنا لعند تستقر البلاد.. والله خيرلك القضيه حي الله تقعد مفتوحه تلاته اربعه شهور.. وتصكر.. لان انت اول شي ما عندكش سوابق.. ثالت شي ما عليكش شي ثابت

بن يزيد:تي صعب انتم عيلة.. واحني .. صعب صعب نقعد هنا

داير الليل برفعه حاجب :تي عيب عليك؟.. تي شن احني قسمنا!.. لي بينا بيك.. وكان هي بكل نطلع اني والصغار ونخليك تاخد راحتك على اقل

بن يزيد:لالا لا تطلع لا سو خليك.. شن تقول انت..

داير الليل:خلاص مالا سلم خوي خليك هنا.. وتو نظملك الامور ما عليك

بن يزيد:منور يا غالي نردهلك في الافراح

....................................................................
....
عند ميار :
-خشيت للحوش.. وعيوني على بن يزيد.. خشيت ولقيت في الفم مراه ملامحها عاديه.. بس اناقتها تلفت النظر.. ونظافتها باينه عليها..

نجمه :اهلا اهلا تفضلي وخيتي الحوش حوشك

ميار ابتسمت تلقائيا :تسلمي حبيبتي هدا من دوقك

نجمه مدت ايدها :كيف حالك؟

ميار :حمدالله كيف حالك انتي

نجمه :لابدة انتي مرت بن يزيد صح؟

ميار :اي صح

نجمه :ايي مره واحني خاطمين شفتكم في السياره.. قال لي ياسين انتي مرته بن يزيد.. خشي تفضلي ارتاحي

ميار :زاد فضلك 

نجمه تتفحص فيا بعيونها:تعالي معاي.. خودي دوش نعطيك حوايج وارتاحي