ولدتني مجرمة

الثانية

#ولدتني_مجرمة
الحلقه :الثانيه
بقلم :فاطمه سالم الورفلي
......................................
....
يقول البقال: «الدم لا ينقلب ماء».. وتقول موظفة البريد مس همفيري: «صدقوني لا بد في الأمر سر خفي».
الشاهد الأخرس
للروائية أجاثا كريستي🖤🎹
........
-ويبقى السؤال هنا .. اذا ابي تخلى عني.. وامي سوف تكون الاسوء.. هل حقا هناك سر خفي ؟.. فماا هو! .. تعالو لنعرف جميعا
....
كركرنا الشناطي.. واحني نتراعشو.. والصقع يضرب فينا على سيقانا.. شوي امي طلعت المفتاح.. وفتحت الشقه ولقينا الشقه في حال يرثى له.. تراب.. والرواشن مفتوحه.. والريح من كل مكان.. وصقع صقع سمييطري..

ماما تفك في المفتاح من الباب :بسم الله.. هيا هيا خشن خلي نظفو اوفف تؤتؤ عليك صقع يالطييف

بسمة حاطة ايديها على فمها وتنفخ فيهن وترعش من الصقع :كح كح ماما تراب هلبا نخنقت

ماما :قلنا خشن هيا عاد بلا عناد

-اني حطيت ايدي على بسمه.. ودخلتها نسايس فيها..

ماما :بشرى خشي الحمام "حشاكم".. ولي تلقيه في الحمام جيبيه سوى سياقه صابون اللي هو هيا فيسع خفي روحك

اني :حاضر

ماما:خفي هيا

-مشيت للحمام " حشاكم ".. فتحته.. وسنوني يخبطن في بعض من الصقع ثلجتت.. خديت السياقه والصابون سايل.. و واركينه.. وطلعت بيهن..

ماما :هيا جيبي كروانه عبيها مايه

-وبالفعل جبت كروانه وعبيتها مايه.. وقعدت نبزع فيها.. وماما تكد في الزليز.. وبسمه تسيق.. واني حال عقلي يقول.. " مدرستي شن بيصير فيها؟.. باهي بابا كيف خلانا هكي بلا مصروف؟.. ولا عطي لي ماما!.. باهي كيف نقعدو بروحنا كيف يهنيه قلبه ويطاوعه!.." قعد عقلي ياخد ويجيب.. لعند ما كملنا تسييق.. وصكرنا الرواشن ولمعناهن.. وقعمزنا اني وبسمه.. على الفراش..

بسمه شبحتلي:بشرى!

اني حاطه ايدي على راسي ونفكر:همم

بسمه :بابا وين مشي؟

اني عجزت على الرد شن بنقوللها بس.. ونصدمت من سؤالها شبحتلها.. وبلعت ريقي: اا مشي لشغل

بسمه عينها دمعت :بنستااحشه بابا ❤

اني تنهدت.. وحضنتها:تو يجي مش ح يطول

-شوي طلعت ماما من الكوجينه.. شاده الصفرة .. وايديها حمر من الصقع.. وعيونها حمر الباين كانت تبكي..وخرت عن بسمه ونضتلها  ماما

اني :هاتي ماما ناخد عنك الصفرة

ماما مدتهلي.. وطول قعدت تنفخ في ايديها وترعش:وووه عليك صقع شنوو هدا

اني حطيت الصفرة :ان شاء الله غر في غطاوات

ماما :في في حاطه المرة لي فاتت.. هيا اشربو السحلب قبل ما يبرد