ولدتني مجرمة

الخامسه

#ولدتني_مجرمة
الحلقه :الخامسه
بقلم :فاطمه سالم الورفلي
........................................
..................
-قعدت عاقدده حواجبي.. ونبي نفتح عيوني.. نبي نعرف الشخص هدا منو!.. الصوت نعرفه.. بس منو؟.. منوو الشخص هدا.. قعدت نحاول ونحاول لعند فتحت عيوني.. بس قعدت نشبح في الدنيا مدغدشه.. وشوي شوي توضح.. نشوف في واحد واقف على الباب وتنهد.. شوي التفتلي.. وكان الشخص هدا غير متوقع ومش متوقعه ابدا ان يكون هدا الشخص لي انقذني يكون هو نفسه لي بابا يحارب فيه.. لي بابا يبي يقتله.. انتم متخيلين لي صاير؟.. امي تلوحني.. وبوي ما يندريش عني.. وعدوهم يساعدني!.. من لي اولى بيا؟.. من لي اقرب ليا؟.. يااااه وخلاص.. اذا الام والاب يتخلوا عنك بي كل سهوله  .. والعدو يساعدك.. هــزلــت.. والعدو عارفين مني؟.. عمي بن يزيد.. اي اي بن يزيد.. لي نشوف فيه في الصور بس.. ونسمع عليه من بابا ان يبي يقتله.. عيوني تعبو دموع وننبيش نبكي قدامه.. قرب مني شوي ..شكله شايب و وجهه مليان تجاعيد..ولابس جرد   ..وسبحه في ايده    ..ولحيته مليانه شيب..وحواجبه فيهن خصلات شيب..وباين على ملامحه الطيبه والحنيه..وتنحنح وقال..

عمي بن يزيد:كيف حالك بنتي؟

اني رفعت راسي وشفتله وقلت :الحمدالله.. عمي!..

عمي بن يزيد:نعم يا بنتي  ..

اني:صحيت يا عمي  .. بس انت كيف عرفتنا في البحر

عمي بن يزيد غمض عيونه بقوه.. وفتحهن عيونه رقرقو.. تنهد.. ورفع ايده..حطها على راسه وبطبطبه قال :المهم توا سلامتك يا بنتي.. ارتاحي توا مش وقت كلام  .. ارتاحي بنتي ارتاحي

-وهووب نفتح الباب .. وخش منه شخص لي زاد صدمني.. واللي هو الممرض.. الممرض هداكا!.. امم شن كاان اسمه!؟    .... يمكن عطاليا!.. او عطيه؟

عمي بن يزيد التفتله:اسمع يا عطاالله.. دير اللازم والواجب واكتر.. وبعد يكتبو لي بنت عمك خروج جيبها طول للحوش "وطلع"

عطاالله هز راسه وشبحله من فم الباب:حاضر حاضر يا بوي

-اني هنا عقلي استك.. بنت عمك؟.. وبوي!.. ليش هم من وين يعرفوني.. بس لحظه لحظه.. الباين عمي بن يزيد بو عطاليا هدا شن اسمه اووف؟.. عطيه بقولي.. تي اوف هدا شن اسمه!.. "حطيت ايدي على راسي ".. شوي تفكرته.. ايوووه عطاااليا قصدييي عطاالله ايوه.. يعني عطاليا تي اووف قصدي عطاالله يتعبر ولد عمي بن يزيد؟. يعني عطاالله ولدي عممييي!... تي كيف صار!.. اووف يا قداش الدنيا صغيره!.. بس لحظه لحظه لما سألت عمي بن يزيد كيف عرفنا احني في البحر!؟.. ملامح وجهه تغيرت!.. معناها في حد كلمهه!.. زعما منو كلم عمي بن يزيد؟  .. زعما ماما!  .... اا قصدي هيام!؟.. لان ما تستهلش لقب الام للاسف.. بس لحظه وين بسمه!!! " نطيت كيف المخلوعة نشبح يمين يسار! "

اني :بسمه بسمه وين؟.. وينهااا؟؟

عطاالله رفع ايده فوق :اششش اعصابك اعصابك .. اهدي ليش العصبيه هدي كلها؟