ولدتني مجرمة

الخامسه والعشرون

#ولدتني_مجرمة
الحلقه :الخامسه والعشرون "والاخيرة"
بقلم :فاطمه سالم الورفلي
...........................................................
....
عند مهيب :

الاشهب شبح من المرش وقال :توا بدت مهمتك.. واللي هي قتل بن يزيد..

-مهيب .. طبست راسي.. و خديت ولاعتي وطرف دخان  .... و ولعته و....خديت تليفوني بعتت رساله لي الجارح وكتبتله"هدا وقت رد دينك.. ساعدتك تطلع من السجن.. اما توا وقت رد الجميل يا جميل.. امشي لي حوش بن يزيد عبد الحميد.. تلقى مراه اسمها هيام.. وبنت صغيره اسمها بسمه   .... اقتل المراه.. وخود البنت
.... "تم الارسال "
-ونضت من مكاني.. طلعت من المطعم . . وزي ما عرفتو.. تم قتلي على ايد المرهون.. لي مفروض هو يكون المقتول "بن يزيد"
......................................................................
....
عند هيام :

-ما نوصفلكمش قداش ارتحت لما قلتها قداش وقداش وقداش.. قداش كنت منعميه على عيوني.. قداش كنت تايهة في حياتي.. قداش مشتااقه لشعور الراحه لي اني فيه توا.. وقطع عليا صوت تقربيع باب و التفت.. لقيت راجل متلتم.. قعدت يابسه في مكاني من قوة الموقف والصدمة  .. فجأة هجم عليا.. وقوس السلاح عليا.. واني قاعده نجمع في اللي صار.. وبدون سابق انذار.. صرت في خبر كان.. واعلن موتي..
.......................................................................
-اما بسمه كرست في الدولاب.. والجارح قعد يدور فوق ولوطا يرقى وينزل.. وبسمه ما دارتش ولا صوت  .. ولحسن الحظ جت الـشرطه.. وحاصراته..وتم القبض عليه .. وخدت بسمه
...............................................................
"اما هنا تلخصت حكايه المجرمين في غضون لحظات وثواني.. تعالو نمشو لباقي الابطال "
....
عندي اني وعطيوه:
يسكت.. كل ساعه والثانيه يعارك.. ومرة يهدا.... ومره يحكي.. ومره يسكت يفكر.. ومره يلوم فيا.. لين صبح الصبح.. و عطالله شافلي وقال

عطاالله :هاتي التليفون!

اني تنهدت :تي مش خداه الشيخ وقال لين تكمل علاج.. بعدين تاخده!

عطالله :كله منك كللة.. كان هدا وين بيعرف... انتي لي خبرتيه

اني :عطاياالله بلا هبال.. هدا لمصلحتك.. لنفترض اهو الشيخ ما يندريش على شي!.. وكلمت عمي بن يزيد ومشيتله.. مش بترجع لضلالك.. ترا ما تمرجش كبدي اخطاني

-وقعدت اني وعطالله ناقر ونقير.. ونص النهار نتعالجو اني وعطيوه.. وفي الليل نخممو في هلنا.. وفات يوم على يومين.. واصبحو شهر وشهرين.. لعند تم العلاج الحمدالله.. ومن هنا ح نحزمو الاحزمه وبننطلقو..

الشيخ عبد السلام :ربي يسعدكم ويونسكم في بعضكم.. اما توا عليكم ستين الف امان .. لاكن صلاتكم راكم تخلوها.. الله الله في صلاتكم والقران ما تهجروشي.. اقرو كل يوم.. ان شاءالله صفحه صفحتين في اليوم خير وبركه.. المهم خير من بلاش