# حب بعد الانفصال❤💔(33)
... المهم قضينا يوم حلو مع بعض تاني يوم المساء كنت قاعدة في الصالون وحسام في مكتبو بجهز في اوراق مهمة عشان يسافر بيها جرس الباب دقة لمن فتحتو وقفت اعاين بصدمة 😱 وحسيت نفسي في حلم لاني ما بصدق إنو الواقفة قدامي دي خالتو نعمات طبعا كانت احلى صدمة واحلى مفاجأة🥺🥺 ضمتني وبقيت ابكي معاها بالجد اشتقت ليها شوق شديد 😭😭😭بعد سلام طويل فضلتها جوا بعد ضيفتها ناديت حسام جاء سلم عليها وعرفتهم على بعض اتونس معاها شويه وقال يخلينا مع بعض وطلع بقيت اسألها عن اخبارا وكدا بعدا قلت ليها ..........
انا : من جيتي دايرة اسألك من فارس بس مترددة 😓
... مسكت يدي وقالت لي ......
خ.نعمات : صحبك المجنون دا جاء معاي بس مكسوف يشوفك بعد العملو معاك وخجلان لانو هو دمر صداقتكم 😕 دايما بقول ليهو بيان ما زعلانه منك بس نهائي ما قادر يواجهك او يواجه شهد 😅
انا : خليهو لي الحقير بعرف انظمو انا😐
خ.نعمات : انتي كيف اخبارك وما شاء الله زوجك شكلو زول كويس ان شاءالله يكون ظني في مكانو ؟
انا : ظنك عمرو ما خاب حسام نعم الزوج وتعاملو كويس شديد 🥰
خ.نعمات : ربنا يسعدك يا بتي 😘
انا : انتو نازلين وين 🤔
خ.نعمات : نزلنا في شقه لحدي ما نبني البيت
انا : حلو 🥰 ما تقولي لي حتبنو البيت عشان تعرسي لفارس 😱
... ضحكت وقالت لي ......
خ.نعمات : صحبك المجنون دا بعرس عليك الله الا انا افتش ليهو بت بذوقي كدا 🤣
انا : المعفن خلي يصبر لي انا بأدبو 🙄 بعد سافر ما اتواصل معاي قلت خير بس كمان يجي وما يجيني لي ياخ 😥
خ.نعمات : فارس خايف تكوني اتغيرتي وكرهتيه
انا : انا مستحيل اتغير ومستحيل اكرهو كمان 😐
خ.نعمات : بعرف وبحمد ربي لأنو فارس عندو اخوات زيكم انتي وشهد 🥰
انا : شهد عرفت انكم هنا ؟؟
خ.نعمات : لا ما عرفت
انا : دقيقة اتصل ليها حتطير من الفرح 😃
خ.نعمات : حبيبتي كيفها هي
انا : محبوسه وعرسها بعد الرمضان 😆
خ.نعمات : ما شاء الله ربنا يتمم ليها على خير 😍 قبل فترة بشرتوني بعقدها🥰
انا : اي والله كنا حنتصل ليكي بس ما لقينا فرصه
خ.نعمات : ما مشكلة حبيبتي احلى شي إني حأحضر عرسها 🥰
... اتصلت لشهد قلت ليها تجيني سريع لاني تعبانه وقفلت الخط ما تم نص ساعه جات بقت تدق الجرس بسرعه عرفتها هي دخلت خالتو نعمات جوة العوضة وفتحت ليها الباب بقت تسألني حاسه بشنو وواجعك وين قلت ليها تجيب لي حبوب خاتاهم في عوضة فهد دخلت العوضة سريع ماتمت ثواني صرخت وجات طالعة ووشها عامل كدا 👈😱 قالت لي .........
شهد : اقسم بالله لقيت طيف خ.نعمات 😱
... خالطتها وانا الضحك داير يشرطني🤣🤣🤣🤣 خالتو نعمات جات طالعة الصالون وهي ميتة من الضحك بس شهد لسة فاكراها طيف ولا شبح 🤣🤣🤣قالت لي .......
شهد : شايفاها جات برة 😨😱 بيان انتي شايفة الأنا شايفاهو 😨
... وعشان اذيد خوفها قلت ليها.......
انا : ما شايفه زول انا شكلك انتي الوحيدة الشايفاها😲🤭
خ.نعمات : شهد بالجد مفتكراني شبح 😂
... خالتو نعمات قعدت تضحك شهد عاينت لي ولخالتو نعمات ما صدقت لحدي ما حبشتها طوالي فكت البكاء خالتو ضمتها وبكو مع بعض 😭😭😭 بعد كملو سلامهم وقعدو شهد قالت .........
شهد : وينو فارس 😕
انا : تتخيلي قال خجلان مننا وما قادر يواجهنا 😐
شهد : انا بوريهو الخجل ارح نمشي ليهو هسي دا 😒
انا : دقيقة بعد الغداء لانو خالتو ما اكلت ولا شي
... مشيت المطبخ اتخلعت لمن شفت حسام قلت ليهو..........
انا : خلعتني انت قبل فتره ما كنت بره البيت
حسام : جبت شوية حاجات ورجعت
انا : تسلم 🙃
... مسك يدي وقال لي .......
حسام : ما بعرف ليه كل الوقت بكون مشتاق ليكي😻
انا : هسي ما كنت مشغول في مكتبك قال مشتاق قال 😒
حسام : كنت بحاول اخلص شغلي عشان افضي وقت لينا
... قبل ما ارد ليهو سمع صوت شهد بتنادي وجاية على المطبخ فكا يدي وطلع شكلو لقا شهد برا سلم عليها وفات يتونس مع خالتو ، شهد جات قالت لي .....
شهد : بتعملو شنو في المطبخ 😏
انا : الناس بعملو شنو اكيد بطبخو 😒
... قعدت تضحك بعدا رصينا الغداء وبعد اتغدينا حسام ساقنا مع خالتو وصلنا شقتهم وكل ما نقرب من باب الشقة التوتر يزيد خالتو فتحت الباب بالمفتاح ودخلنا بس سمعنا صوت فارس جاي من واحدة من الغرف قال
...........
فارس :ماما دي انتي
خ.نعمات : اي
... اشرت لشهد وشلنا مسندين من النوع الكبار داك عشان نطلع زيتو الحقير وقلنا لخالتو توصف لينا غرفتو براحه دخلنا ليهو جوا وهو شغال في اللابتوب وهجمنا عليهو بقينا نضربو ونقول ليهو يا حقير يا معفن اكتر من خمسه سنين لا بتضرب لا بترد على مكالماتنا ورسائلنا وبعد دا كلو تجي وخايف تشوفنا لازم تخاف لانو نحن الليلة حنقتلك😡😠😡😠😡😓 لمن هجمنا عليهو اتخلع خلعة 🤣🤣🤣😂 وبعد صعوبة هرب مننا وطلع الصالون ونحن وراهو ولسه بنضربو قال لينا ......
فارس : شهد 😱 بيان 😨 ما بصدق 😥
... بعد تعبنا قعدنا قلت ليهو.........
انا : بالجد انا سيئة 😥 انت للان مفتكر إنو انا الدمرتة حياتك للان بتكرهني صح 😭😭😭😭😭😭😭😭😭
... تلقائيا دموعي نزلو وشهد قالت ليهو .......
شهد : حاولنا نتواصل معاك بس انت ولا مرة ما رديت علينا اكيد كرهتنا 😭😭😭😭😭😭😭😭😭
... الاثنين بقينا نبكي حسام ومحمد عاوزين يجونا بس خالتو منعتهم صح نحن لما دخلنا جوا لفارس وقتها محمد جاء المهم فارس ختا يدينو في وشو وقال لينا بصوت مخنوق.........
فارس : معقولة اكرهكم كنت خجلان من العملتو فيكم وكنت خايف تكونو انتو الكرهتوني😭 رغم كل العملتو عشاني ما صدقتكم عشان كدا كنت عايش في نفسيات وخوف آسف لاني السبب في الحصل آسف 😭💔
انا : كوكتيلي😭😓
شهد : فيري 😭😓
... جاء قعد بيناتنا وضمانا الاثنين وبقينا نبكي بالجد اشتقنا ليهو الكريه بعد السلام الطويل عرفناهو بحسام ومحمد وحكينا ليهو عنهم بعد سلم عليهم كويس واتعرف بيهم ضحك وقال لينا ..........
فارس : ياداب فهمت لي كانو بحمرو لي لمن ضميتكم 🤣 بس ما تخافو ديل اخواتي يعني ما حأسرقهم منكم 😂
... حسام ومحمد ضحكو فارس عاين لي وقال .......
فارس : بيان دا مش المغرور اللئيم والمدلل النسونجي الكنتي بتكرهيو موت 🤣
... ضربتو وقلت ليهو.......
انا : فارس😒
... قعد يضحك حسام قال ليهو.......
حسام : كانت بتقول عني كدا 🤣
فارس : واكتر من كدا كمان 🤣🤣
... بعدا عاين لمحمد وقال ليهو..........
فارس : وانت يا محمد القالو فيك الجوز ديل ما بتقال 🤣
محمد : 🤣🤣
... انا وشهد ضربناهو قعد يضحك قال لينا .....
فارس : ازواجكم ديل مساكين الله يعونهم😜
انا : الله يعين الحتتزوجك انت 😒
شهد : حتى لو مسكينة نحن حنحرشا ليك 😏
فارس : اصلا انتو الجوز شريرات🤪
... قضينا وقت حلو شديد ونسة وضحك يومنا بقى احلى واحلى بوجود فارس وخالتو نعمات طلعنا منهم متأخرين شديد واي زول فينا رجع بيتهم وكنا مبسوطين شديد 😻❤️ ما صدقت إنو فارس رجع وبقينا كلنا مع بعض من جديد 💚💚💚💚💚تاني يوم بعد صحيت من النوم لقيت حسام مافي بعد عملت الروتين اليومي طلعت لقيت رين صبحت عليها وسألتها من حسام قالت لي طلع بدري بعد فطرت مشيت لجارتي سوسن اتونست معاها شويه وبعدا دخلت لخالتو فاطمة قعدت معاها شويه عرفت إنو حسام دخل مدام هنادي السجن طبعآ ما استغربت لانو اصلا مدام هنادي بتستاهل السجن على عمايله السودة البتعملها دي بس الحارقني انو حسام ما وراني بعد رجعت اتصلت ليهو ما برد اتصلت لرائد وسألتو قال لي مدام هنادي هي الرسلت الشابين الحاولو يعتدو على بس عشان تغرب سمعة حسام ما اتوقعت تعمل كدا 😐😓قلت ليهو وحسام عرف كيف إنو هي الرسلتهم 🤔قال لي بعد هم اخذوهم السجن حسام فات ليهم وضربهم ضرب الموت لحدي ما اعترفو بعدا جاء مع الشرطة وقبضو مدام هنادي وكل البنات المعاها وللأسف اكتشفو إنو مدام هنادي فاتحه بيت مشبوه او ما يسمى ببيت الدعارة وبتجيب بنات الجامعات وبعضهم نسوان متزوجات للأولاد والاغنياء بجوها في الشقة طوالي طبعآ كلامو صدمني وما اتوقعت إنو في ناس بالسوء دا 😱 وقال لي إنو هي ذكرت اسماء كثير من رجال الأعمال والاغنياء ومنهم الشباب الطايشين ومن ضمن الأسماء ذكرت اسم مروان طبعآ صدمتي بقت اكبر قلت ليهو مروان منو😱😨 قال لي مروان ولد عمو صالح بس ما لقو دليل ضد كل الاغنياء ورجال الأعمال عشان كدا قبضو بعض الشباب وقفلو القضية على كدا قلت ليهو ومروان ؟؟ قال لي مروان كمان ما لقو اي دليل ضدو واعتراف مدام هنادي ما كافي بس عمو صالح زعل شديد وخجلان من العملو ولدو قلت ليهو عمو صالح عندو حق يزعل بس هم اتأكدو إنو مروان مشا بيت ذي دا ؟؟؟ قال لي لا ما متأكدين بس مجرد شك لانو مدام هنادي ذكرت إسمو في التحقيق قلت ليهو طيب شكرا ليك قال لي عفوا قلت ليهو لقيت حسام الليلة قال لي لا بس الصباح لمن اتصلت ليهو قال مضغوط وعندو شغل كتير لازم يخلصو قلت ليهو تمام تسلم ، بعدا قفلت الخط وبقيت اتصل لحسام بس ما برد زعلت واتضايقت شديد بقيت منتظرة يرجع لي بس لحدي المساء ما رجع لي جدعت التلفون ورتبت ليهو ملابسو بعدا نزلت شنطتي ورتبت ملابسي لاني حأرجع بيتنا بعد يسافر بعد خلصت حسام جاء قال لي .......
حسام : كيف امسيتي
... بدون ما اعاين ليهو قلت ليهو........
انا : بخير
... شلت منو تلفونو ومفاتيحو ختيتهم في الطربيزة وطلعت ليهو خيارات ختيتهم في السرير ودايرة اطلع مسكني من يدي وقال لي .......
حسام : بيان حبيبي
... فكيت يدي وقلت ليهو........
انا : ارتاح وغير بعدا بنحكي لانو شكلك تعبان
... مشيت المطبخ رصيت الاكل وجهزت العصير حسام لمن جاء قال لي .........
حسام : اسف حبيبتي بس اكلت في المكتب 😅
... طبعآ ياداب غضبي زاد بس ما رديت ليهو بديت ارفع الصحون جاء عاوز يرفع معاي قلت ليهو.........
انا : إياك ما تلمس ولا شي
... فرغت الاكل ولميت العدة حسام جاب العصير ختاهو في الثلاجه وقف قدامي وقال لي .......
حسام : بيان اسف لاني ما رديت على مكالماتك عارف نفسي غلطان وعندك حق تزعلي سامحيني
... رغم غضبي ما حبيت انكد عليهو واكرهو لأني عارفاهو تعبان ورائد قال لي مضغوط في الشغل بس دا ما ببرر ليهو اي شي بس اتحكمت في اعصابي بس بكلامو دا رفع لي ضغطي قلت ليهو بغضب ............
انا : لا ابدا انت ما غلطان انا الغلطانه لاني حبيت اطمن عليك 😤
... ابتسم وعاين لي في عيوني مسافة وقال لي ...........
حسام : انا كمان اشتقت ليكي 🥰 يمكن لاني ما صبحت ليكي وبديت يومي بدون ما اشوف العيون الحلوة دي عشان كدا يومي كان مضغوط ومتعب 🙂😐
... تلقائيا ابتسمت قال لي .....
حسام : الابتسامة دي مسامحة صح 🙂
انا : ما بقدر ازعل منك بس اياك تاني تنشغل كدا 😒
حسام : حاضر يا روحي
... ضميتو وقلت ليهو........
انا : شكرا لانك بتحبني وبتحاول تحميني دائما وعشاني ضربت المعتدين وعرفت منو الرسلهم ودخلتها السجن ❤️💓❤️ كنت فرحانة شديد لمن عرفت وحبيت اشكرك بس انت ما رديت على مكالماتي 😐
... زحاني منو وقال لي بفرح..........
حسام : يعني منفسنة عشان كدا 🙂واجبي احميكي واي زول عاوز يأذيكي اكيد ما حيسلم مني 🙂
انا : بعرف 😃
حسام : طيب لي وشك عابس 🙃
انا : الإنسان لمن ربنا ينعم عليه بالسعادة والفرح بيخاف على زوال النعمه صح
... مسك يديني وقال لي .......
حسام : إياكي تخافي بوعدك حنتخطى كل الظروف سوا لاننا سند بعض وحنواجه كل شي مع بعض ونقيف جمب بعض حتقيفي جمبي صح 😇
... حركت ليهو راسي بمعنى اي ضماني مسافة وقال لي ..........
حسام : يلا غيري عشان نطلع وبطلي تنكدي على نفسك 🙃
انا : لوين ؟؟
حسام : نتمشى ونغير جو
انا : بس انت تعبان خلي مرة تانية
حسام : حابب اقضي باقي اليوم دا معاكي
... قلت ليهو بحزن........
انا : عشان بكره مسافر صح 😥
حسام : صح بس يلا ما تركبي لي الوش العابس البسي سريع
انا : اوكي
... بعد اتجهزت مشينا شارع النيل بقينا نتمشى جمب البحر نسيم البحر وحركت الامواج والجو الجميل والهادي غير كل مودي قضينا الوقت ونسة وضحك تاني يوم كمان قضيناهو مع بعض بكل حب 💓لمن زمن سفرو قرب قال لي لازم نتجهز سريع لانو حالف ما اقعد في الشقة ولا دقيقة وهو مافي الا يوصلني بيتنا ويطمن علي بعدا يسافر 🥺❤️ بعد جهزنا ودعت شقتنا بحزن الشقة الجمعتنا انا وحسام وقت الكره ووقت الحب 🥺حضر حسام ينزل الشنط مشيت ودعت جاراتي 💔بعد وصلنا بيتنا قبل ما ننزل قلت ليهو بتهديد..........
انا : حبيبي بعد توصل طمني عليك اوكي 😢
حسام : حاضر اي أوامر تانية 😇
انا : لازم تشتاق لي كثير وإياك عينك تزوغ كدا ولا كدا وتعاين للتركيات فاهم😒😒😒
... قعد يضحك قلت ليهو.........
انا : جادة انا 😒
حسام : طيب حاضر 🤣 اها وتاني
انا : ممنوع ترهق نفسك 😒
حسام : وتاني 🤩
انا : الاكل في زمنو والنوم في زمنو 🙃
حسام : وتاني 😄
... مسكتو من يدو ورقدت في كتفو وقلت ليهو...............
انا : بحبك 😇💓
... ضماني وقال لي ........
حسام : وانا بعشقك ياقلبي ❤️
... ضماني شديد بعدا نزلنا دخلنا البيت بعد سلم قال لأمي انا ماشي المطار وكدا عشان كدا مستعجل بعد طلع امي قالت لي امشي ودعي راجلك 😅 مشيت لقيتو جمب باب الشارع من شافني قال لي كنت عارف انك حتجي تودعيني قلت ليهو امي قالت لي اودعك 🤣 قال لي امك فاهمة اكتر منك 😅😄 قلت ليهو طير المطار وخلي الكلام الكتير 😒قال لي بس ما ودعتيني 😒😢قلت ليهو بس ودعتك في العربيه 😅قال لي داك اسمو وداع 😒قلت ليهو اااي 😇 جراني ومسكني من خصري وقال لي دقيقة اعلمك تودعي حبيبك كيف😉وغمز لي 😉 قلت ليهو حسام بطل نحن في البيت وجمب الباب كمان ممكن اي زول يجي داخل😅🙊 عاين لي مسافة وقال لي بعد ارجع من السفر حابب نسافر سوا وحنسافر الدولة الإنتي عاوزاها 💜 قلت ليهو ان شاءالله المهم تمشي وترجع بالسلامة وزي ما قلت ليك اهتم بنفسك وبس 💚 وشي تاني ختيت يدي في راسو وقلت ليهو حصنتك من كل تركية عيونا عسليه او بنية ❣️وربنا يبعد عن عيونك كل بنات تركيا الحلوات❣️قعد يضحك ويضحك🤣🤣🤣 سكت وحمرت ليهو قال لي بحبك يا قلبي انا 😻💓❤️ قرب مني كدا بس باسل جاء داخل وهو من سمع حركت الباب فكاني وسلم على باسل وطلع طلعت معاهو وصلتو للعربيه عاينت كدا لقيت مافي زول بستو في خدو سريع 😘 وقلت ليهو توصل بالسلامة 🥺❤️ بعدا رجعت البيت وهو فات 💔 فااااات بتلفت حيرني وغيرني خلاني زي تايه بتلفت خلاني فااات روح ترا رارا را بوين السكة يا انت 💃🏻 صرف النظر عني شال حبو ودعني 💃🏻يا ملاح الفجر لاح حبيبي راح 💃🏻💃🏻💃🏻🤣🤣🤣 معليش اندمجت وكتبت الاغنيه وما حبيت امسحا 🤣 يلا نرجع لروايتنا بطلنا حسام سافر وبطلتنا بيان رجعت بيت اهلها حنعمل ستوب هنا ونواصل في البارت الجاي 🐸💚
... يتبع 🍁 ...............
