# حب بعد الانفصال ❤💔 (22)
حسام : ما بعرف ابدا ليكي من وين وما بعرف كيف ووين ومتين حصل كل دا بس 😥
.... اخد نفس ودنقر راسو شكلو ما قادر يحكي لي عشان كدا ختيت يدي في كتفو وقلت ليهو..........
انا : حسام الايام دي شكلك ما طبيعي في اي مشكلة 🙂حتى لو مشكلة في الشغل حنحلها مع بعض 🤗
... مسك يدي نزلها من كتفو ومسكها بين ايدينو وعاين لي بحب وقال لي.........
حسام : انا بحبك بيان❤
... بعد قال لي كدا كان بعاين لي بحب ومنتظر ردت فعلي بس انا كنت مصدومة وبين مصدقة وما مصدقة جاني إحساس إنو بهظر جريت يدي منو ووقفت ابتسمت وقلت ليهو.........
انا : اكيد انت بتهظر وبس عاوز تخوفني وتشوف ردت فعلي صح 😂😿
... وقف وختا يدينو في اكتافي وعينو في عيني وقال لي بجدية .........
حسام : بيان انا بحبك فهمتي بحبك
... ما عرفت ارد ليهو بشنو لأنو نظرات عيونو بتشهد على كلامو حاولت اتكلم بس غلبني الكلام بقيت اردد في كلمة بس 🙆..........
انا : بس بس
... ما عرفت أقول ليهو شنو بقيت امشي واجي لمن شافني كدا قال لي.........
حسام : ما بعرف دا كلو حصل كيف بس فجأة حسيت نفسي منجذب ليكي وبهتم فيكي وبكل تفاصيلك الصغيرة والكبيرة
... اخد نفس عميق وبعد تنهيدة قال لي..........
حسام : ما مهم كيف ولي بس المهم إني بحبك وانتي بقيتي اغلى شي في حياتي
... ابتسم وقال بفرح...........
حسام : تصدقي إني شايف مها مجرد عابرة في حياتي وإنتي إنتي بس حبي الحقيقي 😍❤
... كنت مصدومة وكل كلمة من حسام بتصدمني اكتر ختيت يدي في راسي وقعدت في الكرسي حسام قعد على رجلينو جنبي وقال لي...........
حسام : بيان لو سمحتي ردي لي
... عاينت ليهو وشايفة نظرات الحب والأمل في عيونو ما قادرة ارد لأني خايفة اكسرو بس في كل الأحوال لازم يعرف إني ما بحبو قلت ليهو بحزن........
انا : انا آسفه حسام بس انا ما بحبك وما عندي اي مشاعر تجاهك
... بعد قلت ليهو كدا شفت الإنكسار والحزن في عيونو بس ما لازم ادي امل لأني ما بحبو ولانو علاقتنا مكتوب ليها تنتهي 😥💔 قلت ليهو بحزن .............
انا : صدقني انا بتمني ليك كل الخير وما بحب اكسر قلبك بس كمان ما لازم اديك امل كاذب واحسسك بسعادة مزيفة انا بحترمك وبحترم كل مشاعرك وبعتبرك أقرب صديق لي بس ما بقدر اعتبرك اكتر من كدا 😓
... بعد قلت ليهو كدا شفت الزعل والانكسار في عيونو قام فات على طرف السطوح وقف هناك وسكت مسافة بعدا قال لي بصوت حزين...........
حسام : كنت متوقع إجابتك لأني بعرف إنك بتكرهي الرجال والحب بس حبيت اعترف ليكي وارتاح من الهم الكنت شايلو في قلبي بس ياداب حاسي بإنو هموم الدنيا اتختت في راسي وقلبي اتكسر💔 يمكن عقلي يتفهم قرارك بس القلب دائماً متمرد يمكن عشان كدا ما قادر اتقبل رفضك 😞💔بس ما تخافي بيان مهما كان قرارك انا اكيد حأتقبلو وحتفضلي انتي أحلى شي في حياتي😍 انتي الخليتي حسام القاسي المغرور البكره البنات وبحب شغلو وبس يحبك وانتي الغيرتي ونسيتي كل الوجع الاتوجعو في حياتو ورجع يثق في الحب ❤
... كلامو كلو كان مليان حزن وعتاب خلا عيوني تدمع غصباً عنها وحسيت إني كسرت كل الأمل الفيهو صح انا بكره الحب بس ما بتحمل اكون السبب في حزن شخص مهما كانت مكانتو وعشان اواسيهو مشيت عليهو بالغصب وقفت جنبو ولفتو على بس لمن عاين لي شفت عيون مليانة حزن وشكلو دمع ومسح دموعو لما شفتو كدا حسيت بقلبي اتكسر وبقيت ابكي انا كمان😭😭 بدون ما احس رفعت يدي ومسحت ليهو باقي دموعو وقلت ليهو ........
انا : آسفه حسام آسفه 😞💔
... لما شافني ببكي رفع لي راسي وعاين لي بنظرات كلها خوف وحب رفع يدو مسح لي دموعي وضماني وحوط خصري بيدينو كنت ببكي قلت ليهو..........
انا : آسفه لاني جرحتك واكيد بهمني سعادتك 😭
... بعد حسيت بيهو زحيت منو شوية بس لسه محوطني بيدينو ووشي في وشو قلت ليهو بحزن...............
انا : حتى لو ما بحبك انا مستحيل اكسر قلبك بس😭💔
... ختا جبينو في جبيني ونفسنا بقى واحد حاولت ازح منو بس بدون فايدة لانو ماسكني بقوة ورافض يسيبني وهو لمن شافني بحاول اتفكا منو قال لي...........
حسام : أهدي
... لما قال لي اهدي هديت لأني قايلاهو حيفكني بس هو بعد قال لي اهدي خلا يد في خصري والتانية رفعها في شعري وقربني منو اكتر وباسني بحب 💋😳❤️ لمن باسني دخلت في حالة صدمة 😳😨 وحسيت بجسمي كلو كشة من الخوف واتجمدت في محلي بقيت لا قادرة ازح منو ولا ابعدو مني😥🙆 بعد باسني زح مني شوية وتاني باسني في جبيني كنت زي الصنم ما قادرة اتحرك ممكن تقولو إني أصلاً ما مجمعة 😅 بعد ثواني جمعت بس فكيت يدو من خصري وزحيت منو وبقيت ارجع لوراء وعاينت ليهو بعتاب قال لي ...........
حسام : بيان
... ما رديت ليهو مشيت بسرعه على باب السطوح وفتحتو سرعه وجري نزلت تحت دخلت الغرفة وقعدت فوق السرير رفعت رجولي وختيت راسي بينهم وبقيت أتذكر كل الحصل دموعي نزلو وحسيت بخوف ورجفة غريبة وبقيت الوم نفسي وابكي 😭، حسام بعد نزلت خليتو ابتسم وقال ‘‘‘قالت ما بتحبني بس لمن شافتني حزين هي كمان حزنت لحزني وبكت لانها جرحتني اذا دا ما حب حيكون شنو 😇💘بحبك ومستحيل استسلم لانك رفضتي حبي 💗 متأكد إنك بتبادليني نفس المشاعر بس مشكلتك عنيدة ومشكلتي مغرور ما بتقبل الرفض والحرب بيناتنا حبي 😎❤‘‘‘ بعدا نزل وجاء على الغرفة كنت ببكي لمن سمعت صوت دعسات رجلين جاية على الغرفة عرفت إنو دا حسام جاء اتغطيت ورقدت غمضت عيوني ومثلت إني نايمة بعد دخل جاء قعد جنبي مسافة بعدا قفل النور ورقد جنبي وهو متلفت على ، بعد قفل النور خفت شديد وغمضت عيوني بخوف حسام مسك يدي ونام بعد حسيت إنو نام قمت براحة فتحت النور ورجعت نمتة ، تاني يوم حسام صحا بدري وكان مصدع لانو طول الليل ما نام حتى لمن فتحت النور كان صاحي بس ما حبة يتكلم معاي نص الليل ويضايقني اكتر لمن صحا انا كنت نايمة ابتسم وعاين لي مسافة حس بصداع ختا يدو في راسو وقال ‘‘‘ لي فترة حاسي بتعب شديد وصداع اكيد دا من ضغوطات الشغل ‘‘‘ عاين للساعة وفات اتدوش وغير سريع جاء قعد جنبي في السرير ابتسم وقال ‘‘‘ امس عشت معاكي أجمل احساس وبتمني اعيش كل الأحاسيس الجميلة معاكي انتي وبس 😍❤‘‘‘ دنقر براحة باسني في خدي بوسة خفيفه عشان ما أصحى وطلع فات ، صحيت متأخرة شوية وبعد عملت الروتين اليومي نزلت تحت وكنت متمنية ما ألقى حسام وحمدلله ما لقيتو كل اليوم كنت بفكر في الحصل واخدت قرار مهم مستحيل اسمح لحسام يقرب مني لاي سبب تاني لأنو كل ما نقرب من بعض كل ما حنعقد علاقتنا اكتر 😓 وحسام الوحيد الحينجرح لأني ما بحبو ( بتحاول تقنع نفسها 😒) ولازم احاسبو على العملو امس😒 ، كنت بفكر خالتو فاطمة جات قعدت جنبي لمن حسيت بيها اتلفت عليها قالت لي .........
خ. فاطمة : كيفك يا بتي
... ابتسمت ليها وقلت ليها........
انا : انا بخير خالتو
... سكتت مسافة وقالت لي........
خ. فاطمة : بيان انتي في مقام بتي آية واكيد بتمني ليكي كل خير وما بسمح اي شخص يضرك حتى لو ولدي 🙂
... لمن قالت كدا عرفتها حتديني محاضرة طويلة عريضة زي محاضرات ماما وبابا 😅قلت ليها........
انا : بعرف خالتو 😇
خ. فاطمة : حسام طباعو صعبة شوية وبتشاف قاسي وبغضب بسرعه كبيرة بس دا كلو من كرهو لمها وبسببها بقى يكره البنات بس صبرك عليهو وطوله بالك خلاهو يتغير وانا لاحظت التغيير دا شفت ولدي حسام الطيب والحنون 💗وعيونو الكانت مليانة حزن اتملت حب وفرح بعرف إنو دا كلو نتيجة تعاملك معاو وصبرك عليهو
انا : لا خالتو انا ما عملت اي شي
... ختت يدا في يدي وابتسمت وقالت لي ............
خ. فاطمة : كفاية إنك خليتي يقتنع إنو ما كل بت زي مها وخليتي عندو أمل انا عرفت إنو هو بحبك لأنو كل ما نكون مع بعض ما بنزل عيونو منك انا مبسوطة لأنو قلبو اختارك إنتي لأني واثقة فيكي وواثقه إنك حتقدمي ليهو السعادة 😇❤
... بكلاما دا دخلتني في حته ضيقه وما عرفت أعمل شنو لأنها لو عرفت إنو انا ما بحب حسام اكيد حتزعل قلت ليها.........
انا : اكيد خالتو ان شاء الله ربنا يقدرني اسعدو 😅
...فرحت شديد قامت باستني في راسي وقالت لي.............
خ. فاطمة : انا كنت متأكده إنو أحمد اختار صح لأنك زي بتي وشاهدة على تربيتك وبعرف إنك حتقدري تطلعي منو كل الحزن ، انتي قدمتي لينا السعادة لانو سعادتنا في سعادتكم 😇❤
... كل كلمة بتقولو بتحسسني بالذنب اكتر واكتر فضلت ساكته وببتسم ليها غصباً عني قالت لي..........
خ. فاطمة : ربنا يحفظك لينا يا رب
... قلت ليها......
انا : ويحفظكم لي 😇
... كلام خالتو خلاني متحيرة وما عارفة اتصرف كيف افضل مع حسام وانا ما بحبو واخلي أسرنا مبسوطين ولا ابعد من حسام ونتطلق وكدا اهلي واهلو حيتكسرو ويزعلو وحسام كمان 🙁 ، ممكن تقولو إني عايشه في صراع نفسي من جهة انا بكره الحب ومن جهة حسام بحبني ومن جهة تانية اهلو واهلي واثقين في نجاح علاقتنا🙆🙆🙆 ، مرت ثلاثة أيام قضيت اوقات حلوة مع اسرتي التانية بس كل تفكيري كان مع حسام لأنو لا اتصل ولا جاء بيتهم عرفتو زعلان مني عشان رفضتو وما قادر يواجهني ويمكن خايف من ردة فعلي ، رابع يوم بعد الظهر كدا اتصل لي رائد وبعد سلم على قال لي ...........
رائد : صراحه حسام حذرني ما اكلمك ولا اكلم زول بس هو مريض وماسكو صداع شديد وحرارتو مرتفعة ليهو اكتر من يومين ، بس حابس نفسو في الشقة ورافض يمشي الدكتور جبت ليهو بندول ما نفع ولمن جبت ليهو دكتور ما سمح لي ادخل وبقى ما برد على تلفوناتي وكل ما اتصل ليهو برد لي برسالة عشان يطمني انا خايف عليهو 😥
... طبعاً خوفني عليهو شديد قلت ليهو بغضب ........
انا : كيف يعني حابس نفسو وبعدين انت صديقو كان لازم توديهو المستشفى بالغصب 😡
رائد : حاولت معاهو كثير بس رفض ولمن اصريت عليهو بقى ما بفتح لي الباب 😞 وحرارتو ماشه في زيادة ، انتي حاولي معاهو يمكن يقتنع بس ما تكلمي خالتو فاطمة لانها حتموت من الخوف😥
انا : طيب امشي الشقة انا جاية
... لبست سريع وشلت مفتاح الشقة وتلفوني وطلعت قلت لخالتو انا ماشة لصحبتي بعد طلعت آية لحقتني لانها شافت مفتاح الشقة واصرت تعرف كلمتها الحقيقية وقلت ليها ما تكلم خالتو حلفت إلا تمشي معاي بعد صعوبة اقنعتها وطلعت لمن وصلت طلعت السلام جري لحدي ما وصلت الشقة لقيت رائد حارسني برا فتحت الباب سريع ودخلنا طوالي دخلنا غرفتو لقيناهو راقد وشكلو تعبان شديد والطربيزة الجنبو فيها اقراص بندول وجك موية ومناديل ، وقفت جنبو وختيت يدي في جبهتو من شدة الحرارة حسيت بإنو مولع نار بالجد حالتو بتحنن الكافر حتى عيونو ما قادر يفتحا بدون ما احس عيوني دمعو ، حسام لمن ختيت يدي في جبهتو فتح عيونو بصعوبة وقال بصوت ضعيف .........
حسام : بيان
.... قلت لرائد..........
انا : اسندو معاي ننزلو
... حسام لمن سمعني قال لينا ........
حسام : اانا بخير
... انا ورائد حاولنا نسندو عشان نوقفو بس حلف ما يقوم قال ما ماشي المستشفى هو أصلاً ما عندو حيل وبحيلو البسيط دا داير يقاومنا😒بعد قومناهو سمعت صوت عمو أحمد جاء داخل قال لي آية كلمتو جاء سند حسام مع رائد وطلعو هم دخلو الأصانصير ما قدرت ادخل معاهم لانو عندي خوف من الأماكن المظلمة والضيقة بس نزلت بالسلالم وانا شبه جاريه لدرجة إني قربت اقع لمن نزلت لقيتهم ركبو العربية ورقدو في المقعد الخلفي ركبت جنبو وختيت راسو في رجولي من شدة حرارتو انا حاسة إني خاتة نار في رجولي رائد وعمو ركبو قدام وساقو سريع وطول الطريق انا بس حاضنة راسو وببكي وخاتة خدي في جبهتو يمكن اخفف ليهو حرارتو شوية سمعتو بنادي قال بصعوبة.........
حسام : بيان
... قلت يمكن عاوز حاجة قلت ليهو........
انا : نعم أنا جنبك 🤗
... فتح عيونو وقال لي.......
حسام : بحبك❤بحبك
... رفعت راسي عاينت لعمو ورائد طبعاً عملو نفسهم مركزين في الشارع وما سامعين شي😂 أصلاً حسام حتى وهو مريض لازم يدخلني في حتة ضيقة😿بعد وصلنا المستشفى جابو نقالة ورقدو فيها انا ماسكة يدو حلفت ما افكا لحدي ما وصلو غرفة خاصة يمكن عمو حجزو ليهو المهم الدكتور قال لينا نطلع عشان يفحصو ويديهو السيروم حلفت كان اطلع رائد جراني طلعني معاهو قعدت أبكي عمو قعد جنبي ورائد ما عارفاهو طار وين عمو قال لي ........
ع. أحمد : حيكون بخير
... ما عرفتو بحاول يطمن نفسو ولا يطمني غايتو بعد فترة الدكتور طلع قال فحصو ووصل ليهو سيروم وقال اخد عينة من دمو رسلو المختبر ولازم نصبر لحدي ما النتيجة تطلع ، انا وعمو دخلنا غرفتو قعدنا جنبو وهو نايم زي الملاك🤗 بعد فترة رائد جاء قعدنا شوية الدكتور جاب نتيجة التحليل كلنا كنا متوترين وخفنا اكتر لمن قال لينا عندو ملاريا صليبين وتايفود والتهاب حاد كتب ليهو دربات وحقن قال ياخدهم صباح ومساء وحبوب وقال لازم يفضل في المستشفى على الأقل ثلاثة يوم عشان يتابع حالتو رائد شال ورقة الأدوية وفات الصيدلية وعمو طلع مع الدكتور قعدت جمب حسام كان نايم يمكن بعد ادوهو السيروم ارتاح شوية ونام بس شكلو تعبان شديد 😥 اكيد حسى بالاعراض دي من بدري بس ما اتكلم غبي مغرور عنيد بس خلي يصحا بعداك حنتحاسب 😒 رائد رجع بكيس مليان أدوية وعمو كمان جاء قعدو الاثنين في الكرسي عمو قال لينا............
ع. احمد : الدكتور قال لو حسام فضل بمرضو اكتر كانت الملاريا حتبقى ثلاثة صليب وممكن تقتلو💔
رائد : أصلاً حسام مهما أتألم ما بحكي دي ما أول مرة 😓
ع. احمد : لمو فيهو ملاريا وتايفود وكمان التهاب حاد كان حيموت ومافي زول حيعرف عشان كدا انا من زمان بقول ليهو ما يفضل في الشقة براهو لازم يقعد معانا بس هو عنيد وما بسمع كلامنا 😓💔
انا : عمو أصلاً حسام ما بسمع كلام زول بس ربي يشفيه وبعد يقوم حسابو عسير 😕💔
... رائد قال في راسو ‘‘‘ منتظرك ايام سودة يا صديقي🌚 ‘‘‘ عمو قال لي.............
ع. أحمد : خليكي قوية وهددي ما تخليهو يعمل الهو عايزو انا واثق فيكي وبعرف انك الوحيدة البتقدري عليهو🙂بعرف انك صبرتي عليهو كثير ولسه صابرة عليهو حسام عنيد بس انتي اعند منو عشان كدا انتي مناسبة ليهو 🙂
انا : ان شاء الله في يوم يرجع يعيش معاكم 😇
ع. أحمد : ان شاء الله تنورو البيت انتي وهو 🤗
... جات ممرضة قصيرة وعسولة طلعت ليهو السيروم وقالت لينا هي المتابعة حالتو وحتبدأ ليهو الأدوية وصلت ليهو سيروم تاني عمو شكرا وطلعت بعدا جو آية وخالتو وماما وبابا شكلو عمو وراهم اسم المستشفى امو دي وشها متغير شكلها بكت وآية كمان ما احسن منها عندهم حق لانو دا ولدهم الوحيد واكتر واحد محبوب ، سلمو علينا ودخلو طوالي امو جات قعدت جمبو المهم بعد قعدو رائد فات جاب كمية من كرستالات الموية والبارد ختا ليهم وفي ثلاجه صغيرة في الغرفة دخلت الباقي هناك ورجعت قعدت جمب حسام بعد فترة بعداك حسام صحا كلهم جو وقفو جمبو حمدلو ليهو السلامة وسألو الأسئلة المعروفة والاحلى عمو وخالتو شاكلو 😄 انا بس قلت ليهو ‘‘‘ حمدالله على سلامتك ‘‘‘ وهو رد لي ب ‘‘‘ يقبل حمدك ‘‘‘ تاني حلفت ما أتكلم معاهو لاني ما قادرة اعاين ليهو قعدت في كرسي بعيد وهو كل فترة يعاين لي ، غير إني زعلانه منو ما قادرة اواجهو بعد الحصل لأني ما حابه اشاكلو لأنو مريض وما قادرة اتخطى الموضوع 😥 المهم بعد إطمنو عليهو عمو قال ليهم يرجعو البيت ويخلونا انا وحسام بس كلهم رفضو اي واحد بقول حيفضل بابا اتدخل وايد كلام عمو ولمن لقوهم مصرين طلعو معاهم بره الغرفة وقالو ليهم كلام كثير إنو مرتو اولى تقعد معاهو ودي فرصة يفضلو مع بعض....... الخ المهم اقنعوهم وقبل ما يطلعو عمو وبابا طلعو جابو عشاء جاهز وختو لينا وودعونا وفاتو ، بعد فاتو رصيت العشاء في طاولة وختيتا ليهو جمب السرير بس قال لي........
حسام : انا ما جعان اتعشي انتي
... انا أصلاً غضبانة لانو عيان وما أتكلم ولمن رفض ياكل غاظني عاينت ليهو بغضب وقلت ليهو.............
انا : انا أصلاً مغيوظة لانك لمن مرضت ما أتكلمت حتى امك ما كلمتها انت عنيد زي الشفع وما بتسمع كلام زول بس ما تنسى انك الولد الوحيد عند اهلك راعي لمشاعرهم وخوفهم عليك ولازم تفهم إنو نفسك دي ما حقتك براك ياخ 😡
... انا بردح وهو ولا همو مستكين وخاتي يدو في خدو وبعاين لي أصلاً الكلام معاهو ما منو فايدة عشان كدا سكتة خليتو وعشان يدو اليمين فيها فراشة شلت معلقة وقربت ليهو الأكل من خشمو وحمرت ليهو ابتسم واكل بقيت مرة اأكلو ومرة اكل وهو ما نزل عيونو مني بعد اكلنا لميت الحاجات وقعدت في الكرسي جمب سريرو قال لي.......
حسام : كلامك صح نفسي ما حقتي براي لانو انتي كمان عندك حق فيها 😀
... حمرت ليهو وسكتة😒 جات الممرضة عشان تديهو الحقن دايرة اطلع مسكني من يدي وقال لي ما اطلع طبعاً الممرضة شغاله تتبسم حمرت ليها ورجعت قعدت في محلي من طلعت الحقن خفت لأني بكش من حاجة بسموها حقنة😣المهم ادتو حقنت الوريد بالفراشة ودايرة تديهو حقنة العضل غمضت عيوني بعد خلصت قالت ليهو ‘‘‘بالشفاء العاجل ‘‘‘ وطلعت بعد ادوهو الحقن غمض عيونو ونام وهو لسه ماسك يدي كنت تعبانه ختيت راسي في طرف السرير ونمت 😴
... يتبع 🍁.......
