قلبي المبعثر

البارت السابع

هدار

ليالي......ولج هدار ويامن جايه؟

جاوبتها واني مستغربة منها.....ويه كرار ابن عمو سعد جوارينه !

ليالي.....يمعوده جاسر صاير اعصاب لان شافج ويا
ميت غيره

.....اكولج عفيه فهميني اخوج شبي اشو لا يمة ولا كرباه

كالت.....يحظي مفاهمته غير يحبج اصلا والله لو تشوفين كنتوري رح ينفجر بالحلويات كله في سبيل انطي اخبارج

جاوبتها واني اخلي الجنطة عالرحلة.....يمكن جان فرحت بحبه اليه بس احس حتى الفرحة انعدمت

ليالي.....يا ليش شبيج؟!

غوركت عيوني واني اتذكر الموقف ردت احجي بس المدرسة بدت تنطينا دروس صارت الفرصة واخذتها همين بالشرح وباقي الفرص استلمونا دك امتحانات يومية وماصارت فرصة ليالي تحاجيني اباوعلها تلوب تريد تعرف شبيه واني يامدرسة تشوفني تسألني شبيه وجهي صاير اصفر واحس روحي

مابيه حيل لأي شي جسمي متثاقل وكأن المرض بده ينهش بيه صارت الطلعة للبيوت اخذت جنطتي قبل كل البنات وطلعت ركض بس مو للبيت رحت لمدرستها الاعدادية  اباوعلها شلون البنات يطلعن منها بس هيه ماكو

التافيت ورحت ورا المدرسة كعدت بالكاع ابجي بحركه الشمس العامودية تضرب بيه حالي تبهذل متت حر وجسمي صار مي من العرق بس مابيه حيل بعد اكوم لامة رجليه لحضني وابجي

فجأة سمعت صوت عمو علي وجاسر يصيحوني رفعت راسي شافوني و اجوي ركض باوعت العمو وكلت.......وينها؟؟ هي مو تكول اني مااعوف الدراسة اريد احقق حلمي لعد شو ممداومة

تقرب مني ولزم ايدي باوعلي بأنكسار وكال.....امشي وياي هدورة

هزيت راسي بلا ببكاء......لا عمو هي هسه تطلع اكعد انتظرها هسه تجي

غمض عيونه قوي حتى متنزل دموعه وجاسر صار ينطيني على عقلي كال.....شوفي نفسج رح تموعين من الحر كومي

عمو حجه بصوت مبحوح......كومي رح نشيل مناك شوفي البيت الجديد واختاري غرفة الج ولحياة يلا عمري

مااعرف بشنو جنت افكر يمكن جنت اوهم روحي بأن رح اشوفها من انتظرتها هنا كمت واني روحي رايحة من الحر رجعنا للبيت وتمرضت ايام وصارت أوضاع العراق ابد مو زينة نسمع اصوات القصف و جثث بالشارع مشمورة جانت الاوضاع تخوف حيل عمو نقل حياة للبيت الجديد وجاب الاجهزة من المستشفى دفع مبلغ كلش جبير في سبيل يخليها بالبيت سوالها غرفة خاصة

وفعلا ب تاريخ 2003/4/9 صار السقوط وانقطعت علاقتي بأمي وحمزة نهائيا شخصيتي تغيرت صرت شوية اقوى من قبل كرست حياتي حتى اغير بعمو علي صرت ما أكل اذا ماهو ياكل وياي كرار صار صديقي المقرب خالة سلوى صارت امي تهتم بيه اكثر من كرار بيبي صرت اني مدللتها ويه كرار
النظام تغير وبدت تدخل الموبايلات للعراق رجعت اداوم ثاني متوسط