قلبي المبعثر

البارت العاشر

هدار

احس بشي كاعد يأذيني بجسمي حيل بس ماكاعد اميز شنو هوه كلشي بيه يوجعني
ريحه الديتول والادوية خنكتني اريد بس اطلع

اريد افتح عيوني بس مكاعد اكدر بألف ياحيل يلا كدرت افتحهن شوية بس ظلمة ليش ماكاعد اكدر اشوف اي شي

ايدي مصبوبة صب بيها شي يمنعني من حركتها وأيدي الثانية كوه حركتها بس احسها ملفوفة حيل بشي قماش تلمست عيوني بأطراف اصابيعي جانت هم مشدودة تلمست داير مداير راسي هم ملفوف عرفته من اللمسة انو هوه شاش كان يغطي جبيني وعيوني

حيل تضايقت سمعت صوت عمو علي يكول.....هدار كعدتي

اختفى صوته شوية وسمعت الدكتور يسألني.....بنتي بيج حيل تجاوبين

كلت بصوت خافت.....اي

الدكتور.......تكدرين تحسين برجلج او بايدج

......بوجع قوي وما اكدر احركهن

الدكتور.......اي بابا هذا الشي عادي انتي طلعتي من باب الموت

.......دكتوووور وجع براسي مينحمل عيوني تأذيني

الدكتور......لازم نسويلج مفراس وتحاليل بس بالاول لازم نفتح الشاش

سأله عمو علي.....شوكت نكدر نفتحه دكتور

الدكتور......انشاءالله باجر بس مااكدر احددلك اذا تكدر تشوف او لا لأن البؤبؤ والقزحية والشبكية متضررات هواي بالزجاج الدخل الهن احنا سوينالها عملية جراحية معقدة بس هالشي مرح نعرف نتيجته اذا ما هيه بذات نفسها تكوللنا تكدر تشوف او لا

راح الدكتور واني بس اسمع مااكدر اشوف مغثوثة حيل وضايجه اريد ابجي بس مكاعده اكدر سألت عمو بقهر......يعني شنو عمو مراح اكدر اشوف؟!

جاوبني وصوته بيه خنكه......لا حبيبتي لاتحجين هيج انشاءالله تتشافين وتطلعين سلامات واذا اضطريت اسويلج عملية في سبيل تشوفين

......منو الجابني هنا

علي.....اخو صديقتج هوه واخته واجتي وياهم هم رنين ماتن بجي عليج

هزيت راسي بلا.....ميهمني عمو بس رنين شلونها وينها هسه

علي.....ب بيتهم لا ترضى تاكل ولاتشرب بس تبجي

......فدوة لكلبها حبيبتي واحنا مصارلنا يومين متعرفين

علي......اللي يحب من صدك يبين وكت الشدة
يلا اروح اخابر سعد يجيب بيبيتج وخالتج طكن من البجي حتى امي تمرضت كاطعه الاكل والشرب

حسيت بي كام صحت بتعب.....عمو كوله يجيب رنين وياك حباب خليها تخابرني قبل لتطلع مناك

كال....اي
وطلع غفيت من التعب والوجع خابرتني رنين ووصيتها تجيب التلفون مالتي ساعة وسمعت صوت بيبي وخالة ورنين يبجن يمي كلت.....اجيتوا مو؟