قلبي المبعثر

البارت الخامس عشر

هدار

مرت امتحاناتي وابو خزرة شوية علاقتي ويا صارت زينه يعني من نروح للامتحان اني وخواته ورنين شوية يسولف ويانا عمو علي من هذاك اليوم ماشفته بعد كال اخابرج بالعيد كرار مكابل رنين ويقري بيها واني غرفتي فارشتها بالكتب ومرة اقره مرة اخابر آدم نسولف شوية ويروح

اليوم العيد والتوتر يقره 1000 من النتائج عيدت عليهم ورحت لبست فستان طويل لونه جكليتي غامق بي حزام من الخصر يصير ذهبي يصير ضيق عالجسم بس مو كلش وحذاء رياضي ابيض وشال جكليتي طلعت اباوع كرار هم مبدل وكاشخ قميص ماروني وبنطرون اسود وحذاء رياضي ابيض ابتسم واشرلي امشي

اخذت العيدية مالتي حصلت من عمو سعد وبيبي وخالة طلعت ورحت دڪَيت الباب على رنين طلعت جانت لابسه نفس اللون ويه كرار قميص ماروني طويل وبنطرون اسود والحذاء هم ابيض ههه

رحنا نتمشى نجيب النتائج اول شي مدرسة كرار لان ابعد دخل وضلينا اني ورنين ننتظر طلع طاير من الفرح شفت النتيجه مالته المعدل كاتبيه جوه اباوعله 98 يعني يحقق حلمه ويصير دكتور لاارادي حضنته فرحانه بيه باوع الرنين كمزت لحضنه وهنا عدهم عادي لأن منفتحين

رحنا للمدرستي دخلنا نستلم النتائج انطتنياها المدرسة وحجت وياي بالكردي ابتسمت وشفت النتيجة اباوع لرنين ضليت اڪَمز......ولج رنيييييين معدلي 100 والله 100

حضنتها كسرت عضامها شفت نتيجتها معدلها 99 الفرحه بهذا اليوم ابد ولاانطيها لاحد يعني قرايتي والسهر ماراح خالي بلاش طلعت وشاف معدلي كرار باركلي ويباوع لرنين يتحلف بيها لان مامطلعه نفس معدله ههه خابر عمو علي وڪَاله ردت احجي ويا مقبل ڪَال مفاجئتج بالبيت تاخذيها

اخذنا كرار للسوك اشترينا حلويات شوية واكسسوارات ورجعنا ميتين فرح من صدوك عيد
جان علينا شفت البنات هستوهن يصعدن وعايدتهن عايدت ابو خزرة من بعيد بس يابة هم يخوزر موتني
دڪَيت باب الشقة فرحانه بس انفتحت باب الشقة

اختفت ابتسامتي وتبدلت بدموع اشتياق وفرح عل حزن على عتب مااعرف شفسرهن هاي الواڪَفه ڪَدامي حياة بطولها وبابتسامتها بدموعها وبجمالها حضنتها حيل وانفجرت بالبجي احساسي بهذا الوقت مااعرف شنو اسمي او شلون اوصفه بس اذا اريد فعلاً اوصل فكرة عنه

فتخيلوا انو ينكتل شخص عزيز على ڪَلبڪَم بابشع طريقة وانت بعمر صغير تشوفه كل يوم ڪَدام عيونك يذبل بدال مايتعافه وبعد ماتأيس منه يرجع يوڪَف ڪَدام عيونك

ابتعدت ابوس بيها مثل الماشايفه حرت منين اشم بيها ادور ريحة حمزة لو ريحة بابا بيها دموع حارة بس مااحس بيها مت لهفتي وشوقي الها اسمعها تڪَول......هدار حبيبتي كافي والله رجعت

ابتعدت عنها وصلت يم باية الدرج واني عيوني مستقرة عليها اهز راسي برفض شديد......لا لا لا انتي مارجعتي اي والله مارجعتي انتي وهم تخيلات مثل حمزة مات وعافني مثل بابا انتي هم رحتي وهسه بس طيفج يمرني