قلبي المبعثر

البارت الثالث والعشرين

هُدار

راسي يأذيني حيل شديصير مگاعده اعرف حاولت افتح عيوني شوية شوية مداشوف غير ظلام همست....وين اني!!

سمعت صوت شاب يگول....شگاعدا تحسين؟! انادي الدكتور

حسيت بأيده لزمت ايدي راد يوخر لزمت اصبعه....لا--لا--لتروح

-بس انادي الدكتور وارد ماطول

شلت ايدي الثانية عبالك حجار ردت الزم ايده مگدرت رجعتها بتعب وهو لزم ايدي حيل....هدي شوي شتردين احجيلي

كحيت وحجيت بصعوبة.....منو اني شنو---شنو اسمي؟!

حسيته انصدم من طريقة كلامه....شقصدج ماتذكرين اي شي اسمج عمرج منين؟!

ضجت هاذ شبي هلگد غبي....مااتذكر اي شي!!

صاح الدكتور وضل مدري شيسوي وبس يتسأل اخر شي گال....استاذ مهاب البنيه بسبب الحادث فقدت الذاكرة زين طلعت عايشه من بين 25نفر ماتوا واما نظرها فيحتاج يمر شهر لان اصلا مبينه متعرضه لحادث قديم لهذا السبب تحتاج وقت متشوف ضوه

شگد حجه واني منا راسي يريد ينفجر عاد ياريت لو فهمت شي من
الگاله صرت مثل الاطرش بالزفة نوب طلع الجان يحجي واجه هذا اللي
فهمت اسمه مهاب وگال.....بما ان لا شهادة جنسيه ولا اي شي يدل
على هويتج تضلين هان بس اخابر جدي اذا رضى اخذج

ضل يحجي ومدري شيسوي اسمعه يگول.....لا ارد بس خليني احاجي جدي
بالعجل حنين
ها جدي
لا بس شگلت على موضوع البنيه
اي صح....

دخت حيل من الحجي غفيت وماگدرت اسمع الباقي اصلا حتى مفهمت شي من كلامه نمت وصارت تجيني تخيلات بس كل شي مغوش
گعدت وهم نفس الصوت گال...شگاعدا تحسين؟!،

....اريد مي

ثواني وحسيت بايده بظهري يسندني اگوم قرب الگلاص من شفتي شربت وابتعدت مسح على راسي وگال....كملتلج الخروجيا نطلع هسا؟!

هزيت راسي بأي وحجيت بضيق....اي عفيه هاي الريحه مال ادوية كتلتني

مهاب.....جا اصيحلج الممرضا تغيرين هدومج حتى نطلع

راح واجتني بنيه مدري شلبستني بس حيل تأذيت ايدي كلش توجعني وراسي وجعه مينحمل ومااگدر اوگف نهائيا خلتني على كرسي وگالت... انتي ماشاءالله عبالك روسية

ابتسمت.....يعني حلوة اني؟!،

ضحكت وگالت....عابرة مرحلة الحلاة!!،

اجه نفس هذاك الولد وطلعني من هذاك المكان شالني وصعدني بالسيارة مدري شصار بيه ارتبكت سد الباب ومدري شنو خله ليورا وراح هو صعد يسوق حرت اسأله على شكلي ضليت العب بملابسي واعصر بيهن بالابهام والسبابة حسيته انتبه عليه من گال...شبيج؟!

وجهت راسي باتجاه الصوت سألته بارتباك....اني شك شكلي شلون صاير

مهاب....ضروري تعرفين؟!