قلبي المبعثر

البارت التاسع عشر

هدار

فات عمو ساند حياة الوجه اصفر ذبلان رحت اساعده واني الوب.....ها عمو شكالك؟!

باوعلي وابتسم......حامل هدار حامل

بهت شكلي وحسيت نفسي رح اوڪَع......بس بس هيه استفرغت دم

هز راسه بلا....متوهمة اكيد هدار متوهمه

راح يم حياة واني باوعت بعيون اشتياق تباوعلي بقلق اشرتلي اسكت واجتني شاورتني....تريدين تتأكدين؟!

هزيتلها راسي بأي ڪَالت....شعلي بخور واقري عليهن ايات وادعية

....بس مااعرف شنو اقره

اشرتلي امشي رحت طلعت البخور وضلت هيه تقره عليهن ايات وتنفخ اخذتهن منها اول مادخلت للصالة حياة وجها صار ازرك وتسعل حسيتها رح تموت ڪَبل شمرت البخور وركضت عليها عمو يمها يضرب على ظهرها خفيف صاح بيه......لييييييش هييييييج؟!

.....عمو والله والله هيه مادري شبيها بيها عمل مااعرف شنو!!

خزرني وصاح.....انجبييييي هدااااار وليييي مناااا

غورڪَت عيوني بالدموع اللي ڪَدامي صار عبارة عن غواش رحت اركض للغرفة دفنت وجهي بالفراش انفجرت بالبجي اجتني اشتياق تهدي بيه رفعت راسي الها.....والله صح هيه بيها شي حتى عمو اول مرة يصيح بيه!!

خزرتني وصارت تاشرلي اسكت مسحت دموعي بكف ايدي هزيتلها راسي....شكو؟!

تقربت حضنتني وشاورتني.....اسكتي هدار تره داير مدايرج كل شي يسمع باجر نشوف حل

ابتعدت وباوعتلها بخوف غمضتي عيونها وفتحتهن تطمني اني مدري شصار بيه روحي راحت ضليت ارجف الشغلة مو هينه سحر مو شغلة عادية اختي وصلت للموت ومداڪَدر اسوي اي شي الها

ضليت اليوم كله بالغرفة اتلفت يمنى ويسرى واتراجف نوب حتى البيت صرت اخاف منه اتاني الصبح يجي اريد اشوف حل بعد مداكدر ڪَوه نمت كم ساعة

اول ماطلع الصبح اشتياق سوت الريوك وعمو راح للكعده انطتني ورقة وڪَالت.....شوفي هدار مااڪَدر اجي وياج اني لان حياة مااضمنلج شتسوي بس اذا فعلاً تريدين كل شي ينحل روحي لهذا العنوان ڪَوليلهم اريد ابو ذياب شرحيله كل شي هل يتلاحڪَلج قبل لايفوت الاوان

هزيت راسي بأي شلت الجنطة وطلعت وصلت يم الباب المدرسة باوعت وغيرت طريقي ابد متفيدني المدرسة اذا خسرت اختي اخسر مستقبلي ولااعوف  عائلتي تدمر حسيت سيارة تمشي ورايه بس ماوڪَفت صرت امشي سريع اخاف اوڪَف ويطلع عمو علي

الورقة بايدي وعيوني عليها وعالطريق السيارة وراية دقات قلبي متسارعة رجليه يمشن اسرع من السيارة شارع مابي ولا طير لحظات تملكني الخوف بيها حسيت هاهيه انتهيت اذا مااوصل اذا وڪَفت للسيارة كل شي ينتهي واولهم حياتي بخسران اختي