قلبي المبعثر

البارت الرابع عشر

هدار

اليوم اللي بعده جان ماعدنه امتحان خطيه اجتني رنين وتشرحلي بالمادة علمود الامتحان جنه ڪَاعدين نقره بالغرفة ودخلت حنين شبيج مابيج و رنين ترد عليها بس اكو كلمات مافهمتها واني اكعد اوضحلهيا حنين ضلت نص ساعة وراحت بس رنوشه طردتها يالله قبلت تروح هم خطيه تاكل حجاية من ابوها بسببي

عمو علي خابرني وضل ينصح تكلي زين وشربي زين والابر ضربيهن بالوريد مثل ماوصاج الدكتور وكووومه شغلات يوصيني عليهن واني بس كلمة الاي تطلع مني

ثاني يوم اللي هوه يوم الامتحان صارت عندي كحه وحرارتي ارتفعت كلش ڪَوه كتمت كحتي حتى اصوم سويت نفسي كل شي مابيه ورنين هم اخذها ابوها بس اني رحت وحدي توسلات هواي يالله قبلوا

طلعت من العمارة واني كحه موتتني وعلى ساعة
اوڪَع صادفت بالطريق ريم وحنين وابو خزرة ضلن يحجن واني مخليه الكلنكس على خشمي وحلكَي
من وصلنا للمدرسة فاتن البنات

ردت افوت وسمعت صوته يڪَول.....اذا مريضة مممجبورة تصومين

التفتت باوعت يمنى يسرى ماكو احد حجيت بنفس مخنوك......اكَول سمعت واحد يحجي ويايه! لو متوهمه

مهاب.....انا الحجيت معاج

فتحت عيوني كحيت وڪَلت.......ابو خزرة يحجي ويايه بهدوء لامستحيييل ههه خاف يطلع حلم

عقد النونة باستغراب ڪَال.....منهو ابو خزرة

تخوصرت وضحكت.....انت ياعيني انت كل مااشوفك عيونك تخزرني عبالك كاتله ابوها هههه لابالله صدوك ليش تخوزرني عود

خزرني حيل صك اسنانه وحجه.....طرڪَاعه لاتڪَفين مثل الطرن

ضحكت وبنفس الوكت كحيت باوعتله وحجيت واني احرك بحواجبي ع السريع.....عادي بابا كرامتي مسحولة من الاساس فماازعل
يا صخااااام الامتحان راح يالله بيباي

دخلت وجانت هستوهه توزع الاسئلة ابتسمت بفشلة وهيه ضحكت واشرتلي اڪَعد ڪَعدت وبديت احل شوية ركزت بس كلساع امسح العرق والصخونه فول والكحه من جهه

خلصت ساعتين ونوب امتحنت الانكليزي بسرعه حليته لان سهل مي طلعت ورنين هم تأشر على خدودي وتڪَول.....لك خدودك صاروا بندورة من حرارتك هلئ ازا شفتي وشك رح تطلع 40

......ديالله امشي اروح اسبح وانام قبل لايجي كرار للمدرسة ونوب هم اضطر افطر

رنين.......بسم الله الرحمن الرحيم

(شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ ۚ فَمَن شَهِدَ مِنكُمُ الشَّهْرَ فَلْيَصُمْهُ ۖ وَمَن كَانَ مَرِيضًا أَوْ عَلَىٰ سَفَرٍ فَعِدَّةٌ مِّنْ أَيَّامٍ أُخَرَ ۗ يُرِيدُ اللَّهُ بِكُمُ الْيُسْرَ وَلَا يُرِيدُ بِكُمُ الْعُسْرَ وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَىٰ مَا هَدَاكُمْ وَلَعَلَّكُمْ تَشْكُرُونَ)
صدق الله العلي العظيم
يعني الله بيعزر الانسان ازا مائدر يصوم وبتئدري تعوضي بغير يوم