قلبي المبعثر

البارت الثامن

هدار

ضليت اكمز مثل المخبلة مكيفه بالموبايل وكرار كابلني وكام جاب صينيه صغيرة ويدك عليها ويغني فطسنا ضحك انتبهت لعمو علي واخيرا ضحك غمزت لكرار شافه ابتسم ووصل يدك واني رحت جبت صينية ثانية وجفجير وضليت ادك واغني كله في سبيل عمو يضحك

ضلينا ساعة على هل وضع لحد ماتعبنا ودينه الغراض للمطبخ وكال عمو.....حطيتلكم بيهن ارقام وسيمكارت حتى خاف يوم تغيبون تأخذون الواجب

بسناه من خده وهم تشكرناه صعدنا فوك رحت ضميته توضيت وصليت وطلعت كتبي كعدت اقرأ مر وكت واذن المغرب هم صليته ونوب نزلت ساعدت بالعشا وكعدنا نتعشى كملنا وغسلت خالة المواعين وكرار اصر على عمو علي يطلعون يجيبون حلويات صدوك طلعوا واني وعمو وبيبي وخالة كعدنا نباوع تلفزيون عمو وكرار تأخروا راد عمو سعد يطلع

يدور عليهن بس همه دخلوا بيبي كالت.....وين صرتوا ساعة كاملة بس تجيبون حلويات

رد عليها عمو علي.....لا يمه مو جيراننا اليوم سكنوا جديد واصروا الا نفوت كعدنا عشر دقايق واجينا

كلت بحماس.....الله يعني صديقة جديدة
همه صدوك عدهم بنيه؟؟

كرار كال.....اي عدهم بس شلون بنية اويلي الله فوكاها تحجي سوري

عمو سعد ضربه على راسه كاله......لك شهل لسان نوب متعلم سالفة جديدة جووز

اني مهتميت كلتله.....زين كرار يا صف هيه

كرار......مااعرف بس تطلع بكدج لو اكبر منج بسنة

......خووش بلكت بنفس المدرسة تطلع

كرار بحماس......اي والله حتى كل يومية اني اوصلكم واجيبكم

علي بضحكه.......لك بطل رح تنخبز

ضحكنا كلنا وكعدنا ناكل حلويات جانت داخلة شغلات جديدة للعراق كملنا وكل من راح لغرفته بس عمو علي صعد يم حياة هاي غرفته ينام وهو حاضنها يكول مااكدر انام وهيه مو بحضني

صار الصبح واني متحمسة اشوف بنت جوارينا السورية سبحت وبدلت وصحت عمو ونزلنا نتريك كلها طشت لشغلها وبيبي راحت تتسوك تكول مااحس براحة اذا مو اني استنكي الغراض بايدي كمل كرار ونزل طلعنا واشرلي كرار وهمسلي على بنية دتمشي ويه ابوها.....هي هاي هدار

هزيت راسي اي ومشيت سريع صحت.....عمو؟!

التفتت هوه والبنية بس شنو اية من الجمال تكتل كتل كلتله.....عمو اني هدار بنت جوارينكم اداوم متوسطة

ابتسم وهز راسه......اها رنين هم متوسطة ثاني تداوم شلونج عمو

رديتله الابتسامة......الحمدلله عمو بخير
لعد اذا متوسطة خل نروح اني وياها يوصلنا ابن عمو

بالبداية جان متردد بس بعدين وافق كالت.....مرحبا يا حلوة كيفك انا رنين

.....هلو عمري اني هدار الحمدلله وعلى فكرة جنت بس اني الحلوة هنا هسه شو اشوف وحدة اخذت مكاني!!