"ရန်သူတော်အားချစ်ကျွမ်းဝင်မိခြင်း"("ရန္သူေတာ္အားခ်စ္ကြၽမ္းဝင္မိျခင္း")(Complete)

part_21 (Z+U)

Unicode

တစ်ရွာလုံးရှိလူအားလုံးလိုလိုဟာ ရွာရဲ့ဘုန်းတော်ကြီးကျောင်းသို့ရောက်နေကြပြီ။

တရားနာသူကနာနေကြပြီး တရားနာသူတို့အားကျွေးမွေးရန်ပြင်ဆင်နေကြသည့်သူများကလည်းပြင်ဆင်နေကြသည်။ ကလေးတွေကတော့တရားမနာကြဘဲ ဘုန်းကြီးကျောင်းဝန်းထဲရှိအရိပ်ရအပြင်အောက်တွေမှာဆော့ကစားနေကြသေးသည်။

ည ကျင်းပမယ့် ဇာတ်ပွဲအတွက်လည်းရွာပြင်ရှိလယ်ကွင်းထဲတွင်ဇာတ်စင်ထိုးသည့်လူကထိုးနှင့်တစ်ရွာလုံးအလုပ်ရှုပ်ဆုံးနေ့ဟုပင်ဆိုနိုင်လောက်သည်။

ဖန်ရှင်းတို့စာမေးပွဲလည်းဖြေပြီးပြီမို့ ယခုအလှူတွင်တက်ကြွစွာပါဝင်ကူညီပေးနေလေသည်။ ယွီပင်းကတော့ ဖန်ရှင်းအနားတပြုံးပြုံးနဲ့ သူဒီနေ့ကိုစောင့်နေခဲ့တာကြာလှပြီ။

ရှောင်ကျန့်ကတော့ ထမင်းပွဲပြင်တဲ့ဘက်တွင်ရှိပြီး ရိပေါ်ကတော့ဇာတ်စင်ထိုးသည့်ဘက်တွင်သွားကူနေရသည်။

ကိုရင်လေးတွေက အနီးအနားရှိရွာများမှလည်းလာရောက်ရှင်ပြုကြတာကြောင့် မနှစ်ကထက်ဒီနှစ်ပိုများတယ်။ တရားနာပြီးကြတော့ တစ်ချို့ကအိမ်ပြန်သွားကြပြီးတစ်ချို့ကတော့ ကျွေးမွေးတဲ့နေရာသို့သွားကာစားသောက်ကြတော့သည်။ ထိုအချိန်မှစပြီး ရှောင်ကျန့်တို့ထမင်းကျွေးအဖွဲ့များမှာလက်လည်ပင်မသင့်ချင်တော့။

ဒါပေမယ့်လည်းပျော်ဖို့ကောင်းတာကြောင့် အားလုံးမှာမောပန်းနေလည်းအပြုံးမပျက်ကြ။

"လိုက်ပွဲလေးထည့်ပေးပါအုံးဗျို့"

"အလှူဆိုတိုင်းနင်းကန်စားမနေနဲ့ စားပိုးနင့်ပြီးသေနေမယ် စူဇကာသားရဲ့"

ထမင်းလိုက်ထည့်ပေးနေတဲ့မိန်းကလေးကပြောလိုက်တော့ ထိုရွာသားကရယ်ကျဲကျဲနဲ့ပန်းကန်လေးရှေ့ထိုးပေးတယ်။

ရှောင်ကျန့်ရယ်လိုက်မိတယ်။ တကယ်ကိုသူတို့ရွာသူတွေရဲ့ပါးစပ်ပေါက်ကအတော်ဆိုးတာပဲ။

ပန်းကန်ဆေးတဲ့နေရာမှာတော့ ဖန်ရှင်းကိုကူလုပ်ပေးနေသလိုနဲ့ ဖွန်ကြောင်နေတဲ့ယွီပင်းကိုမြင်တော့ရှောင်ကျန့်ခေါင်းသာခါမိတော့သည်။