The Accused Mistress

Chapter 14

Chapter 14

First

"Sigurado ka ba na magiging okay lang ang dalawang 'yon?" nag-aalala kong tanong ko kay Lake habang bumibiyahe na kami sakay ang bangka.

"Wala na silang pagpipilian. It's either they talk it out or get bored."

Sinuklay ko ang buhok at ipinusod dahil nagugulo sa lakas ng hangin.

"First time ko talagang nakita na magtalo nang gano'n 'yong dalawa. Thank God, you were there. Baka nagsuntukan na sila."

"I think they like each other. They just don't know how to express it yet," pahayag niya.

Naningkit ang mga mata ko. "Like? You mean as friends? Siyempre naman! Hindi naman tatagal ang friendship naming tatlo kung hindi namin gusto ang isa't-isa..."

Umangat ang sulok ng kanyang labi at may kakaibang kislap sa kanyang mga mata. Inangat niya ang kanyang isang kamay at idinampi ito sa ulo ko sabay gulo sa inayos kong buhok.

"Never mind, Jean. Just stay innocent, alright."

Ngayon ay naging kuryoso na talaga ako.

"What do you mean?"

Kinuha na niya ang kanyang kamay at napatanaw siya sa dagat.

"We're almost there," anunsiyo niya sabay turo.

Napatingin na rin ako rito at tama nga siya. Klaro ko na ang rock formations dahil sa lapit namin. Sa may hindi kalayuan ay natatanaw ko na rin ang napakahabang sand bar. Sa magkabilang gilid nito ay ang napakalinaw na tubig dagat.

Unti-unti ng humina ang tunog ng makina hudyat ng nalalapit na paghinto na rin ng bangka. Pinulot na ni Lake ang camera na nasa upuan kasabay ng tuluyang pagkamatay ng makina at paghinto namin.

Nauna siyang tumayo at sumunod naman ako. Kagaya na lamang ng nakagawian ay inalalayan niya ako sa pagbaba hanggang sa makaapak na ako sa tubig na hanggang ibaba ng tuhod lang.

Nag-usap muna sila ng bangkero ng maiksing sandali tungkol sa pagbalik nito upang sunduin kami. Sinabi niya na dalawang oras lang kami rito. Nang umandar na paalis ang bangka ay naglahad ng kamay si Lake sa akin na tinanggap ko. Hawak niya ang camera sa isang kamay. Pinagsiklop niya ang mga kamay namin at naglakad na kami patungo sa mahabang sand bar.

"Ang ganda no'n!" anas ko sabay turo sa isang kakaibang rock formation.

"Do a pose below it. I'll take a picture," luhog niya.

Lumapad ang ngisi ko at mas na-excite pa. Mabilis akong naglakad papunta rito at halos hilahin ko na siya.

Naging modelo ako sa mga pagkakataong ito habang kinukuhanan ni Lake ng picture. Mabuti na lang at bumagay ang damit na dinala ni Hope para sa akin. Isang off shoulder na floral crop top at manipis na mahabang skirt na tila lumulutang sa tuwing natatamaan ng hangin.

Ang dami naming kinuhang pictures. Minsan, inilalapag ni Lake ang camera sa buhangin para makakuha ng shots naming dalawa habang nasa tubig kami na tila ba naglalaro. May mga pagkakataon din na nagugulat ko siya dahil sa stolen shots na kinukuha ko habang nakatingala lang siya sa itaas dahil sa asul na ulap o kapag hindi siya nakatingin.

Nang mapagod na sa pinaggagawa ay napaupo kami sa buhangin. Nakalublob ang mga paa ko sa tubig habang nasa bandang likuran ko naman siya. Maya-maya pa ay mas inilapit niya ang sarili sa likod ko at inilublob na rin ang kanyang mga paa sa tubig. Pinagmasdan ko ang magkalapit na mga binti hanggang paa namin at nakita ang agwat nito. Ang liit ng sa akin, samantalang malaki naman ang sa kanya. Ang putla ng sa akin, samantalang katamtaman at medyo namumula naman ang sa kanya dahil sa init ng araw. Ang kinis ng sa akin, habang ang kanya naman ay medyo mabalahibo.